Ekaba Kɔkɔɔkɔ Akɛ Wɔɔkpale Kɛya Hiɛkpatamɔ Mli!
“Jeee mɛi ni kpaleɔ kɛyaa hiɛkpatamɔ mli lɛ ateŋ mɛi komɛi ji wɔ.”—HEBRIBII 10:39.
1. Mɛɛ shihilɛi ha bɔfo Petro ŋmɛɛ ehe eha gbeyeishemɔ lɛ?
EKOLƐ bɔfoi lɛ ahe jɔ̃ amɛhe beni amɛ-Nuntsɔ, Yesu, ni amɛsumɔɔ lɛ lɛ kɛɛ amɛ akɛ amɛ fɛɛ amɛbaagbɛ amɛshwã ni amɛshi lɛ lɛ. Te aaafee tɛŋŋ ni nii ni tamɔ nɛkɛ aaaba—yɛ nɛkɛ be, ni ji eŋmɛlɛtswaa ni he hiaa waa fe fɛɛ nɛɛ mli? Petro ma nɔ mi akɛ: “Kɛji mɛi lɛ fɛɛ nane aaatɔtɔ tete lɛ, mi lɛ minane etɔtɔŋ.” Yɛ anɔkwale mli lɛ, Petro ji nuu ekãalɔ ni tsui esa. Shi beni atsɔɔ Yesu sɛɛgbɛ ni amɔ̃ lɛ lɛ, bɔfoi lɛ—ni Petro fata he lɛ—gbɛ amɛshwã. Sɛɛ mli, beni abibiɔ Yesu saji yɛ Osɔfonukpa Kaiafa we lɛ, Petro lilaa shi ni ehao yɛ kpo lɛ nɔ. Beni gbɛkɛ fɛ̃i lɛ naa waa lɛ, ebaanyɛ efee akɛ Petro she gbeyei akɛ ekolɛ abaagbe Yesu kɛ mɔ fɛɛ mɔ ni kɛ lɛ bɔɔ lɛ. Beni mɛi ni damɔ shi lɛ ateŋ mɛi komɛi yoo Petro akɛ Yesu nanemɛi ni bɛŋkɛ lɛ kpaakpa lɛ ateŋ mɔ kome lɛ, etsui fã waa. Ekpoo shii etɛ sɔŋŋ akɛ ekɛ Yesu bɛ nɔ ko feemɔ. Petro kɛɛ eleee lɛ kwraa po!—Marko 14:27-31, 66-72.
2. (a) Mɛni hewɔ Petro gbeyeishemɔ nifeemɔ yɛ gbɛkɛ ni amɔ Yesu lɛ efeee lɛ ‘mɔ ni kpaleɔ kɛyaa sɛɛ’ lɛ? (b) Mɛni esa akɛ efee wɔfaishitswaa?
2 No ji Petro shihilɛ be ni baa shi kwraa, be ni ŋwanejee ko bɛ he akɛ edɔ lɛ yɛ ewala be ni eshwɛ lɛ fɛɛ mli. Shi ani Petro nifeemɔ yɛ nakai gbɛkɛ lɛ ha ebatsɔ feitɔ? Ani enɛ fee lɛ “mɛi” ni yɛ sɛɛ mli lɛ bɔfo Paulo tsɔɔ bɔ ni amɛji beni eŋma akɛ: “Shi wɔ lɛ, jeee mɛi ni kpaleɔ kɛyaa hiɛkpatamɔ mli lɛ ateŋ mɛi komɛi ji wɔ” lɛ ateŋ mɔ ko? (Hebribii 10:39) Ekolɛ wɔteŋ mɛi pii baakpɛlɛ nɔ akɛ Paulo wiemɔi lɛ kɔɔɔ Petro he. Mɛni hewɔ? Ejaakɛ Petro gbeyeishemɔ lɛ sɛɛ etsɛɛɛ, eji be kuku mli shigbeemɔ yɛ ewala shihilɛ ni ekãa kɛ hemɔkɛyeli ni ekaaa kadiɔ lɛ lɛ mli. Nakai nɔŋŋ hu wɔteŋ mɛi pii kɛ hiɛgbele kaiɔ yɛ bei komɛi amli be ko ni eho yɛ wɔshihilɛ mli, bei ni gbeyeishemɔ nina wɔ trukaa ni ehaaa wɔkɛ ekãa adamɔ shi aha anɔkwale lɛ bɔ ni kulɛ wɔɔsumɔ akɛ wɔfee lɛ. (Okɛto Romabii 7:21-23 he.) Wɔbaanyɛ wɔná nɔmimaa akɛ be kukuoo mli shigbeemɔi nɛɛ efeee wɔ mɛi ni kpaleɔ kɛyaa hiɛkpatamɔ mli. Kɛlɛ, ehe miihia ni wɔtswa wɔfai shi akɛ wɔŋmɛŋ gbɛ kɔkɔɔkɔ ni wɔtsɔmɔ mɛi ni tamɔ nakai. Mɛni hewɔ? Ni te wɔɔfee tɛŋŋ wɔkwa gbɔmɔ ni tamɔ nɛkɛ ni wɔɔtsɔ?
