Maŋtsɛyeli Jajelɔi Bɔ Amaniɛ

Nyɔŋmɔ Wiemɔ lɛ Yɛ Hewalɛ

“NYƆŊMƆ wiemɔ hiɛ kã ni eyɛ hewalɛ.” (Hebribii 4:12) Nɛkɛ wiemɔi nɛɛ eba mli anɔkwale shii abɔ, yɛ be mli ni agbeleɔ Biblia mli anɔkwalei lɛ ahiɛ ahaa gbɔmɛi ni apasa jamɔ elaka amɛ lɛ. Taakɛ ejeɔ kpo yɛ niiashikpamɔ ni nyiɛ sɛɛ, ni jɛ Dominican Republic lɛ mli lɛ, Biblia lɛ hewalɛ lɛ baanyɛ atsake gbɔmɛi ashihilɛ ni eha amɛ hiɛnɔkamɔ hu.

Yehowa Odasefoi yasara Katolik yoo ko ni ale lɛ waa, ni bii bibii enyɔ gboi etsɛko tsɔ̃. Eeye awerɛho waa, ni ewieɔ amanehulu ni eba enɔ lɛ he daa gbi. Odasefoi lɛ tsɔɔ lɛ nɔ ni Biblia lɛ kɛɔ yɛ Yohane 5:28, 29 yɛ gbohiiashitee hiɛnɔkamɔ lɛ he. Beni ekɛ Odasefoi lɛ etee nɔ egba sane saŋŋ lɛ, jeee akɛ ena miishɛjemɔ kɛjɛ gbohiiashitee hiɛnɔkamɔ lɛ mli kɛkɛ, shi moŋ eyoo hu akɛ e-Katolik jamɔ mli hiɛnyiɛlɔi lɛ miilaka lɛ.

Efiteee be ko kwraa kɛkɛ ni eyafo egbɛi mli kwraa kɛjɛ Katolik Sɔlemɔ lɛ mli, ni ekpɛlɛ nɔ akɛ Yehowa Odasefoi kɛ lɛ abakase Biblia lɛ daa. Shi, ewu kɛ esusumɔi nɛɛ kpaaa gbee kwraa. Akɛni lɛ hu eji Katoliknyo ni ale lɛ waa hewɔ lɛ, eto gbɛjianɔ koni enanemɛi komɛi ni ji maŋkwralɔi kɛ amɛjamɔ lɛ mli bii abasara eŋa kɛ yiŋtoo akɛ amɛbaaje enijiaŋ wui yɛ gbɛ ni ekɔ lɛ he, koni amɛkɛ lɛ aku sɛɛ kɛba Katolik jamɔ lɛ mli ekoŋŋ. Sɛɛ mli lɛ, nuu lɛ kɛ gbalamlitsemɔ wo ehe gbeyei, ni be ko po lɛ, nuu lɛ wó wekumɛi kɛ enanemɛi ni ekɛyaa sɔlemɔ lɛ atoi nɔ akɛ amɛmiitse amɛgbala lɛ mli.

Shi nɛkɛ ŋaa ni etsɔ̃ nɛɛ tsuuu nii. Nɔ ni tamɔɔɔ enɛ lɛ, yoo lɛ batswa efai shi waa fe tsutsu lɛ akɛ ebaatsa e-Biblia mli nikasemɔ lɛ nɔ. Emumɔŋ dalɛ kɛ Kristofoi asui kpakpai ni ebɔi namɔ lɛ hewɔ lɛ, ewu lɛ kpɛ eyiŋ akɛ ekɛ lɛ baaya nɔ ahi shi kɛkɛ, moŋ fe ni eeetao ni etse gbala lɛ. Gbi ko lɛ, nuu lɛ kpɛlɛ nɔ po akɛ ebaakwɛ Biblia kasemɔ wolo ni ekaseɔ lɛ mli—shi ja akpɛlɛ nɔ kome ko nɔ aha lɛ dã. No ji, eesumɔ ni ekɛ lɛ diɛŋtsɛ e-Katolik Biblia shishitsɔɔmɔ lɛ atsu nii.

Nɔ ni fee lɛ naakpɛɛ ji akɛ, kɛtsɔ nɛkɛ wolo ni jɛ Yehowa Odasefoi aŋɔɔ nɛɛ yelikɛbuamɔ nɔ lɛ, ebabɔi nibii heei kasemɔ kɛjɛ lɛ diɛŋtsɛ e-Biblia lɛ mli tɛɛ. Ebayoo akɛ eŋa ekɔ gbɛ ni ja, ni etsɛɛɛ ni lɛ hu ebafee klalo akɛ ebaanyiɛ yoo lɛ nɔkwɛmɔ nɔ lɛ sɛɛ. Lɛlɛŋ, ebana akɛ ehe miihia ni efee tsakemɔi komɛi yɛ lɛ diɛŋtsɛ eshihilɛ mli. Kaa ko ni he nitsumɔ wa kɛha lɛ ji esu ni ji zigaret shɛremɔ lɛ kpamɔ. Beni ekane Awake! ni je kpo yɛ July 8, 1989, ni hiɛ yitso ni ji ‘Gbele ni Aahɔ̃ɔ—Gbɛi Nyɔŋma ni Atsɔɔ nɔ Akpaa Zigaret Shɛremɔ’ lɛ sɛɛ lɛ, ekpɛ eyiŋ akɛ ebaaŋmɛɛ nɛkɛ su ni kɛ ŋmalɛi lɛ kpaaa gbee nɛɛ he kwraa agbɛnɛ. Yɛ zigaret kɛ adeka ni afɔɔ namɔ yɛ ekotoku mli daa gbi lɛ najiaŋ lɛ, agbɛnɛ ekɛ nakai Awake! lɛ bɔi ekotoku mli woo. Be fɛɛ be ni ebaanu he akɛ eshɛre zigaret lɛ, kɛkɛ lɛ ekane nakai saji ni aŋmala yɛ zigaret shɛremɔ he lɛ ekoŋŋ. Gbɛ nɛɛ tsu nii jogbaŋŋ! Beni ekane saji nɛɛ aahu shii abɔ sɛɛ lɛ, enyɛ ekpa zigaret shɛremɔ kwraa.

Ŋmɛnɛ, wu kɛ ŋa lɛ fɛɛ miisɔmɔ Yehowa akɛ sɔɔlɔi ni abaptisi amɛ. Kɛ shihilɛ lɛ ŋmɛɔ gbɛ lɛ, nuu lɛ sɔmɔɔ akɛ be-fɛɛ sɔɔlɔ, ni etuɔ ebe babaoo ehaa Nyɔŋmɔ Maŋtsɛyeli lɛ he sanekpakpa lɛ shiɛmɔ, ni esɔmɔɔ hu akɛ asafoŋ sɔɔlɔ yɛ Yehowa Odasefoi asafo ni amɛyɔɔ mli lɛ mli. Ekɛ eŋa fɛɛ miikpa gbohiiashitee lɛ gbɛ, beni amɛbaanyɛ amɛkpa amɛbii lɛ agbɛ kɛba wala mli ekoŋŋ yɛ jeŋ hee mli lɛ. Hɛɛ, Nyɔŋmɔ Wiemɔ, ni ji Biblia lɛ hiɛ kã ni eyɛ hewalɛ hu!