Maŋtsɛyeli Jajelɔi Bɔ Amaniɛ

Yehowa He Wa Fe Ehenyɛlɔi Lɛ

ABONSAM kɛ edaimonioi lɛ ebɔ mɔdɛŋ aahu yɛ be kakadaŋŋ mli akɛ amɛaatsi sanekpakpa lɛ shiɛmɔ naa kɛtsɔ apasa jamɔ kɛ mumɔi atsɛmɔ nifeemɔi anɔ. Biblia lɛ wieɔ jwɛŋmɔ fɔŋ ni Satan yɔɔ nɛɛ he yɛ 2 Korintobii 4:4, he ni ewieɔ yɛ akɛ “je nɛŋ nyɔŋmɔ lɛ eshwila mɛi ni heee yeee lɛ ajwɛŋmɔi lɛ yɛ, koni Kristo, ni ji Nyɔŋmɔ subaŋ lɛ anunyam sanekpakpa lɛ la ni tsoɔ lɛ akakpɛ miiha amɛ.”

Shi Yehowa Nyɔŋmɔ he wa fe Satan. Nɔ ko kwraa bɛ ni Yehowa henyɛlɔi baanyɛ amɛfee ni amɛkɛtsĩ eŋwɛi yiŋtoo, ni ji akɛ “ahere gbɔmɛi fɛɛ yiwala, koni amɛshɛ anɔkwale lɛ leee mli” lɛ he nitsumɔ naa. (1 Timoteo 2:4) Amaniɛbɔi ni nyiɛ sɛɛ ni jɛ Maŋtsɛyeli jajelɔi aŋɔɔ yɛ Australia nɛɛ maa enɛ nɔ mi.

◻ Beni etsi ehe kɛjɛ Nyɔŋmɔ jamɔ he aahu afii 20 sɛɛ lɛ, yoo ko bɔi Biblia lɛ kanemɔ ekoŋŋ. Nɛkɛ miishɛɛ hee ni esaa ena yɛ Biblia lɛ he nɛɛ ha ena sanebimɔi pii, no hewɔ lɛ esɔle eha Nyɔŋmɔ kɛha yelikɛbuamɔ koni ena hetooi. Eesumɔ ni etao anɔkwale lɛ, shi ele akɛ esɛɛ ni eeeku kɛya ejamɔ momo lɛ nɔŋŋ mli lɛ haŋ ena enaagbai lɛ anaa tsabaa. Yɛ no najiaŋ lɛ, etee shwapo ko ni hɔ̃ɔ woji memeji lɛ mli ni eyabi akɛ ani amɛyɛ woji komɛi ni kɔɔ Nyɔŋmɔ jamɔ he lo.

Shwapo-tsɛ lɛ kai akɛ eyɛ wolo ko ni kɔɔ jamɔ he, jeee yɛ shwapo lɛ mli, shi moŋ yɛ shia. Wolo lɛ gbɛi ji Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ, ni Yehowa Odasefoi ji mɛi ni fee. Yoo lɛ kɛ miishɛɛ kane wolo lɛ ni ena Biblia mli sanebimɔi babaoo ni eyɔɔ lɛ ahetoo yɛ mli. Beni eyakwɛ tɛlifon wolo lɛ mli ekɛtao Yehowa Odasefoi aahu lɛ, yɛ naagbee lɛ enine shɛ amɛ nɔ ni eje daa Biblia mli nikasemɔ shishi.

◻ Obalayoo ko kɛ ashwaiafeemɔ sɛbɛ ko ni etaoɔ ehɔ̃ɔ lɛ tee maŋ adafitswaa woji akalamɔ he ko akɛ amɛtswa he adafi amɛha lɛ. Adafitswaa lɛ wie enɛ he akɛ ‘blema sɛbɛ ko ni yɔɔ hewalɛ waa diɛŋtsɛ.’ Yehowa Odasefonyo ko na nɛkɛ adafitswaa nɛɛ. Kɛkɛ ni ekpɛ eyiŋ akɛ ebaatswa tɛlifon nɔmba ni atsɔɔ lɛ ni ekɛ obalayoo lɛ awie hewalɛ ni ekɛɛ esɛbɛ nɛɛ yɔɔ lɛ jɛɛhe he. Sanegbaa lɛ tsa nɔ kɛtee bɔ ni Biblia lɛ susuɔ daimonioi anitsumɔ he ehaa lɛ nɔ. Obalayoo ni hɔ̃ɔ sɛbɛ lɛ jie lɛ kpo faŋŋ akɛ gbi ni tsɔ hiɛ lɛ nɔŋŋ lɛ, esɔle ebi Nyɔŋmɔ ni eye ebua lɛ kɛ naagbai ni enaa yɛ daimonioi ahewɔ lɛ. Odasefonyo lɛ to gbɛjianɔ kɛha ekɛ lɛ sanegbaa kroko yɛ tɛlifon lɛ nɔ.

Beni etswa tɛlifon lɛ, no mli lɛ obalayoo lɛ bɛ shia. Emami bawo tɛlifon lɛ nɔ ni ekɛ lɛ wie akɛ: “Mileee nɔ ni okɛɛ mibiyoo lɛ, shi nɔ ni eba nɛɛ ji naakpɛɛ sane diɛŋtsɛ!” Egba lɛ akɛ yɛ klɛŋklɛŋ sanegbaa yɛ tɛlifon lɛ nɔ lɛ sɛɛ lɛ, ebiyoo lɛ shɛrɛ Satan jamɔ mli mfonirii kɛ woji fɛɛ ni eyɔɔ lɛ eshwie ni ebɔi Biblia lɛ kanemɔ.

Yɛ no sɛɛ etsɛɛɛ tsɔ lɛ, amɛto gbɛjianɔ kɛha obalayoo lɛ saramɔ diɛŋtsɛ. Ekpɛlɛ nɔ amrɔ nɔŋŋ akɛ ekɛ Yehowa Odasefoi baakase Biblia lɛ daa. Ekɛ Odasefoi lɛ hu bɔi bɔɔ kɛtsɔɔ amɛ Kristofoi akpeei yaa nɔ. Shikome ekoŋŋ lɛ, Yehowa ye daimonioi lɛ anɔ kunim kɛtsɔ Biblia mli anɔkwalei ni ejie lɛ kpo faŋŋ ni ana lɛ nɔ.