Russia Wojiatoohe Ni Etsɛ Fe Fɛɛ lɛ Ye Bua ni Biblia lɛ Mli ‘Saji Fee Faŋŋ’

NILELƆI enyɔ komɛi fã gbɛ kɛ yiŋtoo akɛ amɛyaatao blema Bibliai ni akɛ niji ŋmala. Amɛteŋ mɔ fɛɛ mɔ fã gbɛ kɛyanyiɛ shia ŋai anɔ, ni amɛyakpa tɛkploi amli, mɔ kome shihilɔi ashihilɛhei kɛ tɛsaai komɛi ni blemabii hi mli lɛ amli kɛmiitao woji nɛɛ. Afii komɛi asɛɛ lɛ, woji nɛɛ ataomɔ kɛ amɛ tee Russia maŋbii awojiatoohe ni etsɛ fe fɛɛ lɛ, ni jɛmɛ ji he ni Bibliai ni akɛ niji ŋmala ní anya he fe ekrokomɛi fɛɛ ni ale yɛ je lɛŋ lɛ ekomɛi yɔɔ. Namɛi ji nilelɔi nɛɛ? Te eba lɛ tɛŋŋ ni woji ni he yɔɔ sɛɛnamɔ ni amɛyana yɛ Russia lɛ yaje jɛmɛ?

Blema Bibliai ní akɛ Niji Ŋmala lɛ Fãa Nyɔŋmɔ Wiemɔ lɛ He

Nilelɔi nɛɛ ateŋ mɔ kome hi shi yɛ afi 1800 afii lɛ amli, ni yɛ no beaŋ lɛ, tsakemɔi komɛi miiya nɔ yɛ Europa yɛ woloŋlee gbɛfaŋ. Eji be ní aná hiɛyaa babaoo yɛ jeŋnilee kɛ kusum nifeemɔi amli, ní no ha mɛi ayiŋ fee amɛ enyɔnyɔɔnyɔ yɛ blema saji ahe. Mɛi ni wieɔ shiɔ Biblia lɛ bɔ mɔdɛŋ koni amɛba hewalɛ ni enaa yɛ mɔ nɔ lɛ shi. Yɛ anɔkwale mli lɛ, woloŋlelɔi komɛi je ŋwane po akɛ saji ni yɔɔ Biblia lɛ mli lɛ ejaaa.

Anɔkwafoi komɛi ní fãa Biblia lɛ he lɛ yɔse akɛ blema Bibliai ni akɛ niji ŋmala ní anako hei ni amɛyɔɔ lɛ ji nɔ ni baafã Nyɔŋmɔ Wiemɔ lɛ he, ni nomɛi baaha anɔkwale ni emli saji lɛ ji lɛ afee faŋŋ. Kɛji nine baanyɛ ashɛ blema Bibliai ni akɛ niji ŋmala ni etsɛ fe nɔ ni yɔɔ ŋmɛnɛ lɛ anɔ lɛ, no baaha ana bɔ ni Biblia lɛ mli saji ja ha lɛ jogbaŋŋ yɛ mɔdɛŋ ni abɔ shii abɔ koni akɛ nibii komɛi afutu saji ni yɔɔ Biblia lɛ mli yɛ bei ni eho lɛ amli lɛ fɛɛ sɛɛ. Blema Bibliai ni tamɔ nɛkɛ lɛ baanyɛ aha ayɔse saji fioo komɛi ni yɔɔ Biblia lɛ mli ní atsɔɔ shishi yɛ gbɛ ni ejaaa nɔ lɛ hu.

