Nyɔŋmɔ Wiemɔ lɛ He Nikaselɔi ni Egbe Nikasemɔ Naa
ALE Yehowa Odasefoi yɛ je lɛŋ fɛɛ yɛ amɛ shia-kɛ-shia shiɛmɔ nitsumɔ lɛ hewɔ, yɛ klɛŋklɛŋ afii oha lɛ mli Kristofoi lɛ akasemɔ mli. Amã nitsumɔ nɛɛ nɔ mi waa yɛ klɛŋklɛŋ wiemɔ lɛ mli, yɛ Buu-Mɔɔ Biblia Gilead Skul klas ni ji 102 lɛ nikasemɔ naagbee nifeemɔ lɛ shishi.
Yɛ March 1, 1997 lɛ, Albert Schroeder, ni ji Yehowa Odasefoi a-Nɔyeli Kuu lɛ mli bii lɛ ateŋ mɔ kome lɛ, gbala jwɛŋmɔ kɛtee sane ko ni je kpo nyɛsɛɛ nɛɛ yɛ French adafitswaa wolo ni atsɛɔ lɛ Le Point lɛ mli lɛ nɔ. Ewie gbɛjianɔ ni Roma Katolik sɔlemɔ lɛ toɔ ni eje shia-kɛ-shia shiɛmɔ shishi yɛ Italy lɛ he. “Bɔni afee ni [Vatican maŋsɛɛ sanekpakpa shiɛlɔi] lɛ akaya kɛ amɛdɛŋ folo beni amɛkɛ Yehowa Odasefoi peleɔ amɛ shikpɔŋkuku lɛ he lɛ,” taakɛ sane ni aŋma lɛ tsɔɔ lɛ, “Vatican lɛ eto gbɛjianɔ po koni eha akala Hetselɔ Marko Sanekpakpa lɛ ekomekomei akpeiakpe kome, beni amɛ tsuji nɛɛ kɛ mɛi ni he esa waa [ni ji Odasefoi] lɛ kpeɔ hiɛ kɛ hiɛ yɛ sanekpakpa lɛ ‘kɛhamɔ’ mli yɛ shia-kɛ-shia lɛ.”
Gbɔmɛi 48 ni egbe nikasemɔ naa lɛ fata mɛi ni ekase Yesu shiɛmɔ mli ŋaa gbɛi ni hi jogbaŋŋ, ni etsɔ nɔ egbɛ Nyɔŋmɔ Wiemɔ lɛ eshwã lɛ ahe. Amɛjɛ shikpɔji kpaanyɔ nɔ kɛba Watchtower Educational Center ni yɔɔ Patterson, yɛ New York lɛ. Amɛkase Biblia lɛ kɛjɛ shishijee kɛyashi naagbee, yɛ nyɔji enumɔ ni amɛkɛtee skul lɛ mli. Nyɔŋmɔ gbɛjianɔtoo lɛ yinɔsane, nibii ni anyɛɔ akɛtsuɔ nii yɛ maŋsɛɛ sanekpakpa shiɛlɔ shihilɛ mli, kɛ Nyɔŋmɔ mumɔ lɛ yibii lɛ woo hu fata amɛ nikasemɔ lɛ he. Amɛkase enɛɛmɛi fɛɛ kɛ yiŋtoo kome pɛ ni mã amɛhiɛ—koni esaa amɛ kɛha maŋsɛɛ sanekpakpa shiɛmɔ nitsumɔ lɛ yɛ shikpɔji 17 ni akɛ amɛ baaya nɔ lɛ amli. Beni amɛgbeɔ amɛ nikasemɔ lɛ naa lɛ, toibolɔi 5,015 ni jɛ maji sɔrɔtoi anɔ ná nifeemɔ ni yɔɔ miishɛɛ nɛɛ mli gbɛfaŋnɔ. Mɛɛ naagbee ŋaawoo ni anyɛɔ akɛtsuɔ nii nakai Gilead nikaselɔi ni egbe skul naa lɛ anine shɛ nɔ?
