Shihilɛ ko ni Mishwako Mihe yɛ Mli

TAAKƐ PAUL OBRIST GBA

Yɛ 1912, beni miye afii ekpaa lɛ, Awo gbo beni efɔɔ ebi ni ji enumɔ nɔ lɛ. Yɛ afii enyɔ sɛɛ lɛ, Berta Weibel, shiakwɛlɔ oblayoo fioo ko bɔi wɔ weku lɛ kwɛmɔ. Beni Ataa kɛ lɛ bote gbalashihilɛ mli yɛ afi ni nyiɛ sɛɛ lɛ mli lɛ, wɔ ni ji gbekɛbii lɛ na miishɛɛ akɛ wɔna nyɛ ekoŋŋ.

WƆHI shi yɛ Brugg, maŋ bibioo ko ni yɔɔ Switzerland fã ko ni wieɔ German wiemɔ lɛ mli. Yɛ anɔkwale mli lɛ, Berta ji Kristofonyo diɛŋtsɛ, ni misumɔɔ esane waa diɛŋtsɛ. Eje shishi ebɔi Biblia Kaselɔi (Yehowa Odasefoi) lɛ awoji lɛ kasemɔ yɛ 1908 mli, ni egbaa mɛi krokomɛi nɔ ni ekaseɔ lɛ he saji.

Yɛ afi 1915, beni Berta kɛ Ataa bote gbalashihilɛ mli sɛɛ etsɛɛɛ lɛ, mikɛ lɛ tee wɔyakwɛ “Photo-Drama of Creation.” Nɛkɛ sini mli mfoniri ni Majimaji Ateŋ Kuu ni Ji Biblia Kaselɔi ni Yɔɔ Ekãa nɛɛ jie lɛ ta mijwɛŋmɔ kɛ mitsui he waa. Mɛi krokomɛi hu nya he. Asa ni yɔɔ Brugg lɛ yi aahu akɛ polisifoi lɛ ŋa shinai lɛ ni amɛshwie mɛi krokomɛi ni baa lɛ. Mɛi pii ka akɛ amɛaabote mli kɛtsɔ atswere ni amɛaakwɔ lɛ nɔ kɛtsɔ samfɛlɛ ko ni agbele mli, ni mɛi fioo ko ye omanye.

Awo Nɔkwɛmɔ nɔ Kpakpa Lɛ

No beaŋ lɛ, Jeŋ Ta I miiya nɔ yɛ Europa, ni gbɔmɛi miishe wɔsɛɛ shihilɛ he gbeyei. No hewɔ lɛ, ákɛ akɛ Nyɔŋmɔ Maŋtsɛyeli lɛ he sane ni shɛjeɔ mɔ mii lɛ aaaya shia kɛ shia taakɛ Awo fee lɛ ji nitsumɔ ni sa yijiemɔ. Bei komɛi lɛ ehaa mifataa ehe, ni mináa enɛ he miishɛɛ. Yɛ 1918 lɛ, Awo nyɛ ekɛ nu mli baptisimɔ fee ehenɔjɔɔmɔ kɛha Yehowa Nyɔŋmɔ lɛ he okadi.

Ataa kɛ ehe wooo Awo jamɔ nifeemɔ lɛ mli kɛyashi ebaptisimɔ lɛ sɛɛ, kɛkɛ ni ebɔi shitee kɛ lɛ woo agbɛnɛ. Gbi ko lɛ ehe e-Biblia woji lɛ yɛ edɛŋ ni eshɛrɛ eshwie la mli. Awo nyɛ eshá e-Biblia lɛ pɛ yɛ la lɛ mli. Shi nɔ ni efee yɛ sɛɛ mli lɛ sa kadimɔ waa. Etee Ataa ŋɔɔ ni eyaloo lɛ atuu. Emli fuuu lɛ.