Sane naataamɔi ni mli wa ni kɔɔ bɔ ni Biblia lɛ ja eha lɛ he lɛ ekomɛi tee nɔ yɛ Germany. Oblanyo nilelɔ kpanaa ko ni yɔɔ nakai maŋ lɛ mli lɛ ŋmɛɛ woji ni eyɔɔ amɛkasemɔ he miishɛɛ lɛ ahe eshwie shi, ni ekɛ ehe wo gbɛfãa ko mli, ni gbɛfãa nɛɛ nɔ enyiɛ ni enine yashɛ blema Bibliai ni fa fe fɛɛ eko ni mɔ ko nine eshɛ nɔ pɛŋ yɛ shihilɛ mli lɛ anɔ. Oblanyo nɛɛ gbɛi ji Konstantin von Tischendorf, ni eji Biblia he nilelɔ, ni gbɛ ni eŋmɛɛɛ koni awie ashi Biblia lɛ ha enyɛ efã bɔ ni Biblia lɛ ja ha lɛ he, ni eye omanye ni sa kadimɔ yɛ enɛ feemɔ mli. Klɛŋklɛŋ gbɛ ni efã kɛtee Sinai ŋa lɛ nɔ yɛ afi 1844 lɛ he ba sɛɛnamɔ babaoo. Eyana kɛntɛŋ ko ni akɛ jwɛi woɔ mli yɛ mɔ kome shihilɔi ashihilɛhe ko, ni beni ekwɛ mli lɛ ena Septuagint loo Hebri Ŋmalɛi ni atsɔɔ shishi yɛ Hela wiemɔ mli lɛ ekomɛi jwere mli—no ji Hela shishitsɔɔmɔi ni nine eshɛ nɔ lɛ ateŋ nɔ ni etsɛ fe fɛɛ!

Tischendorf kɛ mlifilimɔ hala shishitsɔɔmɔ nɛɛ wolokpoi komekomei 43 kɛtee. Eyɛ mli akɛ no mli lɛ eheɔ eyeɔ akɛ babaoo yɛ lolo ni enine baanyɛ ashɛ nɔ moŋ, shi beni eku esɛɛ etee jɛmɛ yɛ afi 1853 mli lɛ, emli fioo ko pɛ enyɛ ekɛku sɛɛ kɛba. Nɛgbɛ fã ni eshwɛ lɛ yɔɔ? Tischendorf nyɛɛɛ ekɛ fɛɛ aba ejaakɛ shika ni ekɛfãa gbɛ lɛ yatã, no hewɔ lɛ, eyabi niiatsɛ ko ní eye ebua lɛ yɛ shika gbɛfaŋ, ni ekpɛ eyiŋ akɛ ebaashi ejaku maŋ lɛ mli ekoŋŋ ní eyatao blema Bibliai ni akɛ niji ŋmala lɛ. Shi dani ebaashi lɛ, ekɛ nibimɔ ko yafɔ̃ Russia maŋtsɛ lɛ hiɛ.

Maŋtsɛ lɛ Ná He Miishɛɛ

Ekã shi faŋŋ akɛ Tischendorf susu bɔ ni abaahere lɛ hiɛmɛɛ yɛ Russia aha lɛ he, akɛni eji Protestant woloŋlelɔ ní nakai maŋ lɛ hu ji maŋ ko ni da ni emlibii lɛ ji Russia Ɔrtodɔks sɔlemɔ lɛ mlibii lɛ hewɔ. Shi miishɛɛ sane ji akɛ no mli lɛ, tsakemɔi komɛi ni sa jogbaŋŋ miiya nɔ yɛ Russia. Bɔ ni áma wolokasemɔ nɔ mi waa aha lɛ ha Maŋnyɛ Catherine II (ní ale lɛ hu akɛ Catherine Kpeteŋkpele lɛ) ma The Imperial Library ni ji wojiatoohe ní yɔɔ St. Petersburg lɛ yɛ afi 1795 mli. Akɛni no ji Russia maŋbii lɛ aklɛŋklɛŋ wojiatoohe ni ama hewɔ lɛ, akɛ woji ni fa babaoo yato jɛmɛ bɔni afee ni mɛi pii aná akane.

