Ani Obaanyɛ Osɔmɔ yɛ Maŋsɛɛ Shikpɔŋ Nɔ?
“MISUSU maŋsɛɛ sanekpakpa shiɛmɔ nitsumɔ ni mikɛ mihe aaawo mli lɛ he aahu. Ákɛ oshijafonyo lɛ, misɔmɔ yɛ Texas, U.S.A., he ni shiɛlɔi ahe bahia waa yɛ lɛ. Miŋa bafata mihe beni wɔbote gbalashihilɛ mli lɛ. Beni wɔfɔ́ wɔbiyoo lɛ, misusu nɛkɛ akɛ, ‘Ojogbaŋŋ, minyɛŋ mikɛ mihe awo mli dɔŋŋ.’ Shi Yehowa haa oti ni akɛmaa hiɛ waa lɛ baa mli anɔkwale, titri lɛ kɛ́ nomɛi kɔɔ esuɔmɔnaa nifeemɔ he.”—Jesse ní amrɔ nɛɛ ekɛ eŋa kɛ ebii etɛ sɔmɔɔ yɛ Ecuador lɛ.
“Misusuko pɛŋ akɛ manyɛ matsu nitsumɔ ni tamɔ nakai yɛ be mli ni mináko Gilead maŋsɛɛ sanekpakpa shiɛmɔ skul mli tsɔsemɔ. Kɛ mina akɛ mɛi ni mikɛ amɛ kaseɔ Biblia lɛ miiha wiemɔ loo amɛmiishiɛ lɛ, mimii shɛɔ mihe waa, ni midaa Yehowa shi akɛ eha mi hegbɛ ni tamɔ nɛkɛ.”—Karen ni ji yoo oshijafonyo ni kɛ ehe ewo gbɛgbamɔ nitsumɔ lɛ mli afii kpaanyɔ yɛ South America lɛ.
“Beni mikɛ afii 13 eshiɛ be-fɛɛ yɛ United States lɛ, mi kɛ miŋa fɛɛ nu he akɛ nitsumɔ hee ko ni yɔɔ miishɛɛ he miihia wɔ. Wɔmii shɛ wɔhe fe bɔ ni eji tsutsu ko lɛ; shihilɛ gbɛ ni miishɛɛ yɔɔ mli diɛŋtsɛ nɛ.”—Tom ni kɛ eŋa Linda kɛ amɛhe woɔ gbɛgbamɔ nitsumɔ lɛ mli yɛ Amazon kpokpaa lɛ nɔ lɛ.
Mɛi ni hiɛsɔɔ wiemɔi nɛɛ jɛ amɛnaa ji gbɔmɛi ni amɛshihilɛi eŋmɛɛɛ amɛ gbɛ koni amɛnine ashɛ maŋsɛɛ sanekpakpa shiɛmɔ nitsumɔ he tsɔsemɔ nɔ yɛ Buu Mɔɔ Biblia Gilead Skul lɛ mli. Fɛɛ sɛɛ lɛ, amɛná maŋsɛɛ sɔɔmɔ lɛ mli miishɛɛ ni amɛkɛ emli kaai lɛ ekpe. Te enɛ ba lɛ eha tɛŋŋ? Ani obaanyɛ otsu nitsumɔ ni tamɔ nɛkɛ?
Jwɛŋmɔ ni Ja He Miihia
Nɔ ni yaa hiɛ fe niiamlitaomɔ he nifeemɔ he miihia bɔni afee ni aye omanye yɛ maŋsɛɛ nitsumɔ mli. Mɛi ni eŋmɛ amɛtsui shi yɛ mli lɛ kɛ jwɛŋmɔ ni ja efee nakai. Taakɛ bɔfo Paulo ji lɛ, amɛbuɔ amɛhe akɛ jeee Nyɔŋmɔ pɛ ji mɔ ni amɛhiɛ lɛ nyɔmɔ shi amɛhiɛ gbɔmɛi hu nyɔmɔ. (Romabii 1:14) Kulɛ amɛbaanyɛ amɛye ŋwɛi fãmɔ akɛ amɛshiɛ lɛ nɔ kɛtsɔ amɛhe ni amɛkɛaawo shiɛmɔ nitsumɔ lɛ mli yɛ amɛmaŋ shikpɔŋkuku lɛ mli. (Mateo 24:14) Shi amɛnu he akɛ amɛhiɛ nyɔmɔ, ni ákɛ amɛná ekãa akɛ amɛhe aaasa koni amɛye amɛbua mɛi ni ewa dani amɛnáa hegbɛ amɛboɔ sanekpakpa lɛ toi lɛ.