Nɔ ni Hiɛkpatamɔ Mli ni Aaakpale Kɛya lɛ Tsɔɔ
3. Gbalɔi Elia kɛ Yona ŋmɛɛ amɛhe amɛha gbeyeishemɔ yɛ mɛɛ gbɛ nɔ?
3 Beni Paulo ŋma yɛ “mɛi ni kpaleɔ kɛyaa hiɛkpatamɔ mli lɛ” ahe lɛ, no mli lɛ jeee mɛi ni ekolɛ amɛbaagbee ekãa ni laajeɔ yɛ be kuku ko mli lɛ ahe ewieɔ lɛ. Yɛ anɔkwale mli lɛ, Paulo le Petro niiashikpamɔ lɛ kɛ saji krokomɛi ni tamɔ nakai. Be ko lɛ, gbalɔ Elia ni yɔɔ ekãa ni sheee sane wiemɔ gbeyei lɛ ŋmɛɛ ehe eha gbeyeishemɔ ni ejo foi koni ekɛhere lɛ diɛŋtsɛ eyiwala yɛ gbele ni Maŋnyɛ Izebel yiwalɔ lɛ kɛwo ehe gbeyei lɛ hewɔ. (1 Maŋtsɛmɛi 19:1-4) Gbalɔ Yona kɛ gbeyeishemɔ ni mli wa waa kpe. Yehowa kɛ nitsumɔ wo edɛŋ koni efã gbɛ kɛya Ninive, yiwalɛ maŋ ni ehe gbɛi yɛ awuiyeli mli lɛ mli. Amrɔ nɔŋŋ ni Yona yata lɛlɛ ko ni miiya Tarshish lɛ mli—kɛku esɛɛ moŋ kɛtee sɛɛsɛɛ shitooi 2,200! (Yona 1:1-3) Kɛlɛ, anyɛŋ atsɔɔ yɛ gbɛ ni ja nɔ akɛ gbalɔi anɔkwafoi nɛɛ loo bɔfo Petro ji mɛi ni kpaleɔ kɛyaa hiɛkpatamɔ mli. Mɛni hewɔ jeee nakai amɛji lɛ?
4, 5. (a) Yɛ mɛɛ gbɛ nɔ emli sane lɛ yeɔ ebuaa wɔ ni wɔleɔ nɔ ni Paulo kɛ wiemɔ ni ji “hiɛkpatamɔ” ni yɔɔ Hebribii 10:39 lɛ tsɔɔ? (b) Mɛni Paulo tsɔɔ beni ekɛɛ akɛ: “Jeee mɛi ni kpaleɔ kɛyaa hiɛkpatamɔ mli lɛ ateŋ mɛi komɛi ji wɔ” lɛ?
4 Kadimɔ wiemɔ kuku ni Paulo kɛtsu nii lɛ fɛɛ: “Shi wɔ lɛ, jeee mɛi ni kpaleɔ kɛyaa hiɛkpatamɔ mli lɛ ateŋ mɛi komɛi ji wɔ.” (Wɔma efã ko nɔ mi.) Mɛni ekɛ wiemɔ “hiɛkpatamɔ” lɛ tsɔɔ? Yɛ bei komɛi amli lɛ Hela wiemɔ ni akɛtsu nii lɛ kɔɔ naanɔ hiɛkpatamɔ he. Bɔ ni atsɔɔ mli aha nɛɛ kɛ emli sane lɛ kpãa gbee. No mli lɛ Paulo bɔ kɔkɔ etsɛko akɛ: “Kɛ kwa wɔkwaa wɔfeɔ esha, beni wɔná anɔkwale lɛ he nilee lɛ sɛɛ lɛ, belɛ eshai ahe afɔle ko bɛ dɔŋŋ; shi kojomɔ gbɛkwɛmɔ ni yɔɔ gbeyei kɛkɛ, kɛ la grigri ni baashã henyɛlɔi lɛ.”—Hebribii 10:26, 27.
5 No hewɔ lɛ, beni Paulo kɛɛ enanemɛi heyelilɔi lɛ akɛ, “jeee mɛi ni kpaleɔ kɛyaa hiɛkpatamɔ mli lɛ ateŋ mɛi komɛi ji wɔ” lɛ, eetsɔɔ akɛ lɛ kɛ e-Kristofoi anɔkwafoi ni kaneɔ wolo ni eŋma lɛ etswa amɛfai shi akɛ amɛtsiŋ amɛhe kɛjɛŋ Yehowa he kɔkɔɔkɔ koni amɛkpa lɛ sɔɔmɔ. Nakai feemɔ baanyɛ ekɛ naanɔ hiɛkpatamɔ pɛ aba. Yuda Iskariot ji mɛi ni kpale kɛtee hiɛkpatamɔ ni tamɔ nɛkɛ mli lɛ ateŋ mɔ ko, taakɛ anɔkwale lɛ henyɛlɔi krokomɛi ni jɛ amɛsuɔmɔ mli amɛte shi amɛwo Yehowa mumɔ lɛ fee lɛ. (Yohane 17:12; 2 Tesalonikabii 2:3) Aŋkroaŋkroi ni tamɔ nɛkɛ lɛ fata “mɛi ni tsui fãa” ni baaná naanɔ hiɛkpatamɔ yɛ okadi la kpaakpo lɛ mli lɛ ahe. (Kpojiemɔ 21:8) Dabi, wɔsumɔŋ ni wɔtamɔ amɛ kɔkɔɔkɔ!
