Namɔ Ji Yehowa?
YEHOWA kɛɛ enɔkwa jálɔi lɛ ateŋ mɔ kome akɛ: “Mɔ ko mɔ ko enaŋ mi, ni eyi aaaná wala.” (2 Mose 33:20) “Nyɔŋmɔ lɛ Mumɔŋ,” ni adesai nyɛŋ amɛkɛ amɛhiŋmɛii diɛŋtsɛ ana lɛ. (Yohane 4:24) Taakɛ hulu lɛ ni wɔɔkwɛ lɛ tɛ̃ɛ yɛ shwane mli lɛ baanyɛ aye wɔhiŋmɛii awui lɛ, nakai nɔŋŋ ebaafee oshara waa kɛha wɔ akɛ wɔɔna hewalɛ Jɛɛhe ni jeee wɔ hulu ni kpɛ́ɔ waa lɛ kɛkɛ efee shi moŋ efee ŋulamii krokomɛi ni kpɛ́ɔ tamɔ hulu ni fa babaoo hu ni yɔɔ jeŋ muu fɛɛ lɛ.
Eji miishɛɛ sane akɛ, ehe ehiaaa ni wɔna Nyɔŋmɔ dani wɔtao ehe saji wɔle. Biblia lɛ haa ayɔseɔ Mɔ ni saa nakai nikeenii ni yɔɔ naakpɛɛ, ni ji shikpɔŋ lɛ eto eha wɔ, ni ejieɔ esu hu kpo etsɔɔ wɔ. No hewɔ lɛ esa jogbaŋŋ akɛ wɔɔkwɛ Biblia lɛ mli koni wɔtao ni wɔle Tsɛ ni ha wɔ wala ni ekɛ shia ni emli shihilɛ ŋɔɔ ni wɔbaaná nakai shihilɛ lɛ mli ŋɔɔmɔ yɛ mli lɛ ha wɔ lɛ he saji.
Nɔ ni Egbɛi lɛ Damɔ Shi Kɛha
Gbɛi fɛɛ gbɛi yɛ eshishitsɔɔmɔ, eyɛ mli akɛ ekolɛ mɛi babaoo yɛ ŋmɛnɛ ni leee shishitsɔɔmɔi lɛ. Ákɛ nɔkwɛmɔnɔ lɛ, Ŋleshi gbɛi David ni ale waa lɛ jɛ Hebri wiemɔ ko ni shishi ji “Mɔ ni Asumɔɔ” lɛ mli. Bɔlɔ lɛ gbɛi ni ji Yehowa lɛ hu yɛ eshishitsɔɔmɔ. Mɛni ni? Yɛ Biblia lɛ klɛŋklɛŋ Hebri wiemɔ lɛ mli lɛ, akɛ niŋmaa okadii ejwɛ YHWH ŋmaa ŋwɛi gbɛi lɛ, ni ejeɔ kpo aaafee shii 7,000 yɛ Biblia lɛ fã ni aŋma yɛ Hebri mli lɛ mli. Anuɔ ŋwɛi gbɛi lɛ shishi akɛ etsɔɔ akɛ, “Ehaa Ebaa Mli.” Etsɔɔ akɛ Yehowa haa lɛ diɛŋtsɛ ebatsɔɔ nɔ fɛɛ nɔ ni ehe hiaa ni efee yɛ nilee mli bɔni afee ni etsu eyiŋtoi ahe nii. Lɛ ji Bɔlɔ, Kojolɔ, Yiwalaherelɔ, Wala Halɔ, ni no hewɔ lɛ ebaanyɛ eye eshiwoi anɔ. Kɛfata he lɛ, yɛ Hebri wiemɔ mli lɛ, gbɛi Yehowa lɛ yɛ wiemɔ su ko mli ni tsɔɔ nifeemɔ ko ni eshwɛ fioo abaatsu he nii agbe naa. Hɛɛ, Yehowa diɛŋtsɛ miiya nɔ eefee mɔ ni haa eyiŋtoi baa mli. Nyɔŋmɔ hiɛkalɔ ji lɛ!