Bei pii lɛ, suɔmɔ ni ayɔɔ akɛ aaatsu nii yɛ shikpɔŋkuku ni woɔ yibii babaoo mli lɛ ji yiŋtoo kroko—ni nakai eji hu. Wɔteŋ namɔ ni kɛ́ ena akɛ wolɛɛnyo ko miishá looi babaoo lɛ, etsiŋ ebɛŋkɛŋ nakai he ni eyɔɔ lɛ? Nakai nɔŋŋ hu nɔyaa ni nɔ bɛ ni anáa yɛ shikpɔji krokomɛi anɔ lɛ he amaniɛbɔi ni woɔ mɔ hewalɛ lɛ ewo mɛi babaoo hewalɛ koni amɛya he ni “looi babaoo” yɔɔ lɛ.—Luka 5:4-10.
Susumɔ He Dã
Maji wuji babaoo eŋmɛɛɛ gbɛ koni jamɔŋ bii ni kɛ amɛhe eha ni jɛ maŋsɛɛ lɛ atsu heloonaa nitsumɔ. No hewɔ lɛ, bei pii lɛ esaaa akɛ mɛi ni sumɔɔ koni amɛyasɔmɔ yɛ maŋsɛɛ shikpɔŋ nɔ lɛ kɛ amɛhe fɔ̃ɔ mɛi krokomɛi anɔ yɛ shika gbɛfaŋ. Te atsu nɛkɛ shika gbɛfaŋ naagba nɛɛ he nii aha tɛŋŋ? Amɛteŋ mɛi pii ehɔ̃ɔ amɛshiai loo amɛkɛhai koni amɛná shika ni he hiaa amɛ lɛ. Mɛi krokomɛi hu ehɔ̃ɔ amɛnitsumɔi. Mɛi komɛi hu kɛ shika eto kɛha oti ni amɛkɛma amɛhiɛ lɛ. Mɛi krokomɛi hu kɛ afi loo afii enyɔ sɔmɔɔ yɛ maŋsɛɛ shikpɔŋ nɔ, kɛkɛ lɛ amɛku amɛsɛɛ kɛtee amɛmaŋ koni amɛyatsu nii koni amɛkɛná shika, kɛkɛ lɛ amɛtee amɛyasɔmɔ ekoŋŋ.
Sɛɛnamɔ kome ni yɔɔ maŋ ni kpaako eyaa ehiɛ lɛ mli ni aaahi lɛ he ji akɛ, bei pii lɛ nibii ajara waaa tamɔ maji ni etee hiɛ babaoo lɛ. Enɛ eye ebua mɛi komɛi koni amɛhi shi bɔ ni sa yɛ nitsumɔ mli hejɔɔmɔ mli shika fioo ko naa. Shi kɛlɛ, shika ni mɔ ko fiteɔ lɛ baadamɔ bɔ ni ehiɔ shi ehaa lɛ nɔ titri. Yɛ maji ni kpaako amɛyaa hiɛ lɛ amli po lɛ, abaanyɛ aná wɔɔhei ni hi jogbaŋŋ shi amɛjara wa waa.
Yɛ faŋŋ mli lɛ, esa akɛ abu shika ni abaafite lɛ he akɔntaa dani afã kɛya. Ni kɛlɛ, nibii babaoo yɛ ni abaafee fe ni aaabu shika ni abaafite lɛ he akɔntaa kɛkɛ. Ekolɛ, saji ni mɛi komɛi ni amɛyasɔmɔ yɛ South America lɛ ewie lɛ baanyɛ etsɔɔ wɔ nii.
