Etsɛŋ—Shihilɛ Kpakpa Baaba!

SUSUMƆ mɔ ni gbaa kɔɔyɔŋ tsakemɔ he sane efɔɔ shi ni bei pii lɛ ebaa mli pɛpɛɛpɛ lɛ he okwɛ. Kɛji akɛ egba yɛ gbɛkɛnaashi adafitswaa lɛ mli akɛ enɔ jetsɛremɔ lɛ nugbɔ baanɛ lɛ, oshashaooo shi kwraa akɛ oookɔ okataŋwia beni oshiɔ shia enɔ leebi lɛ. Tsutsu saji lɛ eha ona hekɛnɔfɔɔ. Otsuɔ nɔ ni ekɛɔ lɛ he nii.

Agbɛnɛ, te Yehowa shiwoo ni kɔɔ shihilɛ kpakpa yɛ shikpɔŋ nɔ paradeiso he lɛ ji anɔkwale ha tɛŋŋ? Ojogbaŋŋ, mɛni tsutsu nibii ni egba efɔ shi lɛ tsɔɔ? Biblia gbalɛi amlibaa maa nibii ni Yehowa etsu lɛ anɔ mi. Eji Nyɔŋmɔ ni ewiemɔ fɛɛ ja ni enɔkwayeli ekaaa shi. (Yoshua 23:14; Yesaia 55:11) Bɔ ni anyɛɔ akɛ he fɔɔ Yehowa Nyɔŋmɔ shiwooi anɔ aahu ahaa hewɔ lɛ, yɛ bei komɛi amli lɛ ewieɔ wɔsɛɛ be mli nibii ni baaba lɛ ahe diɛŋtsɛ tamɔ nɔ ni amɛba mli momo po. Akɛ nɔkwɛmɔ nɔ lɛ, beni ekɛ eshiwoo ni kɔɔ jeŋ hee ni gbele kɛ awerɛho bɛ mli dɔŋŋ he lɛ ha sɛɛ lɛ, wɔkaneɔ akɛ: “[Shiwoo jɔɔmɔi lɛ] amɛba mli!” Yɛ gbɛ kroko nɔ lɛ, “Anɔkwale ni!”—Kpojiemɔ 21:5, 6, NW shishigbɛ niŋmaa.

Hɛɛ, Yehowa tsutsu shiwooi amlibaa haa wɔnaa hekɛnɔfɔɔ yɛ eshiwoo ni ekɛha adesai yɛ shihilɛ kpakpa he lɛ mlibaa mli. Shi, mɛɛ be shihilɛ kpakpa nɛɛ baaba?

Shihilɛ Kpakpa—Mɛɛ Be?

Etsɛŋ ni shihilɛ kpakpa diɛŋtsɛ baaba! Wɔbaanyɛ wɔna nɔmimaa yɛ enɛ he, ejaakɛ Biblia lɛ kɛɔ akɛ nibii gbohii pii baaba shikpɔŋ nɔ beni eshwɛ fioo ni Paradeiso kɛ shihilɛ kpakpa aaaba lɛ. Nakai nibii gbohii lɛ miiya nɔ bianɛ.

Akɛ nɔkwɛmɔ nɔ lɛ, Yesu Kristo gba akɛ tai wuji baaba. Ekɛɛ: “Shi maŋ aaate shi awo maŋ, ni maŋtsɛyeli aaate shi awo maŋtsɛyeli.” (Mateo 24:7) Gbalɛ nɛɛ eba mli anɔkwale. Kɛjɛ afi 1914 kɛbashi 1945 lɛ, awuu jeŋ tai sɔrɔtoi enyɔ, ni tai krokomɛi babaoo ni maŋ kome kɛ maŋ kroko ewuu etee nɔ enyiɛ enɛɛmɛi asɛɛ. “Kɛ aja mli afi fɛɛ afi lɛ, gbelei ni tawuu kɛba yɛ nɛkɛ be nɛɛ mli [kɛjɛ Jeŋ Ta II sɛɛ lɛ] eku ebɔ he toi enyɔ fe gbelei ni ba yɛ afii ohai 19 lɛ mli, ni efe afii ohai 18 lɛ mli nɔ̃ lɛ toi kpawo.”—World Military and Social Expenditures 1993.