Hewalɛwoo ni Ba yɛ Ebe Naa Kɛha Maŋsɛɛ Sanekpakpa Shiɛlɔi Heei
Yɛ sɛinɔtalɔ lɛ shishijee wiemɔi lɛ asɛɛ lɛ, Ralph Walls, ni ji Nɔyeli Kuu lɛ Nitsulɔi Ajinafoi Akuu lɛ yelikɛbualɔ lɛ, kɛ klɛŋklɛŋ wiemɔ kuku ni hiɛ ŋaawoo ni anyɛɔ akɛtsuɔ nii ha maŋsɛɛ sanekpakpa shiɛlɔi heei lɛ. Ewiemɔ lɛ yitso ji “Kaimɔ ni Ojie Suɔmɔ Kpo.” Etsɔɔ mli akɛ, Biblia lɛ gba efɔ̃ shi yɛ 2 Timoteo yitso 3 lɛ akɛ je lɛ baaya nɔ atsɔ̃ gbɔmɛi ni bɛ suɔmɔ kwraa. Ni ekɛ kaimɔ ni eba yɛ be ni sa mli nɛɛ hã maŋsɛɛ sanekpakpa shiɛlɔi heei lɛ, yɛ bɔ ni awie suɔmɔ he ahã, yɛ 1 Korintobii 13:1-7 lɛ kɛ gbeekpamɔ naa, akɛ: “Ákɛ maŋsɛɛ sanekpakpa shiɛlɔi lɛ, ekolɛ nyɛbaaná ŋmɛlɛtswai ni fa fe bɔ ni ataoɔ yɛ nyɛdɛŋ lɛ. Ekolɛ nyɛná nilee babaoo kɛjɛ nyɛ Gilead tsɔsemɔ lɛ mli. Aloo ekolɛ wɔkɛ ŋmɛlɛtswai ni fa fe bɔ ni akpaa gbɛ lɛ baatsu nitsumɔi ni ahã wɔ yɛ nitsumɔ he nine lɛ kɛ ekãa. Shi wɔ mɔdɛŋbɔi kɛ afɔleshaai lɛ fɛɛ baafee efolo kɛji wɔhiɛ kpa nɔ akɛ wɔɔjie suɔmɔ kpo.”
Mɔ ni nyiɛ sɛɛ yɛ gbɛjianɔtoo lɛ mli ji Carey Barber, ni fata Nɔyeli Kuu lɛ he lɛ, ni ewie saneyitso ni ji “Yehowa Nyiɛ Wɔhiɛ Kɛmiiya Kunimyeli Mli” lɛ he. Yehowa Nyɔŋmɔ enyiɛ etsuji anɔkwafoi lɛ ahiɛ kɛtee kunimyeli mli, yɛ e-Maŋtsɛyeli lɛ he sanekpakpa lɛ jajemɔ mli, yɛ yiwaa ni amɛkɛkpe lɛ fɛɛ sɛɛ, kɛjɛ amɛ shishijee nibii bibii lɛ amli tɔ̃ɔ yɛ Jeŋ Ta I sɛɛ. Yɛ 1931 mli lɛ, Biblia Kaselɔi, taakɛ atsɛɔ amɛ yɛ nakai beaŋ lɛ, kpɛlɛ gbɛi ni ji Yehowa Odasefoi lɛ nɔ, ni enɛ wo Kristendom osɔfoi lɛ amlila waa. “Amrɔ nɛɛ maŋsɛɛ sanekpakpa shiɛlɔi ni atsɔse amɛ yɛ Gilead lɛ aklas ni ji 102 nɛɛ ena hegbɛ ni yɔɔ nyam akɛ amɛaaná gbɛfaŋnɔ wulu yɛ nitsumɔ ni yɔɔ nyam, ni ji hegbɛ ni akɛhaa mɛi babaoo bɔ ni aaanyɛ, koni amɛbale nakai gbɛi krɔŋkrɔŋ lɛ mli,” taakɛ Nyɛminuu Barber wie lɛ. Amɛfataa maŋsɛɛ sanekpakpa shiɛlɔi 7,131 sɔŋŋ ni atsɔse amɛ yɛ Gilead Skul lɛ mli, ní amɛye amɛbua ni alɛɛ Nyɔŋmɔ Wiemɔ lɛ shiɛmɔ lɛ mli kɛjɛ shikpɔji 54 nɔ yɛ 1943 kɛyashi shikpɔji 233 nɔ ŋmɛnɛ lɛ ahe.
