Shihilɛ Gbɛ Ni Hi Fe Fɛɛ Efee Wɔ Ekome

Kɛ jeŋ fɛɛ gbɔmɛi ayifalɛ aaakã he aya hiɛ lɛ, no lɛ etsɛŋ ni gbɔmɛi ayifalɛ yɛ shikpɔŋ lɛ nɔ baafee akpekpei akpei ekpaa. Eyɛ mli akɛ amɛ fɛɛ amɛjɛ blematsɛ kome mli moŋ, shi etamɔ nɔ ni mɛi babaoo sumɔɔɔ ni amɛkpɛlɛɔ nɔ akɛ amɛji jeŋ fɛɛ weku kome mli bii ni baabu amɛhe akɔntaa amɛha Bɔlɔ ko ni yɔɔ nilee kɛ suɔmɔ. Mligbalamɔ kɛ béi ni yɔɔ majimaji ateŋ, hewolo nɔ sui, kɛ kusumii amli lɛ kɛ odaseyeli ni jeɔ mɔ nijiaŋ wui haa yɛ nɛkɛ shihilɛi ni yɔɔ mɔbɔ nɛɛ mli.

YƐ BƆ ni ŋmɛnɛŋmɛnɛ beaŋ jeŋ shihilɛi lɛ ji hewɔ lɛ, ekolɛ, etamɔ nɔ ni jeŋ fɛɛ ekomefeemɔ ji oti ko ni anyɛŋ ashɛ he. The Columbia History of the World lɛ kɛɛ: “Yɛ nɔ ni kɔɔ sanebimɔ ni he hiaa fe fɛɛ ni kɔɔ bɔ ni aaahi shi yɛ ekomefeemɔ mli aha lɛ he lɛ, ŋmɛnɛŋmɛnɛ beaŋ je lɛ bɛ susumɔ hee ko ni ekɛaaha, ekome folo po bɛ.”

Kɛlɛ, ekomefeemɔ ni aaahi mɛi fɛɛ ni yɔɔ shikpɔŋ nɔ lɛ ateŋ ni akɛaaba lɛ biii susumɔ hee. Akɛ ekomefeemɔ gbɛ lɛ eha yɛ Ŋmalɛ Krɔŋkrɔŋi lɛ mli. Ewieɔ Mɔ ni bɔ shikpɔŋ lɛ kɛ wala fɛɛ ni yɔɔ nɔ lɛ jamɔ he. Susumɔ kpakpa, yiŋtoo kpakpa kɛ shihilɛ gbɛ he anɔkwa ekomefeemɔ lɛ yɛ Nyɔŋmɔ webii ateŋ momo. Ákɛ mɛi ni yibɔ fa fe akpekpei enumɔ kɛ fã yɛ shikpɔji 233 nɔ lɛ, amɛfee ekome yɛ amɛfaishitswaa mli akɛ, Nyɔŋmɔ shihilɛ gbɛ lɛ ji gbɛ ni hi fe fɛɛ. Taakɛ lalatsɛ lɛ ji lɛ, amɛsɔleɔ akɛ: “Yehowa, tsɔɔmɔ mi ogbɛ lɛ, manyiɛ onɔkwale lɛ mli; feemɔ mitsui ekome, ni mashe ogbɛi lɛ gbeyei!”—Lala 86:11.

Afii babaoo nɛ ni gbalɔ Yesaia gba nɛkɛ ekome ni afeɔ gbɔmɛi yɛ jamɔ krɔŋŋ mli lɛ efɔ̃ shi. Eŋma akɛ: “Aaaba mli akɛ naagbee gbii lɛ amli lɛ, Yehowa we lɛ gɔŋ lɛ aaama shi yɛ gɔji lɛ ayiteaŋ, ni aaawo enɔ fe gɔŋkpɔi lɛ; ni jeŋmaji fɛɛ aaaho kɛaaba he; ni majimaji pii aaatee ayakɛɛ akɛ: Nyɛbaa ni wɔyakwɔa Yehowa gɔŋ lɛ, kɛyaa Yakob Nyɔŋmɔ lɛ we lɛ, koni etsɔɔ wɔ egbɛ̀i lɛ, ni wɔnyiɛ etempɔŋi lɛ anɔ!”—Yesaia 2:2, 3.

Ekomefeemɔ ni yɔɔ Yehowa Odasefoi ateŋ lɛ yɛ srɔto. Yɛ asafoi ni fe 87,000 ni yɔɔ jeŋ fɛɛ lɛ mli lɛ, amɛyeɔ mumɔŋ niyenii kome too lɛ nɔŋŋ yɛ amɛkpeei ashishi daa otsi. (Mateo 24:45-47) Kɛlɛ, kɛjɛ afi 1998 teŋgbɛ kɛyashi afi 1999 shishijee mli lɛ, Odasefoi lɛ jie amɛ ekomefeemɔ lɛ kpo yɛ gbɛ kroko nɔ—kɛtsɔ amɛhe naa ni amɛbua yɛ gbii etɛ “Nyɔŋmɔ Shihilɛ Gbɛ” Kpokpaa Wulu nɔ Kpeei ni amɛfee yɛ jeŋ fɛɛ lɛ nɔ. Kpeeiyalɔi babaoo ni jɛ shikpɔji srɔtoi anɔ fata nɛkɛ henaabuamɔi nɛɛ ahe yɛ maji 13 mli, ni atsɛ lɛ akɛ majimaji ateŋ kpeei. Atsɛ ekrokomɛi hu akɛ kpokpaa wuji anɔ kpeei. Shi nɛkɛ kpeei wuji nɛɛ fɛɛ kɛ mumɔŋ nibii kpakpai ahe gbɛjianɔtoo kome too lɛ nɔŋŋ ha.

Kwɛ bɔ ni eyɔɔ fɛo akɛ aaana kpeeiyalɔi ni yɔɔ miishɛɛ ni amɛsaa amɛhe jogbaŋŋ lɛ keɔ yuu kɛboteɔ kpeehei kɛ shwɛmɔhei amli koni Yehowa atsɔɔ amɛnii nɛkɛ! Nɔ ni tamɔ enɛ ji wiemɔ ni kpeeiyalɔi ni tee majimaji ateŋ kpee ni afee yɛ Michigan, U.S.A. lɛ ateŋ mɔ kome wie lɛ. Ekɛɛ akɛ: “Eyɛ miishɛɛ akɛ aaana wɔnyɛmimɛi ni jɛ je lɛŋ fɛɛ—Czech Republic, Barbados, Nigeria, Hungary, England, Holland, Ethiopia, Kenya, kɛ shikpɔji krokomɛi babaoo nɔ—ni amɛmiifua amɛhe! Eyɛ fɛo akɛ aaana nyɛmimɛi akɛ amɛmiihi shi yɛ ekomefeemɔ mli, ni miishɛɛ yaafonui miishwie shi yɛ suɔmɔ ni amɛyɔɔ kɛha amɛhe kɛ amɛ Nyɔŋmɔ kpeteŋkpele, Yehowa lɛ hewɔ.” Sane ni nyiɛ sɛɛ lɛ baapɛi kpee lɛ he gbɛjianɔtoo ni mɛi akpekpei abɔ ni yɔɔ shikpɔŋ lɛ nɔ fɛɛ lɛ ná mli ŋɔɔmɔ lɛ mli.

[Mfoniri ni yɔɔ baafa 3]

Mountain High Maps® Copyright © 1997 Digital Wisdom, Inc.