Ani He Ni Akɛwooo Maŋkwramɔŋ Saji Amli Lɛ Tsĩɔ Kristofoi Asuɔmɔ Naa?

KRISTOFONYO ni mɔ ko aaaji lɛ biɔ babaoo fe Biblia lɛ kanemɔ, sɔlemɔ, kɛ lalai alamɔ yɛ Hɔgbaa. Etsɔɔ nibii ni afeɔ ahaa Nyɔŋmɔ kɛ gbɔmɛi fɛɛ. Biblia lɛ kɛɔ akɛ: “Nyɛkahaa wɔsumɔa mɛi yɛ wiemɔ mli loo lilɛi nɔ kɛkɛ, shi moŋ yɛ nitsumɔ kɛ anɔkwale mli.” (1 Yohane 3:18) Yesu kɛ anɔkwayeli susu mɛi krokomɛi ahe, ni Kristofoi miisumɔ akɛ amɛkase lɛ. Bɔfo Paulo wo nanemɛi heyelilɔi ahewalɛ koni ‘amɛteke nɔ yɛ Nuŋtsɔ lɛ nitsumɔ lɛ mli’ daa nɛɛ. (1 Korintobii 15:58) Shi mɛni ji Nuŋtsɔ lɛ nitsumɔ lɛ? Ani nɔ ni fata he ji mɔdɛŋ ni abɔɔ koni atsake nɔyeli gbɛjianɔtoo, koni ohiafoi kɛ mɛi ni naa nɔ lɛ aná he sɛɛ? Ani no ji nɔ ni Yesu fee?

Eyɛ mli akɛ mɛi wo Yesu hewalɛ koni efee nakai moŋ, shi ekpoo akɛ ekɛ ehe aaawo maŋkwramɔŋ saji amli loo ni eeefi fã ko sɛɛ. Ekpoo hewalɛ ni Satan kɛha lɛ yɛ shikpɔŋ lɛ nɔ maŋtsɛyelii fɛɛ anɔ lɛ, ekpɛlɛɛɛ ni agbalaa lɛ awoɔ naataamɔ ni kɔɔ toowoo he lɛ mli, ni egbala ehe shi beni kuu ko ni ehé gbɛi waa lɛ mli bii taoɔ akɛ amɛwo lɛ maŋtsɛ lɛ. (Mateo 4:8-10; 22:17-21; Yohane 6:15) Shi ehe ni ekɛwooo maŋkwramɔŋ saji amli lɛ etsiii enaa koni ekatsu nii ni he baaba sɛɛnamɔ kɛha mɛi krokomɛi.

Yesu kɛ ejwɛŋmɔ ma nɔ ni baaha ehi kɛha mɛi krokomɛi kɛya naanɔ lɛ nɔ. Eyɛ mli akɛ mɛi akpei enumɔ ni elɛ amɛ lɛ, kɛ tsamɔ ni etsa mɛi ni he yeɔ lɛ ha mɛi fioo ná hejɔlɛ yɛ be kukuoo ko mli moŋ, shi enitsɔɔmɔ lɛ kɛ naanɔ jɔɔmɔi bahaa adesai fɛɛ. Aleee Yesu akɛ mɔ ni toɔ yelikɛbuamɔ nibii ahe nibii ahe gbɛjianɔ, shi moŋ ale lɛ kɛkɛ akɛ “Tsɔɔlɔ lɛ.” (Mateo 26:18; Marko 5:35; Yohane 11:28) Ewie akɛ: “Enɛ hewɔ afɔ́ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase.”—Yohane 18:37.

