Maŋtsɛyeli Jajelɔi Bɔ Amaniɛ

India—“Ekomefeemɔ yɛ Shihilɛi ní Yɔɔ Srɔto Mli”

“EKOMEFEEMƆ yɛ Shihilɛi ní Yɔɔ Srɔto Mli” ji sabala ko ni ale waa ni akɛtsuɔ nii kɛtsɔɔ maŋ futumɔ ni yɔɔ India lɛ. Ákɛ nine aaashɛ ekomefeemɔ nɔ yɛ nɛkɛ maŋ ni srɔtofeemɔ kpele yɔɔ kusum, wiemɔ, jamɔ, hewolonɔ su, hesaamɔ, kɛ niyenii mli lɛ ji nɔ ni bɛ mlɛo kwraa. Shi kɛlɛ, anaa ekomefeemɔ ni tamɔ enɛ yɛ Yehowa Odasefoi anɔkwɛmɔ gbɛjianɔtoo nitsumɔhe ni yɔɔ India lɛ mli, eyɛ mli moŋ akɛ nitsulɔi ni jɛ amɛsuɔmɔ mli amɛkɛ amɛhe eha ní yɔɔ jɛmɛ ní tsuɔ nii hu yɛ jɛmɛ lɛ jɛ maŋ lɛ mli maji babaoo kɛ shikpɔkukuji ni nɔyeli lɛ yeɔ nɔ kɛtsɔ gbɛjianɔtolɔ ko ni ehala nɔ lɛ amli ni amɛwieɔ wiemɔi srɔtoi babaoo.

• Nyɛhaa matsɔɔa mɔ ni Rajrani—ni ji oblayoo fioo ni jɛ Punjab, ni yɔɔ India kooyi-anaigbɛ lɛ naagbee gbɛ lɛ ji. Beni Rajrani yɔɔ skul lɛ, Yehowa Odasefoi kɛ eklasbii lɛ ateŋ mɔ kome bɔi Biblia lɛ kasemɔ. Oblayoo fioo nɛɛ bɔ mɔdɛŋ ni eha Rajrani aná Biblia lɛ he miishɛɛ. Akɛni eklasnyo lɛ Blɔfo shɛɛɛ shɔŋŋ ni Buu-Mɔɔ lɛ hu bɛ Punjabi wiemɔ mli yɛ nakai beaŋ hewɔ lɛ, lɛ hu ebi Rajrani yelikɛbuamɔ koni etsɔɔ wolo tɛtrɛɛ lɛ mli saji lɛ ashishi eha lɛ. Nɔ ni Rajrani kane yɛ Buu-Mɔɔ lɛ mli lɛ je shishi ebɔi hewalɛ ni mli wa namɔ yɛ enɔ aahu akɛ yɛ shitee-kɛ-woo fɛɛ ni efɔlɔi kɛba enɔ fɛɛ sɛɛ lɛ etee ehiɛ kɛyashɛ he ni ejɔɔ ewala nɔ eha Yehowa Nyɔŋmɔ. Ákɛ mɔ ni miisɔmɔ yɛ India Betel ŋmɛnɛ lɛ, efeɔ nɔ pɔtɛɛ ni gbele ehiŋmɛii kɛha anɔkwale lɛ nɔŋŋ. Etsɔɔ Kristofoi awoji lɛ ashishi kɛyaa Punjabi wiemɔ mli!

• Susumɔ Bijoe, mɔ ni jɛ India fã kroko lɛ—Kerala maŋ ni yɔɔ wuoyi-anaigbɛ lɛ hu he okwɛ. Ashwie Bijoe kɛjɛ nɔtsamɔ skul yɛ shidaamɔ ni ekɔ akɛ mɔ ni kɛ ehe woŋ maŋ saji amli yɛ be mli ni maŋhedɔɔ nifeemɔi yaa nɔ lɛ hewɔ. Kɛtsɔ sane ni sɛɛ gbala shi ni aye yɛ saneyelihe ní ba naagbee kɛ kunimyeli ni sa kadimɔ kɛha jamɔ krɔŋŋ lɛ sɛɛ lɛ, Bijoe ku sɛɛ etee skul ekoŋŋ.a Etsa nɔ kɛyashɛ kɔleji hu. Shi kɛlɛ, jeŋba shara shihilɛ ni yɔɔ jɛmɛ lɛ gba ehe nilee naa, no hewɔ lɛ eshi yɛ skulyaa be ni ato kɛha afi klɛŋklɛŋ fã lɛ mli. Amrɔ nɛɛ yɛ afii nyɔŋma sɛɛ yɛ Betel sɔɔmɔ mli lɛ, enuɔ he akɛ ená hesɛɛ babaoo kɛjɛ Betel weku ni jɛ shihilɛi ní yɔɔ srɔtoi amli ni efee ekome lɛ ateŋ mɔ ko ni eji lɛ mli, fe bɔ ni ebaaná kɛtsɔ woloŋlee ni yaa hiɛ ni abaatiu sɛɛ lɛ mli.

• Norma kɛ Lily fɛɛ eye fe afii 70 ni amɛkɛ afii babaoo ehi shi akɛ okulafoi. Amɛteŋ mɔ fɛɛ mɔ kɛ nɔ ni fe afii 40 ehi be-fɛɛ sɔɔmɔ nitsumɔ lɛ mli. Lily kɛ nɔ ni shɛɔ afii 20 etsu nii yɛ nitsumɔhe nine lɛ akɛ mɔ ni tsɔɔ Tamil wiemɔ lɛ shishi. Norma ba Betel afii 13 ni eho nɛ be mli ni ewu eje mli sɛɛ. Yɛ nitsulɔi ni kɛ ekãa kɛ henilee kpakpa tsuɔ nii he nɔkwɛmɔnɔ fɛfɛo ni amɛji lɛ sɛɛ lɛ, amɛji hewalɛ ni feɔ Betel weku muu lɛ fɛɛ ekome. Amɛnáa he miishɛɛ akɛ amɛaashɛje gbɔi amii, ni amɛnáa weku lɛ mli bii ni darako lɛ anaanyobɔɔ he miishɛɛ, amɛkɛ amɛ jaa miishɛɛ ni yɔɔ afii babaoo yɛ Kristofoi ashihilɛ mli lɛ. Ni oblahii kɛ oblayei lɛ toɔ najiaŋ kɛtsɔ amɛtsũi amli ni amɛfɔ̃ɔ amɛnine kɛyaa kɛha naanyobɔɔ kɛ yelikɛbuamɔ ni amɛkɛhaa kɛ́ hiamɔ lɛ ba lɛ. Eji nɔkwɛmɔnɔ fɛfɛo lɛɛlɛŋ!

Ákɛ mɛi ni eye béi ni kɛ naataamɔ kɛ gbeekpamɔ ni bɛ baa yɛ mɛi pii ateŋ lɛ nɔ lɛ, nɛkɛ nitsulɔi ni jɛ amɛsuɔmɔ mli amɛkɛ amɛhe eha nɛɛ kɛ miishɛɛ tsuɔ nii yɛ ekomefeemɔ mli koni amɛkɛsɔmɔ mɛi krokomɛi ákɛ India Betel weku lɛ mli bii ni efee ekome.—Lala 133:1.

[Shishigbɛ niŋmaa]

[He ni Mfoniri ni yɔɔ baafa 8 lɛ Jɛ]

Background: Mountain High Maps® Copyright © 1997 Digital Wisdom, Inc.