Ŋshɔ ni Egbo Wolokpoi Lɛ—Mɛni Hewɔ Esa akɛ Oná He Miishɛɛ?

Dani aaana Ŋshɔ ni Egbo Wolokpoi lɛ, no mli lɛ Hebri Ŋmalɛi lɛ mli niŋmaai ní etsɛ fe fɛɛ lɛ ehi shi aahu kɛjɛ aaafee afii ohai nɛɛhu kɛ afii ohai nyɔŋma Ŋ.B. kɛbaa. Ani abaanyɛ akɛ hiɛ afɔ̃ niŋmaai nɛɛ anɔ lɛɛlɛŋ akɛ Nyɔŋmɔ Wiemɔ lɛ mli anɔkwa saji ni akɛhaa, akɛni agbe Hebri Ŋmalɛi lɛ aŋmaa naa nɔ ni fa fe afii akpe kɛtsɔ hiɛ lɛ? Nilelɔ Julio Trebolle Barrera ni ji Ŋshɔ ni Egbo Wolokpoi lɛ majimaji ateŋ niŋmalɔi akuu lɛ mlinyo lɛ kɛɛ akɛ: “Isaiah Scroll [ni jɛ Qumran] lɛ kɛ odaseyeli ni anyɛŋ aje he ŋwane haa ni tsɔɔ akɛ Biblia ŋmalɛ ni akɛhaa kɛtsɔ niji ni Yudafoi lɛ kwɛ eko nɔ kɛŋmala lɛ nɔ, nɔ ni fe afii akpe ni eho lɛ efee nɔ ni akɛ anɔkwayeli kɛ henɔkwɛmɔ jogbaŋŋ to he gbɛjianɔ.”

YESAIA wolo lɛ fɛɛ yɛ wolokpo ni Barrera wieɔ he lɛ mli. Kɛbashi amrɔ nɛɛ, ana Hebri Ŋmalɛi lɛ he woji lɛ fɛɛ fãi komɛi yɛ nɔ ni fa fe Biblia niŋmaai 200 ni ayana yɛ Qumran lɛ ateŋ, ja Ester wolo lɛ pɛ. Ákɛ nɔ ni tamɔɔɔ Isaiah Scroll (Yesaia Wolokpo) lɛ, babaoo yɛ ni fãi komɛi pɛ anaa, ni nɔ ni shɛɛɛ wolo fɛɛ wolo mlijaa nyɔŋma mli ekome yɔɔ mli. Biblia woji ni ehé gbɛi fe fɛɛ yɛ Qumran lɛ ji Lalai (ekomekomei 36), Mose Wolo ni Ji Enumɔ (ekomekomei 29), kɛ Yesaia (ekomekomei 21). Enɛɛmɛi hu ji woji ni afɔɔ sɛɛ tsɛmɔ yɛ Kristofoi a-Hela Ŋmalɛi lɛ amli.

Eyɛ mli akɛ wolokpoi lɛ tsɔɔ akɛ afeko tsakemɔi yɛ Biblia lɛ shishitoo mlai lɛ amli moŋ, shi amɛjieɔ lɛ kpo amɛtsɔɔ hu akɛ Hebri Biblia ŋmalɛi ni Yudafoi kɛtsu nii yɛ Second Temple lɛ be lɛ mli lɛ shishitsɔɔmɔi srɔtoi fioo komɛi yɔɔ, ni esoro eko fɛɛ eko kɛ bɔ ni eyɔɔ. Jeee wolokpoi lɛ fɛɛ tamɔ Masorete niŋmaa lɛ yɛ wiemɔi aspɛlimɔ loo wiemɔ ŋmaa he gbɛjianɔtoo mli. Ekomɛi baa Hela Septuagint lɛ he saŋŋ. Tsutsu ko lɛ, woloŋlelɔi susuɔ akɛ ekolɛ srɔtofeemɔi ni yɔɔ Septuagint lɛ mli lɛ jɛ tɔmɔi loo susumɔi heei ni wiemɔ shishitsɔɔlɔ lɛ je gbɛ ekɛwo mli lɛ hewɔ. Amrɔ nɛɛ, wolokpoi lɛ jieɔ lɛ kpo etsɔɔ akɛ srɔtofeemɔi nɛɛ babaoo jɛ tsakemɔi ni afee awo Hebri niŋmaa lɛ mli diɛŋtsɛ. Enɛ baanyɛ atsɔɔ shihilɛi komɛi amli ni mra be mli Kristofoi lɛ tsɛ saji kɛjɛ Hebri Ŋmalɛ lɛ niŋmaai amli yɛ be mli ni ekɛ wiemɔi ni esoro no yɛ Masorete niŋmaa lɛ he lɛ tsuɔ nii.—2 Mose 1:5; Bɔfoi lɛ Asaji 7:14.

