Te Ooofee Tɛŋŋ Ojie Anɔkwa Heshibaa Kpo Lɛ?
ANƆKWA heshibaa jara wa waa yɛ Nyɔŋmɔ hiɛ. Yakobo ŋma akɛ: “Nyɔŋmɔ lɛ, ekuɔ hewolɔi anaa, shi heshibalɔi eduroɔ.” (Yakobo 4:6) Yakobo miitsĩ susumɔi srɔtoi ni atsɔɔ mli yɛ Hebri Ŋmalɛi lɛ amli lɛ tã yɛ biɛ. “Yehowa yɛ ŋwɛi shɔŋŋ moŋ, shi kɛlɛ ehiɛ kã heshibalɔ he; shi hewolɔ lɛ, eyooɔ lɛ yɛ shɔŋŋ.” “Gbɔmɛi ahewoo hiŋmɛii lɛ aaaba shi, aaadɔ adesai ahenɔwomɔ lɛ kɛaaba shi, ni aaawo Yehowa kome too nɔ.” “[Nyɔŋmɔ] yeɔ hefɛoyelɔi ahe fɛo, shi eduroɔ heshibalɔi.”—Lala 138:6; Yesaia 2:11; Abɛi 3:34.
Bɔfo Petro hu wo heshibaa he hewalɛ. Eŋma akɛ: “Nyɛfɛɛ nyɛbaa nyɛhe shi nyɛhaa nyɛhe ni nyɛbumɔa heshibaa jwɛŋmɔ lɛ, ejaakɛ Nyɔŋmɔ kuɔ hewolɔi anaa, shi heshibalɔi eduroɔ.”—1 Petro 5:5.
Kristo Heshibaa He Nɔkwɛmɔnɔ
Ekolɛ, obaabi akɛ, Mɛɛ nɔ̃ kpakpa loo sɛɛnamɔ yɔɔ heshibaa he? Kɛha mɔ ni miibɔ mɔdɛŋ koni efee anɔkwa Kristofonyo lɛ, sanehetoo lɛ ji shishijee nɔ̃—ní aaaba he shi lɛ ji ni afee tamɔ Kristo. Yesu jie eheshibaa lɛ kpo kɛtsɔ nitsumɔ ni ekaaa ni ejɛ ŋwɛi maŋtsɛyelihe lɛ mli eba shikpɔŋ lɛ nɔ ni ebakpɛlɛ nɔ, ni ebatsɔ adesa ni baa shi, mɔ ni baa shi fe bɔfoi lɛ nɔ. (Hebribii 2:7) Eyɛ mli akɛ Nyɔŋmɔ Bi ni moŋ, shi eŋmɛ etsui shi yɛ hiɛshishwiemɔi ni ejamɔ mli henyɛlɔi lɛ kɛba enɔ lɛ mli. Eyɛ mli akɛ eyɛ nyɛmɔ ni ekɛaatsɛ ŋwɛibɔfoi asafoi moŋ, shi efee dioo yɛ ekaai lɛ amli.—Mateo 26:53.
Naagbee lɛ, asɛŋ Yesu yɛ gbɛ ní yɔɔ hiɛgbele nɔ yɛ sɛŋmɔtso nɔ moŋ, shi kɛlɛ, ehi shi akɛ anɔkwafo eha e-Tsɛ lɛ. No hewɔ lɛ, Paulo baanyɛ aŋma yɛ ehe akɛ: “Nɔ ni Kristo Yesu hu jwɛŋ lɛ, no nɔŋŋ nyɛjwɛŋa yɛ nyɛ mli, mɔ ni Nyɔŋmɔ su lɛŋ eyɔɔ moŋ, shi ebuuu egbɔ ni ekɛ Nyɔŋmɔ ye lɛ akɛ nihaanii; shi moŋ ejie yɛ ehe efɔ̃ shi, eŋɔ tsulɔ su efɔ̃ enɔ, etsɔ tamɔ gbɔmɔ ni eshihilɛ gbɛfaŋ hu ana lɛ taakɛ gbɔmɔ; eba ehe shi ni ebo toi kɛtee gbele mli, kɛtee sɛŋmɔtso nɔ gbele mli tete.”—Filipibii 2:5-8.
