Amɛfee Yehowa Suɔmɔnaa Nii

Anyá Yesu He akɛ Mesia kɛ Maŋtsɛ!

GBƆMƐI asafo babaoo ni kɛ hoofeemɔ boteɔ Yerusalem yɛ Nisan 9, afi 33 Ŋ.B. lɛ, hã Yudeabii pii ahiɛ fee amɛ yaa. Eyɛ mli akɛ efɔɔ kaa akɛ anaa gbɔmɛi babaoo ni miibote maŋtiase lɛ mli dani ayeɔ Hehoo lɛ moŋ, shi esoro gbɔi nɛɛ kwraa. Mɔ titri yɛ amɛteŋ ji nuu ko ni ta teji bi nɔ. Nuu lɛ ji Yesu Kristo, ni gbɔmɛi lɛ kɛ atadei kɛ tɛŋ blɛoi miiha shikpɔŋ yɛ ehiɛ, ni amɛmiibolɔ akɛ: “Hosiana David bi lɛ! Ajɔɔ mɔ ni baa yɛ Nuntsɔ [Yehowa, NW] lɛ gbɛi anɔ lɛ! Hosiana yɛ ŋwɛi flooflo!” Beni amɛna mɛi babaoo lɛ, enɛ tsirɛ mɛi ni yɔɔ Yerusalem momo lɛ ateŋ mɛi pii ni amɛyafata mɛi ni nyiɛ esɛɛ lɛ ahe.—Mateo 21:7-9; Yohane 12:12, 13.

Eyɛ mli akɛ amrɔ nɛɛ aanyá ehe moŋ, shi Yesu le kaai ni mɛɔ lɛ. Ejaakɛ, yɛ gbii enumɔ pɛ mli lɛ, abaagbe lɛ yɛ nɛkɛ maŋtiase nɛɛ nɔŋŋ mli! Hɛɛ, Yesu le akɛ Yerusalem ji henyɛlɔi akpokpaa nɔ, ni eto maŋ lɛ mli ni ebote yɛ gbɛ ni ayɔse faŋŋ nɔ nɛɛ he gbɛjianɔ beni nakai susumɔ lɛ yɔɔ ejwɛŋmɔ mli.

Blema Gbalɛ ko Ba Mli

Yɛ afi 518 D.Ŋ.B. lɛ, Zakaria gba bɔ ni Yesu baaya Yerusalem yɛ kunimyeli mli lɛ efɔ shi. Eŋma akɛ: “Bɔɔ oshe, Yerusalem biyoo! Naa, omaŋtsɛ lɛ miiba oŋɔɔ: jalɔ kɛ yiwalaherelɔ ji lɛ; ebaa ehe shi, ni eta teji nɔ, kɛ teji obalanyo ni ji tejiyoo bi ko nɔ. . . . Ni eeewie hejɔlɛ wiemɔ etsɔɔ jeŋmaji lɛ, ni enɔyeli lɛ aaajɛ ŋshɔ naa kɛyashi ŋshɔ naa, ni eeejɛ faa lɛ naa kɛyashi shikpɔŋ naagbee hei lɛ tɔ̃ɔ.”—Zakaria 9:9, 10.

No hewɔ lɛ Yerusalem ni Yesu bote yɛ Nisan 9 lɛ hã Biblia gbalɛ ba mli. Ejeee nifeemɔ ko ni ba trukaa kɛkɛ, shi moŋ aje gbɛ ato he gbɛjianɔ jogbaŋŋ. Mra mli kɛtsɔ hiɛ, beni eyɔɔ Yerusalem sɛɛ nɔŋŋ lɛ, Yesu kɛ famɔ hã ekaselɔi lɛ ateŋ mɛi enyɔ akɛ: “Nyɛyaa akrowa ni yɔɔ nyɛhiɛ lɛ mli, ni amrɔ lɛ nyɛaana tejiyoo ni aŋmɔ lɛ shi kɛ ebi; nyɛfɛnea amɛ nyɛbahaa mi. Ni kɛ mɔ ko bi nyɛ sane ko lɛ, nyɛkɛa lɛ akɛ: Amɛhe miihia Nuntsɔ lɛ; ni amrɔ lɛ eeeha nyɛkɛ amɛ aba.” (Mateo 21:1-3) Shi mɛni hewɔ Yesu taoɔ ni eta teji nɔ kɛbote Yerusalem lɛ, ni te bɔ ni mɛi babaoo lɛ fee amɛnii amɛha lɛ he hiaa ha tɛŋŋ?

Shɛɛ Sane ko ni Kɔɔ Maŋtsɛyeli He

Bei pii lɛ, mfoniri ni akɛ hiŋmɛi naa lɛ náa mɔ nɔ hewalɛ waa fe wiemɔ. Enɛ hewɔ lɛ, bei komɛi lɛ Yehowa hãa egbalɔi lɛ feɔ amɛ shɛɛ sane lɛ he mfoniri, ni amɛkɛwoɔ amɛ gbalɛ mli shɛɛ sane lɛ mli hewalɛ. (1 Maŋtsɛmɛi 11:29-32; Yeremia 27:1-6; Ezekiel 4:1-17) Nɛkɛ gbɛ ni anaa jogbaŋŋ, ni atsɔɔ nɔ akɛ adafitswaa saji hãa nɛɛ hãa mɔ ni tsui wa fe fɛɛ, ni kɛ ehiŋmɛi na nɔ ni tee nɔ lɛ, kaiɔ nakai nifeemɔ lɛ be fɛɛ be. Yesu tsɔ gbɛ ni tamɔ nakai nɔŋŋ nɔ efee shɛɛ sane ko ni mli wa waa he mfoniri kɛtsɔ teji ni eta nɔ kɛbote Yerusalem lɛ nɔ. Yɛ mɛɛ gbɛ nɔ?