6. Mɛɛ gbɛ Satan Abonsam taoɔ ni wɔtsɔ nɔ?
6 Satan Abonsam miisumɔ ni wɔkpale kɛya hiɛkpatamɔ mli. Ákɛ “ŋaatsɔɔi” atsɛ lɛ, ele akɛ bei pii lɛ gbɛ ni fiteɔ mɔ ni tamɔ nɛkɛ lɛ jeɔ shishi yɛ gbɛ̀i bibii anɔ. (Efesobii 6:1, NW shishigbɛ niŋmaa) Kɛji yiwaa ni akɛbaa tɛ̃ɛ nyɛɛɛ atsu nɔ ni etaoɔ lɛ he nii lɛ, etaoɔ akɛ eeefite anɔkwa Kristofoi ahemɔkɛyeli kɛtsɔ gbɛ̀i ni yɔɔ nigii nɔ. Eesumɔ ni ena akɛ Yehowa Odasefoi ni yɔɔ ekãa kɛ kamkam lɛ ekpa shiɛmɔ. Nyɛhaa wɔkwɛa nɔ̃ ŋaa gbɛ̀i ni ekɛtsu nii eshi Hebri Kristofoi ni Paulo ŋma amɛ wolo lɛ.
Bɔ ni Anyɛ Kristofoi Anɔ Koni Amɛkpale Kɛya Sɛɛ
7. (a) Mɛni ji asafo ni yɔɔ Yerusalem lɛ yinɔsane? (b) Mɛɛ mumɔŋ shihilɛi amli mɛi ni kaneɔ wolo ni Paulo ŋma lɛ ateŋ mɛi komɛi yɔɔ mli?
7 Odaseyeli lɛ tsɔɔ akɛ Paulo ŋma ewolo ni ekɛyaha Hebribii lɛ aaafee afi 61 Ŋ.B. Asafo ni yɔɔ Yerusalem lɛ yɛ yinɔsane ko ni tsɔɔ basabasafeemɔ be. Yɛ Yesu gbele sɛɛ lɛ, yiwaa ko ni naa wa waa te shi, ni enyɛ Kristofoi pii ni yɔɔ maŋ lɛ mli lɛ anɔ ni amɛgbɛ amɛshwã. Shi toiŋjɔlɛ be ko nyiɛ sɛɛ ba, ni eha Kristofoi lɛ ayifalɛ tee hiɛ. (Bɔfoi lɛ Asaji 8:4; 9:31) Beni afii lɛ hoɔ kɛyaa lɛ, yiwaai kɛ nibii ni mli wawai baa yɛ be kɛ bei amli. Etamɔ nɔ ni beni Paulo ŋma wolo lɛ eyaha Hebribii lɛ, no mli lɛ asafo lɛ miiná toiŋjɔlɛ mli ŋɔɔmɔ ko ni yashɛɔ he ko. Kɛlɛ, nɔnyɛɛi yɛ. Nɔ ni miihe ashɛ afii 30 eho kɛjɛ be mli ni Yesu gba Yerusalem hiɛkpatamɔ lɛ efɔ̃ shi lɛ. Eeenyɛ efee akɛ mɛi komɛi yɛ ni nu he akɛ naagbee lɛ sɛɛ egbala shi fe nine ni ekolɛ ebaŋ yɛ amɛwala be mli. Mɛi krokomɛi yɛ ni ba asafo lɛ mli etsɛko ni amɛkɛ yiwaa ni naa wa ekpeko, ni bɔ ni ehe hiaa ni aŋmɛ tsui shi yɛ kaa shishi lɛ ahe nɔ ko fioo ko pɛ amɛle. (Hebribii 12:4) Yɛ anɔkwale mli lɛ Satan tao diɛŋtsɛ koni ekɛ hegbɛi ni tamɔ nɛkɛ atsu nii. Mɛɛ “ŋaatsɔɔi” ekɛtsu nii?
