Namɔ Osusuɔ akɛ Nyɔŋmɔ Ji?
TE OBAAHA sanebimɔ nɛɛ hetoo oha tɛŋŋ? Mɛi komɛi susuɔ akɛ amɛle Nyɔŋmɔ jogbaŋŋ—ni tsɔɔ akɛ eji amɛnaanyo kpaakpa. Mɛi krokomɛi naa Nyɔŋmɔ tamɔ bɔ ni amɛnaa amɛwekunyo ko ni amɛkɛ lɛ teŋ jɛkɛ lɛ. Amɛheɔ amɛyeɔ akɛ eyɛ, shi nɔ ko fioo pɛ amɛle yɛ ehe. Kɛ́ oheɔ Nyɔŋmɔ nɔ oyeɔ lɛ, te obaaha sanebimɔi ni nyiɛ sɛɛ nɛɛ ahetoo oha tɛŋŋ?
1. Ani Nyɔŋmɔ ji mɔ ko ni yɔɔ lɛɛlɛŋ?
2. Ani Nyɔŋmɔ yɛ gbɛi?
3. Ani Yesu ji Nyɔŋmɔ Ofe lɛ?
4. Ani Nyɔŋmɔ susuɔ mihe?
5. Ani Nyɔŋmɔ kpɛlɛɔ jamɔ gbɛ̀i srɔtoi fɛɛ anɔ?
Kɛ́ obi mɛi krokomɛi koni amɛha sanebimɔi nɛɛ ahetoo lɛ, eeenyɛ efee akɛ amɛaaha bo hetoi srɔtoi babaoo. No hewɔ lɛ, ebɛ naakpɛɛ mɔ akɛ mɛi efo adesãi yɛ Nyɔŋmɔ he, ni amɛhiɛ susumɔi ni ejaaa yɛ ehe.
Nɔ Hewɔ ni Hetoi lɛ Ahe Hiaa
Beni Yesu Kristo kɛ yoo ko ni heɔ Nyɔŋmɔ nɔ eyeɔ ni ekɛ lɛ kpe yɛ nubu ko he lɛ gbaa sane lɛ, ema nɔ mi akɛ ehe miihia ni ale anɔkwale ni kɔɔ Nyɔŋmɔ he lɛ. Yoo nɛɛ ji Samarianyo, ni ekpɛlɛ nɔ akɛ Yesu ji gbalɔ. Shi nɔ ko miigba yoo lɛ naa. Esoro Yesu jamɔ lɛ yɛ enɔ lɛ he. Beni yoo lɛ wie nɔ ni gbaa enaa lɛ sɛɛ lɛ, Yesu kɛɛ lɛ yɛ faŋŋ mli akɛ: “Nyɛ lɛ, nyɛleee nɔ ni nyɛjáa.” (Yohane 4:19-22) Eyɛ faŋŋ akɛ, Yesu miitsɔɔ akɛ jeee mɛi ni heɔ Nyɔŋmɔ nɔ amɛyeɔ fɛɛ ji mɛi ni le Nyɔŋmɔ yɛ anɔkwale mli.
Ani Yesu wiemɔ lɛ tsɔɔ akɛ mɔ ko mɔ ko nyɛŋ ale Nyɔŋmɔ? Dabi. Yesu saa ekɛɛ yoo lɛ akɛ: “Anɔkwa jálɔi lɛ aaajá tsɛ lɛ yɛ mumɔ kɛ anɔkwale mli, ejaakɛ mɛi ni jáa lɛ nɛkɛ, tsɛ lɛ hu taoɔ.” (Yohane 4:23) Ani oji mɛi ni jáa Nyɔŋmɔ “yɛ mumɔ kɛ anɔkwale mli” lɛ ateŋ mɔ kome?
Ehe miihia waa ni oná sanebimɔ nɛɛ hetoo. Mɛni hewɔ? Yesu ma nɔ mi akɛ anɔkwa nilee he miihia beni esɔle akɛ: “Enɛ ji naanɔ wala lɛ, ákɛ amɛle bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ.” (Yohane 17:3) Hɛɛ, kɛ́ oooná wala wɔsɛɛ lɛ, ehe miihia ni ole anɔkwale ni kɔɔ Nyɔŋmɔ he lɛ!
Ani abaanyɛ ale anɔkwale ni kɔɔ Nyɔŋmɔ he lɛ? Hɛɛ, abaanyɛ ale! Kɛ́ nakai ni lɛ, te ooofee tɛŋŋ ole? Yesu wie kɛkɔ lɛ diɛŋtsɛ ehe akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ.” (Yohane 14:6) Ewie hu akɛ: ‘Mɔ ko leee mɔ ni ji tsɛ lɛ, ja bi lɛ kɛ mɔ ni bi lɛ sumɔɔ akɛ ejie lɛ kpo etsɔɔ lɛ.’—Luka 10:22.
No hewɔ lɛ, gbɛ ni he hiaa ni atsɔɔ nɔ aleɔ Nyɔŋmɔ lɛ yɛ Yesu Kristo ni ji Nyɔŋmɔ Bi lɛ tsɔɔmɔi lɛ amli. Yɛ anɔkwale mli lɛ, Yesu wo wɔ shi akɛ: “Kɛji nyɛhi shi yɛ miwiemɔ lɛ mli lɛ, minɔkwa kaselɔi ji nyɛ, ni nyɛaale anɔkwale lɛ, ni anɔkwale lɛ aaaha nyɛye nyɛhe.”—Yohane 8:31, 32.
Belɛ, te Yesu baaha sanebimɔi enumɔ ni atsĩ tã kɛtsɔ hiɛ lɛ ahetoo eha tɛŋŋ?—w09 02/01-E.
[Mfoniri ni yɔɔ baafa 4]
Ani ojáa Nyɔŋmɔ ko ni oleee lɛ?