Maŋtsɛyeli Jajelɔi Bɔ Amaniɛ

Nyɔŋmɔ Ha Eshwere yɛ Alaska

WÚ BIBIOO ko ni hɔ snoo kɛ ais shishi lɛ mɛɔ kɛha hegbɛ ni eeena koni ekwɛ̃ ni eda agbo. Shwie baa wú ni dalɛ shɛɔ milimitai etɛ yɛ elɛɛmɔ mli lɛ baanyɛ ada kɛyashɛ kilogram 40 yɛ nyɔji etɛ pɛ ni feɔ Alaska hulutsoo be lɛ mli! Hɛɛ, shikpɔŋ nɛɛ ni tsutsu lɛ gbɔmɛi babaoo susu akɛ eji nɔ ni wooo yibii, ni fɛi yeɔ waa yɛ nɔ, ni akɛfeee nɔ ko nɔ ko lɛ baanyɛ awo yibii babaoo.

Enɛ ji anɔkwale titri yɛ mumɔŋ shikpɔŋ ni yɔɔ Alaska lɛ he. Yehowa Odasefoi miiya nɔ amɛmiidu Maŋtsɛyeli wú lɛ yɛ jɛmɛ, he ni fɛi be sɛɛ tsɛɔ waa yɛ lɛ. Taakɛ eji yɛ shikpɔji krokomɛi anɔ lɛ, Nyɔŋmɔ haa wú lɛ shwereɔ yɛ tsui ni hiɛ sũ kpakpa lɛ mli.—1 Korintobii 3:6, 7.

● Yɛ be mli ni Odasefonyo gbekɛ yoo ko ni atsɛɔ lɛ Vanessa ta amɛskul bɔs ko mli lɛ, ena enaanyo skulnyo ko ni atsɛɔ lɛ Ann, ni ekome too efɔɔ shitamɔ lɛ. Etamɔ nɔ ni Ann miiye awerɛhoo, no hewɔ lɛ, Vanessa tsɛ Ann koni ebata emasɛi. Lɛɛlɛŋ ákɛ Ann miiye awerɛhoo! Tsui hela egbe enyɛ, ni no sɛɛ etsɛɛɛ ni kansa gbe etsɛ. Enɛ hewɔ Ann kɛ ewekumɛi ebahi shi yɛ Alaska lɛ.

Gbi ko Hɔɔ beni Vanessa nyiɛ shiɛmɔ nɔ lɛ, etee enaanyo hee lɛ shia, ni eshi wolo bibioo ni ji Ani Nyɔŋmɔ Susuɔ Wɔhe Lɛɛlɛŋ? lɛ eha lɛ. Enɔ Ju beni Ann tee skul lɛ, eyatao gbekɛ Odasefonyo lɛ. Ann bi Biblia mli saji babaoo, ni Vanessa nyɛ eha hetoo. Ebi akɛ: “Nɛgbɛ nyɛyaa nyɛ sɔlemɔ lɛ yɛ?” Nakai gbi gbɛkɛ lɛ, Ann tee eklɛŋklɛŋ kpee yɛ Maŋtsɛyeli Asa lɛ nɔ.

Eyeee be ko ni awusa ni eye afii 17 nɛɛ baná ‘tsɛmɛi’ kɛ ‘nyɛmɛi’ babaoo, taakɛ Yesu wo shi lɛ. (Mateo 19:29) Ni kwɛ bɔ ni be nɛɛ baafee miishɛɛ aha, ákɛ aaana Ann ni mii eshɛ ehe kɛ ŋmɔlɔ ni miijɔɔ ehe nɔ eeha Yehowa kɛtsɔ nu mli baptisimɔ nɔ yɛ “Nyɔŋmɔ Toiŋjɔlɛ He Bɔfoi” Kpokpaa Wulu nɔ Kpee lɛ shishi!

