Gbɛ ni Hi
YEHOWA ODASEFOI susuɔ bɔ ni mumɔŋ shihilɛ kpakpa fiteɔ yɛ je lɛŋ kɛ jeŋba shara kɛ jamɔ mli yiŋkɔshikɔshi feemɔ ni egbɛ eshwã adesai ashihilɛ mli fɛɛ lɛ he waa. Enɛ hewɔ lɛ, bei komɛi lɛ, atsɛɔ amɛ akɛ jamɔ mli keketeefeelɔi. Shi ani nakai amɛji? Dabi. Eyɛ mli akɛ amɛyɛ jamɔ mli hemɔkɛyelii ni mli wa waa moŋ, shi jeee jamɔ mli keketeefeelɔi ji amɛ, yɛ bɔ ni akɛ wiemɔ lɛ tsuɔ nii ahãa lɛ shishinumɔ naa. Amɛnyɛɛɛ maŋkwramɔŋ hiɛnyiɛlɔi anɔ koni amɛkɛha susumɔ ko aya nɔ, ni amɛkɛ amɛhe wooo basabasafeemɔi kɛ awuiyelii amli kɛteee shi amɛshiii mɛi ni amɛkɛ amɛ kpaaa gbee lɛ. Amɛna gbɛ ni hi. Amɛkaseɔ amɛ Hiɛnyiɛlɔ, Yesu Kristo.
Yehowa Odasefoi yɛ nɔmimaa akɛ jamɔ mli anɔkwale yɛ, ni ákɛ anaa yɛ Biblia lɛ mli. (Yohane 8:32; 17:17) Shi Biblia lɛ tsɔɔ Kristofoi akɛ amɛmli ahi, amɛfee ejurɔ, amɛmli ajɔ, ni amɛhiɛ akã shi—ni ji sui ni eŋmɛɛɛ jamɔ he sɛkɛyeli nifeemɔi agbɛ. (Galatabii 5:22, 23; Filipibii 4:5) Awoɔ Kristofoi hewalɛ yɛ Biblia mli wolo ni ji Yakobo lɛ mli ni amɛná “nilee ni jɛ ŋwɛi,” ni awieɔ he akɛ “tsutsu lɛ ehe tse, no sɛɛ lɛ ehe jɔ, ehiɛ kã shi, eboɔ toi, eyi obɔ kɛ mɔbɔnalɛ kɛ yibii kpakpai.” Yakobo kɛfata he akɛ: “Jalɛ yibii lɛ, hejɔlɛ mli adũɔ yɛ ahaa mɛi ni feɔ hejɔlɛ nii lɛ.”—Yakobo 3:17, 18.
Yehowa Odasefoi kaiɔ akɛ Yesu susu anɔkwale lɛ he waa diɛŋtsɛ. Ekɛɛ Pontio Pilato akɛ: “Mi lɛ, enɛ hewɔ afɔ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase.” (Yohane 18:37) Eyɛ mli akɛ eji anɔkwale lɛ hefalɔ ni yɔɔ ekaa moŋ, shi ekaaa akɛ ekɛ ehemɔkɛyelii aaanyɛ mɛi krokomɛi anɔ. Shi moŋ, eshɛ amɛjwɛŋmɔi kɛ amɛtsuii ahe. Ele akɛ eŋwɛi Tsɛ lɛ, ni ji Nyɔŋmɔ ni “hi ni eja” lɛ, baakpɛ eyiŋ yɛ bɔ ni eeefee kɛ be mli ni ebaajie amale kɛ jalɛsane ni ayeee lɛ fɛɛ kɛjɛ shikpɔŋ lɛ nɔ lɛ he. (Lala 25:8) No hewɔ lɛ, ebɔɔɔ mɔdɛŋ akɛ ekɛ nɔnyɛɛ baaku mɛi ni kɛ lɛ kpaaa gbee lɛ anaa. Nɔ ni tamɔɔɔ nakai lɛ, blema jamɔ mli hiɛnyiɛlɔi ni hi shi yɛ egbii lɛ amli lɛ moŋ ka akɛ amɛaanyɛ Yesu nɔ.—Yohane 19:5, 6.
