Okɛ Bɔ ni Nyɔŋmɔ Susuɔ Nii Ahe Ehaa lɛ Asusu Saji Ahe

SEPTEMBER 14, 2002 ji hulutsoo gbi ko ni mli yɔɔ kulɔkulɔ yɛ New York, U.S.A. Mɛi babaoo ni ji mɛi 6,521 ni jɛ maji srɔtoi anɔ lɛ kpe nakai gbi lɛ yɛ Patterson Educational Center kɛ Yehowa Odasefoi atsũi wuji krokomɛi ni yɔɔ kpokpaa lɛ nɔ lɛ amli. Mɛi babaoo lɛ bua amɛhe naa kɛha Buu-Mɔɔ Biblia Gilead Skul lɛ klas ni ji 113 lɛ nikasemɔ naagbee nifeemɔ lɛ. Nikaselɔi lɛ jɛ shikpɔji 14 nɔ, ni amɛkɛ nyɔji enumɔ ni tsɔ hiɛ lɛ saa amɛhe kɛha maŋsɛɛ sanekpakpa shiɛmɔ nitsumɔ ni amɛkɛ amɛhe baawo mli yɛ maji 19 ni aha amɛ nitsumɔ yɛ mli lɛ.

Carey Barber ni kɛ aaafee afii 98 ehi wala mli, ni eji Yehowa Odasefoi a-Nɔyeli Kuu lɛ mlinyo lɛ fee sɛinɔtalɔ kɛha nifeemɔ lɛ. Egbala jwɛŋmɔ kɛtee nɔ ni miihe ashɛ afii 60 gboshinii ni ji Gilead Skul ní eye ebua mɛi akpei abɔ koni amɛya maŋsɛɛ shikpɔji anɔ kɛha sanekpakpa shiɛmɔ lɛ nɔ. Nyɛminuu Barber kɛɛ akɛ: “Kɛ akɛɛ akɛ sɛɛnamɔi wuji ejɛ tsɔsemɔ ni atee nɔ akɛha amɛ lɛ mli kɛba lɛ, ejeee nɔ ko ni akɛmiiwo nii ahe. Mɛi ohai abɔ ni amɛji mɛi ni he jɔ ni yɔɔ shikpɔŋ nɔ he fɛɛ he lɛ ejɔɔ amɛwala nɔ amɛha Yehowa ni amɛkɛ amɛhe ewo enɔkwa jamɔ kɛ sɔɔmɔ krɔŋŋ lɛ mli yɛ yelikɛbuamɔ ni maŋsɛɛ sanekpakpa shiɛlɔi ni átsɔse amɛ lɛ kɛha amɛ lɛ hewɔ.”

Dani nikaselɔi lɛ aaaya Gilead lɛ, no mli lɛ amɛteŋ mɛi babaoo ejie miishɛɛ ni amɛyɔɔ akɛ amɛaalɛɛ amɛsɔɔmɔ nitsumɔ lɛ mli lɛ kpo. Nyɛmi nuu ko kɛ eŋa kɛ nɔ ni fa fe afi kome kase Mandarin wiemɔ lɛ bɔni afee ni amɛnine ashɛ kuu wulu ko ni ji Chinabii ni yɔɔ he ni amɛshia yɔɔ yɛ Canada lɛ anɔ. Nyɛmi nuu kroko hu kɛ eŋa bɔi Albania wiemɔ kasemɔ amɛ diɛŋtsɛ, ni yɛ naagbee lɛ amɛfã kɛtee Albania koni amɛyatsu Biblia lɛ mli miishɛɛnamɔ ni yaa hiɛ yɛ jɛmɛ lɛ he nii. Mɛi krokomɛi hu ni yɔɔ klas lɛ mli lɛ jɛ Hungary, Guatemala, kɛ Dominican Republic amɛba Gilead, ni nomɛi nɔŋŋ ji shikpɔji ni amɛtee nɔ koni amɛyasɔmɔ yɛ he ni Nyɔŋmɔ Wiemɔ lɛ tsɔɔlɔi ahe hiaa waa yɛ lɛ.

