Yehowa ni Wɔɔsɔmɔ Lɛ akɛ Weku ni Efee Ekome

TAAKƐ ANTONIO SANTOLERI GBA

Mitsɛ eye afii 17 beni eshi Italy yɛ 1919 mli lɛ. Efã kɛyahi Brazil kɛha shihilɛ kpakpa taomɔ. Yɛ be ko sɛɛ lɛ, ebagbele yikuu he yɛ maŋ bibioo ko mli yɛ São Paulo maŋ wulu lɛ teŋgbɛ.

GBI ko yɛ 1938 mli, beni miye afii kpawo lɛ, Ataa he Biblia ni yɔɔ Brasileira wiemɔ mli kɛjɛ nuu ko ni ba eyikuu he lɛ dɛŋ. Afii enyɔ sɛɛ lɛ, hela bamɔ Awo waa, ni ehi shi akɛ helatsɛ aahu kɛyashi egbo. Hela bamɔ Ataa hu, no hewɔ lɛ wɔ fɛɛ—Awo, Ataa, minyɛmiyoo Ana, kɛ mi—fɛɛ tee wɔkɛ wɔwekumɛi ni yɔɔ São Paulo maŋtiase lɛ mli lɛ yahi shi.

Beni miyaa skul yɛ São Paulo lɛ, mibatsɔ mɔ ko ni sumɔɔ nikanemɔ waa, titri lɛ yinɔsane mli nibii ni aŋmala ashwie shi. Mina he miishɛɛ waa akɛ bei komɛi lɛ atsĩɔ Biblia lɛ tã yɛ niŋmaai nɛɛ amli. Adesã wolo ko, ni miyamã kɛjɛ São Paulo maŋ woji atoohe lɛ, tsĩ Gɔŋ nɔ Shiɛmɔ lɛ tã shii abɔ. No ji be mli ni mikpɛ miyiŋ akɛ matao Biblia ni makane shiɛmɔ lɛ maha mi diɛŋtsɛ mihe. Mitao Biblia ni Ataa he afii babaoo kɛtsɔ hiɛ lɛ, ni naagbee lɛ miyana yɛ nibii ashishi yɛ dade adeka ko mli, he ni ekã aahu afii kpawo sɔŋŋ lɛ.

Katolikbii ji wɔweku lɛ, no hewɔ lɛ awoko mi hewalɛ akɛ mikane Biblia lɛ dã. Agbɛnɛ, mi diɛŋtsɛ mikase bɔ ni ataoɔ ŋmalɛ yitsei kɛ kukuji lɛ ahãa. Mikane kɛ miishɛɛ babaoo, ni jeee Gɔŋ nɔ Shiɛmɔ lɛ kɛkɛ, shi moŋ Mateo wolo lɛ fɛɛ kɛ Biblia mli woji krokomɛi lɛ hu. Nɔ ni mina he miishɛɛ fe fɛɛ ji anɔkwale ni anaa yɛ bɔ ni awie Yesu tsɔɔmɔi kɛ enaakpɛɛ nii lɛ ahe aha lɛ mli lɛ.

Ní miyoo bɔ ni Katolik jamɔ lɛ yɔɔ sɔrɔto kwraa yɛ nɔ ni mikane yɛ Biblia lɛ mli lɛ he lɛ, mibɔi Presbyterian Sɔlemɔ lɛ yaa, ni Ana bafata mihe. Shi kɛlɛ, minu he akɛ mifee shwɛm yɛ mitsui mli lolo. Mikɛ afii saŋŋ etao Nyɔŋmɔ sɛɛ gbɛ kɛ ekãa aahu. (Bɔfoi lɛ Asaji 17:27) Gbi ko gbɛkɛ ni ŋulamii eje, ni mishwieɔ miyiŋ lɛ, misusu he akɛ, ‘Mɛni hewɔ miyɔɔ biɛ? Mɛni ji yiŋtoo ni yɔɔ shihilɛ sɛɛ?’ Miyatao he ko banee yɛ shia lɛ sɛɛ gbɛ, ni mikula shi, ni misɔle akɛ, ‘Nuntsɔ Nyɔŋmɔ! Namɔ ji bo? Te mafee tɛŋŋ male bo hu?’ No sɛɛ etsɛɛɛ nɔŋŋ ni hetoo ba.