Ataa he jɔ, yɛ enaa sɔŋŋ ni kpɛ ehe lɛ hewɔ. Ni kɛlɛ, yɛ be kɛ bei amli lɛ, ejieɔ eshitee kɛ woo lɛ kpo, ni ehe bahiaa ni wɔkpee emlifu lɛ naa.

Nitsumɔ kɛ Mumɔŋ Shweremɔ

Beni migbe afii etɛ nitsumɔ kasemɔ naa akɛ yitsɔifeelɔ lɛ, yɛ afi 1924 lɛ, mishi shia ni miyaná nitsumɔ yɛ Switzerland maŋ lɛ fã ko ni wieɔ French lɛ mli. Enɛ gbele hegbɛ ni mikɛaalɛɛ minilee yɛ French wiemɔ mli lɛ mli. Eyɛ mli akɛ mishimɔ lɛ tsĩ mimumɔŋ shweremɔ lɛ naa yɛ gbɛ ko nɔ moŋ, shi miŋmɛɛɛ misuɔmɔ ni miyɔɔ kɛha Biblia mli anɔkwale lɛ he. No hewɔ lɛ, beni miku misɛɛ miba shia afii ekpaa sɛɛ lɛ, mije shishi akɛ mabɔi Kristofoi asafoŋ kpee yaa yɛ Brugg.

Yɛ be kukuoo ko sɛɛ lɛ, mifã kɛtee Rheinfelden, maŋ bibioo ko aaafee kilomitai 40 jɛkɛmɔ. Mitsu nii yɛ jɛmɛ yɛ minyɛmi yoo nukpa yitsɔifeemɔ shwapo lɛ mli, ni mitsa mimumɔŋ shweremɔ lɛ nɔ kɛtsɔ Biblia Kaselɔi akuu fioo ko ni mikɛ amɛ kpeɔ lɛ nɔ. Gbi ko beni agbe wɔ otsi teŋ Biblia kasemɔ naa lɛ, Nyɛminuu Soder, onukpa ni kwɛɔ nifeemɔ lɛ nɔ lɛ bi akɛ: “Namɔ eto gbɛjianɔ akɛ ekɛ ehe baawo sɔɔmɔ nitsumɔ lɛ mli Hɔgbaa?” Mikɛ mihe ha, kɛ susumɔ akɛ mafata mɔ ko he koni etsɔɔ mi bɔ ni atsuɔ nitsumɔ lɛ ahaa.

Beni Hɔgbaa shɛ, ni wɔshɛ wɔshikpɔŋkuku lɛ nɔ lɛ, Nyɛminuu Soder kɛɛ, “Owula Obrist baatsu nii yɛ biɛ gbɛ.” Eyɛ mli akɛ mitsui tswa bɔ ni efeko nakai dã moŋ, kɛlɛ mije shishi migba gbɔmɛi ni yɔɔ amɛ shiai amli lɛ Nyɔŋmɔ Maŋtsɛyeli lɛ he sane. (Bɔfoi lɛ Asaji 20:20) Kɛjɛ nakai be lɛ nɔ kɛyaa lɛ, migbugbaaa akɛ matsu shiɛmɔ nitsumɔ ni Yesu wie akɛ abaatsu, dani nibii agbɛjianɔtoo nɛɛ naagbee lɛ aba. (Mateo 24:14) Yɛ March 4, 1934, beni miye afii 28 lɛ, mifee mihe nɔ jɔɔmɔ kɛha Yehowa Nyɔŋmɔ lɛ he okadi kɛtsɔ nu mli baptisimɔ nɔ.

