Gilead Nikaselɔi ni Egbe Naa—“Maŋsɛɛ Sanekpakpa Shiɛlɔi Diɛŋtsɛ!”

“MƐNI ji maŋsɛɛ sanekpakpa shiɛlɔ?” Adafitswaa wolo mli sane ko ni aŋma aaashɛ afii nyɔŋmai ejwɛ nɛ lɛ bi nakai sane lɛ. Niŋmalɔ lɛ tsɔɔ mli akɛ anɔkwa maŋsɛɛ sanekpakpa shiɛlɔi ji dɛŋdadei kɛha shihilɛ kɛ shika gbɛfaŋ tsakemɔi. Shi, aje gbɛ akɛ nɔmimaa ha hetoo kroko ni soro no kwraa, yɛ Hɔgbaa, March 5, 1995, yɛ Jersey City Assembly Hall of Jehovah’s Witnesses. No mli lɛ, mɛni afeɔ? Buu-Mɔɔ Biblia Gilead Skul klas ni ji 98 lɛ—ni ji skul ni etsu maŋsɛɛ sanekpakpa shiɛlɔi kɛtee shikpɔŋ lɛ nɔ he fɛɛ he lɛ, nikasemɔ naagbee nifeemɔ lɛ!

Yɛ shishijee lala kɛ sɔlemɔ lɛ sɛɛ lɛ, Albert D. Schroeder ni fata Nɔyeli Kuu lɛ he lɛ kɛ miishɛɛ here mɛi 6,430 ni eba nifeemɔ lɛ shishi lɛ fɛɛ atuu. Yɛ ehiɛkpamɔ wiemɔ lɛ mli lɛ, Nyɛminuu Schroeder gbala nɔ hewɔ ni esoro Gilead nikaselɔi ni egbe naa lɛ kwraa yɛ mɛi krokomɛi ni etsɛ amɛhe maŋsɛɛ sanekpakpa shiɛlɔi ahe lɛ mli faŋŋ. Ekɛɛ: “Biblia lɛ ji nikasemɔ wolo titri kɛha Gilead.” Atsɔse mɛi ni egbe nikasemɔ naa yɛ Gilead lɛ, jeee ni amɛfee adesai ashihilɛ he nitsulɔi, shi moŋ Nyɔŋmɔ Wiemɔ lɛ tsɔɔlɔi. Enɛ hewɔ lɛ amɛhe esa yɛ gbɛ krɛdɛɛ nɔ akɛ amɛaatsu gbɔmɛi ni yɔɔ maŋsɛɛ shikpɔji anɔ lɛ amumɔŋ hiamɔ nii ahe nii.

Wielɔi ni tsara nɔ lɛ wie hei krokomɛi babaoo ni mɛi ni egbe Gilead nikasemɔ naa lɛ haa anaa odaseyeli ni tsɔɔ faŋŋ akɛ amɛji maŋsɛɛ sanekpakpa shiɛlɔi “diɛŋtsɛ” lɛ ahe. Sane ni Charles Molohan kɛ amɛ wie he lɛ yitso ji “Nyɛyaa nɔ Nyɛwoa Yibii Kpakpai akɛ Maŋsɛɛ Sanekpakpa Shiɛlɔi.” Beni egbalaa jwɛŋmɔ kɛyaa bɔfo Paulo wiemɔi ni yɔɔ Kolosebii 1:9, 10 nɔ lɛ, Nyɛminuu Molohan kai mɛi ni egbe nikasemɔ naa lɛ akɛ nyɔji enumɔ ni amɛbaye yɛ Gilead lɛ eye ebua amɛ ni amɛshwere “yɛ Nyɔŋmɔ he nilee mli.” Enɛ baaye abua amɛ ni amɛwo yibii yɛ gbɛi enyɔ nɔ: kɛtsɔ Nyɔŋmɔ mumɔ lɛ yibii lɛ kpojiemɔ nɔ, kɛ agbɛnɛ hu kɛtsɔ Biblia mli anɔkwalei ni amɛkɛ mɛi krokomɛi aaagba he sane lɛ nɔ.