Naagba ni Da Fe Fɛɛ Lɛ
Markku ni jɛ Finland lɛ kaiɔ akɛ: “Spain wiemɔ kasemɔ lɛ bafee naagba diɛŋtsɛ kɛha mi. Misusu akɛ akɛni minuuu wiemɔ lɛ hewɔ lɛ, ebaatsɛ fioo dani manyɛ masɔmɔ akɛ asafoŋ sɔɔlɔ. Kwɛ bɔ ni efee mi naakpɛɛ beni yɛ nyɔji enyɔ pɛ sɛɛ lɛ, akɛɛ mi akɛ mikwɛ woloŋ nikasemɔ nɔ lɛ! Shi, shihilɛi babaoo yɛ ni kɛ naagba baa. Nɔ ni gbaa minaa titri ji mɛi agbɛi tsɛmɔ. Gbi ko lɛ, mitsɛ Nyɛminuu Sancho akɛ ‘Nyɛminuu Chancho (kpolotoo),’ ni mihiɛ kpaŋ nɔ kɔkɔɔkɔ akɛ mitsɛ Nyɛmiyoo Salamea akɛ ‘Malasea (yitsoŋwalɔ).’ Heniianaa lɛ, nyɛmimɛi hii kɛ yei lɛ to amɛtsui shi waa.” Yɛ naagbee lɛ, Markku kɛ eŋa Celine kɛ afii kpaanyɔ sɔmɔ yɛ nakai maŋ lɛ mli akɛ kpokpaa nɔkwɛlɔ.
Chris ni ji Jesse ŋa ni atsɛ ewiemɔi asɛɛ kɛtsɔ hiɛ lɛ gba akɛ: “Mikaiɔ klɛŋklɛŋ be ni wɔ kpokpaa nɔkwɛlɔ lɛ basara wɔ, beni wɔhi biɛ nyɔji etɛ pɛ lɛ. Manyɛ makɛɛ akɛ, no mli lɛ nyɛminuu lɛ kɛ abɛbuai komɛi miitsu nii ni eekɛɛ nɔ ko ni yɔɔ miishɛɛ koni ebɔ mɔdɛŋ ni ekɛha wiemɔ lɛ abote wɔtsuiaŋ, shi minyɛɛɛ manu nɔ ni etsɔɔ lɛ shishi. Amrɔ nɔŋŋ ni mibɔi yaafo yɛ asa lɛ nɔ. Enɛɛmɛi jeee yaafonui folo kɛkɛ pɛ; no mli lɛ miiyikɔ. Beni agbe kpee lɛ naa lɛ, mibɔ mɔdɛŋ koni matsɔɔ kpokpaa nɔkwɛlɔ lɛ nɔ hewɔ ni mifee nakai lɛ. Emli hi waa ni ekɛɛ mi nɔ ni mɔ fɛɛ mɔ kɛɔ mi lɛ, ‘Ten paciencia, hermana’ (‘Nyɛmiyoo, ná tsui’). Afii enyɔ loo etɛ sɛɛ lɛ, wɔkpe ekoŋŋ ni wɔgba sane minitii 45, ni wɔyɛ miishɛɛ akɛ wɔnyɛ wɔgba sane.”
Nyɛmi nuu kroko hu wie akɛ: “Nikasemɔ he miihia. Kɛ wɔbɔ mɔdɛŋ waa yɛ wiemɔ lɛ kasemɔ mli lɛ, ehaa hesaa ni wɔyɔɔ yɛ sanegbaa mli lɛ yaa hiɛ babaoo.”
Wɔteŋ mɔ fɛɛ mɔ kpɛlɛɔ nɔ akɛ, mɔdɛŋbɔɔ ni tamɔ nɛkɛ lɛ kɛ sɛɛnamɔi babaoo baa. Anáa heshibaa, tsuishitoo, kɛ shifimɔ su, kɛ́ mɔ ko miibɔ mɔdɛŋ ni ekase wiemɔ hee ko lɛ. Shinaa kpele kɛha hegbɛ naa gbeleɔ koni akɛshiɛ sanekpakpa lɛ atsɔɔ mɛi krokomɛi. Ákɛ nɔkwɛmɔnɔ lɛ, Spain wiemɔ kasemɔ lɛ yeɔ ebuaa koni mɔ ko awie wiemɔ ni mɛi ni fá fe akpe toi akpei 400 wieɔ yɛ jeŋ fɛɛ lɛ. Mɛi babaoo ni sɛɛ mli lɛ ehe bahiaa koni amɛku sɛɛ kɛya amɛmaŋ lɛ enyɛ amɛkɛ amɛ wiemɔ mli hesaa lɛ etsu nii kɛye kɛbua mɛi ni amɛmaŋ wiemɔ ji Spain wiemɔ lɛ.