Afii enyɔ sɛɛ lɛ, miná nitsumɔ akɛ yitsɔifeelɔ yɛ Lugano, Switzerland maŋtiase lɛ fã ko ni wieɔ Italia wiemɔ lɛ mli. Mije shishi oya nɔŋŋ mibɔi sanekpakpa lɛ shiɛmɔ yɛ jɛmɛ, eyɛ mli akɛ Italia wiemɔ lɛ fioo kɛkɛ mile. Fɛɛ sɛɛ lɛ, yɛ miklɛŋklɛŋ Hɔgbaa yɛ shiɛmɔ nitsumɔ lɛ mli lɛ, mikɛ woji bibii 20 ni mikɛtee lɛ hã. Yɛ mli aahu lɛ, minyɛ mibua gbɔmɛi fioo ni yɔɔ wiemɔ lɛ he miishɛɛ lɛ anaa mifee amɛ kuu koni wɔkase Buu-Mɔɔ lɛ. Yɛ naagbee mli lɛ, abaptisi mɛnɛɛmɛi ateŋ mɛi komɛi, ni yɛ February 1937 mli lɛ, wɔtse Yehowa Odasefoi asafo yɛ Lugano.

Nyɔji enyɔ sɛɛ, yɛ April 1937 lɛ, minine shɛ wolo ko ni tsake mishihilɛ gbɛ kwraa lɛ nɔ. Eji ninefɔɔ akɛ mibasɔmɔ yɛ Betel, taakɛ atsɛɔ Yehowa Odasefoi anitsumɔhe nine ni yɔɔ maŋ ko mli lɛ. Mikpɛlɛ ninefɔɔ lɛ nɔ oya nɔŋŋ—yiŋkpɛɛ ko ni mishwako mihe yɛ mli kɔkɔɔkɔ. No hewɔ lɛ, mije nɔ ni ebatsɔ afii 60 nitsumɔ yɛ be fɛɛ sɔɔmɔ lɛ mli lɛ shishi.

Betel Sɔɔmɔ yɛ Haomɔ Bei Amli

Nakai be lɛ mli lɛ, Swiss Betel lɛ yɛ maŋtiase ni ji Bern, Switzerland maŋ wulu lɛ mli. Jɛmɛ wɔkala woji wuji, woji bibii, kɛ woji tɛtrɛbii yɛ wiemɔi 14 mli yɛ, ni akɛ enɛ maje kɛtee Europa fɛɛ. Yɛ be komɛi amli lɛ, mikɛ woji wuji lɛ yaa oketeke shidaamɔhe lɛ yɛ shwiili mli, akɛni yɛ nakai beaŋ lɛ, jeee daa wɔnáa tsɔne ni woɔ jatsui lɛ hewɔ. He ni akɛha mi klɛŋklɛŋ yɛ Betel ni matsu nii yɛ ji Composition Department lɛ, he ni wɔtoɔ sumui ni akɛkalaa woji lɛ ahe gbɛjianɔ yɛ lɛ. Etsɛɛɛ ni mije nitsumɔ shishi yɛ ɔfis ni ahereɔ gbɔi yɛ lɛ, ni misɔmɔ akɛ Betel weku lɛ yitsɔikũlɔ hu.

Yɛ September 1939 lɛ, Jeŋ Ta II fɛ, ni Nazi tutuamɔ ni yɔɔ gbeyei lɛ gbɛ gbeyeishemɔ ewo Europa fɛɛ. Switzerland ji maŋ ni fiii maji ni kɛ amɛhe wuɔ ta lɛ eko sɛɛ. Shishijee lɛ, wɔtsá wɔ Kristofoi anitsumɔ lɛ nɔ ni afooo mli. Kɛkɛ ni yɛ July 5, 1940, yɛ shwane ŋmɛji enyɔ mli, beni mita mikpɔ̃lɔ lɛ sɛɛ yɛ gbɔi ashitaramɔhe lɛ, nuu ko ni kɛ asraafonyo ko ni hiɛ tu ni kakla tsɛ naa pue.

“Nɛgbɛ Zürcher yɔɔ?” nuu lɛ bi kɛ gbee walɛ. Yɛ nɛkɛ be nɛɛ mli lɛ Franz Zürcher ji nitsumɔhe nine lɛ nɔkwɛlɔ ni kwɛɔ shiɛmɔ nitsumɔ lɛ nɔ yɛ Switzerland.