Helai ni gbɛɔ shwaa lɛ hu ji odaseyeli kroko ni tsɔɔ bɔ ni shihilɛ kpakpa yɛ Paradeiso ebɛŋkɛ eha. Yesu gba akɛ, ‘gbele helai baaba hei sɔrɔtoi fɛɛ.’ (Luka 21:11) Ani gbalɛ nɛɛ eba mli anɔkwale? Hɛɛ. Yɛ klɛŋklɛŋ jeŋ ta lɛ sɛɛ lɛ, Spania aja lɛ gbe gbɔmɛi fe akpekpei 20. Kɛjɛ no sɛɛ kɛbaa nɛɛ, kansa, tsui hela, atiridii, AIDS, kɛ helai krokomɛi egbe gbɔmɛi akpekpei abɔ. Helai ni jɛɔ nui amli mujiwoo (ni musuŋtsɔmɔ kɛ mlinii amli didiŋtrɔ helai fata he) gbeɔ mɛi akpekpei abɔ daa afi yɛ maji ni kpaako amɛnaa nɔyaa lɛ amli.

Yesu kɛɛ hu akɛ: “Hɔmɔ baaba.” (Mateo 24:7, NW) Taakɛ wɔyoo yɛ sane ni tsɔ hiɛ lɛ mli lɛ, ohiafoi ni yɔɔ je lɛŋ lɛ bɛ niyenii ni fa ni amɛaaye. Enɛ ji odaseyeli lɛ fa kroko akɛ, etsɛŋ kwraa ni shihilɛ kpakpa yɛ Paradeiso baaba.

Yesu kɛɛ “Ni shikpɔŋ hosomɔi ni naa wa aaaba hei sɔrɔtoi fɛɛ.” (Luka 21:11) Enɛ hu eba mli anɔkwale yɛ wɔbe nɛɛ mli. Kɛjɛ 1914 kɛbaa nɛɛ, hiɛkpatamɔ ni shikpɔŋ hosomɔ kɛba lɛ egbe gbɔmɛi akpei ohai abɔ.

Biblia lɛ kɛɔ lolo akɛ nɔ ni baakadi “naagbee gbii” lɛ ji tsakemɔ ni baaba gbɔmɛi ateŋ. Amɛbaafee “hesuɔlɔi” kɛ “shika suɔlɔi,” ni gbekɛbii baafee “fɔlɔi anɔ toigbolɔi.” Gbɔmɛi baafee “mɛi ni sumɔɔ shwɛmɔ kɛ ŋɔɔmɔ fe Nyɔŋmɔ.” (2 Timoteo 3:1-5) Ani okpɛlɛɛɛ nɔ akɛ mɛi pii tamɔ bɔ ni atsɔɔ mli aha nɛɛ?

Yɛ be mli ni gbɔmɛi babaoo yaa nɔ amɛfeɔ nibii fɔji lɛ, ehaa mlakwamɔ faa. Agba enɛ hu afɔ shi. Taakɛ Mateo 24: 12 lɛ, Yesu wie ‘mlakwamɔ ni baafa’ he. Eka shi faŋŋ akɛ obaakpɛlɛ nɔ akɛ efɔŋ feemɔ efa waa bianɛ fe bɔ ni eji afii komɛi ni eho lɛ. Gbɔmɛi ni yɔɔ he fɛɛ he lɛ miishe gbeyei akɛ abaatswa amɛ ojo, abaashishiu amɛ, loo aye amɛ awui yɛ gbɛ ko nɔ.

Tai, helai ni egbɛ eshwa, hɔmɔ, shikpɔŋ hosomɔi, efɔŋ feemɔ ni yaa hiɛ, kɛ tsakemɔ ni ehiii ni eba adesa kɛ mɛi krokomɛi ateŋ sharamɔ mli—enɛɛmɛi fɛɛ eje kpo faŋŋ ŋmɛnɛ, taakɛ Biblia lɛ gba fɔ shi lɛ. Shi obaabi akɛ, ‘Ani nɛkɛ nibii nɛɛ fɛɛ eyako nɔ yɛ adesa yinɔsane be fɛɛ mli? Mɛni yɔɔ sɔrɔto yɛ wɔgbii nɛɛ ahe?’

Nibii komɛi yɛ ni sa kadimɔ jogbaŋŋ yɛ nɔ ni yaa nɔ ŋmɛnɛ lɛ he. Biblia lɛ ekɛɛɛ akɛ nɔ kome ko diɛŋtsɛ, tamɔ hɔmɔ, baaye odase akɛ wɔyɛ naagbee be lɛ mli, ni akɛ shihilɛ kpakpa ebɛŋkɛ. Biblia mli gbalɛi ni kɔɔ naagbee be lɛ he lɛ baaba mli yɛ yinɔ ko ni leee Nyɔŋmɔ lɛ nɔ.—Mateo 24:34-39; Luka 17:26, 27.