8. Mɛɛ su Yudafoi pii hiɛ yɛ Kristofoi asafo hee ni shwereɔ lɛ he?
8 Yudafoi akutso ni yɔɔ Yerusalem kɛ Yudea lɛ kɛ heguɔgbee susu Kristofoi asafo hee ni bɛ niiashikpamɔ tsɔ lɛ he. Kɛji akɛ wɔsusu Paulo wolo lɛ mli saji lɛ ahe lɛ, wɔleɔ heguɔgbee wiemɔi ni Yudafoi ajamɔ mli hiɛnyiɛlɔi hewolɔi lɛ kɛ amɛ sɛɛnyiɛlɔi lɛ kɛshi Kristofoi lɛ ekomɛi. Ekolɛ amɛkɛɛ akɛ: ‘Wɔyɛ sɔlemɔtsu kpeteŋkpele lɛ yɛ Yerusalem, ni ehi shi afii ohai babaoo! Wɔyɛ osɔfonukpa anunyamtsɛ ko ni sɔmɔɔ yɛ jɛmɛ, kɛ osɔfoi bibii ní sɔmɔɔ yɛ eshishi. Ashãa afɔlei daa gbi yɛ jɛmɛ. Wɔyɛ Mla lɛ, ni atsɔ ŋwɛibɔfoi anɔ akɛha Mose kɛ okadii wuji ni fata he yɛ Sinai Gɔŋ lɛ nɔ lɛ. Nɛkɛ jamɔ kuu fã ni jeɔ shishi ehee nɛɛ, nɛkɛ Kristofoi ni amɛ́kwa Yuda jamɔ lɛ bɛ nibii nɛɛ eko kwraa!’ Ani nɔ ni ataoɔ ni ejɛ hefɛoyeli nɛɛ mli aba lɛ ye omanye? Eyɛ faŋŋ akɛ nɛkɛ tutuamɔi nɛɛ gba Hebri Kristofoi lɛ ateŋ mɛi komɛi anaa. Paulo wolo lɛ baye ebua amɛ yɛ be ni sa pɛpɛɛpɛ mli.
Nɔ Hewɔ ni Esaaa akɛ Amɛkpaleɔ Kɛyaa Hiɛkpatamɔ Mli Kɔkɔɔkɔ
9. (a) Mɛɛ saneyitso ko anaa yɛ wolo ni aŋma ayaha Hebribii lɛ fɛɛ mli? (b) Kristofoi sɔmɔɔ yɛ sɔlemɔtsu kpakpa mli fe nɔ ni yɔɔ Yerusalem lɛ yɛ mɛɛ shishinumɔ naa?
9 Nyɛhaa wɔsusua yiŋtoi enyɔ ni Paulo kɛha enyɛmimɛi hii kɛ yei ni yɔɔ Yudea lɛ, ni yɛ no hewɔ lɛ esaaa akɛ amɛkpaleɔ kɛyaa hiɛkpatamɔ mli kɔkɔɔkɔ lɛ he wɔkwɛa. Klɛŋklɛŋ lɛ—Kristofoi ajamɔ gbɛjianɔtoo lɛ ni hi fe fɛɛ lɛ—egbɛ eshwã wolo ni eŋma eyaha Hebribii lɛ fɛɛ mli. Paulo wie saneyitso nɛɛ he ni etsɔɔ mli yɛ ewolo lɛ fɛɛ mli. Yerusalem sɔlemɔtsu lɛ ji nɔ̃ pɔtɛɛ ko ni hi kɛwula shi lɛ he nɔkwɛmɔnɔ kɛkɛ, Yehowa mumɔŋ sɔlemɔtsu “ni jeee niji aŋɔfee” lɛ. (Hebribii 9:11) Nakai Kristofoi lɛ ná hegbɛ akɛ amɛaasɔmɔ yɛ nakai mumɔŋ gbɛjianɔtoo kɛha jamɔ lɛ mli. Amɛsɔmɔ yɛ kpaŋmɔ ni hi jogbaŋŋ shishi, kpaŋmɔ hee ni ajɛ jeeŋmɔ awo shi yɛ he, ni yɔɔ Teŋdamɔlɔ ko ni nɔ kwɔ fe Mose, ni ji Yesu Kristo lɛ.—Yeremia 31:31-34.
10, 11. (a) Mɛni hewɔ Yesu wekukpaa lɛ haaa efeee mɔ ni esaaa akɛ esɔmɔɔ akɛ Osɔfonukpa yɛ mumɔŋ sɔlemɔwe lɛ? (b) Yesu ji Osɔfonukpa ní nɔ kwɔ fe mɔ ni sɔmɔɔ yɛ Yerusalem sɔlemɔtsu lɛ mli lɛ yɛ mɛɛ gbɛ̀i anɔ?