Agbɛnɛ, dani nikaselɔi ni gbeɔ nikasemɔ naa lɛ baashi kɛya nitsumɔ ni akɛwo amɛdɛŋ yɛ Afrika, Europa Bokagbɛ, Amerika Teŋgbɛ kɛ Wuoyigbɛ, kɛ Bokagbɛ Shɔŋŋ lɛ mli lɛ, awo amɛ fɛɛ hewalɛ koni amɛsusu Nyɔŋmɔ he yɛ nɔ fɛɛ nɔ ni amɛfeɔ lɛ mli.

Susumɔ Saji Ahe yɛ Bɔ ni Nyɔŋmɔ Susuɔ Nii Ahe Ehaa lɛ Naa

Yɛ Nyɛminuu Barber shishijee wiemɔ lɛ sɛɛ lɛ, etsɛ́ Maxwell Lloyd ni eji United States Nitsumɔhe Nine Ajinafoi Akuu lɛ mli bii lɛ ateŋ mɔ kome lɛ. Ema saneyitso ni ji “Okɛ Bɔ ni Nyɔŋmɔ Susuɔ Nii Ahe Ehaa lɛ Asusu Saji Fɛɛ He” lɛ nɔ mi. Nyɛminuu Lloyd gbala jwɛŋmɔ kɛtee David kɛ Nyɔŋmɔ Bi Yesu lɛ nɔkwɛmɔnii lɛ anɔ. (1 Samuel 24:6; 26:11; Luka 22:42) Beni wielɔ lɛ ekai nikaselɔi lɛ akɛ, nyɔji enumɔ ni amɛkɛkase Biblia lɛ eha amɛná tsɔsemɔ ni tsɔɔ bɔ ni esa akɛ amɛkɛ bɔ ni Nyɔŋmɔ susuɔ nii ahe ehaa lɛ asusu nii ahe lɛ sɛɛ lɛ, ebi akɛ: “Kɛ nyɛkɛ mɛi miifee Biblia mli nikasemɔ yɛ nyɛnitsumɔ hee lɛ mli lɛ, ani nyɛbaaye nyɛbua amɛ koni amɛsusu saji ahe yɛ bɔ ni Nyɔŋmɔ susuɔ nii ahe ehaa lɛ naa?” Agbɛnɛ, yɛ nɔ ni kɔɔ mɛi krokomɛi aŋaawoo he lɛ, ewo nikaselɔi lɛ ŋaa akɛ: “Kaakɛɛ akɛ, ‘Yɛ misusumɔ naa lɛ, minuɔ he akɛ . . . ’ Shi moŋ, ye obua amɛ ni amɛnu nɔ ni ji Nyɔŋmɔ susumɔ lɛ shishi. Kɛ onyiɛ nifeemɔ ni tamɔ nɛkɛ sɛɛ lɛ, obaatsɔ jɔɔmɔ diɛŋtsɛ oha mɛi ni okɛbɔɔ yɛ onitsumɔ lɛ mli lɛ.”

