Atsĩ Juu Nifeemɔ ko Naa yɛ Afrika Anaigbɛ
Taakɛ Eunice Ebuh gba
“Julɔi ni kɛ awuiyeli nibii ewula amɛhe lɛ to amɛtutuamɔ lɛ he gbɛjianɔtoo yɛ gbi ni wɔkɛfɔɔ Asafo Woloŋ Nikasemɔ feemɔ yɛ wɔshia lɛ nɔ. Wɔgbeleɔ wɔshinaai lɛ anaa wɔhaa nyɛmimɛi hii kɛ yei lɛ kɛ mɛi ni yɔɔ he miishɛɛ lɛ. Eka shi faŋŋ akɛ, julɔi lɛ le wɔsui kɛ kpee be lɛ. Wɔle kɛ nɔmimaa akɛ amɛyaju kar yɛ he kroko ni amɛbamɛ yɛ wɔshinaa lɛ naa yɛ gbi kɛ be ni wɔbaafee woloŋ nikasemɔ lɛ.
“Yɛ heniianaa lɛ, otsi nɔ ni amɛba lɛ ji kpokpaa nɔkwɛlɔ saramɔ otsi. Yɛ nɔ najiaŋ ni wɔɔkpe yɛ wɔshia lɛ, wɔyakpe yɛ Maŋtsɛyeli Asa lɛ nɔ. Beni agbe kpee lɛ naa lɛ, afee onukpai akpee. Be pii lɛ, mi kɛ gbekɛbii lɛ yaa shia, shi miwu ni ji onukpa lɛ kɛɛ wɔ akɛ, wɔmɛ lɛ. Ekɛɛ etsɛŋ. No hewɔ lɛ, wɔmɛ.
“No sɛɛ lɛ, wɔna akɛ kar lɛ hereee nɔ. Kpokpaa nɔkwɛlɔ lɛ kɛ miwu nyɛɛɛ asaa. Tsɔnesaalɔ ni wɔtsɛ lɛ hu nyɛɛɛ asaa.
“Gbekɛbii lɛ nyiɛ kɛtee shia. Be fioo ko sɛɛ lɛ, mihu mitee shia. Miyashɛ aaafee ŋmɛji nyɔŋma. Mi kɛ gbekɛbii lɛ ateŋ mɔ ko mɔ ko boteee kpo lɛ teŋ kɛ kar, nɔ ni kulɛ ebaabi ni wɔgbele agbo wulu lɛ.
“Beni mibote misɛɛ tsũ lɛ mli lɛ, minu tu gbɛɛmɔ he, egbɛɛ waa. Mihiɛ fee mi yaa yɛ nɔ ni baa lɛ he. Mibɔ mɔdɛŋ koni matswa polisifoi lɛ tɛlifoŋ, shi tɛlifoŋ lɛ tsuuu nii. Mijo foi kɛtee shishigbɛ ni miyaŋmɛ shinaa ni akɛ dade fee lɛ mli, kɛkɛ ni mikɛ oyaiyeli ŋmɛ teŋgbɛ shinaa lɛ mli. Migbe kanei lɛ. Gbeyei mɔmɔ mibii lɛ, no hewɔ lɛ, mikɛɛ amɛ koni amɛto amɛtsui shi. Wɔfee ekome ni wɔsɔle wɔbi Yehowa hebuu. No mli lɛ, miwu yɛ Maŋtsɛyeli Asa lɛ nɔ lolo ni eebɔ mɔdɛŋ koni eha kar lɛ ahere nɔ.
“Mikwɛ kpo lɛ nɔ kɛjɛ samfɛlɛ lɛ mli ni mina nuu ko ni ka shi yɛ gbɛ ni ka agbo lɛ sɛɛ lɛ he. Etamɔ nɔ ni julɔi lɛ etee, no hewɔ lɛ, mikɛ nuu ni epila lɛ wo mi kar lɛ mli ni mikɛ lɛ sha foi kɛtee helatsamɔhe. Eji oshara moŋ, shi esa akɛ mafee nɔ ko. Shi kɛlɛ, mɔbɔ sane ji akɛ, egbo yɛ gbi ni nyiɛ sɛɛ lɛ nɔ.
“Yɛ oshara lɛ fɛɛ sɛɛ lɛ, kulɛ nibii amli baawo wu babaoo. Kpokpaa nɔkwɛlɔ lɛ saramɔ lɛ tsɔɔ akɛ wɔfeee woloŋ nikasemɔ yɛ wɔ shia lɛ. Kar lɛ ni fite lɛ tsɔɔ akɛ wɔtaa tsɔne mli kɛyaaa shia akɛ weku. Miwu ni kulɛ julɔi lɛ baamɔ lɛ lɛ baaa shia kɛyashi nyɔɔŋteŋ. Enɛɛmɛi kɛ nibii krokomɛi bafee wɔsɛɛnamɔ yɛ nakai gbɛkɛ lɛ.
“Yehowa ji wɔ mɔɔ kɛ wɔbobaahe. Etamɔ bɔ pɛ ni ŋmalɛ lɛ kɛɔ lɛ akɛ: ‘Kɛ́ jeee Yehowa buɔ maŋ lɛ he lɛ, no lɛ yakatswaa bulɔ lɛ shiɔ he kpe.’”—Lala 127:1.