Mibi akɛ, “namɔ mikɛɛ akɛ lɛ etsɛɔ lɛ lɛ?” Amrɔ nɔŋŋ lɛ amɛmɔ mi ni amɛgbala mi kɛkwɔ atrakpoi lɛ, koni miyatsɔɔ amɛ heni Zürcher ɔfis lɛ yɔɔ.

Afã Betel weku lɛ fɛɛ—wɔyibɔ aaafee 40 yɛ nakai beaŋ—koni wɔyabua wɔhe naa yɛ niyeli asa lɛ nɔ. Akɛ tui wuji ejwɛ mamɔ tsũ lɛ sɛɛ bɔni afee ni akɛje mɔ fɛɛ mɔ ni baaka akɛ ebaajo foi lɛ nijiaŋ wui. Asraafoi aaashɛ 50 bɔi tsũ lɛ mli taomɔ yɛ mli gbɛ. Nɔ ni tamɔɔɔ amɛ gbɛkpamɔi lɛ, anaaa odaseyeli ko ni tsɔɔ akɛ Yehowa Odasefoi fata he ni ateɔ shi awoɔ asraafoi anitsumɔ lɛ. Kɛlɛ, ahe woji wuji lɛ babaoo kɛjɛ wɔdɛŋ ni aloo awo asraafoi atsɔnei wuji enumɔ mli kɛtee.

Beni wɔkpoo akɛ wɔŋmɛŋ gbɛ ni nɔyeli hegbɛi lɛ akane Buu-Mɔɔ lɛ dani akala lɛ, afo ekalamɔ lɛ mli yɛ Switzerland. Enɛ tsɔɔ akɛ, nitsulɔi fioo pɛ ahe baahia kɛha nitsumɔ yɛ Betel, ni awo mɛi ni darako yɛ weku lɛ mli lɛ hewalɛ koni amɛshi ni amɛtsɔmɔ gbɛgbalɔi, taakɛ atsɛɔ Yehowa Odasefoi ni kɛ amɛhe woɔ be-fɛɛ shiɛmɔ nitsumɔ lɛ mli lɛ.

Gbɛgbamɔ yɛ Ta Be Mli

Yɛ July 1940 lɛ, miku misɛɛ kɛtee Switzerland maŋ lɛ fã ni wieɔ Italia wiemɔ ni bɛŋkɛ Lugano, he ni mihi dani miba Betel lɛ. Nɛkɛ shikpɔŋkuku ni eyi tɔ kɛ Katolikbii sɔŋŋ, ni nakai beaŋ hu lɛ eyɔɔ Fasist nɔyeli hewalɛ shishi nɛɛ, bafee migbɛgbamɔ nitsumɔhe.

Efɔɔɔ kaa akɛ gbi ko aaaho ni polisifoi etsiii minaa koni makpa shiɛmɔ nitsumɔ lɛ. Gbi ko beni mikɛ yoo ko wieɔ yɛ abɔɔ ko agbo naa lɛ, nuu ko ni wo maŋbii atade mɔ mi kɛjɛ misɛɛ, ni ekɛ mi wo polisifoi atsɔne ko ni bɔleɔ shi mli, ni ekɛ mi tee Lugano. Jɛmɛ ekɛ mi wo polisifoi lɛ adɛŋ yɛ. Beni abi mi sane lɛ, mi tsɔɔ mli akɛ Yehowa Nyɔŋmɔ efã wɔ akɛ wɔshiɛ.

Polisifonyo lɛ ha hetoo kɛ henɔwomɔ akɛ: “Wɔji mɛi ni kɛ famɔ haa yɛ biɛ yɛ shikpɔŋ lɛ nɔ, Nyɔŋmɔ baanyɛ ekɛ famɔ aha yɛ ŋwɛi!”