Eyɛ mli akɛ anya The Imperial Library lɛ he akɛ efata wojiatoohei ni nɔ bɛ ni yɔɔ Europa lɛ ahe moŋ, shi etɔɔ fã yɛ nɔ ko mli. No ji akɛ beni wojiatoohe nɛɛ náa afii 50 lɛ, no mli lɛ Hebri ŋmalɛi ni akɛ niji ŋmala lɛ ekomekomei ekpaa pɛ ayɔɔ yɛ jɛmɛ. Enɛ faaa haaa Russia maŋbii ní amɛteŋ mɛi pii ebaná wiemɔi ni aŋmala Biblia lɛ yɛ mli yɛ shishijee kɛ Biblia shishitsɔɔmɔi akasemɔ he miishɛɛ lɛ. Maŋnyɛ Catherine II wo woloŋlelɔi komɛi agbɛ kɛtee univɛsiti srɔtoi yɛ Europa koni amɛyakase Hebri wiemɔ. Beni woloŋlelɔi nɛɛ ku amɛsɛɛ amɛba lɛ, ato Hebri wiemɔ kasemɔ he gbɛjianɔ yɛ Russia Ɔrtodɔks nikasemɔhei wuji lɛ amli, ni nakai be mli ji klɛŋklɛŋ be ni Russia woloŋlelɔi je shishi akɛ amɛaakwɛ blema Hebri Bibliai lɛ anɔ ni amɛtsɔɔ shishi pɛpɛɛpɛ kɛba Russia wiemɔ mli. Shi amɛkɛ shika he naagba kpe yɛ enɛ feemɔ mli, ni jamɔŋ hiɛnyiɛlɔi ni sumɔɔɔ tsakemɔi ni yaa nɔ lɛ po te shi wo amɛ. Kpaako nibii ashishinumɔ diɛŋtsɛ baafee faŋŋ kɛha mɛi ni taoɔ amɛná Biblia mli nilee lɛ.

Russia maŋtsɛ Alexander II lɛ na sɛɛnamɔ ni yɔɔ gbɛ ni Tischendorf taoɔ akɛ efã lɛ he, ni eye ebua lɛ yɛ shika gbɛfaŋ. Yɛ Tischendorf he “awuŋa” ni mɛi komɛi “ye kɛ shitee-kɛwoo” ni amɛkɛba enɔ lɛ fɛɛ sɛɛ lɛ, eku esɛɛ kɛtee Sinai ni ekɛ Septuaginta wolokpoi ni eshwɛ ní enine yashɛ nɔ lɛ ba. Sɛɛ mli lɛ, abale Septuagint nɛɛ akɛ Codex Sinaiticus, ni ekã he efata Bibliai ni akɛ niji ŋmala ni yɔɔ ni etsɛ fe fɛɛ lɛ ahe. Beni Tischendorf ku sɛɛ kɛba St. Petersburg lɛ, esha foi kɛtee Imperial Winter Palace ni ji maŋtsɛwe lɛ. Eyabi koni maŋtsɛ lɛ aye abua ni akala blema Bibliai ni akɛ niji ŋmala ní kpaako nine eshɛ nɔ lɛ eko yɛ wolo nɔ, ni maŋtsɛ lɛ shashaooo shi kwraa akɛ eeetsu sane ni akɛbafɔ̃ ehiɛ lɛ he nii, ni beni agbe Biblia hee nɛɛ he nitsumɔ ní abuɔ akɛ eji “nitsumɔi wuji ni fe fɛɛ eko ni atsu pɛŋ yɛ Biblia mlipɛimɔ kɛ ekasemɔ he lɛ ateŋ ekome” lɛ naa lɛ, akɛyato wojiatoohe ni ji The Imperial Library lɛ. Tischendorf ní mii eshɛ ehe agbɛnɛ lɛ ŋma yɛ sɛɛ mli akɛ: “Nyɔŋmɔ kɛ Sinaitic Biblia lɛ . . . eduro wɔyinɔ nɛɛ, koni eha saji ni yɔɔ e-Wiemɔ ni aŋma lɛ mli lɛ afee faŋŋ kɛha wɔ, ni eye ebua wɔ koni wɔfã Biblia lɛ he kɛtsɔ emli saji ni akɛ nɔ ko futuko mli lɛ ní wɔɔha ale lɛ nɔ.”