Wielɔ ni nyiɛ sɛɛ, ni ji Lloyd Barry, ni lɛ hu efata Nɔyeli Kuu lɛ he lɛ, kɛ Gilead klas ni ji 11 lɛ gbe nikasemɔ naa, ni ekɛ nɔ ni fa fe afii 25 sɔmɔ akɛ maŋsɛɛ sanekpakpa shiɛlɔ yɛ Japan. Ekɛ hewalɛwoo hã yɛ ewiemɔ ni yitso ji, “Hii Shi yɛ Nii Nɛɛ Amli” lɛ mli. “Nyɛbaaná nyɛ miishɛɛ lɛ babaoo kɛjɛ tsuishiŋmɛɛ mli,” taakɛ ekɛɛ nikaselɔi lɛ. Mɛɛ sɛɛnamɔi jɛɔ tsui shi ni aŋmɛɔ yɛ maŋsɛɛ sanekpakpa shiɛmɔ nitsumɔ lɛ loo teokrase nitsumɔ kroko mli lɛ mli baa? “Nɔ ni fe fɛɛ lɛ, wɔ tsuishiŋmɛɛ lɛ hãa Yehowa tsui nyáa . . . Anáa tsui ni nyɔɔ mɔ mli babaoo kɛjɛɔ emuuyeli ni ahiɛɔ mli yɛ kaa shishi lɛ mli . . . Hã maŋsɛɛ sanekpakpa shiɛmɔ nitsumɔ lɛ afee oshihilɛ be mli nitsumɔ . . . Onyɔmɔwoo baafee ‘ahekoo’ ni haa mɔ miishɛɛ.” (Mateo 25:21; Abɛi 27:11) Beni emuɔ ewiemɔ lɛ naa lɛ, Nyɛminuu Barry kɛ miishɛɛ jie yi eha maŋsɛɛ sanekpakpa shiɛlɔi lɛ akɛ ‘amɛhi shi yɛ nii nɛɛ amli’ kɛtsɔ amɛfai shi ni amɛaatswa akɛ amɛaaha maŋsɛɛ sanekpakpa shiɛmɔ nitsumɔ lɛ afee amɛshihilɛ gbɛ diɛŋtsɛ lɛ nɔ.—1 Timoteo 4:16.
“Mɛni Obaana?” ji sanebimɔ ni Karl Adams, ní ena gbɛfaŋnɔ yɛ Gilead klas sɔrɔtoi pii atsɔsemɔ mli lɛ tée lɛ shi. Etsɔɔ mli akɛ, nɔ ni maŋsɛɛ sanekpakpa shiɛlɔi heei lɛ baana yɛ amɛ nitsumɔi lɛ amli lɛ damɔɔɔ amɛ heloonaa hiŋmɛii pɛ nɔ, shi moŋ ebaadamɔ amɛtsuiŋ hiŋmɛii hu nɔ. (Efesobii 1:18) Ekɛ nɔ ni Israelbii lɛ na beni amɛyakwɛ Shiwoo Shikpɔŋ lɛ nɔ lɛ fee enɛ he mfoniri. Saralɔi 12 lɛ fɛɛ na nɔ koome lɛ nɔŋŋ kɛji aawie he yɛ heloonaa, shi mɛi enyɔ pɛ na Shiwoo Shikpɔŋ lɛ yɛ Nyɔŋmɔ susumɔ naa. Maŋsɛɛ sanekpakpa shiɛlɔi hu baanyɛ akwɛ nibii yɛ gbɛi sɔrɔtoi anɔ. Ekolɛ amɛkɛ ohia, amanehulu, kɛ shihilɛ ni hiɛnɔkamɔ bɛ mli baakpe, yɛ shikpɔji ni amɛbaasɔmɔ yɛ nɔ lɛ ekomɛi anɔ. Shi esaaa ni amɛfeɔ amɛnii yɛ gbɛ ni ejaaa nɔ, ní amɛshiɔ amɛ nitsumɔ lɛ ni amɛyaa. Nyɛminuu Adams gba maŋsɛɛ sanekpakpa shiɛlɔ ko ni kɛ klas ko gbe nikasemɔ naa nyɛsɛɛ nɛɛ he sane akɛ ewie akɛ: “Niiashikpamɔi nɛɛ ha miyoo akɛ esa akɛ mahi biɛ. Hiɛnɔkamɔ kɛha wɔsɛɛ he miihia gbɔmɛi nɛɛ. Miisumɔ ni maha hiɛyaa aba amɛshihilɛ mli.” Nyɛminuu Adams wo maŋsɛɛ sanekpakpa shiɛlɔi heei lɛ hewalɛ ní amɛsusu shikpɔji ni aha amɛ nitsumɔ yɛ nɔ lɛ ahe akɛ hei ni Yehowa etswa efai shi akɛ ekɛbaafata E-Paradeiso ni baakpele shikpɔŋ muu lɛ fɛɛ nɔ lɛ he, ní amɛbu gbɔmɛi ni yɔɔ jɛmɛ lɛ akɛ mɛi ni baafee jeŋ gbɛjianɔtoo hee lɛ mli bii lɛ fã, ni ekɛmu ewiemɔ lɛ naa.