Biblia Mli Anɔkwale lɛ Kasemɔ

Gbi ko yɛ 1949 mli lɛ, obalayoo ko banina Ataa beni eyiɔ shi kɛjɛɔ tsɔne mli lɛ. Eha lɛ Buu-Mɔɔ kɛ Awake! woji tɛtrɛbii lɛ eko. Eshɛ Buu-Mɔɔ lɛ eko ni ekɛɛ lɛ akɛ ebasara wɔ yɛ shia, ni ekɛɛ lɛ akɛ eyɛ bii enyɔ ni yaa Presbyterian Sɔlemɔ lɛ. Beni yoo lɛ ba ebasara wɔ lɛ, eshi Children wolo lɛ ekome eha Ana, ni ekɛ lɛ je Biblia mli nikasemɔ shishi. Sɛɛ mli lɛ, miyafata he kɛkase nii.

Yɛ November 1950 mli lɛ, wɔtee wɔ klɛŋklɛŋ Yehowa Odasefoi akpee wulu. Jɛmɛ ji he ni ajie “Let God Be True” wolo lɛ kpo yɛ, ni wɔtsa wɔ Biblia mli nikasemɔ lɛ nɔ kɛ nakai wolo lɛ akɛ nɔ ni kudɔɔ wɔ. No sɛɛ etsɛɛɛ tsɔ̃ ni wɔna akɛ wɔna anɔkwale lɛ, ni yɛ April 1951 mli lɛ, abaptisi wɔ kɛfee wɔhenɔjɔɔmɔ kɛha Yehowa lɛ he okadi. Afii komɛi asɛɛ dani Ataa hu jɔɔ ehe nɔ, ni eye Nyɔŋmɔ anɔkwa aahu kɛyashi beni egbo yɛ 1982 mli.

Mina Miishɛɛ yɛ Be-Fɛɛ Sɔɔmɔ Mli

Yɛ January 1954 mli, beni miye afii 22 pɛ lolo lɛ, akpɛlɛ minɔ kɛha sɔɔmɔ yɛ Yehowa Odasefoi anitsumɔ he nine, ni atsɛɔ jɛmɛ Betel lɛ. Beni miyashɛ jɛmɛ lɛ, minaa kpɛ mihe waa beni mina akɛ nuu ko ni kɛ afii enyɔ pɛ ye mi onukpa, ni ji Richard Mucha, ji nitsumɔ he nine lɛ nɔkwɛlɔ lɛ. Yɛ 1955 mli, beni kpokpaa nɔ sɔɔlɔi ahe bahia, taakɛ atsɛɔ nɔkwɛlɔi gbɛfalɔi yɛ nakai beaŋ lɛ, mifata hii enumɔ ni afɔ̃ amɛ nine akɛ amɛbana sɔɔmɔ nɛɛ mli gbɛfaŋnɔ lɛ ahe.

He ni aha mi nitsumɔ yɛ ji Rio Grande do Sul maŋ wulu lɛ mli. Beni mije nitsumɔ lɛ shishi lɛ, no mli lɛ Yehowa Odasefoi asafoi 8 pɛ yɔɔ jɛmɛ, shi beni shɛɔ nyɔji 18 lɛ, ato asafoi heei 2 kɛ kui 20 ni yɔɔ hei ni etse amɛhe banee lɛ ashishi. Ŋmɛnɛ, ayɛ Yehowa Odasefoi akpokpai bibii 15 yɛ kpokpaa nɛɛ nɔ, ni eko fɛɛ eko yɛ asafoi aaafee 20 yɛ mli! Yɛ afi 1956 naagbee lɛ, aha mile akɛ ajara mikpokpaa lɛ mli afee lɛ kpokpai bibii ejwɛ ni kpokpaa nɔ sɔɔlɔi ejwɛ baasɔmɔ amɛ. Aha miku misɛɛ kɛba Betel ekoŋŋ yɛ nakai beaŋ kɛha nitsumɔ hee.