Daniel Sydlik ni fata Nɔyeli Kuu lɛ he lɛ hu nyiɛ sɛɛ kɛ saneyitso ni taa mɔ mli waa, ni ji “Kaaŋmɛɛ Saji Ahe Okɛsaa ní Efite Oshihilɛ.” Etsĩ Yesu sanebimɔ nɛɛ tã, akɛ: “Mɛni gbɔmɔ aaaŋɔha ni ekɛkpɔ̃ esusuma?” (Mateo 16:26) Nyɛminuu Sydlik tsɔɔ mli akɛ: “Gbɔmɛi kɛ amɛsusumai eha yɛ shihilɛ ni yɔɔ mlɛo, kɛ ogbɔjɔ hewɔ.” Shi, mɛi ni yɔɔ hemɔkɛyeli ni hiɛ ka lɛ nyɛŋ amɛŋmɛɛ saji ahe ni akɛsaa kɛji amɛkɛ kaai sɔrɔtoi miikpe. Yesu wiemɔi lɛ tsɔɔ akɛ esa akɛ mɔ lɛ asumɔ akɛ ekɛ nɔ ko ‘aaaha’, ni tsɔɔ afɔleshaa, koni enine ashɛ esusuma, loo ewala nɔ. Awo maŋsɛɛ sanekpakpa shiɛlɔi hee lɛ ŋaa ni amɛkɛ amɛsusuma, amɛnii ni jara wa fe fɛɛ, aha Yehowa, yɛ esɔɔmɔ mli!

No sɛɛ lɛ, William Van de Wall ni fata Sɔɔmɔ Nitsumɔ Ajinafoi Akuu lɛ he lɛ wie saneyitso ni ji “Bɔfo Paulo—Nɔkwɛmɔ nɔ ni Sa Kasemɔ” lɛ he. Nyɛminuu Van de Wall tsɔɔ mli akɛ: “Paulo nyiɛ maŋsɛɛ sanekpakpa shiɛmɔ nitsumɔ lɛ hiɛ yɛ klɛŋklɛŋ afii oha lɛ mli.” Belɛ, esa jogbaŋŋ akɛ atĩ hei ejwɛ ni bɔfo Paulo fee nɔkwɛmɔ nɔ kpakpa efɔ shi eha maŋsɛɛ sanekpakpa shiɛlɔi ŋmɛnɛ lɛ mli: (1) Paulo anɔkwa hedɔɔ kɛ suɔmɔ ni eyɔɔ kɛha gbɔmɛi, (2) bɔ ni esɔɔmɔ nitsumɔ lɛ mɔɔ shi, (3) heshibaa ni haa ekpooɔ akɛ eeewo ehe nɔ, (4) ehe ni ekɛfɔ̃ Yehowa nɔ kwraa kɛmɔ shi.

“Ha Yehowa Atao Omli yɛ Onitsumɔ Hee lɛ Mli” ji saneyitso ni Lyman A. Swingle ni fata Nɔyeli Kuu lɛ he lɛ wie he. Beni ekɛ gbi lɛ ŋmalɛ, ni ji Lala 139:16 tsuɔ nii lɛ, Nyɛminuu Swingle wie faŋŋ akɛ, akɛ maŋsɛɛ sanekpakpa shiɛlɔi heei lɛ, amɛkɛ naagbai baakpe yɛ amɛ nitsumɔi lɛ amli, ni ákɛ Yehowa le amɛnaa tsabaai. Ewo amɛ ŋaa akɛ: “Nyɛyaa eŋɔɔ, nyɛkɛ lɛ agbaa sane kɛji nyɛyɛ naagba ko. Nyɛbɔa mɔdɛŋ akɛ nyɛaale nɔ ni ji esuɔmɔnaa nii.”