No sɛɛ lɛ, Gerrit Lösch, ni ji Nɔyeli Kuu lɛ mlinyo lɛ ji mɔ ni bawie yɛ nifeemɔ lɛ mli. Beni ewieɔ saneyitso ni ji “Mikɛo Yɛ” lɛ he lɛ, egbala jwɛŋmɔ kɛtee bei srɔtoi babaoo ni Yehowa kɛɛ enɔkwa sɔɔlɔi lɛ akɛ, “mikɛo yɛ” lɛ nɔ. (1 Mose 26:23, 24; 28:15; Yoshua 1:5; Yeremia 1:7, 8) Wɔbaanyɛ wɔná nakai hekɛnɔfɔɔ lɛ nɔŋŋ yɛ Yehowa mli yɛ wɔgbii nɛɛ amli, kɛ́ wɔtee nɔ wɔye anɔkwa. Nyɛminuu Lösch tsɔɔ mli akɛ: “Ani ohaoɔ kɛji obaaná mɛi ni okɛ amɛ baakase Biblia lɛ lo? Kaimɔ akɛ, Yehowa kɛɛ akɛ, ‘mikɛo yɛ.’ Ani ohaoɔ yɛ heloonaa nii babaoo ni osumɔɔ akɛ oná lɛ he? Yehowa kɛɛ: ‘Mishiŋo ni misaa mikwaŋo gbi ko gbi ko.’ ” (Hebribii 13:5) Nyɛminuu Lösch mu wiemɔ lɛ naa kɛtsɔ nikaselɔi lɛ ni ekai amɛ akɛ Yesu wo shi akɛ ekɛ enɔkwa sɛɛnyiɛlɔi lɛ baahi shi yɛ kaselɔ feemɔ nitsumɔ lɛ mli lɛ nɔ.—Mateo 28:20.

Gilead nitsɔɔlɔ Lawrence Bowen saneyitso lɛ ji, “Ani Obaafee Shweshweeshwe yɛ La ni Tsoɔ lɛ Mli?” Etsɔɔ mli akɛ, yɛ saji ni atée lɛ shi yɛ Eden lɛ hewɔ lɛ, mɛi fɛɛ ni sumɔɔ koni amɛtuu amɛhe amɛha Yehowa kome too pɛ lɛ, kɛ shihilɛi ni mli wawai ekpe, ni yɛ bei komɛi amli lɛ eji kaai ni tamɔ la ni tsoɔ. Ewo nikaselɔi ni gbeɔ nikasemɔ naa lɛ hewalɛ koni amɛnyiɛ Yesu nɔkwɛmɔnɔ lɛ sɛɛ, mɔ ni fee shweshweeshwe jogbaŋŋ diɛŋtsɛ kɛtsɔ ehe ni ekɛfɔ Yehowa nɔ kwraa kɛmɔ shi ni ekpɛlɛ kaai ni tamɔ la ni tsoɔ ni Yehowa ŋmɛ gbɛ lɛ nɔ koni ekɛha toiboo ni e-Bi lɛ feɔ lɛ aye emuu lɛ. (Hebribii 5:8, 9) Abaanyɛ akɛ Yehowa ato shika tsuulɔ ni kɛ dɔlɛ pɛ ni sa jogbaŋŋ jieɔ muji lɛ he. Yɛ anɔkwale mli lɛ, hemɔkɛyeli ni akɛ la eka ekwɛ lɛ kɛ shweshweeshwefeemɔ babaoo diɛŋtsɛ haa fe shika ni atsuu he. Mɛni hewɔ? Nyɛminuu Bowen kɛɛ akɛ: “Hemɔkɛyeli ni atsuu he lɛ baanyɛ adamɔ nɔnyɛɛ fɛɛ nɔnyɛɛ naa, ni ewajeɔ wɔ koni wɔŋmɛ wɔtsui shi aahu ‘kɛyawula shi.’”—Mateo 24:13.

Gilead nitsɔɔlɔ kroko hu ni ji Mark Noumair bi akɛ: “Ani Abaasumɔ Osane?” Ewiemɔ lɛ yitso lɛ damɔ 1 Samuel 2:26 lɛ mli wiemɔi, ni wie Samuel he akɛ “esa Yehowa kɛ gbɔmɛi fɛɛ hiɛ hu” lɛ nɔ. Beni Nyɛminuu Noumair ni kɛ nɔ ni fe afii nyɔŋma etsu nii yɛ maŋsɛɛ sanekpakpa shiɛmɔ nitsumɔ lɛ mli yɛ Afrika lɛ ewie Samuel nɔkwɛmɔnɔ lɛ he lɛ, ekɛɛ akɛ: “Bo hu obaanyɛ ofee mɔ ni sa Nyɔŋmɔ hiɛ kɛtsɔ nitsumɔ ni Nyɔŋmɔ kɛha bo koni otsu lɛ ni okɛ anɔkwayeli aaakpɛtɛ he lɛ nɔ. Ekɛ maŋsɛɛ sanekpakpa shiɛmɔ nitsumɔ ko ni jara wa eha bo.” Kɛkɛ ni Nyɛminuu Noumair wo klas ni gbeɔ nikasemɔ naa lɛ hewalɛ koni amɛbu amɛnitsumɔi lɛ akɛ nitsumɔ krɔŋkrɔŋ ni Nyɔŋmɔ etuu ewo amɛdɛŋ ni amɛkɛ Nyɔŋmɔ susumɔ atsu nii kɛtsu amɛnitsumɔi lɛ ahe nii.