No hewɔ lɛ, te wɔɔfee tɛŋŋ wɔjie anɔkwa heshibaa kpo lɛ? Yɛ shihilɛi ni anyɛɔ atsuɔ he nii mli lɛ, te wɔɔfee tɛŋŋ wɔfee nii yɛ heshibaa mli moŋ fe yɛ henɔwomɔ gbɛ nɔ lɛ?
Bɔ ni Heshibalɔ Feɔ Nii Ehaa
Nyɛhaa wɔsusua heshibaa he yɛ nitsumɔ shihilɛ mli, kɛji eji nitsumɔhe loo yɛ Kristofoi asɔɔmɔ nitsumɔ lɛ mli jio lɛ he wɔkwɛa. Bɔni afee ni atsu nitsumɔ yɛ omanyeyeli mli lɛ, ekolɛ nɔkwɛlɔi, nitsumɔ nɔkwɛlɔi, nii anɔkwɛlɔi ahe baahia. Esa akɛ mɔ ko afee yiŋkpɛɛi. Te ofeɔ onii ohaa tɛŋŋ? Ani okɛɔ yɛ oyiŋ akɛ, “Mɛɛ hegbɛ eyɔɔ akɛ ekɛɔ mi nɔ ni mifee? Mikɛ afii babaoo etsu nii yɛ biɛ fe lɛ.” Hɛɛ, kɛ owoɔ ohe nɔ lɛ, omli baawo la yɛ onɔ ni aaaye lɛ mli. Yɛ gbɛ kroko nɔ lɛ, mɔ ni baa ehe shi lɛ bɔɔ mɔdɛŋ koni ‘ekaŋmɛ mligbalamɔ loo yaka anunyam taomɔ gbɛ, shi moŋ ekɛ heshibaa jwɛŋmɔ buɔ enanemɛi.’—Filipibii 2:3.
Te ofeɔ onii ohaa tɛŋŋ kɛ ŋaawoo ko jɛ gbekɛ loo yoo ŋɔɔ ba lɛ? Kɛ obaa ohe shi lɛ, kɛ hoo lɛ, obaabo toi. Kɛ owoɔ ohe nɔ lɛ, omli baafu yɛ he loo obaakpoo amrɔ nɔŋŋ. Ani obaasumɔ ni oná yijiemɔ kɛ yiteŋmuluwoo ni kɛ mɔ yaa fitemɔ mli lɛ moŋ aloo ŋaawoo kpakpa ni tswaa mɔ emaa shi?—Abɛi 27:9; 29:5.
Ani obaanyɛ okpee amanehulu he kaa lɛ naa? Heshibaa baaha onyɛ okpee shihilɛi ni mli wa naa ni oto otsui shi taakɛ Hiob fee lɛ po. Kɛ owoɔ ohe nɔ lɛ, onijiaŋ baaje wui ni ekolɛ obaatse atua yɛ shihilɛi ni nyɛɔ mɔ nɔ mli kɛ nɔ ni asusuɔ akɛ tɔ̃tɔ̃mɔ nii lɛ he.—Hiob 1:22; 2:10; 27:2-5.
Heshibaa Ji Suɔmɔ kɛ Eshaifaa Nifeemɔ
Ewa kɛha mɛi komɛi akɛ amɛaakɛɛ akɛ, “Edɔ mi. Mitɔ̃. Osane ja.” Mɛni hewɔ? Ejɛ henɔ ni awoɔ waa lɛ hewɔ! Kɛlɛ, bei pii lɛ, faikpamɔ yɛ anɔkwale mli lɛ baanyɛ atsĩ gbalashihilɛ mli béi anaa yɛ gbɛ ni waaa kwraa nɔ.
Kɛ mɔ ko tɔ̃ onɔ lɛ, ani osumɔɔ ni okɛke lɛ? Aloo yɛ ohenɔwomɔ lɛ mli lɛ, obɛɔ lɛ owoɔ omli, ekolɛ gbii loo nyɔji abɔ ni osumɔɔɔ ni okɛ mɔ ni osusuɔ akɛ etɔ̃ onɔ lɛ wieɔ? Ani okɛ ohe woɔ béi ní yiwalɛ nifeemɔ yɔɔ mli lɛ amli kɛ mɔdɛŋbɔɔ akɛ, koni okɛjaje nibii? Ágbe mɛi yɛ béi ní yiwlɛ nifeemɔ yɔɔ mli lɛ ekomɛi amli. Yɛ mɛi krokomɛi agbɛfaŋ lɛ, mɔheguɔgbee ebafee gbɛ ni amɛtsɔɔ nɔ. Nɔ ni tamɔɔɔ nakai lɛ, mɔ ni baa ehe shi lɛ yɛ suɔmɔ ni ekɛ sane keɔ. Mɛni hewɔ? Ejaakɛ suɔmɔ ehiɛɛɛ mlifu mli. Yehowa miisumɔ ni ekɛ Israelbii lɛ ahe ake amɛ kɛji amɛjieee henɔwomɔ kpo. Yesu sɛɛnyiɛlɔ ni baa ehe shi lɛ sumɔɔ ni ekɛ sane ake, ni esumɔɔ ni ekɛke lɛ shii abɔ po!—Yoel 2:12-14; Mateo 18:21, 22; 1 Korintobii 13:5.