Yɛ ta lɛ mli lɛ, ehe bahia ni wɔfee toiboo wɔha Yesu ŋaawoo akɛ “nyɛhiɛ atɛa tamɔ onufui, ni nyɛfea kpoo tamɔ okpoi” lɛ. (Mateo 10:16) No hewɔ lɛ, mikɛ woji lɛ babaoo to mitade kotoku lɛ mli. Ni bɔni afee ni mana nɔmimaa akɛ nɔ ko eŋmɛŋ mi lɛ, miwo knickerbockers ni afi mli kpɛŋŋ yɛ minakutsei anaa.

Yɛ sɛɛ mli lɛ, minine shɛ gbɛtsɔɔmɔ nɔ akɛ mifã kɛya Engadine jɔɔ lɛ mli, he ni mikɛ polisifoi lɛ kwakwe-kɛ-alɔnte shwɛmɔ lɛ tsa nɔ yɛ lɛ. Enɛ ji jɔɔ fɛfɛo ko yɛ Swiss Alps, heni yɛ fɛ̃i beaŋ lɛ snoo haà nɔ fɛɛ lɛ, no hewɔ lɛ, miha akɛ mitokota dade ni miwoɔ kɛtsɔɔ snoo nɔ lɛ baha mi bɔni afee ni manyɛ matsu shikpɔŋkuku lɛ mli nii.

Nine he haanɔ ni mli efee kulɔkulɔ he hiaa kɛ akɛ dade tokota ni awoɔ kɛtsɔɔ snoo nɔ lɛ miifã gbɛ yɛ fɛ̃i be mli. Minɔ lɛ bɔi tsirɛmɔ nɔŋŋ yɛ ekɛ nitsumɔ be fɛɛ be lɛ hewɔ. Kwɛ miishɛɛ ni miná gbi ko beni minine shɛ nikeenii ko ni mikpaaa gbɛ nɔ, ní nɔ ni yɔɔ mli ji atade ni awoɔ ashwieɔ ŋwɛi atade nɔ, ni gbeɔ fɛ̃i ni akɛ nine lo kɛ nine he haanɔ ni yɔɔ kulɔkulɔ lɛ! Kristofonyo nyɛmi yoo ko ni yɔɔ mitsutsu asafo ni yɔɔ Bern lɛ fee eha mi. Kɛbashi amrɔ nɛɛ po, kɛ misusu he lɛ, ehaa minaa hiɛsɔɔ babaoo.

Miishɛɛ Hegbɛi Babaoo

Yɛ 1943 lɛ, shihilɛ yɛ Switzerland baje shishi akɛ eehi, ni atsɛ́ mi koni miku misɛɛ mibasɔmɔ yɛ Betel. Yɛ naagbai komɛi ni yɔɔ Lausanne asafo ni wieɔ French ni jɛkɛmɔ aaafee kolomitai 100 lɛ mli hewɔ lɛ, akɛ nitsumɔ wo midɛŋ koni miyasara nakai maŋ lɛ be fɛɛ be, koni miye mibua shiɛlɔi lɛ bɔni afee ni amɛná jwɛŋmɔ kpakpa yɛ Nyɔŋmɔ gbɛjianɔtoo lɛ he.

Yɛ sɛɛ mli lɛ, misɔmɔ yɛ be ko mli akɛ kpokpaa nɔkwɛlɔ kɛha French asafoi fɛɛ ni yɔɔ Switzerland lɛ. Yɛ otsi lɛ shishijee mli lɛ, mitsuɔ nii yɛ Betel, shi mikɛ Sohaa, Hɔɔ, kɛ Hɔgbaa yasaraa asafoi sɔrɔtoi lɛ otsi fɛɛ otsi, koni mikɛye mabua amɛ yɛ mumɔŋ. Kɛfata he lɛ, beni ato asafo ni wieɔ French yɛ Bern yɛ 1960 lɛ shishi lɛ, mibatsɔ sɛinɔtalɔ. Misɔmɔ yɛ nɛkɛ gbɛhe nɛɛ mli kɛyashi 1970, beni ajie Betel kɛjɛ Bern kɛtee he ni yɔɔ fɛo ni eyɔɔ amrɔ nɛɛ yɛ Thun maŋ lɛ mli lɛ.