Mɔ ni ha naagbee wiemɔ kɛha gbɛjianɔtoo lɛ fã nɛɛ ji Wallace Liverance, ni kɛ afii pii sɔmɔ yɛ maŋsɛɛ sanekpakpa shiɛmɔ nitsumɔ lɛ mli dani ebatsɔ Gilead tsɔɔlɔ lɛ. Ewiemɔ lɛ yitso ji, “Okɛ Nyɔŋmɔ Nitsumɔi ni Yɔɔ Naakpɛɛ lɛ Mli Sɛɛyoomɔ Atsu Nii.” Sɛɛyoomɔ ni akɛaatsu nii lɛ tsɔɔ hiɛtɛɛ, nilee, kɛ jwɛŋmɔ kɛ hiɛshikamɔ ni akɛaatsu nii. No ji nɔ ko ni Israel Maŋtsɛ Saul efeee.—1 Samuel 13:9-13; 15:1-22.
Gbɛ kome ni aaatsɔ nɔ akɛ sɛɛyoomɔ atsu nii ji ni akpɛlɛ kaai ní jɛɔ he ni atsakeɔ awoɔ shihilɛ hee mli lɛ mli kɛbaa, tamɔ wiemɔ hee kasemɔ kɛ gbɔmɛi lɛ ni aaale amɛ nɛkɛ lɛ nɔ. Niiashikpamɔi ni maŋsɛɛ sanekpakpa shiɛlɔi náa yɛ kaai anaadaamɔ kɛ gbɛtsii nii anɔyeli mli lɛ baanyɛ awo amɛ hewalɛ yɛ mumɔŋ, tamɔ bɔ ni awo Yoshua kɛ Kaleb ekãa beni amɛyeɔ shikpɔŋ ni Nyɔŋmɔ etu ewo amɛdɛŋ lɛ nɔ kunim lɛ.
Saji ni Akɛ Mɛi Gba
Saji ni akɛ mɛi gba kɛtsara nɔ fata gbɛjianɔtoo lɛ fã ni nyiɛ sɛɛ lɛ he. Harold Jackson kɛ Ulysses Glass, ni kɛ be babaoo esɔmɔ akɛ Gilead Skul lɛ nɔkwɛlɔ kɛ tsɔɔlɔ, ni amrɔ nɛɛ eye afii 85 lɛ, gba sane. Maŋsɛɛ sanekpakpa shiɛlɔi ni yɔɔ hei ni ahã amɛ nitsumɔ yɛ lɛ lolo lɛ kaiɔ afii ni ekɛtsɔɔ nii, ní ekɛtsɔse mɛi yɛ anɔkwayeli mli lɛ jogbaŋŋ. Mɔ ni nyiɛ sɛɛ ji Mark Noumair, ni ji Gilead nitsɔɔlɔ ni kɛ afii pii tsu nii yɛ maŋsɛɛ sɔɔmɔ mli yɛ Afrika dani ebafata Gilead Skul tsɔɔlɔi lɛ ahe lɛ. Ebibii nikaselɔi lɛ nibii ni kɔɔ amɛsɔɔmɔ nitsumɔ lɛ he yɛ nyɔji enumɔ ni amɛkɛtee skul lɛ mli. Amɛ niiashikpamɔi lɛ tsɔɔ faŋŋ akɛ gbɔmɛi yɛ maŋ lɛ shikpɔŋkuku lɛ mli ní yɛ Nyɔŋmɔ Wiemɔ lɛ he miishɛɛ.