Biblia Wolokpoi ni He Yɔɔ Sɛɛnamɔ Waa ní Ayaná Kɛjɛ Crimea

Beni aje sane nɛɛ shishi lɛ, awie nilelɔ kroko hu ní fã gbɛ eyatao Bibliai ni he yɔɔ sɛɛnamɔ waa lɛ he. Namɔ ni? Afii fioo komɛi dani Tischendorf aaaku esɛɛ kɛya Russia lɛ, ayaduro The Imperial Library lɛ blema woji srɔtoi babaoo, ni woji nɛɛ falɛ tée maŋtsɛ lɛ miishɛɛ shi, ni no gbala nilelɔi kɛjɛ Europa niiaŋ fɛɛ kɛtee Russia. Woji ni nilelɔi nɛɛ yana lɛ ha amɛnaa kpɛ amɛhe. Amɛyana blema Bibliai ni akɛ niji ŋmala kɛ woji krokomɛi babaoo. Woji srɔtoi nɛɛ afalɛ ji 2,412, ni woji ni akɛ niji ŋmala kɛ wolokpoi 975 fata he. Blema Bibliai 45 ni akɛ niji ŋmala dani afi 900 afii lɛ shɛ lɛ hu fata he. Eyɛ mli akɛ ewa akɛ aaahé aye akɛ mɔ kometoo pɛ fã gbɛ eyatao woji srɔtoi babaoo ni tamɔ nɛkɛ moŋ, shi Abraham Firkovich ni eji Karaitenyo nilelɔ lɛ kometoo ni yaná kɛba, ni no mli lɛ eye fe afii 70! Shi namɛi ji Karaitebii lɛ?b

Maŋtsɛ lɛ miisumɔ ni ele mɛi ni nɛkɛ Karaitebii nɛɛ ji. No mli lɛ, Russia maŋ lɛ elɛɛ ehesui lɛ amli, ni eŋɔ maji ni tsutsu ko lɛ maji krokomɛi yeɔ amɛnɔ lɛ ebafata maji ni eyeɔ amɛnɔ lɛ ahe. Enɛ ha gbɔmɛi ni wieɔ wiemɔi srɔtoi batsɔmɔ maŋtsɛyeli nɛɛ shishibii. No mli lɛ, gbɔmɛi ni yɔɔ Crimea ni ji kpokpaa ko ni yɔɔ fɛo ni yɔɔ Ŋshɔ Diŋ lɛ naa lɛ feɔ amɛnii tamɔ Yudafoi, shi amɛkusum nifeemɔi tamɔ Turkeybii anɔ̃, ni amɛwiemɔ hu je Tartabii awiemɔ. Mɛi nɛɛ ji Karaitebii lɛ, ni amɛji Yudafoi ni aŋɔ amɛ nom kɛtee Babilon beni akpatã Yerusalem hiɛ yɛ afi 607 D.Ŋ.B. lɛ aseshibii. Shi esoro amɛ yɛ Yudafoi rabifoi lɛ ahe, ejaakɛ amɛkɛ Talmud lɛ tsuuu nii, ni amɛmaa Ŋmalɛi lɛ akanemɔ nɔ mi. Karaitebii ni jɛ Crimea lɛ kɛ nibii ni tsɔɔ akɛ esoro amɛ kwraa yɛ Yudafoi rabifoi lɛ ahe lɛ yatsɔɔ maŋtsɛ lɛ, koni ekabu amɛ efata rabifoi lɛ ahe. Karaitebii lɛ kɛ blema Bibliai ni akɛ niji ŋmala ní amɛkɛtsuɔ nii lɛ ekomɛi yatsɔɔ maŋtsɛ lɛ kɛ hiɛnɔkamɔ akɛ no baama nɔ mi kɛha lɛ akɛ amɛji Yudafoi ni ku amɛsɛɛ kɛjɛ Babilon nomŋɔɔ mli amɛyahi Crimea lɛ aseshibii.