Nɔ ko ni Hi Fe Maŋkwramɔŋ Saji ní Aaashiɛ

Anɔkwale lɛ ni Yesu tsɔɔ lɛ jeee maŋkwramɔŋ tsɔɔmɔi. Shi moŋ ekɔɔ Maŋtsɛyeli ni lɛ diɛŋtsɛ ebaafee enɔ Maŋtsɛ lɛ he. (Luka 4:43) Nɛkɛ Maŋtsɛyeli nɛɛ ji ŋwɛi nɔyeli, ni ebaaye adesai agbɛjianɔtoo fɛɛ anajiaŋ, ni ekɛ naanɔ toiŋjɔlɛ baaha adesai. (Yesaia 9:5, 6; 11:9; Daniel 2:44) No hewɔ lɛ eji adesai ahiɛnɔkamɔ kome pɛ. Ani hiɛnɔkamɔ ni yɔɔ diɛŋtsɛ ni tamɔ nɛkɛ ni ajajeɔ fe ni aaawo mɛi ahewalɛ ni amɛkɛ amɛhiɛ afɔ̃ gbɔmɛi anɔ kɛha wɔsɛɛ be ni yɔɔ shweshweeshwe lɛ etsɔɔɔ suɔmɔ babaoo ni ajieɔ lɛ kpo atsɔɔ? Biblia lɛ kɛɔ akɛ: “Nyɛkaŋɔa nyɛhiɛ nyɛfɔa lumɛi loo gbɔmɔ bi ko ní yelikɛbuamɔ ko bɛ edɛŋ lɛ nɔ. Kɛ́ emumɔ je emli lɛ, ekuɔ esɛɛ kɛyaa esũ lɛ mli ekoŋŋ; nakai gbi lɛ nɔŋŋ eyiŋtoi laajeɔ. Ajɔɔ mɔ ni Yakob Mawu lɛ ji ebualɔ, ní ehiɛ kã Yehowa, e-Nyɔŋmɔ lɛ, nɔ lɛ.” (Lala 146:3-5) No hewɔ lɛ, yɛ nɔ najiaŋ ni Yesu aaatsu ekaselɔi lɛ koni amɛyashiɛ gbɛ ko ni hi ni atsɔɔ nɔ atoɔ nɔyelii ahe gbɛjianɔ lɛ, etsɔɔ ekaselɔi lɛ koni amɛshiɛ “maŋtsɛyeli lɛ he sanekpakpa” lɛ.—Mateo 10:6, 7; 24:14.

Belɛ, enɛ ji “Nuŋtsɔ lɛ nitsumɔ lɛ” ni akɛwo Kristofoi shiɛlɔi adɛŋ akɛ amɛtsu lɛ. Akɛni aabi koni Nyɔŋmɔ Maŋtsɛyeli lɛ shishibii lɛ asumɔ amɛhe hewɔ lɛ, Maŋtsɛyeli lɛ baaye omanye yɛ ohia ni ebaajie kɛya kwraa lɛ mli, kɛtsɔ adesai anibii ni amɛyɔɔ lɛ ni amɛbaaja lɛ pɛpɛɛpɛ lɛ nɔ. (Lala 72:8, 12, 13) Sanekpakpa ni esa akɛ ashiɛ nɛ.

Ato Yehowa Odasefoi ahe gbɛjianɔ ŋmɛnɛ kɛha “Nuŋtsɔ lɛ nitsumɔ lɛ” yɛ shikpɔji 235 nɔ. Yɛ Yesu famɔ lɛ kɛ gbeekpãmɔ naa lɛ, amɛjieɔ bulɛ kpo amɛtsɔɔ nɔyelii lɛ fɛɛ. (Mateo 22:21) Shi amɛfeɔ toiboo hu amɛhaa Yesu wiemɔi nɛɛ ni ekɛha sɛɛnyiɛlɔi lɛ akɛ: “Nyɛjɛɛɛ je lɛŋ, shi mi moŋ mihala nyɛ kɛjɛ je lɛŋ lɛ.”—Yohane 15:19.

