Sanekpakpa Kã Wɔhiɛ!

WƆ FƐƐ wɔyeɔ awerɛho kɛ wɔnu sane fɔŋ ko ni kɔɔ wɔhe. Shi yɛ gbɛ kroko nɔ lɛ, wɔmli filiɔ wɔ kɛ wɔnu sanekpakpa—miishɛɛ saji ni kɔɔ wɔ kɛ wɔ suɔlɔi ahe. Shi kɛji akɛ sane fɔŋ ko ba mɛi krokomɛi anɔ shi jeee wɔ lɛ, wɔsumɔɔ ni wɔle nɔ ni eba; mɛi komɛi po nyãa kɛ amɛnu ni nɔ fɔŋ ko eba mɛi krokomɛi anɔ. Enɛ baanyɛ atsɔɔ nɔ hewɔ ni mɛi heɔ adafitswaa woji ni wieɔ sane fɔŋ he babaoo lɛ mli yɛ gbɛ ko nɔ!

Yɛ Jeŋ Ta II shishijee mli lɛ, afee bɔ ni mɛi nyãa amanehulu ni baa mɛi anɔ lɛ he nɔkwɛmɔ nɔ yɛ gbɛ ni yɔɔ gbeyei nɔ kɛtsɔ nibii ni aŋmala lɛ anɔ. Tawuu lɛlɛ ni he yɔɔ oya ni akɛ tawuu nii ewula lɛ ni etsiimɔ shɛɔ tɔn 10,000, Graf Spee, ji German tawuu lɛji lɛ ateŋ nɔ ni ashwɛɛɛ he kwraa yɛ 1939. Tawuu lɛlɛ nɛɛ kɛ afii babaoo tee nɔ efite maji ni kɛ amɛ wuɔ ta lɛ ajarayeli lɛji ni tsɔɔ Atlantik Wuoyigbɛ kɛ India ŋshɔi lɛ ahiɛ lɛ babaoo. Yɛ naagbee lɛ, Britania tawuu lɛji etɛ gbɔbi ni amɛtutua Graf Spee lɛ, emli bii babaoo gboi ni anyɛ lɛlɛ lɛ nɔ kɛtee Uruguay-bii alɛji adaamɔ he yɛ Montevideo koni ayasaa. Uruguay nɔyeli lɛ fã ni tawuu lɛlɛ lɛ ashi jɛmɛ kɛya ŋshɔ hiɛ ekoŋŋ, kɛ jeee nakai lɛ abaatsi naa. No hewɔ lɛ, etamɔ nɔ ni tawuu ni mli wa ni afa kome pɛ baaye kunim miihe afɛ.

Beni United States nitsumɔtsɛmɛi akuu ko ni yɔɔ shika babaoo nu enɛ he lɛ, amɛhai kɔɔyɔŋ lɛlɛ ni amɛteŋ mɔ fɛɛ mɔ baawo shika ni shɛɔ $2,500 koni amɛkɛya Uruguay koni amɛyakwɛ tawuu ni shwieɔ la shi babaoo nɛɛ. Amɛ hiɛnɔkamɔ fee yaka, ejaakɛ tawuu lɛ baaa nɔ. Adolf Hitler fã ni ashiu Graf Spee lɛ. Nɔ ni gbɔmɛi akpei abɔ ni eba ŋshɔ lɛ naa ni miikpa gbɛ akɛ amɛbaana ŋshɔ hiɛ tawuu ni mli wa lɛ na ni amɛnu ji gbɛɛmɔ agbo ko ni ha Graf Spee shiu, emli bii lɛ shiu lɛ. Lɛlɛtsɛ lɛ gbe ehe kɛtsɔ eyitso tu ni etswa nɔ.

Yɛ kadimɔ nii ni yɔɔ gbeyei ni yɔɔ mɛi komɛi amli lɛ fɛɛ sɛɛ lɛ, mɛi pii baakpɛlɛ nɔ akɛ amɛsumɔɔ sanekpakpa fe sane fɔŋ. Ani onuuu he nakai? Belɛ mɛni hewɔ yinɔsane gbaa sane fɔŋ babaoo kɛ sanekpakpa fioo pɛ lɛ? Ani abaanyɛ atsake shihilɛ lɛ be ko?

Nibii ni kɛ Saji Fɔji Fɛɛ Baa

Biblia lɛ gbaa be mli ni sanekpakpa pɛ ji nɔ ni yɔɔ lɛ he sane. No mli lɛ sane fɔŋ ji nɔ ko ni aleee, anuko dã. Beni Yehowa Nyɔŋmɔ gbe enibɔɔ nitsumɔi lɛ anaa lɛ, no mli lɛ shibɔlemɔ ŋulami Shikpɔŋ efee klalo koni gbɔmɔ kɛ kooloo ana mli ŋɔɔmɔ. 1 Mose sane lɛ kɛɔ wɔ akɛ: “Ni Nyɔŋmɔ kwɛ nibii fɛɛ ni efee lɛ, ni naa, ehi naakpa.”—1 Mose 1:31.