Ni Hiɛ ni Tseɔ Shia lɛ Hu?
Deborah ni kɛ ewu Gary sɔmɔ yɛ Amazon kpokpaa lɛ nɔ lɛ kɛɛ akɛ: “Beni wɔba Ecuador klɛŋklɛŋ kwraa yɛ afi 1989 lɛ, no mli lɛ mihiɛ tseɔ shia waa. Mikase bɔ ni mikɛ mihe aaafɔ̃ nyɛmimɛi hii kɛ nyɛmimɛi yei ni yɔɔ asafo lɛ mli lɛ anɔ babaoo. Amɛbatsɔ tamɔ miweku.”
Karen ni átsĩ etã momo lɛ kɛɛ akɛ: “Miwuɔ mishiɔ hiɛ ni tseɔ shia lɛ kɛtsɔ sɔɔmɔ nitsumɔ lɛ ni mikɛ mihe woɔ mli daa gbi lɛ nɔ. Kɛtsɔ enɛ nɔ lɛ, misusuuu shia yaa he. Mihaa ehiɔ mijwɛŋmɔ mli hu akɛ, mifɔlɔi ni mishi amɛ yɛ shia lɛ yɛ he miishɛɛ waa akɛ miitsu nii yɛ biɛ yɛ maŋsɛɛ shikpɔŋ nɔ. Awo kɛ wiemɔi nɛɛ wo mi hewalɛ daa akɛ: ‘Yehowa baanyɛ akwɛ onɔ jogbaŋŋ fe bɔ ni manyɛ makwɛ onɔ maha.’ ”
Makiko ni jɛ Japan lɛ kɛ miishɛɛ kɛɛ kɛfata he akɛ: “Beni miye gbi muu fɛɛ yɛ shiɛmɔ nitsumɔ lɛ mli lɛ, etɔɔ mi waa. No hewɔ lɛ bei pii kɛ́ mitee shia ni mihiɛ bɔi shia tsemɔ lɛ, kɛkɛ lɛ wɔ̀ enyɔ minɔ. No hewɔ lɛ, henumɔ nɛɛ sɛɛ etsɛɛɛ pii.”
Ni Gbekɛbii Hu?
Kɛ gbekɛbii baje mli lɛ, esa akɛ asusu amɛhiamɔ nii ahe tamɔ wolo-kasemɔ nɛkɛ. Yɛ enɛ hewɔ lɛ, mɛi komɛi ehala shia mli nikasemɔ yɛ be mli ni mɛi komɛi kɛ amɛbii ewo skul ni yɔɔ jɛmɛ lɛ amli.
Al kɛ eŋa, bii enyɔ, kɛ enyɛ fã kɛtee South America. Ekɛɛ akɛ: “Wɔna akɛ gbekɛbii lɛ ni wɔkɛ amɛ yawo skul mli lɛ ye ebua amɛ koni amɛkase wiemɔ lɛ oyayaayai. Yɛ nyɔji etɛ mli lɛ, amɛnaa etse waa kɛ wiemɔ lɛ.” Yɛ gbɛ kroko nɔ lɛ, Mike kɛ Carrie bihii enyɔ ni yeko afii 20 lɛ kase nii kɛtsɔ skul ni hi jogbaŋŋ lɛ mli nikasemɔ ni atsɔɔ woloŋmaa nɔ akɛfeɔ lɛ nɔ. Fɔlɔi lɛ wie akɛ: “Wɔna akɛ wɔnyɛŋ wɔŋmɛɛ nikasemɔi ni tamɔ nɛkɛ he wɔha wɔbii lɛ pɛ. Ehe bahia ni wɔkɛ wɔhe awo nikasemɔ lɛ mli koni wɔkwɛ akɛ gbekɛbii hii lɛ kɛ skul nikasemɔ he gbɛjianɔtoo lɛ nyiɛ pɛpɛɛpɛ lo.”