Nɔ ni fee mi naakpɛɛ kɛ miishɛɛ fɛɛ ji akɛ, aha mi nitsumɔ yɛ Brazil kooyigbɛ akɛ kpokpaa wulu nɔ sɔɔlɔ, ni ji sɔɔlɔ gbɛfalɔ ni sɔmɔɔ kpokpaa sɔrɔtoi babaoo. No mli lɛ Brazil yɛ sɔɔlɔi, ni ji Yehowa Odasefoi 12,000, ni maŋ muu lɛ fɛɛ yɛ kpokpai wuji enyɔ. Richard Wuttke sɔmɔɔ yɛ wuoyigbɛ, ni misɔmɔɔ kpokpaa wulu ni yɔɔ kooyigbɛ lɛ. Beni wɔba Betel lɛ, atsɔɔ wɔ bɔ ni akɛ tsɔne ni akɛjieɔ sini lɛ tsuɔ nii ahaa, kɛha The New World Society in Action kɛ The Happiness of the New World Society sinii ni Yehowa Odasefoi fee lɛ jiemɔ.

Nakai beaŋ lɛ, gbɛfaa yɛ sɔrɔto kwraa. Odasefonyo ko kwraa bɛ tsɔne, no hewɔ lɛ mitaa lɛlɛ mli, shwiili ni tsinai gbalaa, okpɔŋɔ nɔ, kɛ tsɔnei ni akɛlooɔ jatsũi amli kɛfãa gbɛ, kɛ kɔɔyɔŋ lɛlɛ hu shikome. Eyɛ miishɛɛ waa kɛji ota kɔɔyɔŋ lɛlɛ mli kɛnyiɛ Amazon koo lɛ yiteŋ ni nyɛyaayi shi yɛ Santarém, ni ji maŋtiase ni yɔɔ Belém yɛ Amazon faa lɛ naabu, kɛ Manaus, ni ji Amazonas Maŋ Wulu lɛ maŋtiase lɛ teŋ lɛ. No mli lɛ kpokpaa wulu nɔkwɛlɔi yɛ kpokpaa nɔ kpeei fioo pɛ ni amɛbaasɔmɔ, no hewɔ lɛ mikɛ be babaoo jieɔ Asafo lɛ sinii lɛ mitsɔɔ. Mɛi ohai abɔ bakwɛɔ, yɛ maŋtiasei wuji lɛ amli.

Nɔ ni mina he miishɛɛ fe fɛɛ yɛ Brazil kooyigbɛ ji Amazon kpokpaa lɛ. Beni misɔmɔɔ yɛ jɛmɛ yɛ April 1957 mli lɛ, Amazon Faa lɛ kɛ eniji lɛ yi ni eje ŋa. Mina hegbɛ akɛ majie sinii lɛ ekome yɛ koo lɛ mli, ni mikɛ nɔ ko tɛtrɛ̀ɛ fĩ tsei enyɔ ateŋ, ni mikɛfee nɔ ni sini la lɛ baakpɛ ashwie nɔ koni ana mfoniri lɛ. Wɔna srawa hewalɛ ni tsɔne lɛ kɛjie sini lɛ kɛjɛ lɛlɛ ko ni eŋmɛ sɛkɛ yɛ faa ni bɛŋkɛ jɛmɛ lɛ mli. No ji klɛŋklɛŋ sini ni mɛi ni bakwɛ lɛ ateŋ mɛi pii na.