● Yɛ maji ni etse amɛhe banee ni yɔɔ Alaska Kooyigbɛ kpokpai lɛ anɔ—hei ni shikpɔji kilomitai ohai abɔ kamɔ akrowai lɛ ateŋ lɛ—akɛ Buu Mɔɔ Asafo lɛ kɔɔyɔŋ lɛlɛ ni hiɛ tsɔnei enyɔ lɛ etsu nii koni akɛdu Maŋtsɛyeli wú lɛ yɛ akutsei ni fa fe 150 mli. Shi mumɔŋ shweremɔ damɔ Biblia nikasemɔ ni afeɔ daa gbi kɛtsɔɔ woloŋmaa nɔ lɛ nɔ. Akɛni woloŋmaa ji nɔ ko ni wa kɛha gbɔmɛi pii hewɔ lɛ, ehe miihia koni Biblia tsɔɔlɔ lɛ afee mɔ ni le ŋaa ni tsakeɔ nibii amli, bɔni afee ni eha miishɛɛ ni nikaselɔ lɛ ená lɛ aya nɔ. Mɛɛ gbɛ nɔ aaatsɔ atsu enɛ he nii?

Eyɛ mli akɛ he ni Kathy yɔɔ lɛ kɛ Edna teŋ jɛkɛmɔ shɛɔ kilomitai 600 moŋ, shi ekɛ lɛ fee Biblia mli nikasemɔ ni yaa hiɛ! Yɛ nɔ najiaŋ ni Kathy aaaŋmala sanebimɔi ni yɔɔ wolo ni amɛkɛkaseɔ nii lɛ mli kɛkɛ ewo wolo ni eŋmaa lɛ mli lɛ, eto wolo kɛha sanebimɔi he gbɛjianɔ kɛ heni abaaŋmala saji ahetoo lɛ yɛ. Beni Edna eŋmala hetooi lɛ sɛɛ lɛ, Kathy ŋmaa lɛ wolo ekoŋŋ, ni eŋmalaa saji ni he hiaa kɛgbalaa sane oti ko mli. Kathy kɛɛ: “Mito Shɔ gbɛkɛ kɛha wɔ ‘nikasemɔ’ lɛ, ni mibɔ mɔdɛŋ mitsu he nii taakɛ matsu be ni mito kɛha Biblia nikasemɔi krokomɛi fɛɛ ahe nii lɛ nɔŋŋ. Mikɛ wolo kotoku ni midrɛs yɔɔ nɔ, ni stamp kpɛtɛ nɔ hu majeɔ Edna. Akɛni eheɔ otsii enyɔ dani wolo lɛ yashɛɔ hewɔ lɛ, etamɔ nɔ ni nikasemɔ kɛmiitsɔ woloŋmaa nɔ lɛ yɛ blɛoo.”

Susumɔ miishɛɛ ni Kathy kɛ Edna baana beni yɛ nyɔji nyɔŋma ni amɛkɛkase nii kɛtsɔ woloŋmaa nɔ lɛ sɛɛ lɛ, amɛkpe hiɛ kɛ hiɛ yɛ kpokpaa wulu nɔ kpee ni afee yɛ Anchorage lɛ shishi lɛ he okwɛ! Odasefoi lɛ hu na miishɛɛ akɛ amɛaana Biblia kaselɔi kɛ mɛi krokomɛi ni yɔɔ wiemɔ lɛ he miishɛɛ, ni amɛjɛ akrowai ni amɛtse amɛhe banee ni yɔɔ Alaska lɛ ni amɛba kpee lɛ.

Eyɛ mli akɛ ekolɛ bei komɛi lɛ shweremɔ lɛ baa fiofio moŋ, shi “tsei bibii” komɛi tsɛ̃ɔ oya kɛ́ amɛná anɔkwale la lɛ. Kɛ aja mli lɛ, abaptisiɔ Yehowa yijielɔi heei ni fa fe oha daa afi yɛ Alaska! Wɔmiikɛɛ akɛ, “Yehowa, oyiwaladɔŋŋ” akɛ ohaa eshwereɔ!