Beni Firkovich je gbɛ ni efã kɛyatao blema woji kɛ blema Bibliai ni akɛ niji ŋmala lɛ shishi lɛ, he klɛŋklɛŋ ni etee ji Chufut-Kalebii ashihilɛhe ni yɔɔ Crimea tɛsaai lɛ amli lɛ. Yinɔbii srɔtoi ni ji Karaitebii ehi tsũi bibii ni akɛ tɛi ni akó kɛjɛ tɛsaai amli fee nɛɛ amli, ni tsũi bibii nɛɛ nɔŋŋ amɛkɛfee amɛjamɔhei. Karaitebii kpatãaa Ŋmalɛi ni etserɛ ni Nyɔŋmɔ gbɛi ni ji Yehowa lɛ yɔɔ mli lɛ ahiɛ, ejaakɛ amɛbuɔ nifitemɔ nɛɛ akɛ eji musubɔɔ nifeemɔ. Amɛkɛ Bibliai ni akɛ niji ŋmala lɛ yatoɔ he ko ni yɔɔ shweshweeshwe yɛ nitoohe tsũ bibioo ko ni atsɛ́ɔ lɛ genizah, ní eshishi yɛ Hebri wiemɔ mli ji “teemɔhe” lɛ mli. Akɛni Karaitebii lɛ buɔ Nyɔŋmɔ gbɛi lɛ waa hewɔ lɛ, amɛfɔɔɔ ŋmalɛi ni etserɛ ni tamɔ nɛkɛ lɛ ahiɛkpatamɔ.

Bɔ ni mulu eha nitoohei nɛɛ amli ewo muji eha lɛ ejeee Firkovich nijiaŋ wui, shi moŋ eto etsui shi ni egbɛlɛ shi yɛ tsũi nɛɛ amli. Eyana Biblia ko ni akɛ niji ŋmala yɛ afi 916 Ŋ.B. ní ehé gbɛi waa lɛ yɛ tsũi nɛɛ ekome mli. Biblia nɛɛ gbɛi ji Petersburg Codex of the Latter Prophets, ni efata Hebri Ŋmalɛi ni yɔɔ ni etsɛ fe fɛɛ lɛ ahe.

Firkovich bɔ mɔdɛŋ enine shɛ woji srɔtoi babaoo ni akɛ niji ŋmala lɛ anɔ, ni yɛ afi 1859 lɛ, ekɛ woji nɛɛ tee koni ahé ni akɛto The Imperial Library lɛ. Yɛ afi 1862 mli lɛ, Alexander II hã shika babaoo ni naa shɛɔ ruble 125,000 (Russia shika 125,000) yɛ nakai beaŋ ni akɛhé woji nɛɛ ato wojiatoohe lɛ. Yɛ no beaŋ lɛ, shika ni akɛhaa daa afi akɛ akɛhé nibii ato wojiatoohe nɛɛ ji ruble 10,000! Blema Biblia ni akɛ niji ŋmala ni ehé gbɛi waa ni ji Leningrad Codex (B 19^A) lɛ fata woji ni ahé nɛɛ ahe. Aŋma yɛ afi 1008 mli, ni no ji Hebri Ŋmalɛi muji fɛɛ ni yɔɔ je lɛŋ lɛ ateŋ nɔ ni etsɛ fe fɛɛ. Nilelɔ ko wie akɛ “ekolɛ no ji Biblia woji ni akɛ niji ŋmala lɛ ateŋ nɔ ni he hiaa fe fɛɛ, ejaakɛ eyeɔ ebuaa ni akɛ wiemɔi ni ja tsuɔ nii yɛ Hebri Bibliai ashishitsɔɔmɔi babaoo ni afeɔ ŋmɛnɛ lɛ amli.” (Kwɛmɔ akrabatsa ni fata he lɛ mli.) Yɛ afi 1862 lɛ nɔŋŋ mli lɛ, akala Codex Sinaiticus ni Tischendorf kɛjɛ egbɛfãa lɛ mli kɛba lɛ, ni anya he yɛ jeŋ fɛɛ.

