“Nyɛtsake Jwɛŋmɔ Ni Miná Yɛ Yehowa Odasefoi Lɛ Ahe lɛ”
NAKAI ji bɔ ni Poland tsuŋwoohe nɔkwɛlɔ ko wie yɛ sane ko ni kɔɔ Yehowa Odasefoi anitsumɔ lɛ he, taakɛ atswa he adafi yɛ October 15, 1998 nɔ̃ lɛ mli lɛ. Saneyitso ni ji, “Beni Tsuii ni Esa Etsɔmɔ Tsuii ni Boɔ Toi,” lɛ ji wolo nɔ sane ni tsɔɔ omanye ni Yehowa Odasefoi ye yɛ nii ni amɛkɛ nanemɛi gboklɛfoi lɛ tsu yɛ Wołów, Poland.
Dani aaajie Buu-Mɔɔ wolo tɛtrɛɛ ni atsĩ tã yɛ yiteŋgbɛ lɛ kpo atsɔɔ maŋbii lɛ, ato kpee krɛdɛɛ ko he gbɛjianɔ koni akɛha nanemɛi lɛ yɛ September 13, 1998, yɛ Wołów tsuŋwoohe lɛ. Mɛi ni fata mɛi ni afɔ̃ amɛ nine lɛ ahe ji Odasefoi ni yɔɔ jɛmɛ niiaŋ, mɛi ni abaptisi amɛ kɛ gboklɛfoi krokomɛi ni yɔɔ sane lɛ he miishɛɛ, kɛ tsuŋwoohe lɛ nɔkwɛlɔi ateŋ mɛi babaoo. Nɔ ni nyiɛ sɛɛ nɛɛ ji mɛi ni ba lɛ aniiashikpamɔ.
Jerzy, ni ji Yehowa Odasefoi lɛ ateŋ mɔ kome ni abaptisi lɛ yɛ tsuŋwoo mli nɔ ni fe afii enumɔ ni eho nɛ lɛ kɛɛ akɛ: “Miná miishɛɛ waa diɛŋtsɛ akɛ, ŋmɛnɛ miinyɛ miikane nibii ni kɔɔ mɔdɛŋ babaoo ni nyɛmimɛi ni jɛ asafoi ni bɛŋkɛ lɛ ebɔ ni amɛkɛ ye amɛbua wɔ lɛ he sane.” Ekɛfata he akɛ: “Mikã he miibɔ mihe mɔdɛŋ, ni miina bɔ ni Yehowa shɔ̃ɔ mi ehaa lɛ.”
Gboklɛfonyo kroko ni atsɛɔ lɛ Zdzisław lɛ, wie odaseyeli nitsumɔ yɛ tsuŋwoohe lɛ he akɛ: “Amrɔ nɛɛ mɛi ejwɛ ni abu amɛ fɔ lɛ miisaa amɛhe kɛha baptisimɔ, ni mɛi hee ni yɔɔ sane lɛ he miishɛɛ lɛ kã he amɛmiiya kpee yɛ wɔ asa lɛ nɔ. Nɛkɛ sane ni aŋma awo wolo tɛtrɛɛ lɛ mli lɛ ji nɔ ko ni baakanya wɔ waa diɛŋtsɛ yɛ sɔɔmɔ nitsumɔ nɛɛ mli.” Mɛɛ jwɛŋmɔ ni ja nɛ, ejaakɛ eshwɛ Zdzisław afii 19 ni ekɛaasɔmɔ lolo yɛ tsuŋwoo mli!
Be ni ekane sane ni kɔɔ Wołów tsuŋwoohe lɛ sɛɛ lɛ, tsuŋwoohei anɔkwɛlɔ ko kɛɛ akɛ: “Awo wɔnɔ waa. Misusuko he dã akɛ abaaná jwɛŋmɔ ni ja tamɔ nɛkɛ yɛ tsuŋwoohe nɛɛ he yɛ je lɛ mli wiemɔi 130 mli. Misumɔɔ nyɛ, ni mihiɛ sɔɔ mɔdɛŋ srɔtoi ni nyɛbɔɔ yɛ mɛi ni abu amɛ fɔ lɛ ahe lɛ.” Nɔkwɛlɔ kroko kɛfata he akɛ: “Nyɛtsake jwɛŋmɔ ni miná yɛ Yehowa Odasefoi lɛ ahe lɛ. Tsutsu lɛ, minaa nyɛ akɛ mɛi ni eye jamɔ he sɛkɛ. Agbɛnɛ minaa akɛ nyɛji gbɔmɛi ni nyiɛɔ shishitoo mlai asɛɛ.”
