Maŋtsɛyeli Jajelɔi Bɔ Amaniɛ

Maŋtsɛyeli Dũmɔ Wui lɛ Gbɛɛ-kɛ-Shwãmɔ yɛ Bei Fɛɛ Mli

NYƆŊMƆ Wiemɔ, Biblia lɛ, woɔ nitsumɔ kɛ hiɛdɔɔ he hewalɛ. Maŋtsɛ Salomo kɛɛ: “Leebi lɛ dũ odũmɔ nii lɛ, ni gbɛkɛ hu kaajie onine yɛ he; ejaakɛ oleee emli nɔ ni baahi, enɛ jio, enɛ jio, aloo ekolɛ enyɔ lɛ fɛɛ baahi pɛpɛɛpɛ jio.”—Jajelɔ 11:6.

Be fɛɛ be ni sa mli lɛ, Yehowa Odasefoi dũɔ ‘dũmɔ wui’ lɛ kɛtsɔ Nyɔŋmɔ Maŋtsɛyeli lɛ he sanekpakpa lɛ shiɛmɔ nɔ. Amɛyaa nɔ ni “amɛfɔ̃ɔɔ nitsɔɔmɔ kɛ Yesu Kristo shiɛmɔ” yɛ shikpɔji kɛ ŋshɔkpɔi ni fa fe 230 nɔ. (Bɔfoi lɛ Asaji 5:42) Niiashikpamɔi ni nyiɛ sɛɛ lɛ feɔ bɔ ni Yehowa Odasefoi ‘gbɔjɔɔɔ amɛnijiaŋ’ yɛ shiɛmɔ nitsumɔ lɛ mli lɛ he mfoniri.

◻ Yɛ Republic of Cape Verde lɛ, Yehowa Odasefonyo ko nyiɛ tsuŋwoohe ko masɛi yɛ be mli ni etsuɔ shiɛmɔ nitsumɔ lɛ. Gbokɛlɛfoi lɛ ateŋ mɛi komɛi ekwɔ tso ko ni amɛtara nɔ, yɛ tsuŋwoohe lɛ kpo lɛ teŋ. Beni amɛjɛ he ni amɛtara lɛ ni amɛna Odasefonyo lɛ, gbokɛlɛfoi lɛ bo waa ni amɛbi lɛ ni eha amɛ woji tɛtrɛbii lɛ eko. Odasefonyo lɛ kɛ tɛ fĩ Buu-Mɔɔ kɛ Awake! woji tɛtrɛbii lɛ saŋŋ ni efɔ̃ kɛtsɔ tsuŋwoohe lɛ gbogbo lɛ yiteŋ eha amɛ. Nɔ ni jɛ shishijee miishɛɛ nɛɛ mli kɛba ji akɛ, eje Biblia mli nikasemɔi 12 shishi. Gbokɛlɛfoi lɛ ateŋ mɛi etɛ ejɔɔ amɛwala nɔ amɛha Nyɔŋmɔ, ni amɛkɛ amɛhe eha kɛha nu mli baptisimɔ. Gbokɛlɛfoi lɛ ateŋ mɔ kome etee nɔ esɔmɔ akɛ be-fɛɛ sanekpakpa shiɛlɔ, loo gbɛgbalɔ, nɔ ni fa fe afi sɔŋŋ nɛ. Shi, mɛɛ gbɛ nɔ amɛtsɔɔ amɛtsuɔ shiɛmɔ nitsumɔ lɛ yɛ tsuŋwoohe lɛ? Klɛŋklɛŋ lɛ, ajara tsuŋwoohe lɛ mli awo shikpɔŋkukuji amli. No sɛɛ lɛ ajara shikpɔŋkuku lɛ mli ahã Odasefoi etɛ lɛ, ni amɛtsu nii kɛjɛ tsuŋwoohe bibioo kome naa kɛtee ekroko naa. Nɛkɛ Maŋtsɛyeli jajelɔi nɛɛ diɔ mɛi ni yɔɔ wiemɔ lɛ he miishɛɛ lɛ asɛɛ tamɔ bɔ ni Yehowa Odasefoi ni yɔɔ je lɛŋ fɛɛ lɛ feɔ lɛ nɔŋŋ pɛpɛɛpɛ—kɛtsɔ sɛɛsaramɔi afeemɔ nɔ. Shi, sɔrɔtofeemɔ kome ni yɔɔ mli ji bɔ ni amɛfeɔ Biblia mli nikasemɔi lɛ nɔtonɔto kɛtsaraa nɔ lɛ. Yɛ nɔ najiaŋ ni amɛkɛ ŋmɛlɛtswaa kome loo nɔ̃ aaakase Biblia lɛ shikome loo shii enyɔ pɛ yɛ otsi mli lɛ, gbokɛlɛfoi lɛ ateŋ mɛi komɛi kaseɔ nii daa gbi! Kɛfata he lɛ, gbokɛlɛfoi anɔkwɛlɔ nukpa fe fɛɛ lɛ eŋmɛ Odasefoi lɛ agbɛ akɛ amɛbafee asafoŋ kpeei fɛɛ yɛ tsuŋwoohe lɛ mli.

◻ Yoo ko ni yɔɔ Portugal lɛ ná Buu Mɔɔ Asafo lɛ woji babaoo akɛ gboshinii yɛ enaa gbele sɛɛ. Akɛni ejeee Yehowa Odasefoi ateŋ mɔ kome hewɔ lɛ, enaaa he miishɛɛ akɛ ekɛ woji nɛɛ baato. Shi kɛlɛ, esumɔɔɔ ni ekpata woji lɛ ahiɛ hu. Gbi ko lɛ ekɛ Yehowa Odasefonyo ko ni ba eŋɔɔ ebasara lɛ yɛ shia-kɛ-shia nitsumɔ lɛ mli lɛ gba woji atoohe nɛɛ mli woji lɛ ahe sane. Odasefonyo lɛ bi lɛ akɛ ani ele sɛɛnamɔ diɛŋtsɛ ni yɔɔ woji atoohe lɛ mli woji lɛ ahe lɛlɛŋ lo. Yoo lɛ to he eha lɛ akɛ: “Yɛ anɔkwale mli lɛ, mileee amɛhe sɛɛnamɔ diɛŋtsɛ, shi te mafee tɛŋŋ male hu?” Yoo lɛ kpɛlɛ Biblia mli nikasemɔ nɔ, ni etsɛɛɛ ni ebana akɛ enaa woji atoohe lɛ mli woji lɛ ajara wa waa diɛŋtsɛ. Amrɔ nɛɛ, lɛ hu ebatsɔ Yehowa Odasefonyo ni abaptisi lɛ. Kɛfata he lɛ, ebiyoo kɛ amɛweku lɛ naanyo ko ni bɛŋkɛ amɛ kpaakpa hu miikase Biblia lɛ. Mɛɛ gboshinii ni he yɔɔ sɛɛnamɔ woji ni abua naa nɛɛ bafee nɛkɛ!