No hewɔ lɛ, Biblia wolokpoi lɛ mli nii kpakpai ni ayana nɛɛ kɛ fãi komɛi lɛ kɛ nɔdaamɔnɔ ni nɔ bɛ haa koni akɛkase Hebri Biblia niŋmaa ni akɛhaa lɛ. Ŋshɔ ni Egbo Wolokpoi lɛ ema sɛɛnamɔ ni yɔɔ Septuagint lɛ kɛ Samaritan Pentateuch lɛ sɛɛ lɛ nɔ mi koni akɛto niŋmaai lɛ ahe akwɛ. Amɛjieɔ saji krokomɛi kɛfataa he kɛha Biblia shishitsɔɔlɔi koni amɛsusu he kɛha niŋmaa lɛ mli tsakemɔi ni yaa hiɛ ni amɛaafee yɛ Masorete niŋmaa lɛ mli lɛ he. Yɛ shihilɛi komɛi amli lɛ, amɛma yiŋkpɛi ni New World Bible Translation Committee lɛ fee koni akɛ Yehowa gbɛi awo hei ni ajie yɛ, yɛ Masorete niŋmaa lɛ mli lɛ nɔ mi.

Wolokpoi lɛ ni wieɔ Qumran kuu lɛ mlai kɛ hemɔkɛyelii ahe lɛ ha efee faŋŋ diɛŋtsɛ akɛ jeee Yuda jamɔ gbɛ kome pɛ yɔɔ yɛ Yesu beaŋ. Qumran kuu lɛ yɛ blema saji ni soro no yɛ Farisifoi kɛ Sadukifoi anɔ̃ lɛ he. Ekolɛ nɛkɛ srɔtofeemɔi nɛɛ ha kuu lɛ gbala amɛhe shi kɛtee ŋa lɛ nɔ lɛ. Amɛsusu yɛ gbɛ ni ejaaa nɔ akɛ kuu lɛ ji Yesaia 40:3 lɛ mlibaa ni kɔɔ gbee ni yɔɔ ŋa lɛ nɔ, ní haa Yehowa gbɛ lɛ jaa tɔrɔmɔɔ. Wolokpo lɛ fãi komɛi wieɔ Mesia ni niŋmalɔi lɛ na akɛ ebaa be ebɛŋkɛ lɛ he. Enɛ ji nɔ ko ni he hiaa waa diɛŋtsɛ yɛ wiemɔ ni Luka wie akɛ “maŋ lɛ hiɛ kã” Mesia baa lɛ “nɔ” lɛ hewɔ.—Luka 3:15.

Ŋshɔ ni Egbo Wolokpoi lɛ yeɔ ebuaa wɔ saŋŋ koni wɔnu Yudafoi ashihilɛ lɛ shishi yɛ be mli ni Yesu shiɛɔ lɛ mli. Amɛkɛ saji ni akɛtoɔ saji ahe kɛha blema Hebri kɛ Biblia ŋmalɛ lɛ kasemɔ lɛ haa. Shi saji amlipɛimɔ he miihia Ŋshɔ ni Egbo Wolokpoi lɛ babaoo lolo. No hewɔ lɛ, abaanyɛ aná nileei heei lolo. Hɛɛ, afii ohai 20 lɛ mli shitsaa mli nibii ni aná ni fe fɛɛ lɛ yaa nɔ etéeɔ woloŋlelɔi kɛ Biblia kaselɔi fɛɛ amiishɛɛ shi lolo yɛ be mli ni wɔboteɔ afii ohai 21 lɛ mli lɛ.

[Hei ni Mfonirii ni yɔɔ baafa 7 lɛ Jɛ]

Qumran shitsaai: Pictorial Archive (Near Eastern History) Est.; niŋmaai: Courtesy of Shrine of the Book, Israel Museum, Jerusalem