Anɔkwalei ni Kɔɔ Nyɔŋmɔ He lɛ Ashishinumɔ Ŋmɛnɛ

Russia wojiatoohe lɛ ni amrɔ nɛɛ ale lɛ akɛ The National Library lɛ fata je lɛŋ wojiatoohei ni anaa blema Bibliaic ni akɛ niji ŋmala ni fa fe fɛɛ yɛ lɛ he. Taakɛ tsakemɔi srɔtoi tee nɔ yɛ Russia yinɔsane mli lɛ, nakai nɔŋŋ atsake wojiatoohe nɛɛ gbɛi shii kpawo sɔŋŋ yɛ afii 200 mli. Gbɛi srɔtoi ni akɛwo wojiatoohe nɛɛ mli eko ni ale waa ji State Saltykov-Shchedrin Public Library. Eyɛ mli akɛ basabasafeemɔi ni tee nɔ yɛ afi 1900 afii lɛ amli lɛ sa wojiatoohe nɛɛ he moŋ, shi blema Bibliai ni akɛ niji ŋmala ni yɔɔ jɛmɛ lɛ ahiɛ kpatãaa yɛ jeŋ tai enyɔ ni awu kɛ Leningrad maŋtiase lɛ he kawoo lɛ fɛɛ sɛɛ. Mɛɛ gbɛ nɔ blema Bibliai ni akɛ niji ŋmala nɛɛ ahe baa sɛɛnamɔ kɛhaa wɔ?

Anyɛɔ akɛ he fɔ̃ɔ blema Bibliai ni akɛ niji ŋmala lɛ anɔ, ni nomɛi anɔ akwɛɔ akɛŋmalaa Biblia shishitsɔɔmɔi babaoo ŋmɛnɛ. Blema Bibliai nɛɛ yeɔ ebuaa ni mɛi ni kɛ tsui ni ja taoɔ anɔkwale lɛ anine shɛɔ Ŋmalɛ Krɔŋkrɔŋ lɛ shishitsɔɔmɔi ni ja anɔ. Biblia wolokpoi ni akɛ niji ŋmala ni ji Sinaiticus Codex kɛ Leningrad Codex lɛ fɛɛ ye ebua babaoo yɛ New World Translation of the Holy Scriptures ni Yehowa Odasefoi kala lɛ feemɔ mli, ni ajie shishitsɔɔmɔ muu lɛ fɛɛ kpo yɛ afi 1961 mli. Ákɛ nɔkwɛmɔnɔ lɛ, Leningrad Codex lɛ nɔ akwɛ afee Bibliai enyɔ ní New World Bible Translation Committee (Jeŋ Hee Biblia Shishitsɔɔmɔ Ajinafoi Akuu) lɛ kɛtsu nii ni ji Biblia Hebraica Stuttgartensia kɛ Biblia Hebraica ni Kittel fee lɛ, ni Tetragrammaton loo Nyɔŋmɔ gbɛi lɛ jeɔ kpo shii 6,828 yɛ blema nɔ̃ diɛŋtsɛ ni akwɛ nɔ aŋmala ekomɛi ashwie shi lɛ mli.

Biblia kanelɔi ateŋ mɛi fioo komɛi pɛ le yelikɛbuamɔ babaoo ni aná kɛjɛ wojiatoohe ni yɔɔ St. Petersburg kɛ emli blema Bibliai ni akɛ niji ŋmala lɛ he nɔ ko. Akɛ maŋtiase lɛ tsutsu gbɛi ni ji Leningrad lɛ ewo blema woji nɛɛ ekomɛi. Ni kɛlɛ, mɔ ni wɔdaa lɛ shi fe fɛɛ ji Yehowa ni ji Biblia lɛ Ŋmalɔ ní haa saji ni kɔɔ Nyɔŋmɔjamɔ he lɛ ashishinumɔ feɔ faŋŋ lɛ. No hewɔ ni lalatsɛ lɛ kpa lɛ fai akɛ: “Ha ola kɛ onɔkwale lɛ aba, ni amɛbatsɔɔ mi gbɛ” lɛ.—Lala 43:3.