No sɛɛ nɔŋŋ ni miku misɛɛ kɛtee Betel sɔɔmɔ mli ekoŋŋ, ni afi ni nyiɛ sɛɛ, ni ji 1958 lɛ, mina hegbɛ mitee “Nyɔŋmɔ Suɔmɔnaa Nii” Yehowa Odasefoi a-Majimaji Ateŋ Kpee, ni afee yɛ New York City, ni fee yinɔsane lɛ eko. Mɛi ni jɛ shikpɔji 123 nɔ kɛba kpee lɛ fata mɛi 253,922 ni yi Yankee Stadium kɛ Polo Grounds ni bɛŋkɛ jɛmɛ lɛ obɔ̃, yɛ gbii kpaanyɔ kpee nɛɛ naagbee gbi lɛ nɔ lɛ ahe.

Mina Tsakemɔi ni Ba Mishihilɛ Mli lɛ Ahe Miishɛɛ

Beni miku misɛɛ kɛtee Betel lɛ sɛɛ be fioo mli, ni mibale Clara Berndt, ni wɔbote gbalashihilɛ mli yɛ March 1959 mli. Aha wɔ kpokpaa nɔ nitsumɔ yɛ Bahia maŋ wulu lɛ mli, ni wɔsɔmɔ yɛ jɛmɛ aaafee afi. Mikɛ Clara fɛɛ kɛ miishɛɛ kaiɔ heshibaa, gbɔfeemɔ, ekãa, kɛ suɔmɔ ni nyɛmimɛi ni yɔɔ jɛmɛ lɛ yɔɔ lɛ; ohiafoi ji amɛ yɛ heloonaa nibii agbɛfaŋ moŋ, shi amɛyɛ nii waa yɛ Maŋtsɛyeli yibiiwoo mli. Kɛkɛ ni ajie wɔ kɛtee São Paulo Maŋ Wulu lɛ mli. Jɛmɛ ji he ni miŋa na musu yɛ, yɛ afi 1960 mli, ni eba lɛ akɛ esa akɛ wɔshi be-fɛɛ sɔɔmɔ nitsumɔ lɛ.

Wɔkpɛ wɔyiŋ akɛ wɔbaafã kɛyahi he ko yɛ Santa Catarina maŋ wulu lɛ mli, he ni afɔ miŋa yɛ lɛ. Wɔ binuu, Gerson, ji wɔbii enumɔ lɛ ateŋ klɛŋklɛŋ mɔ. Mɛi ni nyiɛ esɛɛ ji Gilson yɛ 1962 mli, Talita yɛ 1965, Tárcio yɛ 1969, kɛ Janice yɛ 1974 mli. Kɛtsɔ Yehowa kɛ ŋaawoo kpakpa ni ekɛhaa lɛ nɔ lɛ, wɔnyɛ wɔkpee kaa ni ji tsɔsemɔ ni wɔɔtsɔse amɛ yɛ “Nuntsɔ [Yehowa, NW] tsɔsemɔ kɛ ŋaawoo lɛ mli” lɛ naa.—Efesobii 6:4.

Wɔdɔɔ wɔbii lɛ ateŋ mɔ fɛɛ mɔ he waa. Lalatsɛ lɛ jie wɔ henumɔi akpo jogbaŋŋ akɛ: “Naa, Yehowa gboshinii ni ehaa ji bii.” (Lala 127:3) Yɛ naagbai lɛ fɛɛ sɛɛ lɛ, wɔkwɛ wɔbii lɛ jogbaŋŋ tamɔ bɔ ni wɔbaakwɛ “Yehowa gboshinii” ni eeeha wɔ, beni wɔhaa gbɛtsɔɔmɔi ni anaa yɛ e-Wiemɔ lɛ mli lɛ hiɔ wɔjwɛŋmɔ mli lɛ. Nyɔmɔwoo ni ejɛ mli lɛ fa babaoo. Eha wɔna miishɛɛ ni wɔnyɛŋ wɔkɛ wiemɔi atsɔɔ mli, beni amɛyi enumɔ lɛ fɛɛ amɛjɛ amɛsuɔmɔ mli ekomekome amɛtsɔɔ akɛ amɛmiisumɔ ni abaptisi amɛ akɛ amɛ henɔjɔɔmɔ kɛha Yehowa lɛ he okadi lɛ.—Jajelɔ 12:1.

