Amɛfee Yehowa Suɔmɔnaa Nii

Yesu Tsu Kaselɔi 70

EJI afii 32 Ŋ.B. agbiɛnaa be mli. Nyɔji ekpaa pɛ eshwɛ dani Yesu baagbo. No hewɔ lɛ, bɔni afee ni ewo shiɛmɔ nitsumɔ lɛ foi, ni ekɛ tsɔsemɔ aha esɛɛnyiɛlɔi lɛ ateŋ mɛi komɛi lolo lɛ, ehala kaselɔi 70 ni “etsu amɛ enyɔnyɔ kɛtsɔ ehiɛ kɛtee maŋ fɛɛ maŋ kɛ he fɛɛ he ni lɛ diɛŋtsɛ ebaaya lɛ.”—Luka 10:1.a

Yesu tsu ekaselɔi lɛ “kɛtsɔ ehiɛ” bɔni afee ni yɛ sɛɛ mli beni Yesu eyashɛ jɛmɛ lɛ, gbɔmɛi lɛ anyɛ akpɛ amɛyiŋ oya nɔŋŋ kɛji akɛ amɛyɛ kɛha Mesia lɛ loo amɛbɛ. Shi mɛni hewɔ etsu amɛ “enyɔnyɔ” lɛ? Eka shi faŋŋ akɛ, bɔni afee ni amɛnyɛ amɛwowoo amɛhe hewalɛ yɛ be mli ni amɛkɛ shitee-kɛ-woo ekpe lɛ.

Beni emaa hiamɔ ni yɔɔ amɛshiɛmɔ nitsumɔ lɛ he lɛ nɔ mi lɛ, Yesu kɛɛ esɛɛnyiɛlɔi lɛ akɛ: “Nikpamɔ lɛ fa, shi nitsulɔi lɛ faaa; no hewɔ lɛ nyɛkpaa nikpamɔ Nuntsɔ lɛ fai, koni etsu nitsulɔi kɛba enikpamɔ lɛ mli.” (Luka 10:2) Nikpamɔ ni akɛto he lɛ sa, ejaakɛ sɛɛkpee yɛ nikpamɔ be mli baanyɛ afite yibii kpakpai. Nakai nɔŋŋ kɛ kaselɔi lɛ kpoo amɛshiɛmɔ nitsumɔ lɛ, wala ni jara wawai baanyɛ alaaje!—Ezekiel 33:6.

Sɔɔlɔi ni Nɔ ko Wooo Amɛ Ahuntoo

Yesu tee nɔ efã ekaselɔi lɛ akɛ: “Nyɛkahiɛa fotro loo kotuku loo tokotai, ni nyɛkaŋaa mɔ ko yɛ gbɛ lɛ nɔ.” (Luka 10:4) Eji nɔ ko ni gbɛfalɔ fɔɔ feemɔ akɛ jeee kotuku kɛ niyenii pɛ kɛkɛ ehiɔ, shi moŋ kɛ tokota kroko, ejaakɛ tokotai lɛ ashishi baanyɛ aye ni enaa kpaai lɛ baanyɛ atserɛ. Shi esaaa akɛ Yesu kaselɔi lɛ haoɔ amɛhe yɛ nɛkɛ nibii nɛɛ ahe. Shi moŋ, esa akɛ amɛná hekɛnɔfɔɔ akɛ Yehowa baakwɛ amɛ kɛtsɔ nanemɛi Israelbii, ni ji mɛi ateŋ ni afɔɔ gbɔfeemɔ lɛ anɔ.

Shi mɛni hewɔ Yesu kɛɛ ekaselɔi lɛ akɛ amɛkaŋa mɔ ko lɛ? Ani esa akɛ amɛfee mɛi ni bɛ suɔmɔ, ni feɔ basabasa po? Dabi kwraa! Ekolɛ Hela wiemɔ a·spaʹzo·mai, ni shishi ji koni aŋa lɛ baanyɛ atsɔɔ babaoo fe “hɛloo” loo “oshwie” kɛkɛ ni aaakɛɛ kɛ bulɛ. Ekolɛ nɔ ni baanyɛ afata he hu ji naashɔmɔi, fuamɔi, kɛ sanegbaa kakadaŋŋ ni bakãa mɛi enyɔ ni le amɛhe lɛ ateŋ ni afɔɔ feemɔ lɛ. Ŋmalɛi lɛ ahe wielɔ ko wie akɛ: “Nɔ ni fataaa ŋamɔi ni yɔɔ Bokagbɛbii lɛ ateŋ taakɛ eji yɛ wɔ nɔ lɛ he lɛ ji hiɛshimaa fioo ko, aloo nine mli kpamɔ, shi nɔ ni afeɔ ji fuamɔi babaoo, kɛ yitso hosomɔ, kɛ gbɔmɔtso kɛ shifɔɔ shwɛtɛɛ yɛ shikpɔŋ po. Enɛɛmɛi fɛɛ biɔ be babaoo.” (Okɛto 2 Maŋtsɛmɛi 4:29 he.) No hewɔ lɛ, Yesu ye ebua esɛɛnyiɛlɔi lɛ koni amɛkwa kusumii nibii ni gbalaa mɔ jwɛŋmɔ ni he ehiaaa lɛ.