Yehowa Odasefoi yɛ hemɔkɛyelii ni mli wa waa yɛ jamɔ mli tsɔɔmɔi ahe, ni amɛjieɔ subaŋi kpakpai akpo yɛ jeŋba gbɛfaŋ. Taakɛ bɔfo Paulo ji lɛ, amɛyɛ nɔmimaa akɛ “Nuntsɔ kome, hemɔkɛyeli kome, baptisimɔ kome” pɛ yɔɔ. (Efesobii 4:5) Amɛle Yesu wiemɔi nɛɛ hu, akɛ: “Agbó fintɔ̃ɔ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.” (Mateo 7:13, 14) Ni kɛlɛ, amɛbɔɔɔ mɔdɛŋ akɛ amɛaanyɛ mɛi krokomɛi anɔ ni amɛnyiɛ amɛ hemɔkɛyelii asɛɛ. Shi moŋ, amɛkaseɔ Paulo ni ‘amɛkpaa’ mɛi fɛɛ ni sumɔɔ lɛ “fai” ni ‘amɛha akpata amɛkɛ Nyɔŋmɔ teŋ.’ (2 Korintobii 5:20) Enɛ ji gbɛ ni hi. Eji Nyɔŋmɔ gbɛ.
Esoro jamɔ mli keketeefeemɔ kwraa, taakɛ akɛ wiemɔi lɛ tsuɔ nii ŋmɛnɛ lɛ. Jamɔ mli keketeefeelɔi kɛ ŋaa gbɛi pii—ni awuiyeli fata he lɛ—tsuɔ nii ni amɛkɛ amɛ shishitoo mlai nyɛɔ mɛi anɔ. Yɛ nakai feemɔ mli lɛ, amɛbatsɔmɔɔ maŋkwramɔ gbɛjianɔtoo lɛ fã. Shi, Yesu wie akɛ esa akɛ esɛɛnyiɛlɔi lɛ afee mɛi ni “jɛɛɛ je lɛŋ.” (Yohane 15:19; 17:16; Yakobo 4:4) Yɛ nakai wiemɔi lɛ kɛ gbeekpamɔ naa lɛ, Yehowa Odasefoi hiɔ shi akɛ mɛi ni kɛ amɛhe wooo maŋkwramɔŋ béi ko kwraa mli. Ni taakɛ Italy adafitswaa wolo Fuoripagina jaje yɛ faŋŋ mli lɛ, “amɛkɛ nɔ ko nɔ ko enyɛɛɛ mɔ ko mɔ ko nɔ; mɔ fɛɛ mɔ yɛ hegbɛ akɛ ekpɛlɛɔ nɔ ni amɛkɛɔ lɛ nɔ loo ekpooɔ.” Mɛni ejɛ enɛ mli eba? Odasefoi lɛ a-Biblia mli toiŋjɔlɛ shɛɛ sane lɛ gbalaa gbɔmɛi sɔrɔtoi fɛɛ kɛbaa, kɛ mɛi ni tsutsu lɛ amɛji jamɔ mli keketeefeelɔi lɛ po.—Yesaia 2:2, 3.
Jeŋ ni Subaŋi Kpakpai Yɔɔ Mli
Odasefoi kpɛlɛɔ nɔ akɛ adesai nyɛŋ amɛna naagbai ni jamɔ mli keketeefeelɔi susuɔ he waa lɛ anaa tsabaa. Onyɛŋ onyɛ mɔ ko nɔ akɛ ena hemɔkɛyeli yɛ Nyɔŋmɔ mli loo ekpɛlɛ bo diɛŋtsɛ ojamɔ mli hemɔkɛyelii anɔ. Nakai ni asusuɔ akɛ abaanyɛ afee lɛ kɛ nibii ni yɔɔ gbeyei fe fɛɛ yɛ yinɔsane mli lɛ ekomɛi ba, tamɔ Tai Krɔŋkrɔŋi, teŋgbɛ afii lɛ amli Niseniianiifeemɔi, kɛ Amerika Indiabii lɛ “ajamɔ tsakemɔ” lɛ. Shi, kɛji okɛ ohe fɔ̃ɔ Nyɔŋmɔ nɔ lɛ, obaasumɔ ni oshi sane lɛ oha lɛ.