Nibii ni Wɔbii lɛ Hala

Beni Gerson gbe kɔmpiuta he nikasemɔ naa, ni ekɛɛ wɔ yɛ no sɛɛ nɔŋŋ akɛ eetao eyasɔmɔ yɛ Betel, ní ekɛhala be-fɛɛ sɔɔmɔ lɛ yɛ heloonaa nitsumɔ ko ni ebaatsu daa lɛ najiaŋ lɛ, eha wɔna miishɛɛ waa kɛteke nɔ. Shi Betel shihilɛ efeee mlɛo kɛhaaa Gerson kɛjɛ shishijee. Beni wɔyasara lɛ yɛ be mli ni ehi Betel nyɔji ejwɛ sɛɛ lɛ, bɔ ni efee ehiɛ mɔbɔmɔbɔ tamɔ mɔ ko ni miiye awerɛho, beni wɔshĩɔ lɛ lɛ, sa mihe waa diɛŋtsɛ. Ni mikwɛɔ wɔ kar lɛ mli ashwishwɛ ni akɛkwɛɔ sɛɛ lɛ mli lɛ, mina akɛ ekwɛ wɔ yisɛɛ aahu kɛyashi he ni wɔdɔ yɛ lɛ tɔ̃ɔ. Mihiŋmɛiiaŋ yimɔ obɔ̃bɔ̃ kɛ yaafonui, aahu akɛ miwa yɛ gbɛ lɛ toi fioo, dani wɔtsa wɔ gbɛfaa ni feɔ kilomitai 700 lɛ nɔ.

Gerson baná Betel he miishɛɛ diɛŋtsɛ. Beni ehi jɛmɛ aaafee afii kpawo sɛɛ lɛ, ekɛ Heidi Besser bote gbalashihilɛ mli, ni amɛtee nɔ amɛsɔmɔ yɛ Betel afii enyɔ. Kɛkɛ ni Heidi bana musu, ni eba lɛ akɛ esa akɛ amɛshi. Amɛbiyoo Cintia, ni amrɔ nɛɛ eye afii ekpaa lɛ, fataa amɛhe yɛ Maŋtsɛyeli lɛ he nitsumɔi ni amɛtsuɔ lɛ amli.

Beni wɔyasara Gerson yɛ Betel klɛŋklɛŋ lɛ sɛɛ etsɛɛɛ tsɔ̃ lɛ, Gilson, ní no mli lɛ etsɛko tsɔ̃ ni egbe eklɛŋklɛŋ afi naa, yɛ nitsumɔ nɔkwɛmɔ he nikasemɔ mli lɛ, wie akɛ lɛ hu eesumɔ ni eyasɔmɔ yɛ jɛmɛ. Egbɛjianɔtoo ji akɛ, ekɛ afi kome baasɔmɔ yɛ Betel koni no sɛɛ lɛ ebatsa enitsumɔ nɔkwɛmɔ he nikasemɔ lɛ nɔ. Shi egbɛjianɔtoo lɛ tsake, ni etee nɔ ehi Betel sɔɔmɔ mli. Yɛ afi 1988 mli lɛ, ekɛ Vivian Gonçalves, ni ji gbɛgbalɔ, taakɛ atsɛɔ be-fɛɛ sɔɔlɔi lɛ, bote gbalashihilɛ mli. Amɛtee nɔ amɛsɔmɔ aahu yɛ Betel kɛjɛ nakai beaŋ kɛbaa.

Wɔ miishɛɛ lɛ tsa nɔ lolo beni wɔbi ni ji etɛ, Talita, hala akɛ ekɛ ehe baawo gbɛgbamɔ sɔɔmɔ lɛ mli yɛ 1986 mli, beni ekase tsũi atɛŋmɔ kɛ tsumaa he nii egbe naa lɛ. Afii etɛ sɛɛ lɛ, lɛ hu afɔ̃ lɛ nine kɛtee Betel. Yɛ 1991 mli lɛ, ekɛ José Cozzi, ni kɛ afii nyɔŋma esɔmɔ yɛ Betel lɛ, bote gbalashihilɛ mli. Amɛtsa nɔ yɛ jɛmɛ akɛ gbalashihilɛ mli hefatalɔi.

