Maŋtsɛyeli Jajelɔi Bɔ Amaniɛ

Nitsumɔi Kpakpai ni Woɔ Yehowa Hiɛ Nyam

YESU kɛ ekaselɔi lɛ wie, yɛ e-Gɔŋ nɔ Shiɛmɔ lɛ mli akɛ: “Nyɛhaa nyɛla atsoa yɛ gbɔmɛi ahiɛ, koni amɛna nyɛ nifeemɔ nii kpakpai lɛ, ni amɛwo nyɛtsɛ ni yɔɔ ŋwɛi lɛ hiɛ nyam.” (Mateo 5:16) Nakai nɔŋŋ, anɔkwa Kristofoi ni yɔɔ ŋmɛnɛ lɛ hu tsuɔ ‘nitsumɔi kpakpai’ ni woɔ Yehowa hiɛ nyam.

Mɛni ji nɛkɛ nitsumɔi kpakpai nɛɛ? Nɔ ni fata he ji sanekpakpa lɛ shiɛmɔ, shi wɔ jeŋba kpakpa hu feɔ nitsumɔi kpakpai nɛɛ fã ko ni he hiaa waa. Bei pii lɛ, wɔ jeŋba kpakpa lɛ ji nɔ ni gbalaa gbɔmɛi kɛbaa Kristofoi asafo lɛ mli klɛŋklɛŋ kwraa. Niiashikpamɔi ni nyiɛ sɛɛ lɛ tsɔɔ bɔ ni Yehowa Odasefoi ni yɔɔ Martinique lɛ ‘haa amɛla lɛ tsoɔ yɛ gbɔmɛi ahiɛ.’

◻ Beni etsuɔ shia-kɛ-shia shiɛmɔ nitsumɔ lɛ, Yehowa Odasefonyo yoo ko tee eyasara Katolik yoo ko. Afii 25 sɔŋŋ nɛ ni yoo nɛɛ kɛ nuu ko ni ekɛ lɛ boteko gbalashihilɛ mli lɛ, yɛ kɛkɛ. Yoo nɛɛ le Yehowa Odasefoi atsɔɔmɔi jogbaŋŋ, ejaakɛ aaafee afii kpawo sɔŋŋ ni eho nɛ, ni enine shɛ Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ ekome nɔ.a Yoo lɛ kɛɛ Odasefonyo lɛ akɛ: “Jamɔi lɛ efa babaoo tsɔ̃. Mileee amɛmli nɔ ni mahe maye yɛ nɛkɛ yiŋfutumɔ nɛɛ fɛɛ mli.” Odasefonyo lɛ tsɔɔ mli akɛ ebaanyɛ ena anɔkwale lɛ yɛ Biblia lɛ pɛ mli, ni kɛji ebaana lɛ, no lɛ esa akɛ ekase Ŋmalɛi lɛ jogbaŋŋ ni esɔle ebi Nyɔŋmɔ mumɔ lɛ kɛ gbɛtsɔɔmɔ.

Be saŋŋ ho, ni eyɛ mli akɛ yoo nɛɛ yɛ Biblia lɛ kasemɔ he miishɛɛ moŋ, shi ekpɛlɛɛɛ ninefɔɔ babaoo ni akɛha lɛ akɛ eba Kristofoi akpeei yɛ Yehowa Odasefoi a-Maŋtsɛyeli Asa lɛ nɔ lɛ fɛɛ nɔ. Mɛni hewɔ? Ehiɛ miigbo waa diɛŋtsɛ. Shi, beni afɔ̃ lɛ nine ekoŋŋ akɛ eba Kristo gbele lɛ Kaimɔ lɛ, eye ehiɛ ni gboɔ nɛɛ nɔ ni etee.

Nɔ ni ena he miishɛɛ fe fɛɛ yɛ kpee lɛ he ji suɔmɔ mumɔ ni ajie lɛ kpo yɛ Maŋtsɛyeli Asa lɛ nɔ lɛ. Enako anɔkwa naanyobɔɔ ni tamɔ nɛkɛ yɛ esɔlemɔ lɛ mli dã! Yɛ nakai kpee lɛ sɛɛ lɛ, ebɔi kpeei ni maŋ lɛ mli Odasefoi feɔ lɛ fɛɛ yaa, ni etsɛɛɛ kɛkɛ ni ekɛ nuu ni kulɛ ekɛ lɛ ehi shi kɛkɛ aahu nɛɛ bote gbalashihilɛ mli. Amrɔ nɛɛ eji asafo lɛ mli nyo ni abaptisi lɛ.

◻ Odasefonyo kroko hu nitsumɔi kpakpai wo yibii kpakpai. Nyɛmi yoo nɛɛ hiɛ gbɛhe ni nɔ kwɔ, ni bulɛ yɔɔ mli waa yɛ ɔfis. Beni ahe nuu ko ni jɛ Réunion ŋshɔkpɔ lɛ nɔ lɛ yɛ nitsumɔ lɛ mli lɛ, nitsulɔi lɛ ekomɛi bɔi ehe fɛoyeli, yɛ gbɔmɔ kpitioo ni eji lɛ hewɔ. Ebatsɔ hefɛoyeli nii kwraa kɛha amɛ. Shi nɔ ni tamɔɔɔ nakai lɛ, Odasefonyo lɛ jieɔ mlihilɛ kɛ bulɛ kpo etsɔɔ nuu nɛɛ. Etsɛɛɛ kɛkɛ ni nuu nɛɛ bi nyɛmi yoo lɛ nɔ hewɔ ni esoro lɛ kwraa lɛ.

Odasefonyo lɛ tsɔɔ mli akɛ ejeŋba ni bulɛ yɔɔ mli lɛ jɛ Biblia shishitoo mlai ni ekase kɛjɛ Yehowa Odasefoi aŋɔɔ lɛ hewɔ. Nyɛmi yoo lɛ tsɔɔ lɛ nɔ ni Ŋmalɛi lɛ kɛɔ yɛ Nyɔŋmɔ yiŋtoi ahe kɛ jeŋ hee he hiɛnɔkamɔ ni yɔɔ lɛ hu. Nuu lɛ kpɛlɛ Biblia mli nikasemɔ nɔ, ni ebɔi Kristofoi akpeei yaa, ni ekɛ yoo ni kulɛ ekɛ lɛ yɔɔ kɛkɛ lɛ bote gbalashihilɛ mli.

Yɛ naagbee lɛ, nuu lɛ ku esɛɛ kɛtee Réunion. Tsutsu ko lɛ, kulɛ enaa naagbai yɛ ekɛ ewekumɛi ateŋ, titri lɛ yɛ ekɛ eŋa lɛ weku lɛ teŋ. Shi agbɛnɛ amɛhiɛ sɔ e-Kristofoi ajeŋba kpakpa lɛ waa diɛŋtsɛ. Abaptisi nuu lɛ, ni amrɔ nɛɛ eesɔmɔ akɛ asafoŋ sɔɔlɔ. Eweku lɛ mli bii babaoo, ni eŋa kɛ ebiyei enyɔ fata he, hu miisɔmɔ yɛ Kristofoi asafo lɛ mli akɛ Nyɔŋmɔ Maŋtsɛyeli lɛ he sanekpakpa lɛ shiɛlɔi.

[Shishigbɛ niŋmaa]