“Anɔkwale lɛ Aaaha Nyɛye Nyɛhe”
“Nyɛaale anɔkwale lɛ, ni anɔkwale lɛ aaaha nyɛye nyɛhe.” Nɛkɛ ji bɔ ni Yesu jaje beni etsɔɔ mɛi babaoo lɛ nii yɛ Yerusalem sɔlemɔtsu lɛ mli lɛ. (Yohane 8:32) Yesu bɔfoi lɛ baanyɛ ayɔse Yesu tsɔɔmɔi lɛ amrɔ nɔŋŋ akɛ no ji anɔkwale lɛ. Amɛna odaseyelii babaoo ni tsɔɔ akɛ amɛtsɔɔlɔ lɛ jɛ ŋwɛi.
SHI kɛlɛ, ekolɛ ebaawa kɛha mɛi komɛi ŋmɛnɛ akɛ amɛaayɔse anɔkwale ni Yesu wie he lɛ. Taakɛ eji yɛ gbalɔ Yesaia gbii lɛ amli lɛ, ŋmɛnɛ, gbɔmɛi yɛ ni “tsɛɔ efɔŋ akɛ ekpakpa kɛ ekpakpa hu akɛ efɔŋ! mɛi ni ŋɔɔ duŋ feɔ la, ni amɛŋɔɔ la hu amɛfeɔ duŋ, mɛi ni ŋɔɔ joomɔ feɔ ŋɔɔmɔ, ni amɛŋɔɔ ŋɔɔmɔ amɛfeɔ joomɔ lɛ!” (Yesaia 5:20) Yɛ susumɔi babaoo, jeŋ nileei, kɛ shihilɛi ni aha etee hiɛ gbii nɛɛ amli hewɔ lɛ, mɛi babaoo nuɔ he akɛ nɔ fɛɛ nɔ yawaa he ko, ni akɛ nɔ ko bɛ ni atsɛɔ lɛ anɔkwale lɛ.
Beni Yesu kɛɛ etoibolɔi lɛ akɛ, anɔkwale lɛ baaha amɛye amɛhe lɛ, amɛhere nɔ amɛkɛɛ: “Abraham seshibii ji wɔ, ni wɔtsɔmɔko mɔ ko nyɔji pɛŋ; te tɛŋŋ ni bo okɛɔ akɛ: Nyɛaaye nyɛheŋ?” (Yohane 8:33) Amɛnuuu he akɛ ehe miihia ni mɔ ko loo nɔ ko aha amɛye amɛhe. Shi, Yesu tsɔɔ mli akɛ: “Lɛɛlɛŋ, lɛɛlɛŋ, miikɛɛ nyɛ akɛ: Mɔ fɛɛ mɔ ni feɔ esha lɛ, esha lɛ nyɔŋ ji lɛ.” (Yohane 8:34) Anɔkwale ni Yesu wieɔ he lɛ baanyɛ agbele gbɛ kɛjɛ esha mli kɛya heyeli mli. Yesu kɛɛ: “Kɛji bi lɛ ha nyɛye nyɛhe lɛ, no nyɛaaye nyɛhe lɛɛlɛŋ.” (Yohane 8:36) No hewɔ lɛ, anɔkwale ní haa mɛi yeɔ amɛhe lɛ ji anɔkwale ni kɔɔ Yesu Kristo, Nyɔŋmɔ Bi lɛ he lɛ. Yesu adesa wala ni yeɔ emuu lɛ afɔleshaa lɛ mli hemɔkɛyeli pɛ nɔ mɔ ko baanyɛ atsɔ aná heyeli kɛjɛ esha kɛ gbele mli.
Yɛ be kroko mli lɛ, Yesu kɛɛ akɛ: “Feemɔ amɛ krɔŋkrɔŋ yɛ onɔkwale lɛ mli; owiemɔ lɛ anɔkwaleŋ.” (Yohane 17:17) Nyɔŋmɔ wiemɔ ni yɔɔ Biblia lɛ mli lɛ ji anɔkwale ni baanyɛ ekɛ heyeli kɛmiijɛ apasa hemɔkɛyeli kɛ apasa jamɔ mli aba. Anɔkwale ni kɔɔ Yesu Kristo he, ni haa gbɔmɛi náa hemɔkɛyeli yɛ emli, ni gbeleɔ gbɛ kɛhaa wɔsɛɛ be he hiɛnɔkamɔ kpakpa lɛ yɛ Biblia lɛ mli. Eji nɔ ko ni yɔɔ nyam waa akɛ aaale Nyɔŋmɔ Wiemɔ lɛ mli anɔkwale lɛ!
Te anɔkwale lɛ ni aaale lɛ he hiaa ha tɛŋŋ? Yɛ be mli ni jamɔi babaoo kɛɔ akɛ amɛnyiɛɔ Biblia lɛ sɛɛ lɛ, amɛhaa adesai ajeŋ nileei kɛ blema saji náa amɛnɔ hewalɛ babaoo. Bei pii lɛ, etamɔ nɔ ni jamɔ mli hiɛnyiɛlɔi lɛ gbaaa amɛhe naa tsɔ yɛ bɔ ni amɛshɛɛ sane lɛ ja ha lɛ he ejaakɛ mɛi babaoo kpɛlɛɔ amɛnɔ. Mɛi komɛi nuɔ he akɛ Nyɔŋmɔ náa jamɔ fɛɛ jamɔ he miishɛɛ, kɛji akɛ ahiɛ jwɛŋmɔ kpakpa yɛ he kɛkɛ. Shi Yesu Kristo tsɔɔ mli akɛ: “Ŋmɛlɛtswaa lɛ miiba ni eshɛ agbɛnɛ, beni anɔkwa jalɔi lɛ aaajá tsɛ lɛ yɛ mumɔ kɛ anɔkwale mli, ejaakɛ mɛi ni jáa lɛ nɛkɛ, tsɛ lɛ hu taoɔ.”—Yohane 4:23.
Kɛ wɔmiisumɔ ni wɔjá Nyɔŋmɔ yɛ enɔkpɛlɛmɔ mli lɛ, no lɛ esa akɛ wɔle anɔkwale lɛ. Enɛ ji sane ni he miihia. Wɔ naanɔ miishɛɛ namɔ damɔ nɔ. No hewɔ lɛ, esa akɛ mɔ fɛɛ mɔ abi ehe akɛ: ‘Ani Nyɔŋmɔ kpɛlɛɔ gbɛ ni mitsɔɔ nɔ mijáa lɛ lɛ nɔ? Ani miisumɔ ni makase Nyɔŋmɔ Wiemɔ lɛ mli anɔkwale lɛ yɛ anɔkwayeli mli? Aloo ani miishe gbeyei yɛ nɔ ni niiamlipɛimɔ jogbaŋŋ baanyɛ ajie lɛ kpo lɛ hewɔ?’