David kɛ Janita ni jɛ Australia lɛ tsɔɔ bɔ ni amɛnuɔ he amɛhaa yɛ amɛbihii enyɔ lɛ he. “Wɔmiisumɔ koni wɔbihii lɛ ana bɔ ni mɛi krokomɛi hiɔ shi amɛhaa lɛ jogbaŋŋ. Eyɛ mlɛo akɛ wɔɔsusu akɛ, shihilɛ gbɛ ni akɛtsɔse wɔ lɛ ji nɔ ni ja, shi yɛ anɔkwale mli lɛ, wɔ mɛi ni wɔkɛ enɛ tsuɔ nii lɛ ayi fáaa. Amɛnaa bɔ ni teokrase shishitoo mlai tsuɔ nii lɛ hu yɛ je lɛŋ he fɛɛ he, ekɔɔɔ he eko maŋ nɔ he ni ayɔɔ loo kusum nifeemɔ ni yɔɔ jɛmɛ.”
Ken kaiɔ akɛ: “Beni wɔweku lɛ fã kɛjɛ England yɛ afi 1969 lɛ, no mli lɛ, miye afii ejwɛ pɛ. Eyɛ mli akɛ minijiaŋ je wui akɛ wɔhiii sũtsu bibioo ni akɛ jwɛi eha eyiteŋ lɛ mli taakɛ misusu lɛ moŋ, shi mina akɛ, miná tsɔsemɔ ni yɔɔ miishɛɛ waa fe nɔ ni akɛaaha gbekɛ ko. Edɔɔ mi be fɛɛ be akɛ gbekɛbii krokomɛi yɛ ni amɛnáaa hegbɛ ni tamɔ nɛkɛ! Akɛni mikɛ maŋsɛɛ sanekpakpa shiɛlɔi kɛ gbɛgbalɔi krɛdɛɛi bɔɔ jogbaŋŋ hewɔ lɛ, mibɔi gbɛgbalɔi awalɔ nitsumɔ lɛ tsumɔ beni miye afii nɛɛhu.” Amrɔ nɛɛ nɔkwɛlɔ gbɛfalɔ ji Ken.
Gabriella ni ji Jesse biyoo lɛ kpɛlɛɔ nɔ akɛ: “Ecuador ji wɔshia diɛŋtsɛ agbɛnɛ. Eŋɔɔ minaa waa akɛ mifɔlɔi kpɛ amɛyiŋ ni wɔba biɛ.”
Yɛ gbɛ kroko nɔ lɛ, gbekɛbii komɛi yɛ ni nyɛɛɛ amɛtsake amɛhe amɛwo shihilɛ lɛ mli yɛ yiŋtoi srɔtoi ahewɔ, ni ehe ebahia ni amɛwekui lɛ aku amɛsɛɛ kɛya amɛmaji amli ekoŋŋ. No hewɔ ni nilee yɔɔ mli akɛ aaayasara maŋsɛɛ shikpɔŋ lɛ nɔ kɛtsɔ hiɛ dani afã kɛya jɛmɛ lɛ. Yɛ nɛkɛ gbɛ nɔ lɛ, abaanyɛ adamɔ nɔ̃ diɛŋtsɛ ni yɔɔ lɛ nɔ akpɛ yiŋ.
Jɔɔmɔi ni Yɔɔ Fã ni Aaafã Kɛya lɛ Mli
Lɛɛlɛŋ, ebiɔ mɔdɛŋbɔɔ kɛ afɔleshaai babaoo dani afã kɛya maŋsɛɛ shikpɔŋ ko nɔ. Ani efee nɔ ni sɛɛnamɔ yɔɔ he eha mɛi ni ehe bahia koni amɛfã kɛya lɛ? Nyɛhaa amɛkɛa wɔ.
Jesse kɛɛ: “Yɛ afii nyɔŋma ni wɔkɛhi Ambato maŋtiase lɛ mli lɛ, wɔná asafoi ayifalɛ kɛjɛ 2 kɛyashi 11. Wɔná hegbɛ akɛ wɔɔye wɔbua koni wɔje nakai asafoi lɛ enumɔ shishi, ni wɔtsu nii kɛma Maŋtsɛyeli Asai enyɔ. Wɔná miishɛɛ hu akɛ kɛ́ aja mli lɛ, wɔye wɔbua Biblia mli nikaselɔi enyɔ daa afi ni amɛfee mɛi ni sa kɛha baptisimɔ. Sane kome pɛ dɔɔ mi—biɛ ni mibaaa afii nyɔŋma kɛtsɔɔɔ hiɛ lɛ.”
