Maŋtsɛyeli Jajelɔi Bɔ Amaniɛ
Odaseyeli Miiwo Yibii yɛ Shia kɛ Skul
NƆ NI fata Kristofonyo shihilɛ he ji ejurɔ ni eeefee mɛi krokomɛi, titri lɛ kɛtsɔ Nyɔŋmɔ Maŋtsɛyeli lɛ he sanekpakpa lɛ ni ekɛ amɛ aaawie he lɛ nɔ. Abɛi 3:27 kɛɔ akɛ: “Mɛi ni sa ejurɔfeemɔ lɛ, kaakãmã amɛ, kɛji efeemɔ yɛ odɛŋ hewalɛ mli lɛ.” Yɛ Argentina lɛ, Odasefonyo gbekɛ ko ni yɔɔ sɛi ni ji etɛ nɔ yɛ nɔtsamɔ skul lɛ ná he miishɛɛ akɛ ekɛ eskul naanyo ko baagba Maŋtsɛyeli lɛ he sanekpakpa lɛ he sane. Nibii kpakpai jɛ enɛ ni efee lɛ mli ba.
Gbi ko lɛ, gbekɛ nuu Odasefonyo nɛɛ kɛɛ enaanyo lɛ akɛ jeee jamɔi lɛ fɛɛ ji ekpakpa. Beni obalanyo lɛ jie naa akɛ efeee nɔ fɔŋ ko lɛ, Odasefonyo lɛ kɛɛ lɛ akɛ: “Nakai nɔŋŋ hu ofeee nɔ ko kwraa ohaaa Nyɔŋmɔ.” Enɛ ha gbekɛ lɛ susu nii ahe waa. Sɛɛ mli lɛ, Odasefonyo lɛ tsɔɔ mli akɛ naagbee gbii lɛ nɛ, ni kɛji mɔ ko baana Nyɔŋmɔ nɔkpɛlɛmɔ lɛ, no lɛ esa akɛ mɔ lɛ ana Biblia mli anɔkwa nilee ni ekɛtsu nii hu. Eskul naanyo nɛɛ kpɛlɛ nɔ. Shi ani eweku lɛ baakpɛlɛ ni akɛ lɛ afee Biblia mli nikasemɔ? Bɔni afee ni ena nɔ ko ni ebaasusu he lɛ, Odasefonyo lɛ kɛɛ enaanyo lɛ akɛ ekane Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ.
Be saŋŋ ho, kɛkɛ ni enaanyo lɛ kpa skul baa. Enuuu ehe dɔŋŋ aahu fe afi. Kɛkɛ ni gbi ko lɛ, gbekɛ nuu Odasefonyo nɛɛ naanyo lɛ tswa lɛ tɛlifon ni ekpaaa gbɛ, ni ekɛɛ lɛ akɛ eena akɛ Biblia gbalɛi miiba mli anɔkwale lɛlɛŋ. Oya nɔŋŋ kɛkɛ ni Odasefonyo lɛ kɛ lɛ to gbɛjianɔ akɛ ekɛ lɛ baakase Biblia lɛ.
Beni etee etsutsu skul naanyo lɛ ŋɔɔ lɛ, ekadi akɛ enaanyo lɛ fɔlɔi miisumɔ waa ni amɛle nɔ ni amɛbi lɛ kɛ ehe woɔ mli lɛ. Enaanyo lɛ nyɛmi nuu fioo po susu akɛ nɔ ko miihe agba ejwɛŋmɔ naa. No hewɔ lɛ fɔlɔi lɛ ha enyɛmi nuu fioo lɛ yafata amɛhe yɛ nikasemɔ ni amɛfee yɛ no sɛɛ lɛ mli. Sɛɛ mli lɛ, gbekɛ nuu nɛɛ kɛ yaafonui yabɔ efɔlɔi amaniɛ akɛ nɔ ko kwraa gbaaa enyɛmi nukpa lɛ jwɛŋmɔ naa, kɛkɛ ni emami kɛ musuŋshaa wie akɛ, “Yɛ naagba kome najiaŋ lɛ, amrɔ nɛɛ mina enyɔ!”
No hewɔ lɛ, lɛ diɛŋtsɛ ebafata nikasemɔ ni nyiɛ sɛɛ lɛ he ni ehe bahia ni ekpɛlɛ nɔ akɛ nɔ ko gbaaa gbekɛbii hii lɛ ajwɛŋmɔ naa. Sɛɛ mli lɛ, akɛ lɛ kɛ ewu fɛɛ to Biblia mli nikasemɔ he gbɛjianɔ. Etsɛɛɛ kɛkɛ ni weku muu lɛ fɛɛ bɔi asafoŋ kpeei yaa yɛ Maŋtsɛyeli Asa lɛ nɔ. Yɛ be ko sɛɛ lɛ, gbekɛbii lɛ anii kɛ amɛnaa hu bɔi Biblia lɛ kasemɔ ni amɛbɔi kpeeiyaa hu. Kɛjɛ nakai beaŋ kɛbaa nɛɛ, abaptisi obalahii lɛ ateŋ klɛŋklɛŋ mɔ. Ebote gbalashihilɛ mli, ni ekɛ eŋa etsɔ shiɛlɔi ni yɔɔ ekaa waa.
Kɛfata he lɛ, kɛtsɔ odase ni eyeɔ trukaa yɛ skul lɛ nɔ lɛ, Odasefonyo gbekɛ nuu nɛɛ eye ebua eskulbii krokomɛi enyɔ, kɛ agbɛnɛ hu gbekɛbii nɛɛ ateŋ mɔ kome mami kɛ enyɛmi yoo ni amɛbɔi Biblia lɛ kasemɔ. Kɛ akane amɛ fɛɛ lɛ, mɛi 11 kase Biblia mli anɔkwale lɛ yɛ ejurɔfeemɔ ni Odasefonyo gbekɛ nuu nɛɛ kɛkãmãaa enanemɛi skulbii lɛ hewɔ. Kwɛ miishɛɛ sane ni jɛ mli kɛba! Lɛlɛŋ, “Ajɔɔ maŋ ni Yehowa ji e-Nyɔŋmɔ lɛ!”—Lala 144:15.