Naagbee lɛ, Yesu kɛɛ ekaselɔi lɛ akɛ kɛ amɛbote shia ko mli ni ahere amɛ lɛ, esa akɛ ‘nakai shia lɛ nɔŋŋ amɛhi ni amɛye ni amɛnu nii ni amɛbaaha amɛ lɛ.’ Shi kɛ amɛbote maŋ ko mli ni ahereee amɛ lɛ, esa akɛ ‘amɛshi jɛmɛ ni amɛya eblohui lɛ amli, ni amɛkɛɛ akɛ: Nyɛmaŋ nɛŋ mulu tete ni kpɛtɛ wɔnaji ahe lɛ nɔ wɔkpalaa wɔshwieɔ nyɛnɔ nɛɛ.’ (Luka 10:7, 10, 11) Mulu ni mɔ ko aaakpala loo aaahoso kɛaaje enaneshi lɛ tsɔɔ akɛ kaselɔi lɛ miishi shia loo maŋ ni ahereee amɛ lɛ mli yɛ hejɔlɛ mli amɛmiiha nɔ ni baaba kɛjɛ Nyɔŋmɔ ŋɔɔ yɛ naagbee lɛ. Shi mɛi ni kɛ mlihilɛ hereɔ Yesu kaselɔi lɛ náa jɔɔmɔi. Yesu kɛɛ ebɔfoi lɛ yɛ shihilɛ kroko mli akɛ: “Mɔ ni hereɔ nyɛ lɛ, ehereɔ mi; ni mɔ ni hereɔ mi lɛ, ehereɔ mɔ ni tsu mi lɛ. Ni mɔ fɛɛ mɔ ni aaaha mɛi bibii nɛɛ ateŋ mɔ kome nuhɔ̃ɔ kpulu kome pɛ enu yɛ kaselɔ gbɛi anɔ lɛ, lɛɛlɛŋ, miikɛɛ nyɛ akɛ enyɔmɔwoo eŋmɛŋ lɛ gbikogbiko.”—Mateo 10:40, 42.

Nikasemɔi Kɛha Wɔ

Yehowa Odasefoi ni fa fe 5,000,000 yɛ jeŋ fɛɛ lɛ miishiɛ Nyɔŋmɔ Maŋtsɛyeli lɛ he sanekpakpa ni akɛwo amɛdɛŋ lɛ, ni amɛmiifee kaselɔi amrɔ nɛɛ. (Mateo 24:14; 28:19, 20) Amɛyɔseɔ akɛ amɛshɛɛ sane lɛ he miihia. No hewɔ lɛ, amɛkɛ amɛbe lɛ tsuɔ nii yɛ nilee gbɛ nɔ, ni amɛkpoɔ nibii ni baagbala amɛjwɛŋmɔ ni baatsi amɛnaa kɛjɛ amɛjwɛŋmɔ muu fɛɛ ni amɛaagbala kɛba amɛnitsumɔ ni he hiaa fe fɛɛ lɛ nɔ lɛ he.

Yehowa Odasefoi bɔɔ mɔdɛŋ koni amɛkɛ mɛi fɛɛ ni amɛkɛkpeɔ lɛ aye yɛ suɔmɔ mli. Ni kɛlɛ, amɛkɛ amɛhe wooo sanegbaa ni sɛɛnamɔ ko bɛ he lɛ mli, ni amɛkɛ amɛhe wooo ŋwanejeei ni kɔɔ shihilɛ mli nibii ahe loo mɔdɛŋ ni abɔ koni akɛjaje jalɛ sane ni ayeee ni nine enyɛ shi yɛ mli lɛ mli. (Yohane 17:16) Shi moŋ, amɛgbalaa amɛsanegbaa lɛ kɛyaa adesai anaagbai anaa tsabaa kome pɛ—Nyɔŋmɔ Maŋtsɛyeli lɛ nɔ.

Bei pii lɛ, anaa Yehowa Odasefoi ni amɛmiitsu nii enyɔnyɔɔnyɔ. Ani anyɛŋ babaoo atsu kɛ amɛteŋ mɔ kome fɛɛ mɔ kome tsu nii ekome? Ekolɛ nakai ni. Shi kɛlɛ, Kristofoi yɔseɔ sɛɛnamɔi ni jɛɔ nii ni amɛkɛ amɛnanemɛi heyelilɔi tsuɔ lɛ mli kɛbaa. Ehaa amɛ yibaamɔ falɛ ko kɛ amɛmiiye odase yɛ hei ni oshara yɔɔ. Hefatalɔi ni akɛaatsu nii lɛ hu yeɔ ebuaa mɛi heei lɛ ni amɛnáa hesai ni sanekpakpa lɛ he shiɛlɔi ni yɔɔ niiashikpamɔi babaoo lɛ yɔɔ lɛ ahe sɛɛ. Eji anɔkwale akɛ mɛi enyɔ lɛ fɛɛ baanyɛ aye abua kɛha amɛhe hewalɛwoo.—Abɛi 27:17.

Ŋwanejee ko bɛ he akɛ, shiɛmɔ nitsumɔ lɛ ji nitsumɔ ko ni he hiaa fe fɛɛ ni atsuɔ yɛ “naagbee gbii” nɛɛ amli. (2 Timoteo 3:1) Yehowa Odasefoi yɛ miishɛɛ akɛ amɛaaná jeŋ muu fɛɛ nyɛmifeemɔ sɛɛfimɔ yɛ be mli ni amɛkɛ “jwɛŋmɔ kome miipele sanekpakpa lɛ hemɔkɛyeli lɛ he lɛ” mli.—Filipibii 1:27.

[Shishigbɛ niŋmai]