10 Nakai Kristofoi lɛ hu yɛ Osɔfonukpa ni hi fe fɛɛ, ni ji Yesu Kristo. Dabi, ejeee mɔ ni jɛ Aaron mli. Shi moŋ eji Osɔfonukpa “yɛ Melkizedek gbɛjianɔ lɛ naa.” (Lala 110:4) Melkizedek, ni aŋmaaa ewekukpaa afɔ̃ɔɔ shi lɛ ji blema Salem maŋtsɛ kɛ agbɛnɛ esɔfonukpa hu. No hewɔ lɛ efee Yesu, ní esɔfoyeli lɛ damɔɔɔ adesa ko ni yeee emuu lɛ wekukpaa nɔ, shi moŋ nɔ ko ni nɔ kwɔ kwraa fe nakai—Yehowa Nyɔŋmɔ diɛŋtsɛ kita nɔ lɛ he gbalɛ mfoniri yɛ gbɛ ni sa nɔ. Taakɛ Melkizedek ji lɛ, Yesu sɔmɔɔɔ akɛ Osɔfonukpa kɛkɛ shi moŋ akɛ Maŋtsɛ hu, mɔ ni gboŋ gbi ko gbi ko.—Hebribii 7:11-21.
11 Agbɛnɛ hu, ákɛ mɔ ni tamɔɔɔ osɔfonukpa ni yɔɔ Yerusalem sɔlemɔtsu lɛ mli lɛ, ehe ehiaaa ni Yesu ashã afɔlei daa afi. Efɔleshaa lɛ ji lɛ diɛŋtsɛ ewala ni yeɔ emuu ni ekɛha shikome nyɔŋlo lɛ. (Hebribii 7:27) Nakai afɔlei lɛ fɛɛ ni ashã yɛ sɔlemɔwe lɛ ji okadii kɛkɛ, ni fee nɔ ni Yesu kɛha lɛ he mfonirii. Efɔleshaa ni yeɔ emuu lɛ kɛ nɔ ni abaanyɛ adamɔ nɔ diɛŋtsɛ ni akɛ mɛi fɛɛ ni náa emli hemɔkɛyeli lɛ ahe eshai ake amɛ lɛ ha. Nɔ ni yɔɔ miishɛɛ diɛŋtsɛ hu ji Paulo wiemɔi ni tsɔɔ akɛ nɛkɛ Osɔfonukpa nɛɛ ji Yesu ni tsakeee lɛ nɔŋŋ ni Kristofoi ni yɔɔ Yerusalem lɛ ná amɛle lɛ lɛ. Eji mɔ ni baa ehe shi, mɔ ni mli hi, kɛ mɔ ni baanyɛ ‘anu wɔgbedemɔi lɛ ahe aha wɔ lɛ.’ (Hebribii 4:15; 13:8) Nakai Kristofoi ni afɔ amɛ mu lɛ yɛ hiɛnɔkamɔ akɛ amɛbaasɔmɔ akɛ osɔfoi bibii yɛ Kristo shishi! Te aaafee tɛŋŋ ni amɛaasusu kpalemɔ kɛmiiya Yuda jamɔ mli nibii ni ekpɔtɔ “ni nyɛɛɛ nɔ ko afee ni eye ohia” lɛ anɔ ekoŋŋ lɛ ahe?—Galatabii 4:9.
12, 13. (a) Mɛɛ yiŋtoo ni ji enyɔ ni Paulo kɛha no hewɔ ni esaaa akɛ wɔkpaleɔ kɛyaa sɛɛ kɔkɔɔkɔ lɛ? (b) Mɛni hewɔ Hebri Kristofoi lɛ atsutsu tsuishiŋmɛɛ he saji ni aŋmala ashwie shi lɛ baawo amɛ hewalɛ koni amɛkakpale kɔkɔɔkɔ kɛmiiya hiɛkpatamɔ mli lɛ?
12 Ákɛ nɔ ko ni tamɔ odaseyeli ni faaa lɛ, Paulo kɛ yiŋtoo ni ji enyɔ hewɔ ni esaaa akɛ amɛkpaleɔ kɛyaa hiɛkpatamɔ mli lɛ ha Hebribii lɛ—amɛ diɛŋtsɛ amɛtsuishiŋmɛɛ he saji ni áŋmala ashwie shi lɛ. Eŋma akɛ: “Nyɛkaia klɛŋklɛŋ gbii lɛ, beni la tso yɛ nyɛnɔ lɛ, bɔ ni nyɛmia nyɛhiɛ yɛ amanehului ata babaoo mli.” Paulo kai amɛ akɛ ‘amɛtsɔmɔ kwɛmɔnii’ kɛtsɔ jɛmɔi kɛ amanehului anɔ. Awo mɛi komɛi tsuŋ; mɛi krokomɛi amusuŋ shã amɛ kɛha mɛi ni awo amɛ gboklɛi lɛ ni amɛye amɛbua amɛ. Hɛɛ, amɛjie hemɔkɛyeli kɛ tsuishiŋmɛɛ ni sa yijiemɔ kpo. (Hebribii 10:32-34) Ni kɛlɛ, mɛni hewɔ Paulo kɛɛ amɛ akɛ ‘amɛya nɔ amɛkai’ niiashikpamɔi ni yɔɔ dɔlɛ nɛɛ? Ani enɛ ejeŋ amɛnijiaŋ wui?
