SANEBIMƆI NI BIBLIA LƐ EHA HETOO

Ani abaanyɛ anu Biblia lɛ shishi?

Biblia lɛ ji Nyɔŋmɔ Wiemɔ. Etamɔ wolo ko ni jɛ tsɛ ko ni yɔɔ suɔmɔ dɛŋ. (2 Timoteo 3:16) Yɛ Biblia lɛ mli lɛ, Nyɔŋmɔ tsɔɔ bɔ ni wɔbaafee wɔsa ehiɛ, nɔ hewɔ ni eŋmɛɔ efɔŋfeemɔ gbɛ, kɛ nɔ ni wɔsɛɛ lɛ ebaafee eha adesai. Shi tsɔɔlɔi ni tsɔɔ jamɔ he saji lɛ etsake Biblia tsɔɔmɔi lɛ ahiɛ kwraa; enɛ eha mɛi babaoo ená susumɔ akɛ amɛnyɛŋ amɛnu Biblia lɛ shishi.​—Bɔfoi lɛ Asaji 20:29, 30.

Yehowa Nyɔŋmɔ miisumɔ koni wɔle anɔkwalei ni kɔɔ ehe. Enɛ hewɔ lɛ, eha wɔ wolo ko ni abaanyɛ anu shishi.​—Kanemɔ 1 Timoteo 2:3, 4.

Te obaafee tɛŋŋ onu Biblia lɛ shishi?

Kɛfata Biblia lɛ ni ekɛha wɔ lɛ he lɛ, Yehowa kɛ yelikɛbuamɔ ni baaha wɔnu shishi hu haa wɔ. Etsu Yesu kɛba koni ebatsɔɔ wɔ nii. (Luka 4:16-21) Yesu ye ebua etoibolɔi lɛ koni amɛnu Ŋmalɛi lɛ ashishi, ni etsɛ ŋmalɛi lɛ ayisɛɛ ekomekomei.​—Kanemɔ Luka 24:27, 32, 45.

Yesu to Kristofoi asafo lɛ shishi bɔni afee ni atsa nitsumɔ ni ebaje shishi lɛ nɔ. (Mateo 28:19, 20) Ŋmɛnɛ lɛ, Yesu anɔkwa sɛɛnyiɛlɔi lɛ yeɔ amɛbuaa mɛi koni amɛnu nɔ ni Biblia lɛ tsɔɔ yɛ Nyɔŋmɔ he lɛ shishi. Kɛ́ obaasumɔ ni onu Biblia lɛ shishi lɛ, Yehowa Odasefoi baaná he miishɛɛ akɛ amɛbaaye amɛbua bo.​—Kanemɔ Bɔfoi lɛ Asaji 8:30, 31.