Amɛ Là lɛ Gbooo
YEHOWA ODASEFOI anɔkwafoi kɛ haomɔi kɛ shihilɛi ni mli wawai kpe yɛ Biblia bei amli, taakɛ eji ŋmɛnɛ lɛ. Amɛkɛ shitee-kɛ-woo kɛ hiɛnɔkamɔi ni feɔ yaka kpe. Ni kɛlɛ, amɛŋmɛɛɛ he yɛ nijiaŋwujee hewɔ. Ni tsɔɔ akɛ, amɛla lɛ gbooo.
Akɛ nɔkwɛmɔ nɔ lɛ, akɛ nitsumɔ wo gbalɔ Yeremia dɛŋ akɛ efee Nyɔŋmɔ gbalɔ kɛha Yuda maŋ ni ekwa hemɔkɛyeli lɛ. Ejaje kɔkɔbɔɔ ni kɔɔ Yerusalem hiɛkpatamɔ ni baa lɛ he lɛ etsɔɔ. (Yeremia 1:11-19) Yɛ enɛ hewɔ lɛ, Yeremia maŋ bii ni buɔ lɛ akɛ eji amanehulu he adafitswalɔ lɛ te shi wo lɛ babaoo.
Osɔfo Pashur, Nyɔŋmɔ we lɛ nɔ lumɔ lɛ yi Yeremia be ko yɛ nɔ ni egba lɛ hewɔ ni ebɔ lɛ apã. Yɛ nɔ ni tamɔ enɔ ni aye nɛɛ hewɔ lɛ, Yeremia kɛɛ: “Mitsɔ mɔ ni aŋmɔɔ lɛ daa jenamɔ, mɔ fɛɛ mɔ yeɔ mihe fɛo po. Be fɛɛ be ni miwieɔ lɛ, ja mibolɔ, mibolɔɔ akɛ: Yiwalɛ kɛ haomɔ sɔŋŋ! Ejaakɛ Yehowa wiemɔ lɛ etsɔ ahorabɔɔ kɛ hefɛoyeli eha mi daa jenamɔ.” Gbalɔ lɛ nijiaŋ je wui kɛyashɛ he ni ekɛɛ akɛ: “Mitsiŋ [Yehowa] ta ni miwieŋ yɛ egbɛi anɔ dɔŋŋ.”—Yeremia 20:1, 2, 7-9.
Shi, Yeremia eŋmɛɛɛ ehe ehaaa nijiaŋwujee. Beni ewieɔ “Yehowa wiemɔ” he lɛ, ejaje akɛ: “Etsɔ tamɔ la ni tsoɔ yɛ mitsui mli, ni aŋa yi awo miwui amli; enaatsii etɔ mi, ni minyɛɛɛ.” (Yeremia 20:8, 9) Akɛni eyɔɔ kanyamɔ waa akɛ eeejaje Nyɔŋmɔ shɛɛ saji lɛ hewɔ lɛ, mumɔ krɔŋkrɔŋ waje Yeremia ni etsu enitsumɔ lɛ egbe naa.
Bɔfo Paulo hu yɛ yiŋtoi babaoo ni baaha enijiaŋ aje wui, kɛ eŋmɛɛ ehe eha nomɛi. Eŋmɛ etsui shi yɛ adebɔɔ naa osharai, lɛlɛ kɛ shishamɔi, yiwaai, kɛ yii amli. Kɛfata he lɛ, ‘nɔ ni haoɔ lɛ daa gbi ji yeyeeye ni efeɔ yɛ asafoi lɛ fɛɛ hewɔ.’ (2 Korintobii 11:23-28) Hɛɛ, esa akɛ Paulo atsu naagbai ahe nii daa gbi, ehaoɔ yɛ asafoi heei ni eye ebua ni ato lɛ ahe. Agbɛnɛ hu eyeee emuu, ni esa akɛ edamɔ ‘ŋmei ko ni yɔɔ eheloo mli,’ ekolɛ ehiŋmɛi ni enaaa nii jogbaŋŋ lɛ naa. (2 Korintobii 12:7; Romabii 7:15; Galatabii 4:15) Mɛi komɛi po wie shi Paulo yɛ esɛɛ, ni enu enɛ he yɛ sɛɛ mli.—2 Korintobii 10:10.
Ni kɛlɛ, Paulo eŋmɛɛɛ gbɛ koni nijiaŋwujee aye enɔ. Dabi, ejeee mɔ ni ehewalɛ fe adesa nɔ̃. (2 Korintobii 11:29, 30) Mɛni ha ‘emligbɛ la’ lɛ tee nɔ etso lɛ? Nɔ kome ji akɛ, eyɛ enanemɛi ni yeɔ buaa lɛ, mɛi komɛi po fata ehe kɛtee Roma, he ni aha ehi shia ni asraafonyo ko buɔ ehe yɛ lɛ. (Bɔfoi lɛ Asaji 28:14-16) Nɔ ni ji enyɔ lɛ, bɔfo lɛ kwɛ shihilɛ mli ni eyɔɔ lɛ yɛ gbɛ ni ŋmɛɔ pɛpɛɛpɛ nɔ. Mɛi ni waa eyi lɛ kɛ mɛi ni teɔ shi woɔ lɛ lɛ ji mɛi ni yeɔ fɔ, jeee Paulo. Kɛmiiba eshikpɔŋ nɔ sɔɔmɔ lɛ naagbee lɛ, eŋmɛ esɔɔmɔ lɛ ekwɛ yɛ gbɛ ni ja nɔ ni ekɛɛ: “Nɔ ni eshwɛ ni ka shi ha mi ji jalɛ akekre lɛ, ni Nuntsɔ ni ji jalɛ kojolɔ lɛ baaha mi yɛ nakai gbi lɛ nɔ lɛ.”—2 Timoteo 4:8.
Nɔ ni fe fɛɛ lɛ, Paulo yaa Yehowa Nyɔŋmɔ ŋɔɔ yɛ sɔlemɔ mli daa, ni ‘Nuntsɔ lɛ damɔ emasɛi ni ewo lɛ hewalɛ.’ (2 Timoteo 4:17) Paulo kɛɛ: “Minyɛɔ nii fɛɛ mifeɔ yɛ mɔ ni wajeɔ mi . . . lɛ mli.” (Filipibii 4:13) Sharamɔ ni akɛ Nyɔŋmɔ kɛ nanemɛi Kristofoi yeɔ, kɛ bɔ ni ekɛ jwɛŋmɔ kpakpa kwɛɔ esɔɔmɔ lɛ ye bua Paulo ni eha etee nɔ yɛ Yehowa sɔɔmɔ mli.
Nyɔŋmɔ kɛ mumɔ tsirɛ Paulo ni eŋma akɛ: “Shi nyɛkahaa ekpakpa-feemɔ miitɔa wɔ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.” (Galatabii 6:7-9) Wɔbaakpa mɛni? Naanɔ wala. No hewɔ lɛ, feemɔ tamɔ Yeremia, Paulo, kɛ Yehowa odasefoi anɔkwafoi krokomɛi babaoo ni atsi amɛ tã yɛ Ŋmalɛi lɛ amli lɛ. Hɛɛ, feemɔ tamɔ amɛ, ni kaaŋmɛɛ he oha nijiaŋwujee. Kaaha ola lɛ miigbo.—Okɛto Mateo 5:14-16 he.
[Mfonirii ni yɔɔ baafa 25]
Paulo kɛ Yeremia haaa amɛla lɛ agbo