13 Nɔ ni tamɔɔɔ nakai lɛ, ‘klɛŋklɛŋ gbii lɛ kaimɔ’ baaha Hebribii lɛ akai bɔ ni Yehowa waje amɛ yɛ kaa shishi lɛ. Yɛ eyelikɛbuamɔ hewɔ lɛ, amɛ́nyɛ amɛku Satan tutuamɔi lɛ babaoo naa momo. Paulo ŋma akɛ: “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ” lɛ. (Hebribii 6:10) Hɛɛ, Yehowa kai amɛ anɔkwayeli nitsumɔi lɛ fɛɛ, ni ekɛto ekaimɔ ni bɛ naagbee lɛ mli. Akaiɔ wɔ Yesu ŋaawoo akɛ wɔbɔ jwetri yɛ ŋwɛi lɛ. Julɔ ko nyɛŋ aju nɛkɛ jwetrii nɛɛ kɔkɔɔkɔ; omlɛgɛ loo ŋkanale ko nyɛŋ afite amɛ. (Mateo 6:19-21) Yɛ anɔkwale mli lɛ, kɛji akɛ Kristofonyo lɛ kpale kɛtee hiɛkpatamɔ mli lɛ, no pɛ dani abaanyɛ afite nɛkɛ jwetrii nɛɛ. No baaha jwetrii ni ekɛto yɛ ŋwɛi lɛ fɛɛ alaaje. Mɛɛ yiŋtoo ni mli wa waa po Paulo kɛha Hebri Kristofoi lɛ nɛkɛ, akɛni amɛdiii gbɛ ni tamɔ nɛkɛ sɛɛ lɛ hewɔ! Mɛni hewɔ esa akɛ amɛha afii ni amɛkɛsɔmɔ yɛ anɔkwayeli mli lɛ fɛɛ afee efolo? Ebaafee nɔ ni ja kɛ nɔ ni hi babaoo moŋ akɛ amɛaaya nɔ amɛŋmɛ amɛtsui shi.
Nɔ Hewɔ ni Esaaa akɛ Wɔkpaleɔ Kɛyaa Hiɛkpatamɔ Mli Kɔkɔɔkɔ
14. Mɛɛ kaai ni tamɔ nɔ ni klɛŋklɛŋ afii oha lɛ mli Kristofoi lɛ kɛkpe lɛ wɔ hu wɔkɛkpeɔ?
14 Anɔkwa Kristofoi ni yɔɔ ŋmɛnɛ lɛ hu yɛ yiŋtoi ni mli wawai ni haaa amɛkpale kɛya sɛɛ. Klɛŋklɛŋ lɛ, nyɛhaa wɔkaia jɔɔmɔi ni wɔyɔɔ ni ji jamɔ krɔŋŋ ni Yehowa kɛha wɔ lɛ. Taakɛ klɛŋklɛŋ afii oha lɛ mli Kristofoi lɛ ji lɛ, be ni jamɔi ni ehe gbɛi babaoo lɛ amli bii yeɔ wɔhe fɛo ni amɛliɔ wɔ, ni amɛkɛ amɛniji tsɔɔ amɛ jamɔ tsui fɛfɛji kɛ bɔ ni amɛ blema saji etsɛ eha yɛ henɔwomɔ mli lɛ mli wɔyɔɔ lɛ. Shi, Yehowa maa nɔ mi kɛhaa wɔ akɛ, ekpɛlɛɔ wɔjamɔ lɛ nɔ. Yɛ anɔkwale mli lɛ, wɔnáa jɔɔmɔi amli ŋɔɔmɔ ko ŋmɛnɛ ni klɛŋklɛŋ afii oha lɛ mli Kristofoi lɛ naaa. Shi ekolɛ obaasusu akɛ, ‘Te aaafee tɛŋŋ ni eeeba lɛ nakai hu?’ Fɛɛ sɛɛ lɛ, amɛhi shi yɛ be ni mumɔŋ sɔlemɔtsu lɛ bɔi nitsumɔ lɛ mli. Kristo batsɔ e-Sɔfonukpa beni abaptisi lɛ yɛ afi 29 Ŋ.B. lɛ. Amɛteŋ mɛi komɛi ena Nyɔŋmɔ Bi ni tsuɔ naakpɛɛ nitsumɔi lɛ. Yɛ egbele sɛɛ po lɛ, naakpɛɛ nibii babaoo tee nɔ. Shi taakɛ agba afɔ̃ shi lɛ, yɛ naagbee lɛ nikeenii ni tamɔ nɛkɛ sɛɛ fo.—1 Korintobii 13:8.
