Sɛɛkuu Kɛmiiya Sũ Mli—Yɛ Mɛɛ Gbɛ Nɔ?

“SŨ JIO, ni sũ mli oooku osɛɛ kɛaatee!” Beni klɛŋklɛŋ gbɔmɔ, Adam nu nakai wiemɔi lɛ, ele nɔ̃ ni esa akɛ ekpa gbɛ. Shikpɔŋ sũ akɛshɔ̃ lɛ ni ekuŋ esɛɛ kɛyaŋ he ko fe sũ kɛkɛ mli. Ebaagbo ejaakɛ ebooo e-Bɔlɔ, Yehowa Nyɔŋmɔ toi.—1 Mose 2:7, 15-17; 3:17-19.

Biblia lɛ tsɔɔ akɛ sũ akɛfee adesai. Ekɛɔ hu akɛ: “Susuma ni feɔ esha lɛ, lɛ nɔŋŋ eeegbo!” (Ezekiel 18:4; Lala 103:14) Gbele kɛ awerɛho eba gbɔmɛi akpekpei abɔ nɔ, ni etee sanebimɔi ni kɔɔ bɔ ni aaajie gbohii lɛ kɛaaya he lɛ shi shii abɔ.

Tsutsu kɛ Ŋmɛnɛŋmɛnɛ Nifeemɔi

Mɛɛ gbɛ nɔ Nyɔŋmɔ webii ni hi shi yɛ blema bei amli lɛ fuɔ amɛ gbohii lɛ yɛ? Biblia lɛ tsĩɔ gbɛi sɔrɔtoi anɔ ni atsɔɔ atsuɔ gbohii ahe nii lɛ tã yɛ eklɛŋklɛŋ baafai lɛ amli, ni shikpɔŋ ni afuɔ mɛi yɛ fata he. (1 Mose 35:8) Afu blematsɛ Abraham, eŋa Sara, kɛ amɛ binuu Isak kɛ amɛ nabi Yakob hu yɛ tɛkpolo ni yɔɔ Makpela lɛ mli. (1 Mose 23:2, 19; 25:9; 49:30, 31; 50:13) Afu Gideon kɛ Samson, Israel kojolɔi lɛ, yɛ ‘amɛtsɛmɛi afuuhei lɛ.’ (Kojolɔi 8:32; 16:31) Enɛ tsɔɔ akɛ Nyɔŋmɔ webii ni hi shi yɛ blema lɛ sumɔɔ ni amɛna fuuhe kɛha weku lɛ. Beni Yesu Kristo gbo yɛ Ŋ.B. klɛŋklɛŋ afii oha lɛ mli lɛ, akɛ egbonyo yafɔ̃ gbonyobu hee ni akpɛ yɛ tɛsaa ko mli lɛ mli. (Mateo 27:57-60) Belɛ, nɔ ni afɔɔ feemɔ ji akɛ, afuɔ gbohii lɛ yɛ shikpɔŋ aloo akɛwoɔ gbonyobu mli. Aafee enɛ lolo yɛ hei pii yɛ shikpɔŋ lɛ fɛɛ nɔ.

Shi, yɛ hei komɛi yɛ je lɛŋ ŋmɛnɛ lɛ, gbɛhei ni bɛ kɛ shikpɔji ajara ni wa tsɔ̃ hewɔ lɛ, hei ni abaafu mɛi yɛ lɛ miiya nɔ eefee nɔ ni wa akɛ aaaná fuuhei. No hewɔ lɛ, mɛi komɛi miisusu gbɛi krokomɛi anɔ ni abaatsɔ afu gbohii lɛ ahe.

Gbohii ni ashã lɛ alamulu ni ashwãa lɛ miihe afee nɔ ni afɔɔ feemɔ agbɛnɛ. Yɛ England lɛ, atsuɔ gbohii aaafee oha mlijaa 40 he nii yɛ nɛkɛ gbɛ nɔ bianɛ. Yɛ Sweden, he ni ashãa gbohii fe oha mlijaa 80 yɛ maji wuji lɛ amli lɛ, áhala kooi pɔtɛ̃ɛ komɛi kɛha lamulu lɛ agbɛɛ-kɛ-shwamɔ. Ni yɛ Shanghai kɛ China maŋtiasei fioo komɛi ni yɔɔ ŋshɔnaa gbɛ lɛ, maŋ nɔyelii lɛ kɛ hegbɛ eha ni ashwã babaoo yɛ ŋshɔ mli shii abɔ yɛ afi lɛ mli.

Nɛgbɛ abaanyɛ ashwã lamulu yɛ? Jeee he fɛɛ he kɛkɛ. Ekolɛ mɛi komɛi baashe gbeyei akɛ lamulu lɛ ni ashwãa lɛ baafite shihilɛ he lɛ. Shi, yɛ anɔkwale mli lɛ, atsĩɔ oshara ni tsɔɔ akɛ tsɛŋemɔ hela baanyɛ aba lɛ naa kɛtsɔɔ gbohii ni ashãa lɛ nɔ. Gɔɔ sɔrɔtoi ni yɔɔ England lɛ ekomɛi kɛ kaimɔ abɔɔi komɛi ni yɔɔ United States lɛ eto hei ni adu kwɛɛnii yɛ loo fɔfɔi abɔɔi akɛ hei ni abaanyɛ ashwã yɛ. Shi, nɔ ni Kristofoi susuɔ he titri ji Ŋmalɛ naa jwɛŋmɔ yɛ gbohii ni ashãa kɛ amɛ lamulu ni akɛshwãa lɛ he.

