Maŋtsɛyeli Jajelɔi Bɔ Amaniɛ

Heyeli Kɛmiijɛ Daimonioi Ahewalɛ Shishi

MUMƆI atsɛmɔ nifeemɔi ena gbɔmɛi akpekpei abɔ ashihilɛi anɔ hewalɛ be kakadaŋŋ. Shi abaanyɛ ana heyeli kɛjɛ mli! Nakai ji bɔ ni eba lɛ yɛ mɛi pii agbɛfaŋ yɛ blema Efeso maŋ lɛ mli. Taakɛ Biblia mli amaniɛbɔɔ lɛ tsɔɔ lɛ, “ŋkunyaayelɔi lɛ hu ateŋ mɛi babaoo ba ni amɛkɛ amɛwoji lɛ babua shi ni amɛshã . . . Nɔ̃ hewalɛ ni Nuntsɔ [Yehowa, NW] lɛ wiemɔ lɛ ná ni ekɛ-da ni eye kunim nɛ.”—Bɔfoi lɛ Asaji 19:19, 20.

Kristofoi asafo lɛ hu miina dalɛ ŋmɛnɛ. Taakɛ eji yɛ Efeso lɛ, gbɔmɛi ni batsɔmɔɔ heyelilɔi lɛ ateŋ mɛi komɛi ji mɛi ni tsutsu ko lɛ amɛkɛ mumɔi fɔji tsuɔ nii. Niiashikpamɔ ni jɛ Zimbabwe ni nyiɛ sɛɛ nɛɛ tsɔɔ enɛ mli.

Ale Gogo (Naa) Mthupha jogbaŋŋ yɛ emumɔi fɔji ahewalɛ ni eyɔɔ lɛ hewɔ. Gbɔmɛi jɛɔ hei shɔŋŋ tamɔ Zambia, Botswana, kɛ South Africa baa eŋɔɔ koni ekɛ ebaai ahe tsofa lɛ atsa amɛ. Gogo Mthupha etsɔɔ mɛi krokomɛi hu bɔ ni afeɔ abatsɔɔ n’anga aloo okɔmfo. Ni bei komɛi lɛ eyeɔ ŋkunyaa!

Hɔgbaa leebi ko lɛ, Yehowa Odasefoi ni kɛ amɛhe ewo shia kɛ shia shiɛmɔ nitsumɔ lɛ mli lɛ basara Gogo Mthupha. Ená ekɛ amɛ sanegbaa ni kɔɔ Biblia mli shiwoo he lɛ he jalɛ jeŋ hee lɛ he miishɛɛ, jeŋ ko ni efɔŋ ko kwraa naaa mɛi anɔ hewalɛ yɛ mli. Ehé Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ wolo lɛ eko, ni ekpɛlɛ koni akɛlɛ afee shia Biblia mli nikasemɔ.a Beni akɛ lɛ ekase nii shii etɛ pɛ sɛɛ lɛ, ebɔi kpeei yaa.

Kɛtsɔ Biblia lɛ ni Gogo Mthupha kase lɛ nɔ lɛ, ekase akɛ hewalɛi krɛdɛɛi ni eyɔɔ lɛ jɛ mumɔŋ bɔɔnii yiwalɔi ni ete shi amɛwo jeŋ muu fɛɛ maŋtsɛ ni Yehowa ji lɛ aŋɔɔ. (2 Petro 2:4; Yuda 6) Ekase hu akɛ nɛkɛ daimonioi nɛɛ etswa amɛfaishi akɛ amɛbaagbala mɛi fɛɛ ni amɛaanyɛ lɛ koni amɛte shi amɛwo Yehowa kɛ jamɔ krɔŋŋ. Akɛ ni edaaŋ-ŋmaa damɔ nɛkɛ mumɔŋ bɔɔnii yiwalɔi nɛɛ atsɛmɔ nɔ hewɔ lɛ, mɛni ebaafee?

Gogo Mthupha jie bɔ ni esumɔɔ ni ejie sɛbɛi kɛ emumɔi atsɛmɔ nibii ni eyɔɔ lɛ fɛɛ eshwie lɛ kpo etsɔɔ. Nɔ ni fata enɛɛmɛi ahe ji eyitso fiinɔ krɛdɛɛ lɛ kɛ “etsina akolonto ni wieɔ,” ni no ekɛtsuɔ nii yɛ e-n’anga tsamɔ lɛ mli lɛ. Gogo Mthupha miisumɔ ni eshɛrɛ nɛkɛ nibii nɛɛ fɛɛ eshwie bɔni afee ni enyɛ esɔmɔ anɔkwa Nyɔŋmɔ hiɛkalɔ koome pɛ lɛ, Yehowa.

Eyɛ mli akɛ ewekumɛi lɛ ateŋ mɛi komɛi te shi wo enɛ, ejaakɛ eyeɔ ebua amɛ yɛ shika gbɛfaŋ. Amɛkpalɛ fai koni eŋɔ nibii lɛ kɛ enaakpɛɛ hewalɛi lɛ eha amɛ, bɔni afee ni amɛnyɛ amɛna hesɛɛ daa. Gogo Mthupha ekpɛlɛɛɛ.

Kɛtsɔ Yehowa Odasefoi asafo ni yɔɔ jɛmɛ lɛ ayelikɛbuamɔ nɔ lɛ, ebua mumɔi atsɛmɔ nibii ewo kotokui wuji etɛ mli, ni eshã fɛɛ. Yɛ be mli ni la lɛ shãa edaimonioi ajamɔ mli nibii lɛ, Gogo Mthupha kɛɛ: “Nyɛkwɛa! Nakai akolonto lɛ, enyɛɛɛ ehere lɛ diɛŋtsɛ eyiwala.”

Yɛ be ni sa mli lɛ, Gogo Mthupha jɛ miishɛɛ mli ekɛ nu mli baptisimɔ fee ehenɔjɔɔmɔ kɛha Yehowa lɛ he okadi. Te efeɔ tɛŋŋ ekwɛɔ ehe agbɛnɛ? Kɛtsɔ yelibaai ahɔɔmɔ nɔ. Hɛɛ, kɛtsɔ Nyɔŋmɔ Wiemɔ lɛ mli hewalɛ nɔ lɛ, mɔ ko baanyɛ aye ehe kwraa kɛjɛ daimonioi ajamɔ he. Gogo Mthupha kɛɛ akɛ: “Miyeko mihe nɛkɛ pɛŋ.”

[Shishigbɛ niŋmai]