Sane fɔŋ ni bɛ lɛ sɛɛ etsɛɛɛ yɛ gbɔmɔ bɔɔ sɛɛ. Dani Adam kɛ Hawa aaafɔ bii lɛ, abɔ sane fɔŋ ni ji atua ni atse ashi Nyɔŋmɔ kɛ ejeŋ muu fɛɛ gbɛjianɔtoo kpakpa lɛ he amaniɛ. Mumɔŋ bi ko ni nɔ kwɔ waa batsɔ kutumpɔfo ni yeee gbɛhe ni akɛwo edɛŋ lɛ anɔkwa, ni enyɛ egbala klɛŋklɛŋ adesai enyɔ lɛ koni amɛbafata ehe yɛ etuatsemɔ kɛ esɛɛgbɛtsɔɔmɔ gbɛ lɛ mli.—1 Mose 3:1-6.

Saji fɔji babaoo ni gbɔmɛi ena lɛ ná amɛshishijee kɛjɛ nakai be lɛ mli. Ebɛ naakpɛɛ mɔ akɛ shishiumɔ, lakamɔ, amalei, saji ni jeee anɔkwale, kɛ anɔkwale fãfãafãi eje kpo waa yɛ saji fɔji ni egbɛ eshwa je lɛŋ fɛɛ kɛjɛ nakai be lɛ mli lɛ mli. Yesu Kristo kɛ shwamɔ lɛ fɔ Satan Abonsam nɔ akɛ sane fɔŋ shishijelɔ, ni ekɛɛ E-gbii lɛ amli jamɔ mli hiɛnyiɛlɔi lɛ akɛ: “Nyɛ lɛ nyɛtsɛ ni nyɛjɛ emli ji abonsam, ni nyɛtsɛ lɛ tsinebaa nii nyɛsumɔɔ akɛ nyɛfee. Lɛ lɛ gbɔmɔgbelɔ ji lɛ kɛjɛ teteete, ni edamɔɔɔ anɔkwale lɛ mli, ejaakɛ anɔkwale bɛ emli. Kɛ eemale lɛ, lɛ diɛŋtsɛ enii ahe ewieɔ, ejaakɛ amalelɔ kɛ malemɔtsɛ ji lɛ.”—Yohane 8:44.

Beni gbɔmɛi ayifalɛ tee hiɛ lɛ, saji fɔji fa kɛtee hiɛ. Shi kɛlɛ, enɛ etsɔɔɔ akɛ nyamɔ kɛ miishɛɛ be ko kwraa baaa, ejaakɛ nibii pii yɛ shihilɛ mli ni tsɔɔ miishɛɛ loo ekɛ nyamɔ baa. Kɛlɛ, ana haomɔ kɛ awerɛho he atatui yɛ adesa yinɔi fɛɛ mli kɛbashi bianɛ.

Nɔ kroko yɛ ni kɛ shihilɛ fɔŋ nɛɛ baa. No ji bɔ ni wɔdɔɔ kɛyaa efɔŋ feemɔ kɛ amanehulu he ni wɔna kɛjɛ fɔmɔ mli lɛ. Yehowa diɛŋtsɛ kɛ ewao tsɔɔ nɛkɛ nii ni kɛ sane fɔŋ baa ni anyɛŋ ajo naa foi nɛɛ ni ekɛɛ akɛ: ‘Gbɔmɔ tsuiŋ jwɛŋmɔ lɛ, efɔŋ eji kɛjɛ egbekɛbiiashi.’—1 Mose 8:21.

Mɛni Hewɔ Saji Fɔji Faa Babaoo Lɛ?

Shi, yiŋtoo ko yɛ nɔ hewɔ ni saji fɔji efa babaoo yɛ afii ohai 20 nɛɛ mli lɛ sɛɛ. Atsɔɔ yiŋtoo nɛɛ mli faŋŋ yɛ Biblia lɛ ni gba akɛ adesai ni yɔɔ afii ohai 20 nɛɛ mli lɛ baabote be ko ni yɔɔ sɔrɔto ni ale akɛ “naagbee gbii” loo “naagbee be” lɛ amli lɛ mli. (2 Timoteo 3:1; Daniel 12:4) Biblia gbalɛ kɛ Biblia be he akɔntaabuu haa aleɔ akɛ “naagbee be” nɛɛ je shishi kɛjɛ 1914. Kɛha Ŋmalɛ mlitsɔɔmɔ fitsofitso ni yeɔ enɛ he odase lɛ, ofainɛ kwɛmɔ Nilee Ni Kɛ Mɔ Yaa Naanɔ Wala Mli wolo lɛ ni Watchtower Bible and Tract Society of New York, Inc. fee lɛ, yitso 11.