Yehowa Subaŋi ni Nɔ Kwɔlɔ Fe Fɛɛ
Biblia lɛ wieɔ Bɔlɔ lɛ he akɛ “Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii, ni hiɛɔ mɔbɔnalɛ mli ehaa mɛi akpei abɔ, ni ŋɔɔ tɔmɔ kɛ efɔŋ kɛ esha efaa.” (2 Mose 34:6, 7) Wiemɔ ni ji “mɔbɔnalɛ” náa eshishitsɔɔmɔ kɛjɛɔ Hebri wiemɔ ni shishinumɔ yɔɔ mli waa lɛ mli. Etsɔɔ mlihilɛ ni jɛɔ suɔmɔ mli ekɛ ehe kpɛtɛɔ nɔ ko he kɛyashiɔ beni etsuɔ yiŋtoo ni eyɔɔ kɛha nakai nii lɛ he nii. Abaanyɛ atsɔɔ shishi hu akɛ “anɔkwa suɔmɔ.” Yehowa mlihilɛ lɛ jɛɔ suɔmɔ mli ekpɛtɛɔ ebɔɔnii ahe, ni etsuɔ eyiŋtoo ni yɔɔ naakpɛɛ he nii. Ani onaŋ suɔmɔ ni tamɔ nɛkɛ ni jɛ Mɔ ni kɛ wala eha bo lɛ ŋɔɔ lɛ he miishɛɛ?
Yehowa mli fuuu mra ni ekɛ wɔtɔmɔi keɔ wɔ oya. Eji miishɛɛ akɛ aaabɛŋkɛ mɔ ni tamɔ nɛkɛ. Ni kɛlɛ, nakai etsɔɔɔ akɛ ekpɛlɛɔ efɔŋfeemɔ nɔ. Ejaje akɛ: “Mi, Yehowa lɛ, misumɔɔ jalɛsaneyeli, minyɛɔ ojotswaa kɛ nɔshafeemɔ.” (Yesaia 61:8) Ákɛ Nyɔŋmɔ ni sumɔɔ jalɛsaneyeli lɛ, eŋmɛŋ mɛi ni kɛ ekãa feɔ esha ni yaa nɔ yɛ amɛ nɔ fɔŋ feemɔ mli lɛ agbɛ kɛyaŋ naanɔ. No hewɔ lɛ, wɔbaanyɛ wɔná nɔmimaa akɛ yɛ Yehowa be ni sa mli lɛ, ebaajaje jalɛ sane ni ayeee yɛ je lɛŋ lɛ. Ekwaŋ mɛi ni afeɔ amɛ niseniianii lɛ.
Ebɛ mlɛo akɛ aaaha suɔmɔ kɛ jalɛsaneyeli aŋmɛ pɛpɛɛpɛ kɛmɔ shi. Kɛ fɔlɔ ji bo ni obii lɛ baaa amɛjeŋ jogbaŋŋ lɛ, ani ewaa kɛhaa bo akɛ oookpɛ oyiŋ yɛ be, kɛ bɔ ni obaajaje amɛ oha, kɛ he ni obaafee nakai kɛyashɛ lɛ he? Ebiɔ nilee babaoo bɔni afee ni aha jalɛsaneyeli kɛ mɔbɔnalɛ ni suɔmɔ yɔɔ mli aŋmɛ pɛpɛɛpɛ. Yehowa jieɔ nakai su lɛ kpo babaoo beni ekɛ adesai yeɔ. (Romabii 11:33-36) Lɛɛlɛŋ, abaanyɛ ana Bɔlɔ lɛ nilee yɛ he fɛɛ he, ákɛ nɔkwɛmɔnɔ lɛ yɛ adebɔɔ mli naakpɛɛ nibii ni bɔle wɔ kɛkpe lɛ mli.—Lala 104:24; Abɛi 3:19.
Shi, nilee ni aaaná lɛ kɛkɛ faaa. Bɔni afee ni Bɔlɔ lɛ atsu esuɔmɔnaa nii ahe nii lɛ, esa akɛ ená hewalɛ hu, ni Biblia lɛ jieɔ lɛ kpo akɛ eyɛ hewalɛ waa: “Nyɛholea nyɛhiŋmɛii anɔ kɛyaa ŋwɛi, ni nyɛkwɛa: Namɔ bɔ enɛɛmɛi? Lɛ mɔ ni ejieɔ amɛsafo lɛ kpo yɛ yibɔ naa, ni etsɛɔ amɛ fɛɛ kɛ amɛgbɛii; enyɛmɔ ni fa kɛ ehewalɛ kpele lɛ hewɔ lɛ amɛteŋ ekomefolo po eshwɛɛɛ.” (Yesaia 40:26) Yɛ Yehowa ‘nyɛmɔ ni fa’ lɛ naa lɛ, etsuɔ nibii ahe nii. Ani subaŋ ni tamɔ nɛkɛ haŋ obɛŋkɛ lɛ?