Mina miishɛɛ akɛ mina Odasefoi akuu fioo ko ni wieɔ Italia wiemɔ yɛ Thun, ni mije shishi mikɛ amɛ bɔi nitsumɔ. Yɛ mli aahu lɛ, ato asafo shishi, ni misɔmɔ akɛ sɛinɔtalɔ afii pii kɛyashi nyɛmimɛi obalahii ahe basa kɛha nakai gbɛnaa nii lɛ he nitsumɔ.

Nɔ ni mibuɔ lɛ akɛ eji hegbɛ krɛdɛɛ ko ni miishɛɛ yɔɔ mli ji Yehowa webii amajimaji ateŋ kpeei ni aaaya. Akɛ nɔkwɛmɔ nɔ lɛ, yɛ 1950 lɛ afee Teokrase Nɔyaa Kpee yɛ Yankee Stadium, New York. Yehowa Odasefoi ajeŋ fɛɛ nitsumɔhe yitso ni yɔɔ Brooklyn, New York lɛ saramɔ ná minɔ hewalɛ waa. Mihiɛ hu kpaŋ Nyɛminuu Milton G. Henschel wiemɔ ni eha yɛ afi ni nyiɛ sɛɛ yɛ Jamɔ ni He Tse Kpee ni afee yɛ London, England lɛ, ni gbala jwɛŋmɔ kɛtee Yesu wiemɔi, “miikɛɛ nyɛ akɛ, kɛji mɛnɛɛmɛi aaabu amɛnaa lɛ, no lɛ tɛi aabɔlɔ” lɛ nɔ lɛ hu nɔ. (Luka 19:40) Nyɛminuu Henschel bi akɛ, “Ani nyɛsusuɔ akɛ esa akɛ tɛi lɛ abolɔ?” Miinyɛ miinu bolɔmɔ ni ba kɛjɛ gbei akpei nyɔŋmai abɔ ni gbɛɛ yɛ mitoiŋ akɛ, “Dabi!” lɛ he lolo.

Beni miku misɛɛ mitee Betel yɛ 1937 lɛ, mitsɛ ni na le akɛ yelikɛbuamɔ fioo kɛkɛ wɔnine shɛɔ nɔ lɛ, kɛ ahuntoo bi akɛ, “Mibinuu, te ooofee tɛŋŋ ohi shi kɛ́ ogbɔ?” Mitsɛ́ lalatsɛ David wiemɔi lɛ ayisɛɛ mikɛha lɛ hetoo: “Shi minako jalɔ ko ni akwa lɛ loo ni eseshibii miisisɛ̃ aboloo pɛŋ.” (Lala 37:25) Nɛkɛ wiemɔi nɛɛ eba mli anɔkwale yɛ migbɛfaŋ.

Kwɛ miishɛɛ ni miyɔɔ, akɛ nɔ ni fe afii 80 ni eho nɛ lɛ, Berta Weibel kɛ Ataa bote gbalashihilɛ mli, ni ákɛ kɛtsɔ enɔkwɛmɔ nɔ kɛ eyelikɛbuamɔ nɔ lɛ, mibale Yehowa kɛ esui lɛ! Eyɛ mli akɛ weku lɛ mli bii lɛ ateŋ mɛi komɛi ye ehe fɛo moŋ, shi kɛlɛ esɔmɔ Yehowa yɛ anɔkwale mli kɛyashi egbo yɛ 1983. Ejieee heshwamɔ kpo akɛ ésɔmɔ e-Nyɔŋmɔ, Yehowa; nakai nɔŋŋ mi hu mishwako mihe akɛ mihi shi oshija, ni mitu miwala fɛɛ kɛha Yehowa sɔɔmɔ.

[Mfoniri ni yɔɔ baafa 25]

Miitsu nii yɛ Betel