Mikɛ miŋa saa wɔna miishɛɛ waa ekoŋŋ beni Tárcio, ni ji mɔ ni nyiɛ sɛɛ lɛ, saa etĩ nakai wiemɔ kuku ni wɔnu shii etɛ sɔŋŋ kɛtsɔ hiɛ momo lɛ mli ekoŋŋ, akɛ, “Ataa, miisumɔ ni mayasɔmɔ yɛ Betel.” Akpɛlɛ egbɛbimɔ wolo lɛ nɔ, ni lɛ hu eje Betel sɔɔmɔ shishi yɛ 1991 mli, ni ehi jɛmɛ aahu kɛbashi 1995. Eŋɔɔ wɔnaa waa akɛ ekɛ ebalahiiaŋ hewalɛ lɛ tsu nii fe afii etɛ, kɛha Yehowa Maŋtsɛyeli lɛ he nibii ahiɛyaa yɛ nɛkɛ gbɛ nɔ.

Wɔ nakutsoŋ bi, Janice, kpɛ eyiŋ akɛ ebaasɔmɔ Yehowa, ni abaptisi lɛ beni eye afii 13. Beni eyaa skul lɛ, ekɛ afi sɔmɔ akɛ gbɛgbalɔi awalɔ. Kɛkɛ ni, September 1, 1993 lɛ, ebɔi sɔɔmɔ akɛ daa gbɛgbalɔ yɛ wɔ asafo lɛ mli yɛ Gaspar maŋtiase lɛ mli.

Gbɛ ni Atsɔɔ nɔ Ayeɔ Omanye

Mɛni ji nɔ titri ni haa weku lɛ nyɛɔ eyaa nɔ efeɔ ekome yɛ Yehowa jamɔ mli? Miheee miyeee akɛ nifeemɔ gbɛ ni yɔɔ naakpɛɛ yɛ, ní atsɔɔ nɔ afeɔ nakai. Yehowa kɛ ŋaawoo eha yɛ e-Wiemɔ lɛ mli kɛha fɔlɔi Kristofoi koni amɛnyiɛ sɛɛ, no hewɔ lɛ esa akɛ wɔkɛ yijiemɔ fɛɛ aha lɛ yɛ nibii kpakpai ni ejɛ mli eba kɛha wɔ lɛ ahe. Wɔbɔ mɔdɛŋ waa akɛ wɔɔnyiɛ egbɛtsɔɔmɔi asɛɛ. (Abɛi 22:6) Wɔbii lɛ fɛɛ ná Latinbii ahenumɔi kɛjɛ miŋɔɔ, kɛ Germanbii amumɔ ni anyɛɔ akɛtsuɔ nii kɛjɛ amɛnyɛ ŋɔɔ. Shi nɔ ni he hiaa fe fɛɛ ni amɛna kɛjɛ wɔdɛŋ ji mumɔŋ gboshinii.

Wɔ shia shihilɛ bɔleɔ Maŋtsɛyeli lɛ he nibii ahe. Nibii nɛɛ ni wɔɔha ehi klɛŋklɛŋ gbɛhe lɛ bɛ mlɛo. Akɛ nɔkwɛmɔ nɔ lɛ, wɔna naagba yɛ weku Biblia mli nikasemɔ ni wɔɔfee daa lɛ gbɛfaŋ, shi wɔnijiaŋ ejeee wui. Wɔkɛ gbekɛbii lɛ ateŋ mɔ fɛɛ mɔ tee Kristofoi akpeei kɛ kpokpaa nɔ kpeei kɛ kpeei wuji ashishi hu, kɛjɛ amɛ gbekɛbiiashi tɔ̃ɔ. Hela loo sane kroko ni ebaje trukaa pɛ ji nɔ ni tsĩɔ wɔ kpeeiyaa naa. Kɛfata he lɛ, gbekɛbii lɛ fataa wɔhe yɛ Kristofoi asɔɔmɔ nitsumɔ lɛ mli, beni amɛdarako po.