Maji Fɛɛ a-Nyɔŋmɔ
Ekolɛ obaakɛɛ akɛ, ‘Shi ani jeee Yehowa ní ji “Kpaŋmɔ Momo” lɛ Nyɔŋmɔ lɛ ji blema Israel Nyɔŋmɔ lɛ?’ Eji anɔkwale akɛ Yehowa jie ehe kpo etsɔɔ Israelbii lɛ. Shi kɛlɛ, Yehowa ji Nyɔŋmɔ ni “weku fɛɛ weku . . . ni yɔɔ shikpɔŋ nɔ lɛ ná egbɛi kɛjɛ eŋɔɔ” kɛtsɔ klɛŋklɛŋ adesai enyɔ ni ebɔ amɛ lɛ nɔ. (Efesobii 3:15, NW) Kɛ oheɔ oyeɔ akɛ eja akɛ okɛ bulɛ aaaha oblematsɛmɛi lɛ, ani efeŋ nɔ ni sa akɛ oookula shi oha Mɔ ni kɛ wala ha klɛŋklɛŋ gbɔmɔ, wɔ fɛɛ wɔblematsɛ ni ji mɔ ni seshi sɔrɔtoi fɛɛ ni yɔɔ shikpɔŋ nɔ ŋmɛnɛ lɛ jɛ emli kɛba lɛ?
Adesai a-Bɔlɔ lɛ jeee mɔ ni yɔɔ kpɛŋŋ. Lɛɛlɛŋ, be ko lɛ wekukpaa kpakpa bakã lɛ kɛ Israel maŋ lɛ teŋ. Shi yɛ nakai beaŋ po lɛ, ehere mɛi fɛɛ ni boɔ tsɛɔ egbɛi lɛ atuu. Israel maŋtsɛ nilelɔ ko kɛɛ Yehowa yɛ sɔlemɔ mli akɛ: “Gbɔ tete ni jɛɛɛ omaŋ Israelbii lɛ ateŋ, shi moŋ ogbɛi lɛ hewɔ ejɛ maŋsɛɛ shɔŋŋ eba . . . lɛ: bo toi yɛ ŋwɛi . . . , ni ofee nɔ fɛɛ nɔ ni gbɔ lɛ boɔ tsɛɔo yɛ hewɔ lɛ, beni afee ni shikpɔŋ lɛ nɔ majimaji fɛɛ ale ogbɛi lɛ.” (1 Maŋtsɛmɛi 8:41-43) Kɛbashi ŋmɛnɛ lɛ, gbɔmɛi ni jɛ maji fɛɛ mli lɛ baanyɛ abale Yehowa ni amɛná amɛkɛ lɛ teŋ wekukpaa ni shishinumɔ yɔɔ mli. Shi te no saa ohe ehaa tɛŋŋ?
Sɛɛnamɔi ni Yɔɔ Yehowa ni Aaale Lɛ lɛ He
Kɛ oooku osɛɛ kɛya sane mlitsɔɔmɔ ni yɔɔ sane ni etsɔ hiɛ lɛ mli lɛ he lɛ, kɛ́ onine shɛ nikeenii ko ni aha he fɛfɛo ko nɔ lɛ, bɔ fɛɛ bɔ ni ji lɛ ooosumɔ ni otao ni ole nɔ ni nikeenii lɛ ji. Te esa akɛ akɛtsu nii ni akwɛ nɔ aha tɛŋŋ? Nakai nɔŋŋ hu wɔmiisumɔ ni wɔle nɔ ni yɔɔ Nyɔŋmɔ jwɛŋmɔ mli kɛha wɔ beni esaa shikpɔŋ lɛ eto wɔ lɛ. Biblia lɛ kɛɔ akɛ, “ebɔɔɔ lɛ efolo,” shi “eshɔ̃ lɛ ni ahi nɔ,” ni ji akɛ koni adesai ahi nɔ.—Yesaia 45:18.
