Maŋtsɛyeli Jajelɔi Bɔ Amaniɛ

Abaashiɛ Maŋtsɛyeli lɛ He Sanekpakpa Lɛ

AFII ohai abɔ nɛ ni Nyɔŋmɔ henyɛlɔ kpele fe fɛɛ, Satan Abonsam kɛ maŋkwramɔŋ nɔyelii kɛ apasa jamɔ etsu nii yɛ gbɛ ni yɔɔ nigii nɔ yɛ mɔdɛŋ ni ebɔɔ ni etsĩ anɔkwa Kristojamɔ gbɛɛ-kɛ-shwamɔ naa lɛ mli. Shi nɛkɛ gbɛi nɛɛ yeŋ omanye. Yesu gba efɔ shi akɛ “[abaashiɛ] [jeee, “ekolɛ aaashiɛ” aloo “abaanyɛ ashiɛ”] maŋtsɛyeli lɛ he sanekpakpa nɛɛ atsɔɔ je nɛŋ fɛɛ.”—Mateo 24:14.

Anaa Satan nine ni enyɛ shi lɛ he odaseyeli yɛ Greece. Greek Ortodɔks Sɔlemɔ ni yɔɔ nakai shikpɔŋ lɛ nɔ lɛ eka akɛ ebaatsĩ Yehowa Odasefoi anaa koni amɛkashiɛ Maŋtsɛyeli lɛ he sanekpakpa lɛ amɛtsɔɔ. Shi, taakɛ ejeɔ kpo faŋŋ yɛ niiashikpamɔ ni nyiɛ sɛɛ lɛ mli lɛ, yɛ be ni sa mli lɛ, Biblia mli anɔkwale lɛ yashɛɔ gbɔmɛi ni yɔɔ jalɛ tsuii lɛ aŋɔɔ, yɛ shitee-kɛ-woo lɛ fɛɛ sɛɛ.

Aaafee afii 30 ni eho nɛ lɛ, Greek Ortodɔks osɔfo ko kpɛlɛ sanekpakpa lɛ nɔ, ni ejie lɛ kpo po akɛ ebaasumɔ ni ebatsɔ Yehowa Odasefoi ateŋ mɔ kome. Shi, ewekumɛi te shi amɛwo gbɛ ni etaoɔ ekɔ nɛɛ waa, ni amɛnyɛ enɔ aahu ni ekpa Odasefoi lɛ kɛbɔɔ kwraa. Etee nɔ yɛ ewala be mli nitsumɔ ni ji osɔfoyeli lɛ mli koni ekɛsa eweku lɛ hiɛ; shi kɛlɛ, ekpɛlɛɔ nɔ be fɛɛ be akɛ Yehowa Odasefoi eye amɛbua lɛ ni ebakase anɔkwale lɛ, ni ákɛ eŋmɛɛ he yɛ gbɛhe ni woo yɔɔ mli ni etaoɔ ena yɛ apasa jamɔ mli lɛ hewɔ.

Shi enɛ fɛɛ sɛɛ lɛ, ewieɔ kɛfiɔ Yehowa Odasefoi asɛɛ be fɛɛ be ni eeena hegbɛ kɛha nakai feemɔ. Bei babaoo ji bei ni ewo gbɔmɛi aŋaa po akɛ kɛ amɛmiitao ni amɛkase Biblia mli anɔkwalei lɛ, no lɛ amɛkɛ Odasefoi lɛ akase nii. Mɛi komɛi kɛ eŋaawoo nɛɛ etsu nii diɛŋtsɛ yɛ afii abɔ ni eho lɛ fɛɛ mli.

Nyɛsɛɛ nɛɛ, osɔfo lɛ he baye waa ni ena akɛ ekolɛ etsɛŋ ni ebaagbo. Beni eyɔɔ helatsamɔ he lɛ, etsɛ ebii lɛ fɛɛ kɛba, ni amɛ fɛɛ amɛbabua amɛhe naa yɛ esaatso lɛ he.a Kɛkɛ ni egbala mli etsɔɔ amɛ akɛ kɛ egbo lɛ, amɛbaanyɛ amɛna lɛ ekoŋŋ. Ekɛ amɛ wie Biblia lɛ tsɔɔmɔ akɛ Yehowa baatee adesai ashi kɛba wala mli ni amɛbahi paradeiso mli yɛ shikpɔŋ nɛɛ nɔ lɛ he, shi ekɛɛ amɛ akɛ kɛ amɛmiisumɔ ni amɛna be mli ni enɛ baaba mli lɛ, no lɛ esa akɛ amɛkase anɔkwale lɛ kɛjɛ Biblia lɛ mli ni amɛtsi amɛhe kwraa kɛjɛ apasa jamɔ he. Eje gbɛ ekɛ amɛ wie ni amɛkɛ Yehowa Odasefoi abɔ koni amɛkase bɔ ni amɛaafee amɛtsɔmɔ anɔkwa Kristofoi lɛ kɛjɛ amɛŋɔɔ.

No sɛɛ etsɛɛɛ ni osɔfo lɛ gbo. Shi, ŋaawoo wiemɔi ni ekɛ ebii lɛ wie ni ekɛ amɛ ye shɛɛ lɛ wo yibii kpakpai. Ebi yoo, ni tamɔ ewekumɛi lɛ ateŋ mɛi pii lɛ, ete shi ewo Yehowa Odasefoi kɛ amɛ nitsumɔ lɛ aahu. Shi enyɛɛɛ eku ehiɛ efɔ wiemɔi ni etsɛ ni gboɔ lɛ jɛ anɔkwayeli mli ekɛ amɛ wie lɛ nɔ, no hewɔ lɛ etsɛɛɛ kɛkɛ ni etao Yehowa Odasefoi asɛɛ gbɛ ni ebɔi Biblia lɛ kasemɔ. Nyɛsɛɛ nɛɛ nɔŋŋ ni lɛ diɛŋtsɛ hu ebatsɔ Odasefonyo, ni ejɔɔ ewala nɔ eha Yehowa Nyɔŋmɔ, ni ekɛ nu mli baptisimɔ fee ehenɔjɔɔmɔ lɛ he okadi.

Yehowa Odasefoi ni yɔɔ Greece, kɛ agbɛnɛ shikpɔji krokomɛi fe 230 nɔ lɛ kɛ amɛhe fɔ̃ɔ Nyɔŋmɔ mumɔ krɔŋkrɔŋ lɛ hewalɛ nɔ. Amɛsɛɛ ni mumɔ krɔŋkrɔŋ lɛ fiɔ kɛmɔɔ shi lɛ ji nɔ ni haa amɛnyɛɔ amɛnaa Yesu gbalɛ lɛ mlibaa mli gbɛfaŋnɔ, akɛ: “Kɛ mumɔ krɔŋkrɔŋ lɛ na ba nyɛ nɔ lɛ, nyɛaana hewalɛ ni nyɛaatsɔmɔ midasefoi yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbee hei lɛ.”—Bɔfoi lɛ Asaji 1:8.

[Shishigbɛ niŋmai]