Ba “Nyɔŋmɔ Wiemɔ Mli Hemɔkɛyeli” Kpokpaa Wulu nɔ Kpee Lɛ!
GBƆMƐI akpekpei abɔ baaya kpee lɛ yɛ hei ohai abɔ ni abaafee yɛ lɛ, yɛ je lɛŋ fɛɛ. Ato kpeei nɛɛ amli babaoo he gbɛjianɔ kɛha Afrika Anaigbɛ kɛjɛ December 1997 kɛyashi January 1998 mli. Ekolɛ abaafee nɛkɛ gbii etɛ henaabuamɔi—Sohaa kɛyashi Hɔgbaa—nɛɛ ekome yɛ maŋtiase ni kɛ he ni oyɔɔ lɛ jɛkɛɛɛ mli.
Obaaná Biblia gbɛtsɔɔmɔi babaoo ni anyɛɔ akɛtsuɔ nii lɛ ahe sɛɛ babaoo. Yɛ hei babaoo lɛ, gbɛjianɔtoo lɛ baaje shishi kɛ lala, daa leebi 9:30. Sohaa leebi gbɛjianɔtoo lɛ kɛ minitii 25 baabibii gbɔmɛi ni Nyɔŋmɔ Wiemɔ lɛ mli hemɔkɛyeli ni amɛyɔɔ lɛ ená amɛshihilɛi anɔ hewalɛ waa lɛ saji. Nakai klɛŋklɛŋ fã lɛ baaba naagbee kɛ wiemɔ krɛdɛɛ lɛ, ni ji, “Hemɔkɛyeli Naa Wɔnyiɛɔ yɛ, shi Jeee Ninamɔ Naa.”
Sohaa shwane klɛŋklɛŋ wiemɔ lɛ baasusu gbɛfaŋnɔ ni he hiaa ni gbekɛbii yɔɔ yɛ Kristofoi asafo lɛ mli lɛ he. Nɔ ni nyiɛ no sɛɛ, ni ji wiemɔi etɛ ni tsara nɔ lɛ wieɔ bɔ ni tɛi ni Biblia lɛ efolɔ eshwie shi lɛ saa Kristofoi ajeŋba yɛ wiemɔ, subaŋ, kɛ hesaamɔ he ehaa lɛ he. No sɛɛ lɛ, wiemɔi ni yitsei ji “Kwɛmɔ Jogbaŋŋ yɛ Ohemɔkɛyeli ni Aaatã lɛ He” kɛ “Nyɔŋmɔ Wiemɔ lɛ Hiɛ Kã” lɛ, gbalaa jwɛŋmɔ kɛyaa ŋaawoo kpakpa ni yɔɔ Hebribii yitsei 3 kɛ 4 lɛ anɔ. Sohaa gbɛjianɔtoo lɛ baaba naagbee kɛ wiemɔ ni yitso ji “Wolo Kɛha Gbɔmɛi Fɛɛ.”
Hɔɔ leebi klɛŋklɛŋ wiemɔ lɛ yitso ji “Hemɔkɛyeli ni Nitsumɔi Bɛ He lɛ Ji Hemɔkɛyeli Gbonyo.” Wiemɔ kroko hu ni he hiaa, ni abaahã nakai leebi lɛ, ni ji, “Daamɔ Shi Kpɛŋŋ ni Onane Amɔ̃ Shi Shiŋŋ yɛ Anɔkwale lɛ Mli” lɛ wieɔ gbɛ ni aaatsɔ nɔ ana mumɔŋ dalɛ lɛ he. Leebi gbɛjianɔtoo lɛ baaba naagbee kɛ wiemɔ ni ahãa daa yɛ kpee fɛɛ kpee shishi lɛ, ni ji “Nyɔŋmɔ Wiemɔ lɛ Mli Hemɔkɛyeli Namɔ kɛ Mɔ Yaa Baptisimɔ Mli,” ni no sɛɛ lɛ abaato gbɛjianɔ ní abaptisi kaselɔi heei lɛ.
Hɔɔ shwane klɛŋklɛŋ wiemɔ, ni yitso ji, “Pelemɔ Hemɔkɛyeli lɛ He Waa” lɛ, wieɔ ŋaawoo ni yɔɔ Biblia mli wolo ni ji Yuda mli lɛ he. Wiemɔi ni tsara nɔ, ni heɔ ŋmɛlɛtswaa kome, ni yitso ji, “Ba ni Wɔtee Yehowa We Lɛ,” baasusu sɛɛnamɔi ni yɔɔ Kristofoi akpeei ahe lɛ he. Nakai gbi lɛ wiemɔi ahe gbɛjianɔtoo lɛ baaba naagbee kɛ wiemɔ ni yitso ji “Bɔ ni Ohemɔkɛyeli lɛ Ji Lɛ—Aaka Aakwɛ Bianɛ.”
Hɔgbaa leebi gbɛjianɔtoo lɛ baafee wiemɔi etɛ ni tsara nɔ, ni baasusu Biblia mli wolo ni ji Yoel, kɛ bɔ ni ekɔɔ wɔ gbii nɛɛ ahe ehaa lɛ he. Kɛkɛ lɛ Biblia mli drama ni yitso ji “Hã Ohiŋmɛi nɔ Atse” lɛ baanyiɛ sɛɛ. Kpee lɛ shishi wiemɔ ni he hiaa waa ji shwane maŋshiɛmɔ lɛ, ni yitso ji, “Hemɔkɛyeli kɛ Owɔsɛɛ Be.”
Eka shi faŋŋ akɛ, kɛ onyɛ́ otee kpee lɛ, obaaná he sɛɛ babaoo diɛŋtsɛ yɛ mumɔŋ. Akɛ miishɛɛ baahere bo atuu kɛha kpeei lɛ fãi lɛ fɛɛ. Too gbɛjianɔ bianɛ ni oya eko. Kɛ́ ootao ole he ni bɛŋkɛ bo fe fɛɛ lɛ, yaabi yɛ Yehowa Odasefoi a-Maŋtsɛyeli Asa ni yɔɔ he ni oyɔɔ lɛ, loo ŋmaa wolo obahã mɛi ni fee wolo tɛtrɛɛ nɛɛ.