Taakɛ Biblia lɛ tsɔɔ lɛ, Nyɔŋmɔ efo husu yɛ be ni ekɛŋmɛɔ adesai agbɛ ni amɛku emlai amli ni amɛkɛ nakai feemɔ haa amanehulu kɛ piŋmɔ baa lɛ he. Eshwɛ fioo ni nakai be lɛ baatã kwraa. Yesu miiye nɔ momo akɛ Maŋtsɛ yɛ Nyɔŋmɔ ŋwɛi Maŋtsɛyeli lɛ mli, ni etsɛŋ ni nakai Maŋtsɛyeli lɛ baafee nii ni ekɛjie adesai anɔyelii, ni ebaatsu adesai adaa gbi kudɔmɔ he nii. (Mateo 24:3-14; Kpojiemɔ 11:15, 18) Nɔ ni baajɛ mli aba ji jeŋ muu fɛɛ paradeiso ni toiŋjɔlɛ kɛ jalɛ baafa babaoo yɛ mli. Nakai beaŋ lɛ, anaŋ yiŋkɔshikɔshi feemɔ ko yɛ bɔ ni esa akɛ aja anɔkwale Nyɔŋmɔ lɛ aha lɛ he. “Jalɔi lɛ, shikpɔŋ lɛ aaatsɔ amɛnɔ ni amɛaahi nɔ daa.” (Lala 37:29) Sui ni hiɔ shi kɛyaa naanɔ, tamɔ mɔbɔnalɛ, anɔkwale, jalɛsaneyeli, kɛ ejurɔfeemɔ baaye kunim kɛha adesai toibolɔi fɛɛ ahilɛ-kɛhamɔ.
Beni ekpaa nakai be lɛ gbɛ lɛ, lalatsɛ lɛ wie yɛ lalafoo gbɛ nɔ akɛ: “Mɔbɔnalɛ kɛ anɔkwale ebakpe, jalɛ kɛ hejɔlɛ eshɔshɔɔ amɛhe naa. Anɔkwale lɛ, shikpɔŋ lɛ ekwɛ̃ɔ kɛjɛɔ, ni jalɛ jɛɔ ŋwɛi gboɔ ehiɛ shi ekwɛɔ. Yehowa aaaŋɔ nɔ kpakpa ahã, ni wɔshikpɔŋ lɛ aaaba enii. Jalɛ aaanyiɛ ehiɛ ni eeeŋɔ enanemaahei lɛ efee gbɛ.”—Lala 85:11-14.
Eyɛ mli akɛ wɔnyɛŋ wɔtsake je lɛ moŋ, shi akɛ aŋkroaŋkroi lɛ, wɔbaanyɛ wɔna Nyɔŋmɔ gbeyeishemɔ sui kpakpai ŋmɛnɛ po. Enɛ hewɔ lɛ, wɔbaanyɛ wɔbɔ mɔdɛŋ ni wɔfee gbɔmɛi ni Nyɔŋmɔ baasumɔ akɛ ejálɔi yɛ nakai jeŋ hee lɛ mli. Ni no lɛ wɔbaafata mɛi ni he jɔ ni lalatsɛ lɛ wie amɛhe nɛkɛ lɛ ahe, akɛ: “Mɛi ni he jɔ lɛ, shikpɔŋ lɛ aaatsɔ amɛnɔ, ni amɛmii aaashɛ amɛhe yɛ hejɔlɛ babaoo mli.” (Lala 37:11) Nyɔŋmɔ wajeɔ mɛi ni feɔ esuɔmɔnaa nii lɛ ni ejɔɔ amɛ, ni ekɛ nibii ni yɔɔ naakpɛɛ ahe shiwoo haa kɛha amɛ wɔsɛɛ be. Bɔfo Yohane wie akɛ: “Je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.”—1 Yohane 2:17.
[Mfoniri ni yɔɔ baafa 7]
Yehowa Odasefoi fɔ̃ɔ mɛi fɛɛ nine koni amɛbale Nyɔŋmɔ Maŋtsɛyeli lɛ he sanekpakpa lɛ
[He ni Mfoniri ni yɔɔ baafa 6 lɛ Jɛ]
Kane ni yɔɔ baafai 3, 4, 5, kɛ 6: Printer’s Ornaments/ni Carol Belanger Grafton/Dover Publications, Inc. fee