Agbɛnɛ hu, eji nɔ ko ni ekaaa kwraa akɛ Yesu gbalɛ lɛ mli nibii komɛi—titri lɛ, nɔ ni kɔɔ hɔmɔ kɛ helai ni egbɛ eshwa he lɛ—miiba mli ŋmɛnɛ. Mɛni hewɔ? Ejaakɛ jeŋ nilee etee hiɛ fe bei fɛɛ ni eho. Tsofafeemɔ he nilee kɛ helatsamɔi sɔrɔtoi etee hiɛ waa loo egbɛ eshwa waa. Nyɔŋmɔ pɛ ji mɔ ni baanyɛ agba yɛ e-Wiemɔ, Biblia lɛ mli, akɛ hela kɛ hɔmɔ mli baawo wu, shi jeee ni eeehi, yɛ nɛkɛ be nɛɛ mli.

Akɛni Biblia lɛ mli gbalɛi fɛɛ ni kɔɔ naagbee be, loo “naagbee gbii” lɛ ahe lɛ miiba mli anɔkwale hewɔ lɛ, te wɔɔmu sane naa wɔha tɛŋŋ? Akɛ shihilɛ kpakpa ebɛŋkɛ! Shi mɛɛ gbɛ nɔ ebaatsɔ eba?

Shihilɛ Kpakpa —Yɛ Mɛɛ Gbɛ Nɔ?

Ani osusuɔ akɛ adesai baanyɛ ni amɛkɛ Paradeiso aba? Adesa nɔyelii sɔrɔtoi ehi shi kɛjɛ adesa yinɔsane be fɛɛ mli kɛbashi ŋmɛnɛ. Ekomɛi bɔ mɔdɛŋ waa ni amɛha gbɔmɛi anine ashɛ amɛ hiamɔ nii anɔ. Shi, naagbai lɛ miiwo wu kwraa moŋ. Nɔyelii kɛ tsofai ni akɛtsuɔ nii yɛ gbɛ fɔŋ nɔ, shiai kpakpa ni anaaa, ohia, efɔŋ feemɔ, nitsumɔ ni bɛ, kɛ tawuu miipele yɛ maji ni yɔɔ shika lɛ kɛ maji ni yeɔ ohia lɛ fɛɛ mli.

Kɛji akɛ nɔyelii baanyɛ ana naagbai nɛɛ ekomɛi anaa tsabaa po lɛ, amɛnyɛŋ amɛkɛ hela mli heyeli kwraa aba kɔkɔɔkɔ; ni asaŋ amɛnyɛŋ amɛha gbɔlɛ kɛ gbele aba naagbee. Eyɛ faŋŋ akɛ, adesai kɛ Paradeiso baŋ shikpɔŋ nɛɛ nɔ kɔkɔɔkɔ.

Biblia lɛ kɛ nilee wieɔ akɛ: “Nyɛkaŋɔa nyɛhiɛ nyɛfɔa lumɛi loo gbɔmɔ bi ko ni yelikɛbuamɔ ko bɛ edɛŋ lɛ nɔ.” Belɛ, namɔ nɔ esa akɛ wɔkɛ wɔhiɛ afɔ? Biblia lɛ haa hetoo: “Ajɔɔ mɔ ni Yakob Mawu lɛ ji ebualɔ, ni ehiɛ ka Yehowa, e-Nyɔŋmɔ lɛ, nɔ lɛ.” (Lala 146:3, 5) Kɛ wɔkɛ wɔhiɛ fɔ Yehowa Nyɔŋmɔ nɔ lɛ, wɔhiɛnɔkamɔ efeŋ yaka kɔkɔɔkɔ.

Yɛ anɔkwale mli lɛ, Mɔ ni yɔɔ nilee kɛ hewalɛ ni ekɛaabɔ shikpɔŋ lɛ, hulu, kɛ ŋulamii lɛ hu baanyɛ afee shikpɔŋ lɛ paradeiso. Ebaanyɛ eha adesai ana shihilɛ kpakpa mli ŋɔɔmɔ. Nɔ fɛɛ nɔ ni Yehowa Nyɔŋmɔ aaaje shishi akɛ eeefee lɛ, ebaanyɛ egbe naa hu. E-Wiemɔ lɛ kɛɔ akɛ: “Nɔ ko nɔ ko bɛ ni Nyɔŋmɔ nyɛŋ afee.” (Luka 1:37) Shi mɛɛ gbɛ nɔ Nyɔŋmɔ baatsɔ ni ekɛ shihilɛ kpakpa aba?

Yehowa baatsɔ e-Maŋtsɛyeli lɛ nɔ ni ekɛ shihilɛ kpakpa abaha adesai. Ni mɛni ji Nyɔŋmɔ Maŋtsɛyeli lɛ? Eji nɔyeli diɛŋtsɛ ni yɔɔ Nɔyelɔ ni Nyɔŋmɔ ehala lɛ, Yesu Kristo. Nyɔŋmɔ Maŋtsɛyeli lɛ shihilɛ he yɛ ŋwɛi, shi etsɛŋ ni ekɛ naakpɛɛ jɔɔmɔi kɛ shihilɛ kpakpa baaba abaha mɛi ni yɔɔ shikpɔŋ nɔ Paradeiso lɛ mli lɛ.—Yesaia 9:5, 6.