Yɛ Biblia bei amli lɛ, akɛ teji tsuɔ yiŋtoo ni woo yɔɔ mli he nii. Akɛ nɔkwɛmɔ nɔ lɛ, Salomo ta etsɛ “teji-okpɔŋɔ,” ni ji tejinuu bi ni ekɛ okpɔŋɔ fɔ lɛ nɔ, kɛtee he ni afɔ lɛ mu yɛ akɛ maŋtsɛ lɛ. (1 Maŋtsɛmɛi 1:33-40) No hewɔ lɛ teji nɔ ni Yesu ta kɛtee Yerusalem lɛ baatsɔɔ akɛ ekɛ ehe miitsɔɔ akɛ maŋtsɛ.a Gbɔmɛi asafo babaoo lɛ anifeemɔ wo nɛkɛ shɛɛ sane nɛɛ mli hewalɛ. Ŋwanejee ko bɛ he akɛ, kuu lɛ, ni amɛteŋ mɛi babaoo diɛŋtsɛ ji Galileabii lɛ, kɛ amɛ atadei lɛ ha shikpɔŋ kɛnyiɛ Yesu hiɛ—ni ji nifeemɔ ko ni hãa akaiɔ bɔ ni atswa maŋtsɛ ni Yehu ye lɛ he adafi yɛ maŋ lɛ. (2 Maŋtsɛmɛi 9:13) Bɔ ni amɛwie Yesu he akɛ “David bi” lɛ mã nɔyeli hegbɛ ni eyɔɔ yɛ mla naa lɛ nɔ mi waa. (Luka 1:31-33) Ni eka shi faŋŋ akɛ tɛŋ blɛoi ni amɛkɛtsu nii lɛ tsɔɔ amɛhe shi ni amɛbaa amɛhaa emaŋtsɛyeli hegbɛ lɛ.—Okɛto Kpojiemɔ 7:9, 10 he.

No hewɔ lɛ gbɔmɛi babaoo ni nyiɛ kɛba Yerusalem yɛ Nisan 9 lɛ kɛ shɛɛ sane ni mli kã shi faŋŋ hã akɛ Yesu ji Mesia kɛ Maŋtsɛ ni Nyɔŋmɔ ehala lɛ. Shi kɛlɛ, jeee mɛi fɛɛ na miishɛɛ akɛ amɛaana Yesu ni akɛ lɛ miitsɔɔ yɛ nɛkɛ gbɛ nɔ. Farisifoi lɛ titri ji mɛi ni susu akɛ esaaa kwraa akɛ akɛ maŋtsɛ anunyam ni tamɔ nɛkɛ hãa Yesu. Amɛkɛɛ lɛ, ní ŋwanejee ko bɛ he akɛ, mlifu yɛ amɛgbee mli, akɛ: “Tsɔɔlɔ, kã okaselɔi lɛ.” Yesu hã amɛ hetoo akɛ: “Miikɛɛ nyɛ akɛ, kɛji mɛnɛɛmɛi aaabu amɛnaa lɛ, no lɛ tɛi aaabolɔ.” (Luka 19:39, 40) Hɛɛ, Nyɔŋmɔ Maŋtsɛyeli lɛ ji Yesu shiɛmɔ lɛ saneyitso. Kɛji gbɔmɛi kpɛlɛ nɔ jio, amɛkpɛlɛɛɛ nɔ jio, ekɛ ekaa baajaje shɛɛ sane nɛɛ.

Nikasemɔ Kɛha Wɔ

Ehe bahia ni Yesu ana ekaa babaoo ni ekɛbote Yerusalem yɛ bɔ ni gbalɔ Zakaria gba efɔ shi lɛ naa. Ele akɛ nakai ni eeefee lɛ baatee ehenyɛlɔi lɛ amlifu shi. Dani ebaakwɔ kɛbaaya ŋwɛi lɛ, Yesu kɛ nitsumɔ wo esɛɛnyiɛlɔi lɛ adɛŋ akɛ amɛshiɛ Nyɔŋmɔ Maŋtsɛyeli lɛ he sanekpakpa lɛ, ni ‘amɛyafee jeŋmaji fɛɛ ekaselɔi.’ (Mateo 24:14; 28:19, 20) Ebiɔ ni ana ekaa ni akɛtsu nitsumɔ nɛɛ agbe naa. Jeee mɛi fɛɛ naa miishɛɛ akɛ amɛaabo shɛɛ sane lɛ toi. Mɛi komɛi efee shikpilikpii yɛ he, ni mɛi krokomɛi hu teɔ shi woɔ. Nɔyelii komɛi kɛ naatsii eba shiɛmɔ nitsumɔ lɛ nɔ, loo amɛgu kwraa.

Shi kɛlɛ, Yehowa Odasefoi yooɔ akɛ, kɛji gbɔmɛi lɛ bo toi jio, amɛfeee nakai jio, esa akɛ ashiɛ Nyɔŋmɔ Maŋtsɛyeli ni ato ama shi lɛ atsɔɔ. (Ezekiel 2:7) Beni amɛyaa nɔ amɛtsuɔ nɛkɛ yiwalaheremɔ nitsumɔ nɛɛ, Yesu shiwoo nɛɛ hãa amɛnaa nɔmimaa akɛ: “Naa, mi lɛ mikɛ nyɛ yɛ daa kɛyashi jeŋ naagbee lɛ.”—Mateo 28:20.

[Shishigbɛ niŋmai]