15. Anɔkwa Kristofoi ni yɔɔ ŋmɛnɛ lɛ miihi shi yɛ mɛɛ gbalɛ mlibaa be mli, ni mɛni no tsɔɔ kɛhaa wɔ?
15 Shi kɛlɛ, sɔlemɔwe gbalɛ kakadaŋŋ ni yɔɔ Ezekiel yitsei 40 kɛyashi 48a lɛ mlibaa be ni sa kadimɔ waa lɛ mli wɔyɔɔ lɛ. No hewɔ lɛ, wɔna Nyɔŋmɔ gbɛjianɔtoo kɛha jamɔ krɔŋŋ ni ásaa ato ama shi ekoŋŋ lɛ. Átsuu nakai mumɔŋ sɔlemɔwe lɛ he kɛjɛ ejamɔŋ mujiwoo kɛ wɔŋjamɔ lɛ fɛɛ mli. (Ezekiel 43:9; Maleaki 3:1-5) Susumɔ sɛɛnamɔi ni nɛkɛ hetsuumɔ lɛ kɛha wɔ lɛ ahe.
16. Mɛɛ nifeemɔ gbɛ ko ni jeɔ mɔ nijiaŋ wui klɛŋklɛŋ afii oha lɛ mli Kristofoi lɛ kɛkpe?
16 Yɛ klɛŋklɛŋ afii oha lɛ mli lɛ, no mli lɛ wɔsɛɛ be he hiɛnɔkamɔ kpakpa ko bɛ kɛha Kristofoi asafo lɛ ni ato he gbɛjianɔ lɛ. Yesu egba efɔ̃ shi akɛ ebaafee tamɔ nɔ ni ádu jwɛi awo ŋmãa ŋmɔ hee ko mli, ni ehaaa ayoo ŋmãa lɛ yɛ jwɛi lɛ ateŋ. (Mateo 13:24-30) Ni nakai eba lɛ. Beni klɛŋklɛŋ afii oha lɛ baa naagbee, ni bɔfo Yohane ni egbɔ lɛ sɔmɔɔ akɛ naagbee mɔ ni tsĩɔ fitemɔ gbɛ lɛ, no mli lɛ hemɔkɛyeli kwamɔ miishwere momo. (2 Tesalonikabii 2:6; 1 Yohane 2:18) Bɔfoi lɛ agbele sɛɛ etsɛɛɛ ni osɔfoi akuu ko ni etse ehe bate shi, ni amɛkɛ nɔnyɛɛ ba asafoku lɛ nɔ ni amɛwowoo atadei ni haa esoroɔ amɛ. Hemɔkɛyeli kwamɔ gbɛ eshwã he fɛɛ he. Kwɛ bɔ ni enɛ baaje anɔkwa Kristofoi lɛ anijiaŋ wui aha! Amɛna ni akɛ ekroko ni ekpɔtɔ ebahà gbɛjianɔ ni áto ama shi ehee kɛha jamɔ krɔŋŋ lɛ nɔ kwraa. Enɛ je shishi yɛ be ni shɛɛɛ be ni Kristo to asafo lɛ shishi lɛ sɛɛ afii oha.
17. Ŋmɛnɛŋmɛnɛ beaŋ Kristofoi asafo lɛ etsɛ fe klɛŋklɛŋ afii oha lɛ mli nɔ̃ lɛ yɛ mɛɛ shishinumɔ naa?
17 Agbɛnɛ susumɔ nɔ ko ni tamɔɔɔ enɛ he okwɛ. Ŋmɛnɛ, jamɔ krɔŋŋ sɛɛ etsɛ fe be ni hi shi kɛyashi be mli ni bɔfoi lɛ gboi lɛ. Kɛjɛ be mli ni afee wolo tɛtrɛɛ nɛɛ klɛŋklɛŋ nɔ̃ yɛ afi 1879 mli kɛbaa nɛɛ, Yehowa kɛ jamɔ ni ekrɔŋŋfeemɔ yaa hiɛ be fɛɛ be ejɔɔ wɔ. Yehowa kɛ Kristo Yesu ba mumɔŋ sɔlemɔwe lɛ yɛ afi 1918 kɛ yiŋtoo akɛ amɛbaatsuu he. (Maleaki 3:1-5) Kɛjɛ afi 1919 kɛbaa nɛɛ, átee nɔ atsuu gbɛjianɔtoo kɛha Yehowa Nyɔŋmɔ jamɔ lɛ he kɛtee hiɛ fiofio. Shishinumɔ ni wɔyɔɔ yɛ Biblia gbalɛi kɛ shishitoo mlai ahe lɛ mli efee faŋŋ kɛtee hiɛ. (Abɛi 4:18) Namɔ ŋɔɔ enɛ he yijiemɔ lɛ yaa? Jeee adesai komɛi kɛkɛ ni yeee emuu. Yehowa pɛ, kɛ e-Bi ni ji asafo lɛ Yitso lɛ, baanyɛ abu E-webii ahe kɛjɛ fitemɔ mli yɛ nɛkɛ fitemɔ bei nɛɛ amli. Belɛ, wɔkakpa shidaa ni wɔkɛaaha Yehowa akɛni eŋmɛ wɔ gbɛ koni wɔkɛ wɔhe awo jamɔ krɔŋŋ mli ŋmɛnɛ lɛ kɔkɔɔkɔ. Ni nyɛhaa wɔtswaa wɔfai shi shiŋŋ akɛ wɔkpalaŋ kɛyaŋ hiɛkpatamɔ mli kɔkɔɔkɔ!