Kɛkɛ ni John E. Barr ni fata Nɔyeli Kuu lɛ he lɛ wie saneyitso ni ji “Nyɛ Hemɔkɛyeli lɛ Miida Naakpa” lɛ he. (2 Tesalonikabii 1:3) Wɔkaneɔ yɛ Luka 17:1 akɛ Yesu wie akɛ: “Be fɛɛ be ni fee lɛ, ja nanetɔ̃tɔ̃mɔ saji ba.” Mɛi komɛi anaji etɔ̃tɔ̃ yɛ amɛnanemɛi maŋsɛɛ sanekpakpa shiɛlɔi komɛi asui ahewɔ. Shi Nyɛminuu Barr wo maŋsɛɛ sanekpakpa shiɛlɔi lɛ hewalɛ ni amɛna hemɔkɛyeli ni he hiaa ni haa anyɛɔ akɛ sane keɔ lɛ eko. Lɛlɛŋ, sane nɛɛ nɔŋŋ hewɔ ni Yesu kaselɔi lɛ kpa fai akɛ: “Fatamɔ wɔ hemɔkɛyeli lɛ he oha wɔ” lɛ. (Luka 17:2-5) Gbɛjianɔtoo mli tsakemɔi babaoo hu baanyɛ aka maŋsɛɛ sanekpakpa shiɛlɔi lɛ ahemɔkɛyeli. Nyɛminuu Barr bi akɛ: “Ani wɔyɛ hemɔkɛyeli ni wɔkɛaakpɛlɛ enɛɛmɛi anɔ, aloo ani amɛbaatsɔ gbɛtsii nii ni tamɔ gɔji?”

Enɛ sɛɛ lɛ, Gilead tsɔɔlɔi enyɔ lɛ aŋaawoi tsara nɔ. Jack Redford wo mɛi ni egbe nikasemɔ naa nɛɛ hewalɛ ni amɛhiɛ jwɛŋmɔ kpakpa be fɛɛ be. Egba amɛ maŋsɛɛ sanekpakpa shiɛlɔ ko ni shi enitsumɔ lɛ yɛ ehe fɛo ni enanemɛi maŋsɛɛ sanekpakpa shiɛlɔi ye hewɔ lɛ he sane. Shi, Ŋmalɛi lɛ bɔɔ wɔ kɔkɔ yɛ wɔmli ni aaafu yakatswaa lɛ he. (Jajelɔ 7:9) Ewo amɛ ŋaa akɛ: “Nyɛnaa jwɛŋmɔ ni ja. Nyɛkɛ mɛi krokomɛi ni ebɔle nyɛ lɛ atɔmɔi kɛ emuu ni amɛyeee lɛ akea amɛ.”

Kɛkɛ ni U. V. Glass, ni ji Gilead nɔ onukpa lɛ bi akɛ: “Ani nyɛfee klalo akɛ nyɛbaakpee ‘be kɛ nibii ni aleee ni baa trukaa’ lɛ anaa?” (Jajelɔ 9:11, NW) Nyɛminuu Glass tsɔɔ mli akɛ: “Wɔ shihilɛ gbɛ nyɛɔ etsakeɔ be fɛɛ be, ni tsakemɔi nɛɛ ekomɛi baanyɛ afee nɔ ni haoɔ mɔ waa.” Maŋsɛɛ sanekpakpa shiɛlɔi komɛi kɛ gbɔmɔtsoŋ gbɔjɔmɔi, helai, kɛ weku mli naagbai ni amɛkpaaa gbɛ ekpe trukaa, ni enɛ enyɛ mɛi komɛi anɔ ni amɛshi amɛ nitsumɔi lɛ. Nyɛminuu Glass wie akɛ: “Nɔ fɛɛ nɔ ni nɛkɛ saji ni aleee ni baa trukaa nɛɛ baaji lɛ, wɔle akɛ Yehowa le ni esusuɔ he hu. Kɛ wɔkɛ wɔhe fɔ̃ enɔ kwraa kɛmɔ shi lɛ, wɔle akɛ wɔbaaje mli kɛ kunimyeli!”

