Hiɛmɔ Emuuyeli Mli ni Ohi Shi!
“KWA Nyɔŋmɔ ni ogbo!” Wɔ wolo tɛtrɛɛ nɛɛ sɛɛ mfoniri lɛ miitsɔɔ Hiob ŋa, mɔ ni kɛ wiemɔi nɛɛ tutua lɛ lɛ. Enɛ ba aaafee afii 3,600 ni eho nɛ. Ni kɛlɛ, nakai tutuamɔ wiemɔi ni akɛba Nyɔŋmɔ tsulɔ anɔkwafo lɛ nɔ lɛ maa sane ko ni kã adesai ahiɛ kɛbashi ŋmɛnɛ lɛ nɔ mi. Hiob anɔkwafo lɛ elaaje enibii fɛɛ kɛ dɔlɛ babaoo—ekooloi, eshia, ebii nyɔŋma. Amrɔ nɛɛ aapiŋ egbɔmɔtso hu kɛ hela ko ni ehiii tsamɔ, ni akɛmiika lɛ waa kɛmiishɛ etsuishiŋmɛɛ lɛ naagbee tɔ̃ɔ. Mɛɛ yiŋtoo hewɔ? Nyɔŋmɔ kɛ gbɔmɔ adesa henyɛlɔ kpele fe fɛɛ, Satan Abonsam miitsu mpoatswaa wiemɔ ko ni ewie akɛ gbɔmɔ adesa nyɛŋ ahiɛ emuuyeli mli eha Nyɔŋmɔ yɛ kaa ni naa wa waa shishi lɛ he nii.—Hiob 1:11, 12; 2:4, 5, 9, 10.
Ŋmɛnɛ, taakɛ eji yɛ Hiob gbii lɛ amli lɛ, ‘jeŋ muu lɛ fɛɛ ka mɔ fɔŋ lɛ,’ ni ji Satan Abonsam ‘dɛŋ.’ (1 Yohane 5:19) Lɛlɛŋ, eji anɔkwale waa ŋmɛnɛ, ejaakɛ amrɔ nɛɛ ashɛ́ “[mɔ] ni atsɛɔ lɛ diabolo (naafolɔlɔ loo Abonsam) lɛ kɛ Satan (henyɛlɔ) lɛ ni shishiuɔ jeŋ muu lɛ fɛɛ lɛ” afɔ̃ kɛjɛ ŋwɛi kɛbagbee shikpɔŋ nɛɛ nɔ. (Kpojiemɔ 12:9) Enɛ tsɔɔ nɔ hewɔ ni amanehului ni mli wa waa baa adesai anɔ yɛ wɔ be nɛɛ mli lɛ. Klɛŋklɛŋ jeŋ ta, ni fɛ yɛ 1914 mli lɛ kadi “kɔɔmɔi lɛ abɔimɔ,” ni etsa nɔ aahu kɛbashɛ afii ohai 20 nɛɛ mli.—Mateo 24:7, 8.
Ani bei komɛi lɛ onuɔ he akɛ oshɛ he ni adesa tsuishiŋmɛɛ baanyɛ ashɛ kwraa lɛ he, yɛ nɛkɛ yiwalɛ jeŋ ni ekpɔtɔ nɛɛ mli? Ani bei komɛi lɛ osusuɔ akɛ, ‘Ani yiŋtoo ko yɛ shihilɛ sɛɛ?’ Ekolɛ Hiob nu he nakai, shi elaajeee Nyɔŋmɔ mli hemɔkɛyeli ni eyɔɔ lɛ, eyɛ mli akɛ etɔ̃ tɔmɔi komɛi moŋ. Ejie efaishitswaa kpo yɛ nɛkɛ wiemɔi nɛɛ mli, akɛ: “Mibemyeli lɛ miŋmɛŋ he kɛyashi beyinɔ ni magbo.” Ena hekɛnɔfɔɔ akɛ Nyɔŋmɔ ‘baana emuuyeli mli ni ehiɛ lɛ.’—Hiob 27:5; 31:6.
Ehe bahia ni Yesu Kristo, Nyɔŋmɔ diɛŋtsɛ Bi lɛ hu aŋmɛ etsui shi yɛ kaai amli beni eyɔɔ shikpɔŋ nɛɛ nɔ lɛ. Satan tutua Yesu yɛ gbɛi sɔrɔtoi anɔ. Ekɛ Yesu heloonaa hiamɔ nii tsu nii akɛ hegbɛ ni ekɛka E-hekɛnɔfɔɔ ni eyɔɔ yɛ Nyɔŋmɔ Wiemɔ lɛ mli lɛ ekwɛ, taakɛ ebalɛ yɛ gɔŋ lɛ nɔ he ni eka lɛ yɛ lɛ. (Mateo 4:1-11) Eha woloŋmalɔi kɛ Farisifoi hemɔkɛyeli kwalɔi kɛ mɛi ni amɛnyɛ amɛlaka amɛ lɛ wa Yesu yi, amɛfolɔ enaa akɛ ebɔ musu, ni amɛtee eyinɔ apam akɛ amɛbaagbe lɛ, ni amɛkɛ enɛɛmɛi fɛɛ hao lɛ waa. (Luka 5:21; Yohane 5:16-18; 10:36-39; 11:57) Amɛfee Yesu nibii ni mli wa kwraa fe bɔ ni amale miishɛjelɔi etɛ lɛ fee Hiob lɛ.—Hiob 16:2; 19:1, 2.