18. Mɛɛ yiŋtoo ni wɔyɔɔ hewɔ ni wɔkpaleee kɛyaaa hiɛkpatamɔ mli kɔkɔɔkɔ lɛ?
18 Taakɛ nakai Hebri Kristofoi lɛ ji lɛ, wɔyɛ yiŋtoo ni ji enyɔ ni wɔdamɔɔ nɔ wɔkpoɔ gbeyeishemɔ kɛ kpalemɔ gbɛ lɛ—wɔ diɛŋtsɛ wɔ tsuishiŋmɛɛ he saji ni aŋmala ashwie shi lɛ. Kɛji akɛ nyɛsɛɛ afii nɛɛ amli nɔŋŋ wɔje shishi akɛ wɔmiisɔmɔ Yehowa aloo wɔtee nɔ wɔfee nakai afii nyɔŋmai abɔ hu lɛ, kɛlɛ wɔtswa Kristofoi anitsumɔi ahe saji ni aŋmala ashwie shi wɔma shi. Wɔteŋ mɛi pii ena yiwaa mli amanehulu, kɛ́ eji tsuŋwoo, naatsii, niseniianiifeemɔ, aloo wɔ nibii ni laajeɔ. Mɛi babaoo kɛ weku mli shitee-kɛ-woo, heguɔgbee, hefɛoyeli, kɛ shikpilikpiifeemɔ ekpe. Wɔ fɛɛ wɔŋmɛ wɔtsui shi, ni wɔtee nɔ yɛ anɔkwa sɔɔmɔ ní wɔkɛhaa Yehowa lɛ mli yɛ shihilɛ mli nibii ni kaa mɔ kɛ kaai srɔtoi lɛ fɛɛ sɛɛ. Yɛ nakai feemɔ hewɔ lɛ, wɔtswa hiɛmiamɔ he saji ni aŋmala ashwie shi ni Yehowa hiɛ kpaŋ nɔ wɔma shi, jwetrii afiase ni yɔɔ ŋwɛi. Yɛ anɔkwale mli lɛ, belɛ jeee be ni akpaleɔ kɛyaa sɛɛ kɛyaa gbɛjianɔtoo momo ni ekpɔtɔ ni wɔshi yɛ wɔsɛɛ lɛ mli nɛ! Mɛni hewɔ esa akɛ wɔha wɔnitsumɔ dɛŋdɛŋ lɛ fɛɛ afee nɔ ni sɛɛnamɔ bɛ he? Ŋmɛnɛ ji be ni enɛ ebafee anɔkwale titri, beni ‘eshwɛ be fioo kɛkɛ’ dani naagbee lɛ baaba lɛ.—Hebribii 10:37.
19. Mɛni abaasusu he yɛ wɔ nikasemɔ ni nyiɛ sɛɛ lɛ mli?
19 Hɛɛ, nyɛhaa wɔtswaa wɔfai shi akɛ, “wɔ lɛ, jeee mɛi ni kpaleɔ kɛyaa hiɛkpatamɔ mli lɛ ateŋ mɛi komɛi ji wɔ”! Shi moŋ, nyɛhaa wɔfea ‘mɛi ni yɔɔ hemɔkɛyeli.’ (Hebribii 10:39) Te wɔɔfee tɛŋŋ wɔná nɔmimaa akɛ wɔtamɔ bɔ ni átsɔɔ mli aha nɛɛ, ni te wɔɔfee tɛŋŋ wɔye wɔbua nanemɛi Kristofoi lɛ ni amɛfee nakai nɔŋŋ? Wɔ nikasemɔ ni nyiɛ sɛɛ lɛ baasusu sane nɛɛ he.
[Shishigbɛ niŋmaa]
Ani Okaiɔ?
◻ Ákɛ aaakpale kɛya hiɛkpatamɔ mli lɛ tsɔɔ mɛni?
◻ Mɛɛ nɔnyɛɛi akɛbaa Hebri Kristofoi ni Paulo ŋma amɛ wolo lɛ anɔ?
◻ Mɛɛ yiŋtoi ni nomɛi ahewɔ ni esaaa akɛ wɔkpaleɔ kɛyaa hiɛkpatamɔ mli Paulo kɛha Hebribii lɛ?
◻ Mɛɛ yiŋtoi ní wɔyɔɔ wɔdamɔɔ nɔ wɔtswaa wɔfai shi akɛ wɔkpaleŋ kɛyaŋ hiɛkpatamɔ mli kɔkɔɔkɔ lɛ?
[Mfonirii ni yɔɔ baafa 15]
Gbeyeishemɔ mli ni Petro gbee lɛ efeee lɛ ‘mɔ ni kpaleɔ kɛyaa hiɛkpatamɔ mli’