Osumɔŋ ni Eŋmɛɛ Bo!
NI MƐNI aŋmɛɛ mi? No ji “Nyɔŋmɔ Toiŋjɔlɛ he Bɔfoi” Yehowa Odasefoi a-Kpokpaa Wulu nɔ Kpee ni bɛŋkɛɔ oyayaayai lɛ! Yɛ hei pii lɛ, kpee lɛ baaje shishi Sohaa leebi 9:30 kɛ lala gbɛjianɔtoo. Beni onu sanegbaai ni tswaa mɔ hemɔkɛyeli emaa shi, yɛ wiemɔ ni ji “Saji ni Jɛ Toiŋjɔlɛ Jajelɔi ni Yɔɔ Ekaa lɛ Aŋɔɔ” sɛɛ lɛ, obaaná wiemɔ ni woɔ mɔ hewalɛ, ni yitso ji “Mɛni Nyɔŋmɔ Taoɔ Yɛ Wɔdɛŋ?” lɛ hu he miishɛɛ.
Sohaa shwane gbɛjianɔtoo lɛ mli oti ko ji wiemɔ krɛdɛɛ ni kanyaa mɔ, ni ji “Wɔ Nitsumɔ akɛ Nyɔŋmɔ Toiŋjɔlɛ lɛ he Bɔfoi.” Kɛkɛ lɛ fã ni ji “Ni Wɔɔye Wɔbua Mɛi Krokomɛi ni Amɛle Nyɔŋmɔ Taomɔ Nii” lɛ kɛ bɔ ni wɔfee wɔtsɔɔ mɛi heei anii lɛ he ŋaawoi baaha. Nɔ ni baanyiɛ no sɛɛ ji wiemɔi ni tsara nɔ, ni eba yɛ ebe naa, ni yitso ji “Kwɛmɔ Jogbaŋŋ yɛ Hiɛtserɛjiemɔ he Osharai ni Etee lɛ Ahe.” Sohaa gbɛjianɔtoo lɛ baaba naagbee kɛ wiemɔi ni ji “Tee Shi Owo Abonsam—Kaaŋmɛ Lɛ Gbɛ Kwraa” kɛ “Okɛ Anɔkwayeli Afĩ Emuu ni Nyɔŋmɔ Wiemɔ lɛ Yeɔ lɛ Sɛɛ.”
Hɔɔ leebi gbɛjianɔtoo lɛ baama bɔ ni kaselɔ-feemɔ nitsumɔ lɛ he hiaa ha lɛ nɔ mi yɛ wiemɔ ni hiɛ fãi etɛ ni tsara nɔ, ni yitso ji “Bɔfoi ni kɛ Toiŋjɔlɛ he Sanekpakpa Baa” lɛ mli. Leebi kpee lɛ baaba naagbee kɛ wiemɔi ni ji “Miishɛɛ Mli ni Aaajɛ Aha Nii yɛ Yehowa Gbɛjianɔtoo lɛ Mli” kɛ “Wala kɛ Toiŋjɔlɛ kɛtsɔ Henɔjɔɔmɔ kɛ Baptisimɔ Nɔ,” ni no sɛɛ lɛ kaselɔi heei lɛ baana hegbɛ ni abaptisi amɛ.
Hɔɔ shwane wiemɔ ni yitso ji “Susumɔ Yehowa Jwɛŋmɔ yɛ Saji Ahe lɛ He” lɛ baaha sanebimɔi tamɔ ‘Ani Kristofoi miina mligbalamɔ nitsumɔ lɛ mli gbɛfaŋnɔ ŋmɛnɛ?’ kɛ ‘Mɛni Biblia lɛ kɛɔ yɛ gbɔmɔgbee akɛ toigbalamɔ lɛ he?’ lɛ ahetoo. Obaana wiemɔi ni tsara nɔ, ni hiɛ fãi enyɔ, ni yitso ji “Toiŋjɔlɛ Nyɔŋmɔ lɛ Susuɔ Ohe,” kɛ titri lɛ naagbee wiemɔ ni ji “Dii Toiŋjɔlɛ ni Nyɔŋmɔ Gbeyeishemɔ Yɔɔ Mli Sɛɛ yɛ Weku Shihilɛ Mli” lɛ ahe miishɛɛ waa.
Hɔgbaa leebi wiemɔi lɛ ekomɛi ji wiemɔi ni tsara nɔ, ni hiɛ fãi etɛ, ni yitso ji “Bɔ ni Wɔɔfee Wɔle Bɔfoi ni Ja” kɛ “Bo Nyɔŋmɔ Wiemɔ lɛ Toi ni Oye Nɔ.” Leebi gbɛjianɔtoo lɛ baaba naagbee kɛ drama fɛfɛo ko ni baaha wɔkase nibii kpakpai kɛjɛ Biblia mli sane ni kɔɔ Kojolɔ Gideon he lɛ mli.
Kpee lɛ naagbee fã ni ji Hɔgbaa shwane lɛ baafee maŋshiɛmɔ lɛ, ni eyitso ji “Yɛ Naagbee lɛ Anɔkwa Toiŋjɔlɛ Eba!—Kɛjɛ Mɛɛ Jɛɛhe?” Yɛ naagbee lɛ, wiemɔ ni kanyaa mɔ waa, ni yitso ji “Ni Wɔɔya Hiɛ akɛ Nyɔŋmɔ Toiŋjɔlɛ he Bɔfoi” lɛ kɛ kpokpaa wulu nɔ kpee nɛɛ baaba naagbee kwraa.
Too gbɛjianɔ bianɛ ni oya eko. Kɛ ootao ole he ni abaafee eko yɛ ni bɛŋkɛ bo fe fɛɛ lɛ, yaabi yɛ Yehowa Odasefoi a-Maŋtsɛyeli Asa ni yɔɔ he ni oyɔɔ lɛ nɔ, loo ŋmaa wolo obaha mɛi ni fee wolo tɛtrɛɛ nɛɛ. June 8 Awake! ni baaje kpo lɛ baatsɔɔ hei ni abaafee kpeei lɛ eko yɛ lɛ adrɛs sɔrɔtoi lɛ fɛɛ, yɛ United States, Canada, Britain, kɛ Ireland.