No sɛɛ lɛ, Robert Ciranko kɛ Charles Molohan kɛ hii ni yɔɔ niiashikpamɔ babaoo, ní amɛmiiya skul kroko, ni ji skul ni afee kɛha nitsumɔ he nine nɔkwɛlɔi, yɛ nikasemɔ he lɛ nɔŋŋ lɛ gba sane. Ŋaawoo ni amɛkɛha klas ni egbe nikasemɔ naa lɛ eko ji bɔ ni ehe hiaa ni amɛba amɛhe shi ni amɛye amɛbua ni ekomefeemɔ ahi asafo lɛ mli. Amɛwo ŋaa akɛ esaaa akɛ skulbii ni egbe nikasemɔ naa nɛɛ tsɔɔ hiɛ amɛnáa susumɔi komɛi yɛ nɔ ni baaba yɛ maŋsɛɛ sanekpakpa shiɛmɔ lɛ mli lɛ he, shi moŋ, amɛsumɔ akɛ amɛaakpɛlɛ nɔ fɛɛ nɔ ni amɛkɛaakpe lɛ nɔ. Ŋwanejee ko bɛ he akɛ ŋaawoo nɛɛ kɛ nitsumɔ baaye abua maŋsɛɛ sanekpakpa shiɛlɔi heei lɛ ni amɛgbe nitsumɔ ni akɛwo amɛdɛŋ akɛ Nyɔŋmɔ Wiemɔ lɛ tsɔɔlɔi lɛ naa.
Yɛ naagbee lɛ, Theodore Jaracz, ni fata Nɔyeli Kuu lɛ mli bii lɛ ahe lɛ, kɛ toibolɔi lɛ wie saneyitso ni ji “Mɛni Náa Namɔ nɔ Hewalɛ?” lɛ he. Etsɔɔ mli akɛ, kɛ́ wɔjie mumɔ lɛ yibii lɛ kpo akɛ Kristofoi lɛ, wɔbaanyɛ wɔná mɛi krokomɛi anɔ hewalɛ kpakpa. Ewie akɛ: “Maŋsɛɛ sanekpakpa shiɛlɔi ni Yehowa gbɛjianɔtoo lɛ tsuɔ amɛ lɛ efee nibii ni sa yijiemɔ waa amɛshwie shi, ni ji mɛi anɔ hewalɛ kpakpa ni amɛná yɛ mumɔŋ.” Kɛkɛ ni no sɛɛ lɛ etsĩ wiemɔi ni aŋkroaŋkroi komɛi ni maŋsɛɛ sanekpakpa shiɛlɔi anɔkwɛmɔ nii kpakpai eye ebua amɛ ní amɛmiisɔmɔ Nyɔŋmɔ lɛ wie lɛ atã. “Eba akɛ nyɛaahiɛ gbɛi kpakpa ni Yehowa webii ená lɛ mli, ni nyɛya nɔ nyɛshi nakai shinaai lɛ yɛ nyɛ maŋsɛɛ shikpɔji lɛ anɔ ni nyɛkɛtao mɛi ni sa lɛ . . . Agbɛnɛ hu, nyɛtsɔa nyɛjeŋba kpakpa ni he tse lɛ nɔ nyɛtea shi nyɛshia je nɛŋ mumɔ lɛ, ní nyɛfee mɛi ni náa mɛi anɔ hewalɛ kpakpa, kɛha Yehowa yijiemɔ kɛ hiɛnyamwoo,” taakɛ emu ewiemɔ lɛ naa lɛ.
Yɛ gbɛjianɔtoo lɛ naamuu mli lɛ, sɛinɔtalɔ lɛ kɛ ŋamɔi ni jɛ hei ni bɛŋkɛ kɛ hei ni jɛkɛ fɛɛ hã, ni no sɛɛ lɛ ekɛ skulbii lɛ ayijiemɔ woji hã amɛ ni etsɔɔ maŋsɛɛ hei ni aha amɛ maŋsɛɛ sanekpakpa shiɛmɔ nitsumɔ yɛ. No sɛɛ lɛ, skulbii ni egbe nikasemɔ naa lɛ ateŋ mɔ kome kane klas lɛ yiŋkpɛɛ ni ji shidaa ni amɛkɛhaa yɛ tsɔsemɔ ni akɛha amɛ lɛ he. Eyɛ faŋŋ akɛ, klas ni ji 102 lɛ nikasemɔ naagbee gbɛjianɔtoo lɛ hã mɛi fɛɛ ni ba jɛmɛ lɛ tswa amɛfai shi waa akɛ amɛbaaya hiɛ yɛ Nyɔŋmɔ Wiemɔ lɛ shiɛmɔ mli.
[Mfoniri ni yɔɔ baafa 31]
Buu-Mɔɔ Biblia Gilead Skul Klasbii ni Ji 102 ni Gbe Nikasemɔ Naa
Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔ gbɛ.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.