Naagbee gbii lɛ baaje shishi kɛ sane ko ni baaha sane fɔŋ afa amrɔ nɔŋŋ yɛ shikpɔŋ nɔ. Mɛni ji no? No ji shɛ ni ashɛrɛ Satan Abonsam kɛ edaimonioi lɛ kɛjɛ ŋwɛi ashwie lɛ. Obaanyɛ okane bɔ ni atsɔɔ nii ni baaha sane fɔŋ afa nɛɛ mli fitsofitso aha lɛ yɛ Kpojiemɔ 12:9, 12: “Ni ashɛ drako kpeteŋkpele lɛ afɔ, mɔ ni ji blema onufu lɛ ni atsɛɔ lɛ diabolo (naafolɔlɔ loo abonsam) lɛ kɛ satan (henyɛlɔ) lɛ ni shishiuɔ jeŋ muu lɛ fɛɛ lɛ, ashɛ lɛ afɔ shikpɔŋ lɛ nɔ, ni ashɛrɛ ebɔfoi lɛ hu ashwie afata ehe. . . . Kpoo ha mɛi ni yɔɔ shikpɔŋ lɛ nɔ kɛ ŋshɔ hiɛ lɛ! Ejaakɛ abonsam lɛ ekpeleke shi kɛba nyɛŋɔɔ, egri naakpa, ni ele akɛ be fioo kɛkɛ eyɔɔ.”

No hewɔ lɛ, yɛ bei abɔ ni eshwɛ dani naagbee gbii lɛ aaata kwraa lɛ mli lɛ, wɔbaakpa gbɛ akɛ saji fɔji baaya nɔ, ni ebaafa ni emli baawa hu.

Ehiŋ Shi Nɛkɛ Yɛ Be Fɛɛ Mli

Nɔ ni yɔɔ miishɛɛ kɛha shikpɔŋ nɔ bii ji akɛ, shihilɛ ni yɔɔ mɔbɔ ni haa saji fɔji gbɛɔ eshwaa ŋmɛnɛ lɛ ehiŋ shi yɛ be fɛɛ mli. Yɛ anɔkwale mli lɛ, wɔbaanyɛ wɔwie kɛ hekɛnɔfɔɔ akɛ, akane saji fɔji ni yaa nɔ daa lɛ agbii lɛ. Shihilɛ lɛ jeee nɔ ni hiɛnɔkamɔ bɛ mli, yɛ bɔ ni etamɔ akɛ nakai eji lɛ fɛɛ sɛɛ. Saji fɔji fɛɛ anaagbee ebɛŋkɛ, ni ebaaba kɛ̃ ni efeŋ yaka yɛ Nyɔŋmɔ be ni sa mli.

Wɔbaanyɛ wɔna nɔmimaa yɛ enɛ he, ejaakɛ agba akɛ naagbee gbii lɛ baaba naagbee kɛ hiɛkpatamɔ ni Nyɔŋmɔ kɛbaaba ni ejie nibii fɛɛ ni kɛ saji fɔji baa lɛ kɛya. Ebaajie gbɔmɛi ni teeɔ bei ashi, ni sumɔɔɔ ni amɛtsake ni amɛje amɛ gbɛ fɔŋ lɛ nɔ lɛ kɛya. Enɛ baa naagbee yɛ Nyɔŋmɔ Ofe lɛ gbi wulu lɛ nɔ ta ni ale jogbaŋŋ akɛ Harmagedon lɛ mli. (Kpojiemɔ 16:16) No sɛɛ nɔŋŋ pɛ lɛ, abaamɔmɔ Satan Abonsam kɛ edaimonioi atai lɛ. Kpojiemɔ 20:1-3 tsɔɔ bɔ ni afimɔɔ Satan, saji fɔji fɛɛ ashishijelɔ lɛ mli: “Ni mina bɔfo ko miikpeleke shi kɛmiijɛ ŋwɛi, ni ehiɛ bu kwɔŋkwɔŋ lɛ naa samfee lɛ kɛ kɔsɔŋkɔsɔ kpeteŋkpele ko yɛ edɛŋ. Ni emɔ drako lɛ, blema onufu lɛ ni ji diabolo (abonsam) kɛ satan lɛ, ni efi lɛ afii akpe, ni eŋɔ lɛ ewo bu kwɔŋkwɔŋ lɛ mli, ni eŋa eyi ni esɔo naa koni ekashishiu jeŋmaji lɛ dɔŋŋ.”

Yɛ saji ni yɔɔ naakpɛɛ nɛɛ asɛɛ lɛ, sanekpakpa be ni eko bako nakai da baaba aha shikpɔŋ lɛ kɛ enɔ bii lɛ. Mɛi ni baafata enɔ bii nɛɛ ahe ji akpekpei abɔ ni je Harmagedon naagbee ta lɛ mli, kɛ akpekpei toi akpei abɔ ni abaatee amɛ shi kɛjɛ amɛ gbele wɔɔ yɛ gbohiiabui amli lɛ. Atsɔɔ sanekpakpa ni fe fɛɛ nɛɛ mli yɛ Biblia lɛ mli naagbee wolo lɛ mli: “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:3, 4.

Ani obaanyɛ osusu nakai miishɛɛ be lɛ he? Anunyam wɔsɛɛ be ni sane fɔŋ ko bɛ dɔŋŋ lɛlɛŋ. Hɛɛ, no mli lɛ saji fɔji fɛɛ eba naagbee ni anuŋ he kwraa dɔŋŋ. No mli lɛ sanekpakpa baahe shi ni ebaahi shi kɛya naanɔi fɛɛ mli.