Linda kɛɛ: “Hiɛsɔɔ ni gbɔmɛi lɛ yɔɔ yɛ sanekpakpa lɛ he kɛ mɔdɛŋ ni wɔbɔɔ lɛ woɔ wɔ hewalɛ waa diɛŋtsɛ. Ákɛ nɔkwɛmɔnɔ lɛ, yɛ maŋ bibioo ko ni koo sɔŋŋ yɔɔ mli lɛ mli lɛ, Biblia mli nikaselɔ ko ni atsɛɔ lɛ Alfonso lɛ yɔse bɔ ni sɛɛnamɔ baaba he aha akɛ aaaha maŋshiɛmɔi yɛ ekutso lɛ mli. No mli lɛ kpaako efã kɛyahi etso shia ni ema lɛ ehee ni ji tso shiai fioo pɛ ni yɔɔ akrowa lɛ mli lɛ ateŋ ekome lɛ mli. Beni esusu he ní ena akɛ eshia lɛ pɛ ji tsũ ni yɔɔ maŋ lɛ mli ni hi kɛha Yehowa lɛ, eku esɛɛ eyahi ejwɛi tsũ lɛ mli ekoŋŋ ni ekɛ eshia lɛ ha nyɛmimɛi lɛ koni amɛkɛtsu nii akɛ Maŋtsɛyeli Asa.”
Jim kɛɛ: “Be diɛŋtsɛ ni wɔyeɔ ni wɔkɛ gbɔmɛi wieɔ yɛ shiɛmɔ nitsumɔ lɛ mli lɛ fá fe be ni wɔkɛtsuɔ nii yɛ United States lɛ shii nyɔŋma. Kɛfata he lɛ, hejɔlɛ babaoo yɛ bɔ ni shihilɛ yaa nɔ ehaa yɛ biɛ lɛ mli. Ŋwanejee ko bɛ he akɛ be babaoo yɛ kɛha nikasemɔ kɛ shiɛmɔyaa.”
Sandra kɛɛ: “Kɛ mikwɛ bɔ ni Biblia mli anɔkwale baanyɛ atsake gbɔmɛi koni amɛfee mɛi ni hi lɛ, ehaa mitsui nyɔɔ mimli waa diɛŋtsɛ. Be ko lɛ mikɛ Amada ni eye afii 69, ni eji nibii bibii ahɔ̃ɔmɔ shwapo nɔtsɛ lɛ kase Biblia lɛ. Nɔ ni efɔɔ feemɔ ji akɛ ekɛ nu susumɔ nii enyɔ shiɔ mliki susumɔ nii nyɔŋma mli. Agbɛnɛ hu lɛ, eyaa nɔ eshishiuɔ ekpelɔi lɛ kɛtsɔ susumɔnɔ ní ehaaa eyi lɛ nɔ be mli ni ehɔ̃ɔ mliki ehaa amɛ lɛ. Shi beni Amada kase saneyitso ni ji ‘Anɔkwayeli Kɛ Miishɛɛ Baa’ lɛ he sane yɛ Nilee Ni Kɛ Mɔ Yaa Naanɔ Wala Mli wolo lɛ yitso 13 lɛ mli lɛ, ekpa nibii fɔji nɛɛ feemɔ. Kwɛ miishɛɛ ni eji akɛ aaana akɛ aabaptisi lɛ yɛ no sɛɛ!”
Karen kɛɛ: “Mikɛ mihe efɔ̃ko Yehowa nɔ babaoo nɛkɛ pɛŋ loo ekɛ mi etsu nii babaoo tamɔ beni miyɔɔ biɛ nɛɛ lɛ. Naanyobɔɔ ni yɔɔ mi kɛ Yehowa teŋ lɛ mli ewa waa aahu diɛŋtsɛ.”
Ni Bo Hu?