Mɔ ni baa ehe shi lɛ ‘kɛ woo haa enaanyo tsutsu.’ (Romabii 12:10) New International Version lɛ kaneɔ akɛ: “Nyɛkɛ woo ahaahaa nyɛhe fe nyɛ diɛŋtsɛ.” Ani ojieɔ mɛi krokomɛi ayi ni ohiɛ sɔɔ amɛmɔdɛŋbɔɔi kɛ nyɛmɔi? Aloo otaoɔ tɔ̃mɔi daa koni okɛwo amɛgbɛi ahe muji? Hɛɛ, ani obaanyɛ ojie mɛi krokomɛi ayi yɛ anɔkwale mli? Kɛ ewa kɛha bo yɛ enɛ gbɛfaŋ lɛ, ekolɛ shweshweeshwe shihilɛ ni obɛ kɛ henɔwomɔ ji onaagbai lɛ.
Mɔ ni woɔ ehe nɔ lɛ etooo etsui shi. Mɔ ni baa ehe shi lɛ he jɔ ni eyɛ tsuishitoo. Ni bo hu? Ani omli fũɔ kɛ́ ona akɛ akɛ bo yeee yɛ gbɛ kpakpa nɔ? Nakai nifeemɔ lɛ ji tsuishitoo ni atsɔ lɛ sɛɛsɛɛ. Kɛ oyɛ heshibaa lɛ, obuŋ ohe babaoo. Kaimɔ nɔ ni ba beni Yesu kaselɔi lɛ bu amɛhe babaoo lɛ—amɛtaa saji anaa yɛ mɔ ni he hiaa fe fɛɛ he. Amɛhiɛ kpa nɔ akɛ “tsuji ni he bɛ sɛɛnamɔ” ji amɛ fɛɛ!—Luka 17:10; 22:24; Marko 10:35-37, 41.
French niŋmalɔ Voltaire tsɔɔ heshibaa mli akɛ, “susuma lɛ humifeemɔ . . . tsofa ni kuɔ henɔwomɔ naa.” Hɛɛ, humifeemɔ ji heshibaa jwɛŋmɔ. Mɔ ni baa ehe shi lɛ humiɔ shi yɛ mumɔŋ, ni ewooo ehe nɔ. Eyɛ bulɛ ni mli kwɔ ni etseɔ ehiɛ ehaa mɔ.
No hewɔ lɛ, mɛni hewɔ esa akɛ obɔ mɔdɛŋ ni oba ohe shi lɛ? Ejaakɛ heshibaa yɛ Nyɔŋmɔ nɔ kpɛlɛmɔ ni eyeɔ ebuaa wɔ ni wɔnine shɛɔ ŋwɛi gbɛtsɔɔmɔ nɔ. Yɛ gbɛ ko nɔ lɛ, Daniel heshibaa lɛ hewɔ lɛ, Yehowa bu gbalɔ lɛ mɔ ko ni “asumɔɔ” ni ekɛ ninaa tsu bɔfo kɛtee eŋɔɔ! (Daniel 9:23; 10:11, 19) Heshibaa kɛ nyɔmɔwoo babaoo baa. Ekɛ anɔkwa nanemɛi ni sumɔɔ bo baa. Nɔ ni fe fɛɛ lɛ, ekɛ Yehowa jɔɔmɔi baa. “Heshibaa kɛ Yehowa gbeyeishemɔ nyɔmɔwoo ji nii kɛ hiɛnyam kɛ wala.”—Abɛi 22:4.
[Mfoniri ni yɔɔ baafa ]
Faikpamɔ wiemɔ ni jɛɔ heshibaa mli lɛ baanyɛ aha shihilɛ ahi