‘Amɛwieɔ Ekpakpafeemɔ kɛ Suɔmɔ He’

YƐ NYƐSƐƐ afii nɛɛ amli lɛ, Yehowa Odasefoi ni yɔɔ France lɛ ebafee mɛi ni agbeɔ amɛhe guɔ waa. Mɛi ni teɔ shi woɔ amɛ lɛ kɛ anɔkwalei ni bɛ shiŋŋ kɛ saji ni esaaa miitsu nii ni amɛkɛmiifite amɛ yɛ maŋbii ahiɛ. Yɛ afi 1999 afi lɛ shishijee mli lɛ, Yehowa Odasefoi ni yɔɔ France fɛɛ lɛ ja dɛhiɛmɔ wolo ni hiɛ yitso akɛ People of France, You Are Being Deceived! (Francebii, Aalaka Nyɛ!) akpekpei 12. Amɛkɛ dɛhiɛmɔ wolo nɛɛ te shi amɛwo naafolɔmɔ wiemɔi ni akɛgbe amɛhe guɔ lɛ.

Yɛ tafaa lɛ gbii fioo komɛi asɛɛ lɛ, Ow. Jean Bonhomme, ni ji datrɛfonyo ni kulɛ eji Mlawoo Kpee lɛ mlinyo lɛ ŋma wolo ko eyaha ni akɛwo jɛmɛ adafitswaa wolo ko mli. Eŋma akɛ: “Yehowa Odasefoi baa mishia lɛ yɛ be kɛ bei amli. Amɛkɛ mi bawieɔ ekpakpafeemɔ kɛ suɔmɔ ni baahi shi yɛ jeŋ muu fɛɛ lɛ he. . . . Amɛkɛ nɔnyɛɛ efeee enɛ. Amɛkɛ mlijɔlɛ wieɔ, ni amɛjɛɔ suɔmɔ mli amɛboɔ mijamɔ he ŋwanejee lɛ toi.”

Beni Ow. Bonhomme wieɔ Yehowa Odasefoi lɛ amumɔŋ susumɔi lɛ ahe lɛ, ekɛɛ akɛ: “Akɛni amɛjɛɛɛ je lɛŋ hewɔ lɛ, yɛ amɛgbɛfaŋ lɛ, ebaawa akɛ amɛbaaye mɔ ko awui. Yɛ gbɛ kroko nɔ lɛ, nibii komɛi ahe nilee ni maŋkwramɔŋ bii komɛi bɛ lɛ fiteɔ toiŋjɔlɛ ni yɔɔ maŋbii ateŋ lɛ waa, ni maŋbii ateŋ ekomefeemɔ lɛ fitemɔ hu fata he.”