Sanebimɔi ni Jɛ Kanelɔi Adɛŋ

Mesia lɛ he gbalɛ ko ni ale waa yɛ Yesaia yitso 53. Kuku 10 kɛɔ akɛ: “Esa Yehowa hiɛ akɛ eeetswa lɛ nɔ̃ ní eha hela amɔ lɛ.” Mɛni enɛ tsɔɔ?

Eyɛ mlɛo akɛ aaana nɔ hewɔ ni sanebimɔ ko baanyɛ ate shi yɛ Yesaia 53:10 lɛ he lɛ. Anɔkwa Kristofoi susuuu akɛ wɔ-Nyɔŋmɔ ni yɔɔ musuŋtsɔlɛ kɛ mlijɔlɛ lɛ baaná miishɛɛ akɛ eeetswa mɛi anii loo ni eeeha hela amɔ mɔ ko. Biblia lɛ haa wɔ nɔ ni wɔbaadamɔ nɔ wɔná hekɛnɔfɔɔ akɛ Nyɔŋmɔ náaa miishɛɛ yɛ mɛi ni efeko nɔ ko lɛ apiŋmɔ he. (5 Mose 32:4; Yeremia 7:30, 31) Ekolɛ yɛ afii ohai abɔ ni eho lɛ amli lɛ, Yehowa eŋmɛ nɔnaa gbɛ yɛ yiŋtoi komɛi ni kɛ enilee kɛ suɔmɔ lɛ kpãa gbee lɛ naa. Shi eji anɔkwale akɛ jeee lɛ ji mɔ ni ha esuɔmɔ Bi Yesu na amanehulu. No hewɔ lɛ, mɛni diɛŋtsɛ ji nɔ ni nɛkɛ wiemɔ kuku nɛɛ wieɔ he lɛ mɔ?

Ojogbaŋŋ, abaanyɛ aye abua wɔ koni wɔna shishinumɔ diɛŋtsɛ ni yɔɔ mli lɛ kɛji wɔsusu kuku lɛ fɛɛ he, ni wɔyɔse shii enyɔ ni wiemɔ ni ji ‘sa hiɛ’ lɛ je kpo yɛ lɛ he. Yesaia 53:10 lɛ kaneɔ akɛ: “Esa Yehowa hiɛ akɛ eeetswa lɛ nɔ̃ ní eha hela amɔ lɛ. Kɛji eŋɔ esusuma efee sɔ̃ afɔle lɛ, eeená seshibii, eeeha egbii atsɛ, ni nɔ ní sa Yehowa hiɛ lɛ aaashwere yɛ edɛŋ.”

Biblia lɛ mli sane lɛ fɛɛ tsɔɔ akɛ “nɔ ní sa Yehowa hiɛ,” ni atsĩ tã yɛ kuku lɛ naagbee lɛ, wieɔ eyiŋtoo lɛ he nitsumɔ kɛtsɔ Maŋtsɛyeli lɛ nɔ lɛ he. Enɛ ni Yehowa feɔ lɛ baabu emaŋtsɛyeli lɛ bem ni ebaaha anyɛ ajie esha ni nine shɛ nɔ lɛ kɛjɛ adesai ni feɔ toiboo lɛ ahe—wɔhe eshai lɛ. (1 Kronika 29:11; Lala 83:19; Bɔfoi lɛ Asaji 4:24; Hebribii 2:14, 15; 1 Yohane 3:8) Nɔ ni baagbele gbɛ kɛha enɛɛmɛi fɛɛ ji akɛ esa akɛ Nyɔŋmɔ Bi lɛ abatsɔ adesa koni ekɛ kpɔmɔ afɔleshaa aha. Taakɛ wɔle lɛ, yɛ enɛ feemɔ mli lɛ Yesu na amanehulu. Biblia lɛ kɛɔ wɔ akɛ: “Ekase toiboo yɛ amanehului ní ena lɛ amli.” No hewɔ lɛ Yesu ná he sɛɛ kɛjɛ nakai amanehulu lɛ mli.—Hebribii 5:7-9.

Yesu le momo akɛ piŋmɔi komɛi fata gbɛ ni woo yɔɔ mli ní ebaakɔ lɛ he. Eji nɔ ni yɔɔ faŋŋ yɛ ewiemɔi ni aŋmala ashwie shi yɛ Yohane 12:23, 24, he ni wɔkaneɔ yɛ akɛ: “Ŋmɛlɛtswaa ni akɛbaawo gbɔmɔ bi lɛ hiɛnyam lɛ eshɛ. Lɛɛlɛŋ, lɛɛlɛŋ miikɛɛnyɛ akɛ: Kɛ́ ŋmãa kuli enyɔɔɔ shikpɔŋ ni egbo lɛ, no lɛ bɔni eyɔɔ lɛ nɔŋŋ eyɔɔ; shi kɛji egbo lɛ, ewoɔ yibii pii.” Hɛɛ, Yesu le akɛ ebaabi ni ehiɛ emuuyeli mli kɛyashi piŋmɔ gbele mli tete po. Sane lɛ yaa nɔ akɛ: “‘Agbɛnɛ misusuma miihao, ni mɛni makɛɛ? Ataa, heremɔ mi yɛ ŋmɛlɛtswaa nɛɛ mli? Tsɛbelɛ enɛ hewɔ nɔŋŋ miba yɛ ŋmɛlɛtswaa nɛɛ mli. Ataa, wo ogbɛi lɛ hiɛ nyam!’ Kɛkɛ ni gbee ko jɛ ŋwɛi kɛɛ: ‘Miná miwo ehiɛ nyam, ni masaa mawo ehiɛ nyam ekoŋŋ.’”—Yohane 12:27, 28; Mateo 26:38, 39.

Sane nɛɛ mli wɔbaanyɛ wɔnu Yesaia 53:10 lɛ shishi yɛ. Yehowa le jogbaŋŋ akɛ tswiamɔ ni aaatswia e-Bi lɛ nii yɛ shishinumɔ ko naa lɛ fata eniiashikpamɔ lɛ he. Kɛlɛ, anunyam kɛ nibii kpakpai babaoo ni baajɛ mli aba ni yɔɔ ejwɛŋmɔŋ lɛ hewɔ lɛ, Yehowa ná niiashikpamɔ ni Yesu baaná lɛ he miishɛɛ. Yɛ shishinumɔ ni tamɔ nɛkɛ naa lɛ Yehowa ‘ná miishɛɛ yɛ nitswiamɔ lɛ mli,’ loo Mesia lɛ nitswiamɔ mli. Ni Yesu hu ná miishɛɛ yɛ nɔ ni ebaanyɛ etsu ní etsu he nii lɛ he. Lɛɛlɛŋ, taakɛ Yesaia 53:10 mu sane naa lɛ, “nɔ ní sa Yehowa hiɛ lɛ aaashwere yɛ edɛŋ.”