Brochure Hee lɛ ni Akɛbaatsu Nii Jogbaŋŋ Kɛmɔ Shi
1 Akɛni mɛi babaoo eye suɔlɔ ko gbele he awerɛho pɛŋ hewɔ lɛ, esa akɛ mɛi sɔrɔtoi fɛɛ anya brochure hee ni ji, Beni Mɔ Ko ni Osumɔɔ Lɛ Egbo lɛ he. Esa akɛ ehe kɛ emli mfonirii ni asha kɛ nɔ ni atɛŋ lɛ fɛɛ ni feɔ hiŋmɛi lɛ fɛo lɛ aha ekɛhamɔ lɛ afee mlɛo. Lazaro ni ateeɔ lɛ shi kɛjɛɔ gbohii ateŋ lɛ he mfoniri ni teeɔ henumɔi ashi ni atɛŋ yɛ baafa 29 lɛ tsɔɔ bɔ ni Yesu “sumɔɔ waa akɛ ejie gbele pilamɔi lɛ kɛya.” Mfoniri ni atɛŋ yɛ baafa muu ni tsa nɔ lɛ fɛɛ nɔ lɛ feɔ jeŋ hee lɛ mli gbohiiashitee he shihilɛ ni yɔɔ miishɛɛ lɛ he mfoniri. Kwɛ bɔ ni esa akɛ enɛ aha mɛi ni yeɔ awerɛho lɛ atsuii anyá aha!
2 Ato brochure nɛɛ he gbɛjianɔ koni akɛtee sanegbaai ashi. Sanebimɔi ni akɛbaama saji anɔ mi lɛ jeɔ kpo yɛ akrabatsa ko mli yɛ fa fɛɛ fa naagbee gbɛ. Obaanyɛ okɛ “Sanebimɔi ni Sa Hesusumɔ” nɛɛ atsu nii yɛ gbɛ ni osusuɔ akɛ ebaaye ebua onikaselɔ lɛ waa diɛŋtsɛ lɛ nɔ.
3 Kɛ otee mɛi aŋɔɔ lɛ, obaanyɛ okɛ emli saji ni ato naa yɛ baafa 2 lɛ atsɔɔ, ni obi ni shiatsɛ lɛ atsɔɔ nɔ ni feɔ lɛ miishɛɛ. Kwɛmɔ ni ole nɔ ni he hiaa aŋkro fɛɛ aŋkro. Ha ejie ehenumɔi akpo, koni otsɔɔ bɔ ni wolo bibioo lɛ shɛjeɔ mɔ mii ehaa. Fa fɛɛ fa kɛ nɔ ni wɔ hiɛnɔkamɔ damɔ nɔ lɛ he Biblia mli ŋmalɛi saŋŋ tsuɔ nii.
4 Saneyitso bibioo ni ji, “Hiɛnɔkamɔ Diɛŋtsɛ Yɛ” ni yɔɔ baafa 5 lɛ, kɛ Biblia mli hiɛnɔkamɔ ni yɔɔ kɛha gbohii lɛ ni eshɛjeɔ mɔ mii hu lɛ he nɔmimaa haa. Esa akɛ enɛ atee akɔnɔ shi kɛha “Hiɛnɔkamɔ ni Ma Shi Shiŋŋ kɛha Gbohii Lɛ” ni yɔɔ baafai 26-31 lɛ he sanegbaa. Akrabatsa ni yɔɔ baafa 27 lɛ kɛ “Ŋmalɛi ni Shɛjeɔ Mɔ Mii” lolo haa. Etsɛŋ ni shiatsɛ ni yeɔ awerɛho lɛ baana akɛ Yehowa ji “miishɛjemɔ fɛɛ Nyɔŋmɔ lɛ” lɛlɛŋ.—2 Kor. 1:3-7.
5 Fãi ni akɛfolɔɔ teŋ lɛ tsɔɔ ŋaa gbɛ nɔ etsɔɔ gbɛi sɔrɔtoi ni mɛi feɔ amɛnii amɛhaa yɛ suɔlɔ ko gbele lɛ he. Amɛtsɔɔ bɔ ni abaafee adamɔ ŋkɔmɔyeli naa kɛ bɔ ni mɛi krokomɛi baanyɛ afee ni amɛye amɛbua yɛ fimɔ bei ni tamɔ nakai lɛ amli. Akrabatsa ko yɛ baafa 25 ni yitso ji “Ni Aaaye Abua Gbekɛbii Koni Amɛnyɛ Amɛdamɔ Gbele Naa.” Esa akɛ enɛ afee yelikɛbuamɔ diɛŋtsɛ aha fɔlɔi ní eeeba lɛ akɛ amɛaadamɔ naagba nɛɛ naa lɛ.
6 Ha eko ahi omasɛi daa, ni okɛtsu nii yɛ trukaa odaseyeli mli. Obaanyɛ otsɔ ŋaa gbɛ nɔ obɛŋkɛ mɛi ni yeɔ awerɛho yɛ fuuhei yɛ be mli ni amɛku amɛsɛɛ amɛba ni amɛbasara suɔlɔ ko ni egbo lɛ sãi lɛ.
7 Wɔmli filiɔ wɔ akɛ Yehowa ji Nyɔŋmɔ “ni shɛjeɔ mɛi ni eba shi lɛ amii” lɛ. (2 Kor. 7:6, NW) Wɔmiibu enɛ akɛ hegbɛ ni wɔna akɛ wɔɔfata he ‘kɛshɛje mɛi ni yeɔ ŋkɔmɔ lɛ amii.’—Yes. 61:2.