Beni Mɛi komɛi ni tsutsu ko lɛ amɛkɛ amɛhe woɔ maŋkwramɔŋ saji amli lɛ kase Biblia lɛ jogbaŋŋ yɛ sɛɛ mli lɛ, amɛkpa nakai feemɔ. Italianyo maŋkwralɔ ko ni ji Catholic Action, ni ji gbɛjianɔtoo ko ni jamɔ kudɔɔ lɛ lɛ mlinyo lɛ kɛɛ akɛ: “Mikɛ mihe yawo maŋkwramɔŋ saji amli, kɛ yiŋtoo akɛ esa akɛ mɔ atsu nɔ ko diɛŋtsɛ yɛ maŋkwramɔŋ kɛ maŋ saji amli.” Beni ekpa enitsumɔ akɛ maŋtiase nɔkwɛlɔ bɔni afee ni eshiɛ Nyɔŋmɔ Maŋtsɛyeli lɛ akɛ Yehowa Odasefoi lɛ ateŋ mɔ kome lɛ, etsɔɔ nɔ hewɔ ni mɛi ni kɛ amɛhe woɔ maŋkwramɔŋ nifeemɔi amli kɛ jwɛŋmɔ kpakpa lɛ amɔdɛŋbɔɔ lɛ feɔ yaka lɛ mli. “Jeee mɔdɛŋ ni mɛi ni hiɛ jeŋba kpakpa lɛ ebɔko akɛ amɛaaha shihilɛ lɛ ahi hewɔ je lɛ yɛ bɔ ni eyɔɔ lɛ, shi moŋ nibii fɔji ni mɛi babaoo feɔ lɛ yeɔ mɛi ni kɛ anɔkwayeli bɔɔ mɔdɛŋ koni aná shihilɛ kpakpa lɛ anɔ.”

He ni akɛwooo maŋkwramɔŋ saji amli bɔni afee ni ashiɛ adesai ahiɛnɔkamɔ kome pɛ lɛ, etsiii anɔkwa Kristofoi anaa kɛjɛɛɛ yelikɛbuamɔ ni amɛkɛbaaha mɛi krokomɛi lɛ he. Mɛi ni amɛyeɔ kɛbuaa amɛ koni amɛbatsɔmɔ Nyɔŋmɔ Maŋtsɛyeli lɛ shishibii lɛ feɔ tsakemɔi yɛ amɛsubaŋi ni kpataa mɔ hiɛ lɛ mli, koni amɛjie bulɛ kpo amɛtsɔɔ nɔyelɔi, koni amɛha amɛ weku shihilɛ aya hiɛ, kɛ agbɛnɛ lɛ ni amɛŋmɛ pɛpɛɛpɛ yɛ bɔ ni amɛkwɛɔ heloonaa ninamɔ amɛhaa lɛ mli. Nɔ ni he hiaa fe fɛɛ lɛ, Yehowa Odasefoi yeɔ amɛbuaa mɛi koni amɛná amɛkɛ Nyɔŋmɔ teŋ wekukpaa ni yɔɔ gbagbalii mli ŋɔɔmɔ.

Mɛi ni shiɛɔ Nyɔŋmɔ Maŋtsɛyeli lɛ he sanekpakpa lɛ ahe baa sɛɛnamɔ kɛhaa amɛkutsoŋbii. Shi nɔ ni fe fɛɛ lɛ, amɛyeɔ amɛbuaa gbɔmɛi koni amɛkɛ amɛhiɛ afɔ nɔyeli ko ni yɔɔ diɛŋtsɛ, ni kɛ toiŋjɔlɛ ni hiɔ shi daa baaha mɛi fɛɛ ni sumɔɔ Nyɔŋmɔ lɛ nɔ. Akɛni Kristofoi nɛɛ kɛ amɛhe wooo maŋkwramɔŋ saji amli hewɔ lɛ, amɛjɛɔ suɔmɔ mli amɛkɛ yelikɛbuamɔ ni sɛɛ tsɛɔ fe fɛɛ ni anyɛɔ atsuɔ he nii haa ŋmɛnɛ.

