Miishɛɛ ni Ayɔɔ yɛ “Hetselɔi” Ahe yɛ Ŋmɛnɛŋmɛnɛ Beaŋ

“Ani okaiɔ be ni etamɔ nɔ ni ekaalɔi atã tsĩi je wɔtsine waa lɛ? Etamɔ nɔ ni no gbaaa Amerikabii akpekpei 4.2 ni kwɛ Mother Teresa yarafeemɔ yɛ Sept. 13 lɛ anaa. Kɛjɛ beni egbo yɛ Sept. 5 lɛ sɛɛ kɛbaa nɛɛ, mɛi kɛ nibimɔi egbá Vatican lɛ naa akɛ ájaje yɛ mla naa akɛ eji hetselɔ. Mɛi fioo ayiŋ feɔ amɛ kɔshikɔshi akɛ abaakpɛlɛ Nɔ.”—Sun-sentinel, United States, October 3, 1997.

MƐI babaoo buɔ Mother Teresa ni ji Katolik maŋsɛɛ sanekpakpa shiɛlɔ lɛ yelikɛbuamɔ ni ekɛha mɛi kɛ ejurɔfeemɔi lɛ akɛ eji anɔkwa hetselɔ ni aaaji lɛ kpojiemɔ. Mɛi yɛ ni yɔɔ ekãa ni ehe gbɛi yɛ jamɔi krokomɛi amli. Shi kɛlɛ, ekolɛ ayɔseko amɛ faŋŋ tamɔ mɛi ni Roma Katolik Sɔlemɔ lɛ ejaje akɛ amɛji hetselɔi lɛ.

Paapa John Paul II lɛ ekpɛlɛ mɛi ni miihe ashɛ 450 nɔ akɛ hetselɔi yɛ enɔyeli akɛ paapa lɛ mli, ni kɛ́ abua naa lɛ, no fa fe mɛi ayibɔ ni paapai krokomɛi fɛɛ ni hi shi yɛ afii ohai 20 lɛ mli lɛ ekpɛlɛ amɛnɔ akɛ hetselɔi lɛ.a Mɛni hewɔ akɛ hetuu-kɛhamɔ ni sɛɛ tsɛɔ tamɔ nɛkɛ haa “hetselɔi,” mɛi ni aleee amɛteŋ mɛi babaoo tsɔ yɛ Katolikbii ateŋ po lɛ?

Notre Dame University Nyɔŋmɔ jamɔ he nilelɔ Lawrence Cunningham tsɔɔ mli akɛ: “Susumɔ akɛ ekolɛ krɔŋkrɔŋfeemɔ yɛ je lɛ mli lɛ teeɔ gbɔmɛi amiishɛɛ shi. Yɔsemɔ ni ayɔseɔ akɛ hetselɔi yɛ lɛ tsɔɔ akɛ mɛi ni yɔɔ ekãa yɛ shihilɛ mli aaanyɛ ahi shi po ŋmɛnɛ.” Kɛfata he lɛ, akpɛlɛɔ nɔ akɛ “hetselɔi” kɛ Nyɔŋmɔ yɛ tsakpaa krɛdɛɛ ko, ni no haa amɛbafeɔ mlidamɔlɔi ni sa kɛha hiɛkalɔi lɛ. Kɛji ana “hetselɔ” ko heloonaa nibii loo gbɔmɔtso fãi komɛi ni eshwɛ lɛ, abuɔ enɛɛmɛi waa ni ayɛ hemɔkɛyeli akɛ hewalɛ jɛɔ amɛ mli.

The Catechism of the Council of Trent, ni akala yɛ afii ohai 16 lɛ mli koni asaa akɛma Katolik tsɔɔmɔ lɛ nɔ mi lɛ wo akpɔ akɛ: “Wɔsane ja akɛ wɔɔmu sane naa akɛ, woo nifeemɔ ni akɛhaa hetselɔi ‘ni ewɔ yɛ Nuŋtsɔ lɛ mli,’ bi ni abiɔ amɛ koni amɛdamɔ mli amɛha mɛi, kɛ bulɛ ni akɛhaa amɛkaimɔ nibii kɛ amɛ lamului lɛ baaa Nyɔŋmɔ anunyam lɛ shi yɛ gbɛ ko nɔ, shi moŋ eyeɔ ebuaa babaoo ni ehaa eyaa hiɛ, tamɔ bɔ ni ewoɔ Kristofonyo lɛ hiɛnɔkamɔ lɛ mli hewalɛ ni ewajeɔ lɛ lɛ, ni awoɔ Kristofonyo ko ni biɔ ni hetselɔi lɛ adamɔ mli aha lɛ lɛ hewalɛ koni ekase hetselɔi lɛ ajeŋba kpakpa lɛ.” (The Catechism of the Council of Trent, 1905) Yɛ anɔkwale mli lɛ, anɔkwa Kristofoi miisumɔ ni amɛba amɛjeŋ jogbaŋŋ, ni amɛbɛŋkɛ Nyɔŋmɔ yɛ gbɛ kpakpa nɔ, koni amɛnine ashɛ ŋwɛi yelikɛbuamɔ nɔ. (Yakobo 4:7, 8) No hewɔ lɛ, yɛ Nyɔŋmɔ Wiemɔ lɛ naa lɛ, namɛi ahe saa akɛ anɔkwa hetselɔi? Ni mɛɛ gbɛfaŋnɔ amɛtsuɔ he nii?

[Shishigbɛ niŋmaa]