Beni skul lɛ yaa nɔ lɛ, nikaselɔi lɛ ná hegbɛi babaoo yɛ otsii lɛ anaagbeei amli ni amɛgba mɛi ni yɔɔ akutso lɛ mli lɛ “Nyɔŋmɔ niwuji lɛ” ni atsɔɔ yɛ Biblia lɛ mli lɛ ahe sane. (Bɔfoi lɛ Asaji 2:11) Yɛ anɔkwale mli lɛ, amɛnyɛ amɛwie nɛkɛ nibii nɛɛ ahe yɛ wiemɔi srɔtoi nyɔŋma mli. Wallace Liverance ni ji Gilead nitsɔɔlɔ kroko hu kɛ nikaselɔi akuu ko gba sane, ni ebi amɛ saji, ni amɛgba amɛ niiashikpamɔi, be mli ni asusuɔ saneyitso ni ji “‘Nyɔŋmɔ Niwuji Lɛ’ Tsirɛ Mɛi Kɛha Nifeemɔ” lɛ he lɛ. Ekɛɛ akɛ: “Mumɔ lɛ tsirɛ mɛi ni yɔɔ ŋwɛitsu lɛ nɔ yɛ Pentekoste lɛ koni amɛwie ‘Nyɔŋmɔ niwuji lɛ’ ahe. Nakai mumɔ lɛ nɔŋŋ tsuɔ nii ŋmɛnɛ yɛ Nyɔŋmɔ anɔkwa sɔɔlɔi fɛɛ amli.” Mɛi komɛi hu ená kanyamɔ koni amɛkase wiemɔi heei kɛ yiŋtoo ni ma amɛhiɛ akɛ koni amɛye mɛi krokomɛi babaoo hu odase.

Ŋaawoo Kpakpa ni Akɛaasusu Saji Ahe yɛ Nyɔŋmɔ Susumɔ Naa

Yɛ shishijee wiemɔi lɛ asɛɛ lɛ, Gary Breaux kɛ William Young ni amɛji United States nitsumɔhe nine lɛ nitsulɔi lɛ amli bii lɛ kɛ nitsumɔhe niji ajinafoi akui srɔtoi ni yɔɔ shikpɔji ni maŋsɛɛ sanekpakpa shiɛlɔi sɔmɔɔ yɛ nɔ amrɔ nɛɛ lɛ kɛ agbɛnɛ nyɛmi nuu ko kɛ eŋa ni amɛkɛ afii 41 ehi maŋsɛɛ sanekpakpa shiɛmɔ nitsumɔ lɛ mli lɛ gba sane. Nɔ ko ni awie ji akɛ: “Mɛi ni sumɔɔ ni amɛná nɔ ko fioo ko lɛ hiɔ shi amɛtsɛɔ. Amɛgbalaa amɛjwɛŋmɔ kɛyaa yiŋtoo hewɔ ni amɛba lɛ nɔ. Amɛle akɛ amɛba koni amɛbashiɛ sanekpakpa lɛ ni amɛye amɛbua mɛi koni amɛbale Yehowa.”