Yɛ afii ni eho nɛɛ fɛɛ mli lɛ, Odasefoi akpei abɔ efã kɛtee koni amɛyasɔmɔ yɛ maŋsɛɛ. Mɛi komɛi hiɔ shi afi loo afii enyɔ, mɛi krokomɛi hu hiɔ shi kwraa. Nɔ ni amɛkɛbaa ji amɛ niiashikpamɔ, mumɔŋ hiɛyaa, kɛ shika gbɛfaŋ nibii kɛ oti ni ma amɛhiɛ akɛ amɛbaaha Maŋtsɛyeli lɛ he nibii aya hiɛ yɛ maŋsɛɛ shikpɔŋ nɔ. Amɛnyɛ amɛsɔmɔ yɛ hei ni Maŋtsɛyeli shiɛlɔi ni yɔɔ jɛmɛ lɛ nyɛɛɛ asɔmɔ yɛ, yɛ heloonaa nitsumɔ ni anaaa atsu lɛ hewɔ. Amɛteŋ mɛi babaoo ehe tsɔnei ni nyɛɔ etsɔɔ he fɛɛ he ni amɛkɛaatsu nii yɛ shikpɔŋkuku ni kulɛ amɛnyɛŋ jɛmɛ amɛya lɛ mli. Mɛi krokomɛi hu ni sumɔɔ ni amɛhi maŋtiasei amli lɛ hu ebafee hewalɛwoo nɔ̃ kɛha asafoi wuji ni yɔɔ hei ni onukpai fáaa yɛ lɛ. Ni kɛlɛ, sanebimɔ ko kwraa bɛ he akɛ, amɛ fɛɛ amɛma nɔ mi akɛ amɛnine eshɛ mumɔŋ jɔɔmɔi babaoo nɔ fe bɔ ni amɛkɛha.
Ani obaanyɛ oná hegbɛ ni ji maŋsɛɛ shikpɔŋ ni ooosɔmɔ yɛ nɔ lɛ mli gbɛfaŋnɔ? Kɛ oshihilɛi baaŋmɛ gbɛ lɛ, mɛni hewɔ otaooo fã ni tamɔ nɛkɛ ni ooonyɛ ofã kɛya he ko lɛ mli okwɛɛɛ? Klɛŋklɛŋ nifeemɔ ni he hiaa lɛ baafee wolo ni oooŋma kɛyaha Asafo lɛ nitsumɔhe nine ni yɔɔ maŋ mli he ni osusuɔ akɛ obaanyɛ oyasɔmɔ yɛ jɛmɛ lɛ. Saji pɔtɛɛ ni onine shɛɔ nɔ lɛ baaye ebua bo koni ole kɛji obaanyɛ oná hegbɛ lɛ akɛ ooonyɛ otsu he nii. Kɛfata he lɛ, abaanyɛ aná gbɛtsɔɔmɔi kpakpai babaoo yɛ sane ni ji “Go Out From Your Land and From Your Relatives” (Jee Oshikpɔŋ lɛ Nɔ kɛ Oweku Lɛŋ) ni yɔɔ August 15, 1988 The Watchtower lɛ mli lɛ. Kɛ oto ogbɛjianɔ jogbaŋŋ ni oná Yehowa jɔɔmɔi lɛ, ekolɛ bo hu obaanyɛ oná miishɛɛ ni anáa yɛ maŋsɛɛ shikpɔŋ nɔ sɔɔmɔ mli lɛ eko.
[Mfoniri ni yɔɔ baafa 24]
TOM KƐ LINDA MIINYIƐ GBƐ FINTƆŊŊ NÍ KÃ KOO KO TEŊŊ LƐ NƆ KƐMIIYA SHUAR INDIABII ASHIHILƐHE LƐ
[Mfoniri ni yɔɔ baafa 25]
MƐI BABAOO SƆMƆƆ YƐ ECUADOR MAŊTIASE NI JI QUITO LƐ MLI
[Mfoniri ni yɔɔ baafa 25]
MAKIKO MIISHIƐ YƐ ANDES GƆJI LƐ ANƆ
[Mfoniri ni yɔɔ baafa 26]
HILBIG WEKU LƐ MIISƆMƆ YƐ ECUADOR YƐ AFII ENUMƆ NI EHO NƐƐ MLI