Wiemɔ ko ni yitso ji “Aje Gbɛ Ahala Amɛ Kɛha Maŋsɛɛ Sanekpakpa Sɔɔmɔ” lɛ kɛ wiemɔi ni aha nakai gbi lɛ leebi lɛ fɛɛ ba naagbee. Theodore Jaracz ni fata Nɔyeli Kuu lɛ he lɛ bawie sanebimɔ ni atee lɛ shi kɛjɛ shishijee kwraa, ni ji, “Mɛni ji maŋsɛɛ sanekpakpa shiɛlɔ?” lɛ he. Yɛ hetoo hamɔ mli lɛ, ewie Bɔfoi lɛ Asaji yitsei 13 kɛ 14 ni kɔɔ Paulo kɛ Barnaba maŋsɛɛ sanekpakpa shiɛmɔ nitsumɔ lɛ he lɛ he. Eyɛ faŋŋ akɛ, nakai nitsumɔ lɛ kɔɔɔ shihilɛ mli naagbai anaa tsabaa namɔ he kwraa, shi moŋ ekɔɔ ‘sanekpakpa lɛ jajemɔ’ he. (Bɔfoi lɛ Asaji 13:32) Nyɛminuu Jaracz bi akɛ: “Ani nyɛkɛ mi kpaaa gbee akɛ Paulo kɛ Barnaba fee bɔ ni sa akɛ maŋsɛɛ sanekpakpa shiɛlɔ afee lɛ he nɔkwɛmɔ nɔ lɛlɛŋ?” Kɛkɛ ni no sɛɛ lɛ atsɛ Robert Tracy ni yɔɔ Mexico, ni eji maŋsɛɛ sanekpakpa shiɛlɔ ni yɔɔ niiashikpamɔ waa lɛ ni ebagba niiashikpamɔi ni yɔɔ miishɛɛ waa, ni lɛ diɛŋtsɛ ena akɛ sanekpakpa jajelɔ lɛ etsɔɔ amɛ.

Leebi gbɛjianɔtoo lɛ shɛ enaagbee kwraa beni Nyɛminuu Schroeder ja yijiemɔ woji eha mɛi 48 ni egbe nikasemɔ naa lɛ. Toibolɔi lɛ na miishɛɛ waa beni amɛnu shikpɔji 21 ni aha maŋsɛɛ sanekpakpa shiɛlɔi lɛ nitsumɔ yɛ nɔ lɛ agbɛi lɛ: Barbados, Benin, Bolivia, Central African Republic, Costa Rica, Côte d’Ivoire, Ecuador, Equatorial Guinea, Estonia, Guinea-Bissau, Honduras, Latvia, Leeward Islands, Mauritius, Mozambique, Nicaragua, Paraguay, Peru, Senegal, Taiwan, kɛ Venezuela.

Beni akpa ni ayaye nii shwane lɛ, toibolɔi lɛ babua amɛhe naa ekoŋŋ ni amɛna Buu-Mɔɔ nikasemɔ, ni Robert P. Johnson ni yɔɔ Sɔɔmɔ Nitsumɔ He lɛ kwɛ nɔ lɛ he miishɛɛ. Klas ni ji 98 lɛ mli bii lɛ ha sanebimɔi lɛ ahetoo. Nɔ ni nyiɛ enɛ sɛɛ ji saji ni abibii amɛ ni amɛha hetoo, ni onukpai ni tsuɔ nii yɛ Gilead lɛ kwɛ nɔ. Ewo toibolɔi lɛ hewalɛ waa beni mɛi ni egbe nikasemɔ naa lɛ gbaa niiashikpamɔi ni amɛna yɛ shiɛmɔ mli, ni amɛtsɔɔ bɔ ni amɛnuɔ amɛ maŋsɛɛ nitsumɔi lɛ ahe amɛhaa lɛ.