Nɔkwɛlɔ ni kwɛɔ Wołów tsuŋwoohe lɛ, ni ji Marek Gajos, ŋmɔ ni ekɛɛ akɛ: “Shishijee lɛ wɔsusu akɛ omanye fioo ko pɛ nyɛbaaye. Wɔsusu akɛ nyɛ tamɔ jamɔi krokomɛi ni peleɔ nii ahe kɛkɛ kɛha mɛi ni abu amɛ fɔ lɛ saamɔ yɛ Biblia lɛ mli. Shi kɛlɛ, beni wɔna nyɛ shishijee nitsumɔ lɛ, wɔkpɛ wɔyiŋ akɛ wɔkɛ nyɛ baafee ekome. Afii nɛɛhu sɔŋŋ nɛ ni nyɛbɔi biɛ baa ni etɔɔɔ nyɛ, ni mihiɛ sɔɔ nɔ ni nyɛnyɛ nyɛtsu lɛ waa diɛŋtsɛ.”
Shi mɛɛ gbɛ nɔ mɛi ayifalɛ ni awo amɛtsuŋ yɛ Wołów lɛ here sane lɛ nɔ yɛ? Miishɛɛ ni ayɔɔ yɛ nanemɛi gboklɛfoi lɛ ateŋ lɛ mli wa aahu akɛ, eha aŋɔ woji tɛtrɛbii ni ji Odasefoi lɛ diɛŋtsɛ anɔ lɛ fɛɛ. Tsuŋwoohe lɛ nɔkwɛlɔi lɛ hu jie miishɛɛ kpo ni amɛshɛ 40 kroko kɛha amɛ diɛŋtsɛ amɛhe. Bɔ ni afee ni aná eko aha mɛi fɛɛ ni taoɔ eko lɛ hewɔ lɛ, asafoi ni yɔɔ jɛmɛ lɛ ye bua kɛtsɔ ekomekomei 100 ni amɛkɛha nyɛmimɛi ni yɔɔ tsuŋwoo mli lɛ. Yɛ nakai beaŋ nɔŋŋ lɛ, kpeeiyaa yɛ tsuŋwoohe lɛ tee hiɛ.
Piotr Choduń, ni ji tsuŋwoohe nɔkwɛlɔ ni kɛ Yehowa Odasefoi lɛ fee ekome waa lɛ wie akɛ: “Wɔkpɛ wɔyiŋ akɛ wɔkɛ sane ni aŋma yɛ wolo tɛtrɛɛ nɛɛ mli lɛ baakpɛtɛ adafitswaa tao ni yɔɔ wɔ tsuŋwoohe lɛ mli lɛ fɛɛ nɔ. Wɔná ni kulɛ nanemɛi gboklɛfoi lɛ fɛɛ ni kɛ nyɛ bɔiko Biblia lɛ kasemɔ lɛ baakane wolo tɛtrɛɛ lɛ.”
Odasefoi lɛ anɔkwɛmɔnɔ kpakpa kɛ amɛfaishitswaa he mɔdɛŋbɔɔ yɛ shiɛmɔ nitsumɔ lɛ mli lɛ etee nɔ ekɛ yibii kpakpai eba. Kɛfata gboklɛfoi 15 ni etee amɛhiɛ kɛshɛ nu mli baptisimɔ he lɛ ahe lɛ, gboklɛfoi anɔkwɛlɔi 2 ejɔɔ amɛhe nɔ amɛha Yehowa ni gboklɛfoi anɔkwɛlɔ kroko hu ebi ni akɛ lɛ akase Biblia lɛ. Yɛ anɔkwale mli lɛ, nyɛmimɛi ni shiɛ yɛ Wołów tsuŋwoohe lɛ kɛ shidaa lɛ fɛɛ haa Yehowa Nyɔŋmɔ kɛha amɛ omanyeli lɛ.—Okɛto 1 Korintobii 3:6, 7 he.
[Caption on page 28]
Odasefoi etɛ kɛ gboklɛfonyo ko ni kɛ wolo tɛtɛrɛɛ lɛ miitsɔɔ yɛ tsuŋwoo kpeehe asa lɛ nɔ