Shi adesai babaoo ebuko nikeenii ni Bɔlɔ lɛ kɛha lɛ he. Amɛmiifite shikpɔŋ lɛ, ni eŋɔɔɔ Yehowa naa kwraa. Ni kɛlɛ, yɛ nɔ ni egbɛi lɛ damɔ shi kɛha naa lɛ, Yehowa etswa efai shi akɛ ebaaha eklɛŋklɛŋ yiŋtoo ni eyɔɔ kɛha gbɔmɔ kɛ shikpɔŋ lɛ aba mli. (Lala 115:16; Kpojiemɔ 11:18) Ebaasaa shikpɔŋ lɛ akɛ gboshinii kɛha mɛi ni sumɔɔ ni amɛhi shi akɛ ebii toibolɔi lɛ.—Mateo 5:5.
Biblia lɛ naagbee wolo lɛ tsɔɔ bɔ ni nibii baatamɔ aha kɛ́ no ba akɛ: “Naa, Nyɔŋmɔ buu lɛ yɛ gbɔmɛi ateŋ, ni eeeshi ebuu lɛ yɛ amɛteŋ, ni amɛaatsɔmɔ emaŋ. . . . Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.” (Kpojiemɔ 21:3, 4) No be lɛ mli lɛ mɔ ko kwraa yeŋ ŋkɔmɔ loo awerɛho kɛ yaafo yɛ suɔlɔ ko gbele hewɔ. Mɔ ko kwraa kɛ nijiaŋwujee bolɔŋ koni aye abua lɛ loo ni eeepiŋ yɛ hela ko ni gbeɔ mɔ hewɔ. ‘Abaafo gbele sɛɛ’ po. (1 Korintobii 15:26; Yesaia 25:8; 33:24) Enɛ tsɔɔ shihilɛ ni kɛjɛ shishijee lɛ Yehowa sumɔɔ ni wɔná mli ŋɔɔmɔ beni ebɔ wɔ klɛŋklɛŋ blematsɛmɛi lɛ.
Yɛ anɔkwale mli lɛ, obaanyɛ oná nakai paradeiso shihilɛi lɛ he nɔ ko fioo bianɛ yɛ Yehowa jálɔi lɛ ateŋ. Ekɛɔ amɛ akɛ: “Miji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ni onyiɛ nɔ lɛ.” (Yesaia 48:17) Yehowa ji Tsɛ ni mli hi ni tsɔɔ wɔ ni ji ebii lɛ gbɛ ni hi fe fɛɛ ni wɔɔtsɔ nɔ wɔhi shi. Gbɛtsɔɔmɔi ni eyɔɔ kɛha adesai lɛ kɛ gbɛtsiinii ni esaaa haaa, shi moŋ hebuu ni suɔmɔ yɔɔ mli. Enɛɛmɛi asɛɛ ni abaanyiɛ lɛ kɛ anɔkwa heyeli kɛ miishɛɛ baaba, taakɛ aŋma akɛ: “Shi [Yehowa, NW] ji Mumɔ lɛ; shi he ni [Yehowa mumɔ, NW] lɛ yɔɔ lɛ, jɛi heyeli yɔɔ.” (2 Korintobii 3:17) Kɛtsɔ gbɛtsɔɔmɔi ni atsɔɔ yɛ Biblia lɛ mli lɛ sɛɛnyiɛmɔ nɔ lɛ, mɛi ni kpɛlɛɔ enɔyeli lɛ nɔ lɛ miiná jwɛŋmɔŋ toiŋjɔlɛ ni gbi ko lɛ ebaagbɛ eshwã adesai ajeŋ muu fɛɛ lɛ nɔ lɛ mli ŋɔɔmɔ amrɔ nɛɛ.—Filipibii 4:7.
Mɛɛ Tsɛ ni feɔ ejurɔ Yehowa ji nɛkɛ! Ani oosumɔ ni okase Mɔ ni yɔɔ adebɔɔ mli naakpɛɛ nibii lɛ fɛɛ sɛɛ lɛ he nii babaoo? Sɛɛnamɔi lɛ jara wa waa kɛha mɛi ni feɔ nakai lɛ amrɔ nɛɛ po. Ni yɛ wɔsɛɛ be mli lɛ jɔɔmɔi lɛ baahi shi kɛya naanɔ.
[Mfoniri ni yɔɔ baafa 5]
Abaanyɛ ana ŋwɛi gbɛi ni akɛ Hebri niŋmaa okadii ejwɛ eŋma lɛ yɛ sɔlemɔtsui memeji babaoo gbogboi lɛ ahe