Afii ekpaa kɛ fã sɔŋŋ nɛ, ni Gilead ehi Buu-Mɔɔ Asafo lɛ tsũi ni yɔɔ Wallkill lɛ amli, yɛ New York. Shi yɛ April 1995 mli lɛ, ajie skul lɛ kɛba Watchtower Educational Center hee ni yɔɔ Patterson, yɛ New York lɛ. Te Betel weku ni yɔɔ Wallkill lɛ nu tsakemɔ nɛɛ he amɛha tɛŋŋ? Abibii mɛi ni jɛ Wallkill lɛ ateŋ mɛi saŋŋ saji yɛ nikasemɔ naagbee nifeemɔ nɛɛ shishi. Amɛ wiemɔi ni saa mɔ he waa lɛ fee lɛ faŋŋ akɛ Gilead nikaselɔi lɛ eshi kadimɔ ko yɛ jɛmɛ ni amɛbaakai be fɛɛ be. Lɛlɛŋ, nɛkɛ hii kɛ yei ni kɛ amɛhe eha nɛɛ ji maŋsɛɛ sanekpakpa shiɛlɔi diɛŋtsɛ—amɛbaa amɛhe shi, amɛkɛ amɛhe shaa afɔle, ni amɛsusuɔ mɛi krokomɛi ayelikɛbuamɔ he waa.

Beni nikasemɔ naagbee nifeemɔ lɛ baa naagbee lɛ, mɛi fɛɛ ni eba jɛmɛ lɛ na nɔmimaa waa akɛ Gilead Skul lɛ baaya nɔ atsu nɔ ni etsu aahu fe afii 50 lɛ lolo kɛ omanyeyeli—akɛ maŋsɛɛ sanekpakpa shiɛlɔi diɛŋtsɛ baaha!

[Akrabatsa ni yɔɔ baafa 18]

Klasbii lɛ Ahe Saji:

Maji sɔrɔtoi anɔ ni amɛjɛ kɛba: 8

Maji sɔrɔtoi ni aha amɛ nitsumɔ yɛ mli: 21

Nikaselɔi lɛ ayifalɛ: 48

Afii abɔ ni amɛye lɛ mlijaa: 32.72

Afii abɔ ni amɛkɛhi anɔkwale lɛ mli lɛ mlijaa: 15.48

Afii abɔ ni amɛkɛsɔmɔ kɛ amɛbe fɛɛ mlijaa: 10.91

[Mfoniri ni yɔɔ baafa 18]

Watchtower Bible School of Gilead Klasbii ni Ji 98 ni Gbe Nikasemɔ Naa

Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛ gbɛ kɛyaa sɛɛ gbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔ gbɛ.

(1) Eszlinger, A.; Mann, T.; Rivera, G.; Baruero, M.; Vaz, M.; Durga, K.; Silweryx H.; Alvarado, D. (2) Toth, B.; Segarra, S.; Hart, R.; Rooryck, I.; Escobar, P.; Ejstrup, J.; Sligh, L.; Rivera, E. (3) Archard, D.; Snaith, S.; Marciel, P.; Koljonen, D.; Waddell, S.; Blackburn, L.; Escobar, M.; Archard, K. (4) Hart, M.; Toth, S.; Koljonen, J.; Bergman, H.; Mann, D.; Blackburn, J.; Park, D.; Vaz, F. (5) Segarra, S.; Sligh, L.; Leslie, L.; Bergman, B.; Baruero, W.; Alvarado, J.; Leslie, D.; Park, D. (6) Silweryx, K.; Eszlinger, R.; Waddell, J.; Snaith, K.; Durga, A.; Rooryck, F.; Ejstrup, C.; Marciel, D.