David Splane ni ji Nɔyeli Kuu lɛ mlinyo kroko hu lɛ, mu nifeemɔ lɛ naa kɛ wiemɔ ni yitso ji “Jeee Shɔŋŋ Nyɛyaa!” Te ekɛ nakai tsɔɔ tɛŋŋ, yɛ anɔkwale ni eji akɛ aatsu mɛi 46 ni gbeɔ nikasemɔ naa amrɔ nɛɛ lɛ kɛmiiya shikpɔji ni yɔɔ jeŋ fɛɛ lɛ anɔ lɛ? Etsɔɔ mli akɛ: “Obaahi Nyɔŋmɔ we lɛ be fɛɛ be shii abɔ ni oyeɔ anɔkwa, ni he ni oyɔɔ yɛ shikpɔŋ nɔ lɛ kɔɔɔ he eko.” Hɛɛ, anɔkwa Kristofoi fɛɛ miisɔmɔ yɛ Nyɔŋmɔ mumɔŋ sɔlemɔwe kpeteŋkpele lɛ mli he ko, loo ewe lɛ ni ba shihilɛ mli yɛ Yesu baptisimɔ be lɛ mli yɛ klɛŋklɛŋ afii oha lɛ mli lɛ, ni he ni amɛyɔɔ diɛŋtsɛ lɛ kɔɔɔ he eko. (Hebribii 9:9) Kwɛ miishɛjemɔ ni eji kɛha mɛi ni eba lɛ akɛ amɛaale akɛ Yehowa bɛŋkɛɔ enɔkwa sɔɔlɔi fɛɛ ni yɔɔ shikpɔŋ lɛ nɔ! Tamɔ bɔ ni Yehowa yɔɔ Yesu he miishɛɛ beni eyɔɔ shikpɔŋ nɔ lɛ, nakai nɔŋŋ E-náa wɔ fɛɛ kɛ sɔɔmɔ ni wɔkɛhaa Lɛ lɛ he miishɛɛ, ni he ni ekolɛ wɔyɔɔ lɛ kɔɔɔ he eko. No hewɔ lɛ, yɛ nɔ ni kɔɔ jamɔ he saji ahe lɛ, wɔkɛ wɔteŋ mɔ fɛɛ mɔ kɛ Yehowa kɛ Yesu teŋ jɛkɛɛɛ kwraa.

Yɛ ŋamɔi ni nine shɛ nɔ kɛjɛ je lɛŋ hei srɔtoi lɛ nɔkpɛlɛmɔ sɛɛ lɛ, nitsumɔi ahe adafitswaa, kɛ woloŋmaa ni klasbii lɛ kane ni tsɔɔ hiɛsɔɔ ni amɛyɔɔ kɛha tsɔsemɔ ni amɛnine shɛ nɔ yɛ Gilead lɛ sɛɛ lɛ, sɛinɔtalɔ lɛ kɛ nifeemɔ lɛ ba naagbee yɛ omanyeyeli mli. Ewo maŋsɛɛ sanekpakpa shiɛlɔi heei lɛ hewalɛ koni amɛya nɔ amɛtsu amɛnitsumɔ kpakpa lɛ ni amɛmli afili amɛ yɛ Yehowa sɔɔmɔ mli.—Filipibii 3:1.

[Akrabatsa ni yɔɔ baafa 23]

KLASBII LƐ AHE SAJI

Maji srɔtoi anɔ ni amɛjɛ kɛba: 14

Maji srɔtoi anɔ ni aha amɛ nitsumɔ yɛ mli: 19

Nikaselɔi lɛ ayifalɛ: 46

Afii abɔ ni amɛye lɛ mlijaa: 35.0

Afii abɔ ni amɛkɛhi anɔkwale lɛ mli lɛ mlijaa: 17.2

Afii abɔ ni amɛkɛsɔmɔ kɛ amɛbe fɛɛ mlijaa: 13.7

[Mfoniri ni yɔɔ baafa 24]

Buu Mɔɔ Biblia Gilead Skul Klasbii ni Ji 113 ni Gbe Nikasemɔ Naa

Gbɛii ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛgbɛ kɛyaa sɛɛgbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔgbɛ.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.