Mɛni Ŋmalɛ lɛ Kɛɔ?

Gbalɔ Yesaia kɛɛ yɛ sane ni ejaje eshi “Babel maŋtsɛ lɛ” mli akɛ: “Ashɛo afɔ ni obɛ fuuhe.” (Yesaia 14:4, 19, NW) Ani esa akɛ akɛ hiɛshishwiemɔ sane ni tamɔ nɛkɛ ato lamulu ni akɛshwãa lɛ he? Dabi, ejaakɛ awieee gbonyoshãa kɛ lamulu ni jɛɔ mli lɛ ni akɛaato loo akɛaashwã lɛ he.

Yesu Kristo wie shikpɔŋ nɔ gbohiiashitee ni baaba yɛ e-Afii Akpe Nɔyeli lɛ mli lɛ he, beni ekɛɛ: “Mɛi ni yɔɔ gbohiiabui lɛ amli lɛ aaanu [mi]gbee, ni amɛaaje kpo.” (Yohane 5:28, 29) Shi kɛlɛ, ákɛ gbonyobu pɔtɛɛ ko he ehiaaa koni atee mɔ ko shi lɛ, gbalɛ wiemɔ kroko ni tsɔɔ gbohiiashitee lɛ mli yeɔ he odase. Kpojiemɔ 20:13 kɛɔ akɛ: “Ŋshɔ jie gbohii ni yɔɔ emli lɛ eha, ni gbele kɛ gbohiiaje jie gbohii ni yɔɔ amɛmli lɛ amɛha.” No hewɔ lɛ, nɔ ni he hiaa lɛ jeee hé loo gbɛ ni mɔ ko ‘kuɔ esɛɛ kɛyaa sũ mli’ lɛ. Shi moŋ, ákɛ Nyɔŋmɔ kaiɔ lɛ ni ateeɔ lɛ shi. (Hiob 14:13-15; okɛto Luka 23:42, 43 he.) Yɛ anɔkwale mli lɛ, gbonyobui ni yɔɔ fɛo ahe ehiaaa Nyɔŋmɔ ni no aye abua lɛ ni enyɛ ekai gbɔmɛi. Gbohii ni ashãa lɛ etsĩii mɔ ko shitee kɛmiijɛ gbohii ateŋ lɛ naa. Ni kɛ akɛ lamulu lɛ shwã kɛ jwɛŋmɔ kpakpa ni apasa jamɔ mli nifeemɔi bɛ mli lɛ, efeŋ nɔ ko ni kɛ Ŋmalɛi lɛ kpaaa gbee.

Ehe baahia ni mɛi ni kpɛɔ amɛyiŋ akɛ amɛaasumɔ ni amɛshwã lamulu lɛ abo maŋ lɛ mla toi. Ebaafee nɔ ni sa akɛ amɛaasusu mɛi ni agbo ashi amɛ lɛ kɛ mɛi krokomɛi ahenumɔi hu he. Yehowa tsuji baafee jogbaŋŋ akɛ amɛaakwɛ koni amɛ Ŋmalɛ naa heyeli lɛ he nitsumɔ yɛ nɛkɛ gbɛ nɔ lɛ kɛ ahorabɔɔ akaba gbɛi kpakpa ni kã Kristofoi anɔ lɛ nɔ. Enɛ he miihia titri, yɛ shikpɔji ni aŋmɛɔ gbohii ni ashãa kɛ amɛ lamulu ni akɛshwãa lɛ gbɛ yɛ mla naa, ni kɛlɛ akpɛlɛko nɔ jogbaŋŋ yɛ akutso ko lɛ mli lɛ. Shi, Kristofonyo baatsi ehe kɛjɛ nifeemɔi loo kusumii nifeemɔi fɛɛ ni damɔ adesa susuma ni gbooo he hemɔkɛyeli nɔ lɛ he.

Heyeli Kwraa Kɛmiijɛ Gbonyobu Mli!

Mɛi komɛi ni fiɔ gbohii ni ashãa amɛ lɛ sɛɛ lɛ kɛɔ akɛ etsɔɔ heyeli kɛmiijɛ fũu yɛ gbohiiabui amli. Shi kɛlɛ, nɔ ni kɛ heyeli ni da fe fɛɛ baa lɛ baafee Biblia shiwoo akɛ “naagbee henyɛlɔ ni abaafo esɛɛ ji gbele” lɛ mlibaa.—1 Korintobii 15:24-28.

Enɛ tsɔɔ akɛ, gbohiiabui, sãii, kɛ gbohii ashãa kɛ lamulu ni akɛshwãa lɛ po baafee tsutsu nibii. Hɛɛ, gbele ehiŋ shi dɔŋŋ. Yɛ mumɔ lɛ kanyamɔ naa lɛ, bɔfo Yohane ŋma akɛ: “Ni minu gbee kpeteŋkpele ko jɛ maŋtsɛsɛi lɛ mli kɛɛ: Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ, ni Nyɔŋmɔ diɛŋtsɛ kɛ amɛ aaahi shi, ni eeetsɔ amɛ-Nyɔŋmɔ. Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:3, 4.

[Mfonirii ni yɔɔ baafa 29]

Gbɛ ni ehe shi waa ni atsɔɔ nɔ atsuɔ gbohii ahe nii

[Mfoniri ni yɔɔ baafa 31]

Gbohii alamulu shwãmɔ yɛ Sagami Bay, yɛ Japan

[He ni Sane lɛ Jɛ]

Courtesy of Koueisha, Tokyo