Ekolɛ ole Yesu sɔlemɔ nɔkwɛmɔ nɔ ni anaa yɛ Biblia lɛ mli yɛ Mateo 6:9-13 (NW) lɛ jogbaŋŋ. Nakai sɔlemɔ ni afee aha Nyɔŋmɔ lɛ fa ko kɛɔ akɛ: “Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ hu, taakɛ afeɔ yɛ ŋwɛi lɛ.” Yɛ nakai sɔlemɔ lɛ kɛ gbeekpamɔ naa lɛ, Nyɔŋmɔ Maŋtsɛyeli lɛ ‘baaba’ ni ebatsu Yehowa Nyɔŋmɔ yiŋtoo kɛha shikpɔŋ lɛ he nii. Ni eyiŋtoo ji ni shikpɔŋ lɛ atsɔ paradeiso.

Naagbee sanebimɔ ko teɔ shi: Mɛni esa akɛ ofee koni ona shihilɛ kpakpa yɛ Paradeiso ni baa lɛ mli ŋɔɔmɔ?

Nɔ ni Ehe Hiaa ni Ofee

Yehowa Nyɔŋmɔ ejɛ suɔmɔ mli ekɛ shihilɛ kpakpa yɛ Paradeiso he gbɛkpamɔ miiha mɛi fɛɛ ni feɔ esuɔmɔnaa nii. Biblia lɛ kɛɔ wɔ akɛ: “Jalɔi lɛ, shikpɔŋ lɛ aaatsɔ amɛnɔ, ni amɛaahi nɔ daa.” (Lala 37:29) Shi mɛni feɔ mɔ ko jalɔ yɛ Nyɔŋmɔ hiɛ?

Bɔni afee ni wɔsa Yehowa hiɛ lɛ, ehe hiaa ni wɔkase nɔ ni etaoɔ ni wɔfee lɛ he nii babaoo. Kɛ wɔna Nyɔŋmɔ he nilee ni wɔkɛtsu nii yɛ wɔshihilɛ mli lɛ, wɔbaanyɛ wɔhi shi kɛya naanɔ. Yesu kɛɛ yɛ sɔlemɔ ko ni esɔle eha Nyɔŋmɔ lɛ mli akɛ: “Enɛ ji naanɔ wala lɛ, akɛ amɛaana bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ he nilee.”—Yohane 17:3, NW.

Wolo ni wieɔ Yehowa Nyɔŋmɔ kɛ Yesu Kristo he ji Nyɔŋmɔ Wiemɔ, Biblia lɛ. Eji Yehowa nikeenii ni jara wa waa fe fɛɛ lɛ ateŋ ekome. Biblia lɛ tamɔ wolo ni tsɛ ni yɔɔ suɔmɔ eŋma ebii. Egbaa wɔ Nyɔŋmɔ shiwoo akɛ ekɛ shihilɛ kpakpa baaba abaha adesai lɛ he sane, ni etsɔɔ wɔ gbɛ ni wɔɔtsɔ nɔ ni wɔnine ashɛ nɔ. Biblia lɛ haa wɔleɔ nɔ ni Nyɔŋmɔ efee yɛ tsutsu, kɛ nɔ ni ebaafee yɛ wɔsɛɛ. Agbɛnɛ hu ekɛ ŋaawoo ni kɔɔ bɔ ni wɔɔfee wɔtsu wɔnaagbai ahe nii yɛ omanyeyeli mli haa wɔ. Yɛ anɔkwale mli lɛ, Nyɔŋmɔ Wiemɔ lɛ tsɔɔ wɔ bɔ ni wɔɔfee wɔna miishɛɛ ko kɛ̃ yɛ jeŋ ni haomɔ yɔɔ mli nɛɛ po mli.—2 Timoteo 3:16, 17.

Yehowa Odasefoi kɛ miishɛɛ baato shia Biblia mli nikasemɔ he gbɛjianɔ aha bo ni aheee bo nɔ̃ ko. Kasemɔ bɔ ni ooofee ona miishɛɛ shihilɛ bianɛ, kɛ gbɛkpamɔ kɛha shihilɛ kpakpa yɛ wɔsɛɛ be ni ebɛŋkɛ lɛ mli.

[Mfoniri ni yɔɔ baafa 5]

Biblia gbalɛi tsɔɔ akɛ shihilɛ kpakpa ebɛŋkɛ

[Mfoniri ni yɔɔ baafa 7]

Nyɔŋmɔ Maŋtsɛyeli lɛ kɛ shihilɛ kpakpa baaba abaha adesai