Beni eyɔɔ Getsemane abɔɔ lɛ mli, ni Yesu bɛŋkɛɔ ekaa lɛ naagbee kwraa he lɛ, ekɛɛ ekaselɔi lɛ akɛ: “Misusuma miihao kɛyashi gbele mli po.” Kɛkɛ ni “eŋɔ ehiɛ ebu shi, ni esɔle ekɛɛ: ‘Mi-Tsɛ, kɛji aaaho lɛ, ha ni kpulu nɛɛ aho mihe aya; shi kɛlɛ jeee bɔ ni mi misumɔɔ, shi moŋ bɔ ni bo osumɔɔ.’ ” Yɛ naagbee, beni eyɔɔ sɛŋmɔtso lɛ nɔ lɛ, yɛ gbalɛ wiemɔi ni yɔɔ Lala 22:2 lɛ mlibaa mli lɛ, Yesu bo akɛ: “Mi-Nyɔŋmɔ, mi-Nyɔŋmɔ, mɛɛba okwa mi?” Shi yɛ naagbee lɛ, Nyɔŋmɔ kwaaa Yesu ejaakɛ Yesu hiɛ emuuyeli mli aahu kɛmɔ shi kɛha Lɛ, ni ekɛfee nɔkwɛmɔ nɔ efɔ shi eha anɔkwa Kristofoi fɛɛ ni amɛnyiɛ sɛɛ. Yehowa tee Yesu shi kɛjɛ gbele mli ni ewo enɔ kɛtee ŋwɛi he ni kwɔ fe fɛɛ lɛ, ni ekɛwo emuuyeli mli ni ehiɛ lɛ he nyɔmɔ. (Mateo 26:38, 39; 27:46; Bɔfoi lɛ Asaji 2:32-36; 5:30; 1 Petro 2:21) Nakai nɔŋŋ Nyɔŋmɔ baawo mɛi fɛɛ ni hiɛɔ emuuyeli mli amɛhaa lɛ lɛ hu nyɔmɔ.
Jeee akɛ Yesu emuuyeli mlihiɛmɔ lɛ ha Satan mpoatswaa lɛ hetoo kɛmɔ shi kɛkɛ, shi moŋ egbɔmɔtso ni ekɛsha afɔle akɛ gbɔmɔ ni eye emuu lɛ hu kɛ kpɔmɔ nɔ ha, ni no nɔ adesai ni hiɛɔ emuuyeli mli lɛ aaadamɔ amɛna naanɔ wala. (Mateo 20:28) Klɛŋklɛŋ lɛ, Yesu bua “asafoku bibioo” ni afɔ amɛ mu, ni batsɔmɔɔ ehefatalɔi niyelɔi yɛ ŋwɛi Maŋtsɛyeli lɛ mli lɛ anaa. (Luka 12:32) Yɛ enɛ sɛɛ lɛ, aabua “asafo babaoo” ni baana yibaamɔ kɛfo “amanehulu kpeteŋkpele lɛ” hu anaa, ni amɛbaaje mli ni amɛna naanɔ wala yɛ Nyɔŋmɔ Maŋtsɛyeli lɛ nɔyeli he ni yɔɔ shikpɔŋ nɛɛ nɔ lɛ.—Kpojiemɔ 7:9, 14-17.
Emuuyeli mlihiɛlɔ Hiob baafata mɛi akpekpei akpei abɔ ni egboi ni abaatee amɛ shi yɛ nakai beaŋ ni amɛbatsɔmɔ nakai toiŋjɔlɛ “shikpɔŋ hee” lɛ fã lɛ ahe. (2 Petro 3:13; Yohane 5:28, 29) Taakɛ afee he mfoniri yɛ wɔ wolo tɛtrɛɛ nɛɛ sɛɛ lɛ, emuuyeli mlihiɛmɔ na ehe nyɔmɔwoo yɛ Hiob gbii lɛ amli, beni Yehowa “jɔɔ Hiob sɛɛkpee be lɛ fe etsutsu be lɛ.” Ena mumɔŋ hewalɛ akɛ mɔ ni “kɛ enaabu efeee esha ko.” Nyɔŋmɔ ha eye afii 140 efata ewala afii lɛ ahe. Yɛ heloo gbɛfaŋ hu lɛ, eha Hiob nibii ni eyɔɔ tsutsu lɛ toi enyɔ, ni Hiob “fɔ bihii kpawo kɛ biyei etɛ,” ni awieɔ ebiyei lɛ ahe akɛ amɛhe yɛ fɛo fe mɔ fɛɛ mɔ yɛ shikpɔŋ lɛ fɛɛ nɔ. (Hiob 2:10; 42:12-17) Shi nɛkɛ shweremɔ nɛɛ feɔ jɔɔmɔi ni emuuyeli mlihiɛlɔi baana mli ŋɔɔmɔ yɛ “shikpɔŋ hee” lɛ nɔ Paradeiso lɛ mli lɛ he okadi bibioo ko kɛkɛ ni amɛnaa. Obaanyɛ ona nakai miishɛɛ lɛ mli gbɛfaŋnɔ, taakɛ baafai ni nyiɛ sɛɛ lɛ baatsɔɔ mli lɛ!
[Mfoniri ni yɔɔ baafa 4]
Yesu fee nɔkwɛmɔ nɔ ni eye emuu efɔ̃ shi akɛ emuuyeli mlihiɛlɔ