[Akrabatsa/Mfoniri ni yɔɔ baafa 7]

Mikpa Mihe kɛ Maŋkwramɔŋ Saji Amli Woo ni Mibɔi Nyɔŋmɔ Maŋtsɛyeli lɛ Shiɛmɔ

Átila kase Nyɔŋmɔ jamɔ he nitsɔɔmɔ ni biɔ ni aye he kɛjɛ naagbai amli lɛ he nii kɛjɛ osɔfo ni tsɔɔ lɛ nii yɛ Belém, Brazil lɛ ŋɔɔ beni eji gbekɛ nuu lɛ. Enáa he miishɛɛ kɛji akɛ enu ni aawie akɛ adesai baaye amɛhe kɛjɛ nɔnaa mli be ko, ni no hewɔ lɛ ekɛ ehe yabɔ kuu ko ni taoɔ ni amɛkɛ tsakemɔ aba lɛ he, ni ekase bɔ ni atoɔ shi ni afoɔ kɛwieɔ ashiɔ nii kɛ kpo ni akpoɔ akɛ abaafee toiboo aha maŋ mla, bɔni afee ni ekɛ tsakemɔ aba lɛ he nii.

Shi Átila náa he miishɛɛ hu akɛ ekɛ wolo ni ahã lɛ ni ji Tsɔɔlɔ Kple lɛ Toibooa lɛ baatsɔɔ gbekɛbii ni yɔɔ kuu nɛɛ mli lɛ anii. Wolo lɛ tsɔɔ jeŋba kpakpa kɛ toiboo ni afeɔ ahaa nɔyelɔi. Enɛ ha Átila susu nɔ hewɔ ni mɛi ni fiɔ Nyɔŋmɔ jamɔ he nikasemɔ ni biɔ koni aye he kɛjɛ naagbai amli lɛ sɛɛ lɛ enyiɛɛɛ Yesu jeŋba he mlai ni nɔ kwɔlɔ lɛ asɛɛ lɛ he, kɛ nɔ hewɔ ni mɛi komɛi ahiɛ kpaa mɛi ni awaa amɛyi lɛ anɔ kɛ́ amɛnine shɛ nɔyeli hegbɛi anɔ lɛ. Etsi ehe kɛjɛ kuu lɛ he. Sɛɛ mli lɛ Yehowa Odasefoi yasara lɛ ni amɛkɛ lɛ gba sane ni kɔɔ Nyɔŋmɔ Maŋtsɛyeli lɛ he. Etsɛɛɛ ni ebɔi Biblia lɛ kasemɔ, ni ekase nɔ ni kɔɔ anɔkwa tsabaa kɛha nɔnyɛɛ ni baa adesai anɔ lɛ he nii.

Átila tee Katolik kpee ko ni afee ni kɔɔ jamɔ kɛ maŋkwramɔŋ Saji ahe lɛ hu shishi beni ekaseɔ Biblia lɛ. Tsɔɔlɔi lɛ tsɔɔ mli akɛ “jamɔ kɛ maŋkwramɔŋ saji ji gbɛ̀i srɔtoi enyɔ ni atsɔɔ nɔ atsuɔ sane kometoo lɛ he nii.” Etee kpee yɛ Maŋtsɛyeli Asa lɛ hu nɔ. Mɛɛ srɔtofeemɔ po nɛ! Nɔ kome ji akɛ, onaaa akɛ aashɛre tawa, aanu dãa, loo akɛ wiemɔi ni he tseee miitsu nii yɛ jɛmɛ. Ekpɛ eyiŋ akɛ ebaafata amɛhe yɛ amɛshiɛmɔ nitsumɔ lɛ mli, ni etsɛɛɛ ni abaptisi lɛ. Amrɔ nɛɛ ebaanyɛ ena nɔ hewɔ ni Nyɔŋmɔ jamɔ he nikasemɔ ni biɔ ni aye he kɛjɛ naagbai amli lɛ jeee tsabaa kɛha ohiafoi anaagbai lɛ.

[Shishigbɛ niŋmaa]

[Mfonirii ni yɔɔ baafa 6]

Kristofoi sɔɔlɔi ahe ni amɛkɛwooo maŋkwramɔŋ saji amli lɛ etsiii amɛnaa koni amɛkaye amɛbua mɛi krokomɛi