Gbekɛbii lɛ bɔi wiemɔi ahamɔ yɛ Teokrase Sɔɔmɔ Skul lɛ mli, beni amɛye aaafee afii nyɔŋma. Wɔye wɔbua amɛ ni amɛsaa amɛhe kɛha amɛ klɛŋklɛŋ wiemɔi lɛ, ni wɔwo amɛ hewalɛ ni amɛkɛ wolo ni amɛŋmala otii yɛ nɔ atsu nii, moŋ fe ni amɛaaŋma wiemɔ lɛ fɛɛ. Sɛɛ mli lɛ, agbɛnɛ amɛteŋ mɔ fɛɛ mɔ diɛŋtsɛ saa ehe kɛhaa ewiemɔ. Agbɛnɛ hu, beni amɛye aaafee afii 10 kɛmiishɛ 12 lɛ, amɛteŋ mɔ fɛɛ mɔ bɔi shiɛmɔyaa daa. Enɛ ji shihilɛ gbɛ pɛ ni amɛle.

Miŋa, Clara, ná gbɛfaŋnɔ ni he hiaa waa yɛ wɔbii lɛ atsɔsemɔ mli. Daa gbɛkɛ, beni amɛdarako kwraa—ni ji be mli ni gbekɛ jwɛŋmɔ mɔ̃ɔ nɔ ni atsɔɔ lɛ lɛ fɛɛ jogbaŋŋ lɛ—Clara kaneɔ Biblia mli sane ehaa amɛ ni ekɛ amɛteŋ mɔ fɛɛ mɔ sɔleɔ. Ekɛ Kɛjɛ Paradeiso ni Laaje Kɛyaa Paradeiso ní Asaa Akpɔ̃, Tsɔɔlɔ Kple lɛ Toiboo, kɛ My Book of Bible Stories woji lɛ tsu nii jogbaŋŋ ni ehe ba sɛɛnamɔ diɛŋtsɛ.a Beni wɔnine shɛɔ kasɛt ni atswaa aboɔ toi kɛ nɔ ni akwɛɔ ni akɛkaseɔ nii, ni Yehowa Odasefoi kɛha lɛ anɔ lɛ, wɔkɛ nomɛi hu tsu nii.

Niiashikpamɔ ni wɔna akɛ fɔlɔi Kristofoi lɛ maa nɔ mi akɛ ehe hiaa ni asusu gbekɛbii lɛ ahe daa gbi. Suɔmɔ ni mli wa, amɛhe miishɛɛ ni aaana aŋkroaŋkro, kɛ be babaoo, fata nibii ni he hiaa gbekɛbii waa lɛ ahe. Jeee akɛ wɔbu lɛ akɛ eji wɔ gbɛnaa nii akɛ fɔlɔi, ni ji akɛ wɔtsu nɛkɛ hiamɔ nii nɛɛ ahe nii bɔ ni wɔɔnyɛ kɛkɛ, shi moŋ wɔna miishɛɛ babaoo yɛ nakai feemɔ mli.

Lɛlɛŋ, eyɛ miishɛɛ waa kɛha fɔlɔi akɛ amɛaana wiemɔi ni yɔɔ Lala 127:3-5 lɛ amlibaa, akɛ: “Naa, Yehowa gboshinii ni ehaa ji bii, ni nikeenii ji musuŋbii. Bɔ ni gãimlibii yɔɔ yɛ ekãalɔ dɛŋ lɛ, nakai obalahiiaŋ bihii yɔɔ. Ajɔɔ nuu ni amɛyi egãimlibii akotoku lɛ tɔ lɛ!” Yehowa sɔɔmɔ akɛ weku ni efee ekome lɛ eha wɔna miishɛɛ waa lɛlɛŋ!

[Shishigbɛ niŋmaa]

[Mfoniri ni yɔɔ baafa 26]

Antonio Santoleri kɛ eweku kɔkrɔɔ