[Shishigbɛ niŋmai]

[Akrabatsa ni yɔɔ baafa 13]

ALE NYƆŊMƆ GBƐI LƐ, NI AKƐMIITSU NII LOLO

Yehowa ejɛ nilee mli eha abáa e-Wiemɔ ni ji Biblia lɛ yi kɛbashi ŋmɛnɛ. Woloŋmalɔi ni kɛ ekãa tsu nii yɛ yinɔi ni eho lɛ amli lɛ fata he ni abáa wolo nɛɛ yi. Amɛteŋ mɛi ni to amɛtsui shi ní amɛkwɛ woji ni aŋmala momo lɛ anɔ amɛŋmala lɛ jogbaŋŋ ji Masoretebii ni ji Hebribii woloŋmalɔi ni hi shi yɛ afi 500 Ŋ.B. afii lɛ amli kɛyashi afi 900 Ŋ.B. afii lɛ amli lɛ. Abɛ gbɛɛmɔ okadii yɛ blema Hebri niŋmaai amli. Enɛ bafee naagba wulu beni Aramaik wiemɔ baye Hebri wiemɔ najiaŋ lɛ, ejaakɛ beni be shwieɔ mli lɛ, anyɛɛɛ ale bɔ ni atsɛ́ɔ Hebri wiemɔi pɔtɛɛi komɛi ahaa diɛŋtsɛ. Masoretebii lɛ fee gbɛɛmɔ okadii komɛi kɛhɔlɔ Biblia niŋmaai lɛ ekomɛi amli bɔni afee ni amɛkɛtsɔɔ bɔ ni atsɛ́ɔ Hebri wiemɔi nɛɛ ahaa.

Nɔ ko ni sa kadimɔ ji akɛ, gbɛɛmɔ okadii ni Masoretebii lɛ kɛtsu nii yɛ Leningrad Codex wolokpo lɛ mli lɛ tsɔɔ bɔ ni atsɛ́ɔ Tetragrammaton ni ji Hebri okadii ejwɛ ni damɔ shi kɛha Nyɔŋmɔ gbɛi lɛ ahaa, ákɛ atsɛ́ɔ gbɛi nɛɛ Yehwah’, Yehwih’, loo Yeho·wah’. Amrɔ nɛɛ bɔ ni mɛi babaoo le ni atsɛɔ gbɛi nɛɛ ji “Yehowa.” Biblia ŋmalɔi kɛ mɛi komɛi ni kwɛ nɔ ni Biblia ŋmalɔi lɛ ŋmala lɛ anɔ amɛŋmala ekomɛi pɛpɛɛpɛ amɛshwie shi lɛ le Nyɔŋmɔ gbɛi lɛ jogbaŋŋ. Ŋmɛnɛ, mɛi akpekpei abɔ ni kpɛlɛɔ nɔ akɛ ‘Yehowa ji Mɔ ni nɔ kwɔ fe fɛɛ yɛ shikpɔŋ lɛ nɔ fɛɛ’ lɛ le Nyɔŋmɔ gbɛi nɛɛ, ni amɛkɛtsuɔ nii hu.—Lala 83:19.

[Mfoniri ni yɔɔ baafa 10]

Tsũ ni akɛ blema Bibliai ni akɛ niji ŋmala toɔ mli yɛ The National Library lɛ

[Mfoniri ni yɔɔ baafa 11]

Maŋnyɛ Catherine II

[Mfonirii ni yɔɔ baafa 11]

Konstantin von Tischendorf (lɛ eyɔɔ teŋ lɛ) kɛ Russia maŋtsɛ Alexander II

[Mfoniri ni yɔɔ baafa 12]

Abraham Firkovich

[He ni Mfoniri ni yɔɔ baafa 10 lɛ Jɛ]

Mfonirii enyɔ lɛ fɛɛ: National Library of Russia, St. Petersburg

[Hei ni Mfonirii ni yɔɔ baafa 11 lɛ Jɛ]

Catherine II: National Library of Russia, St. Petersburg; Alexander II: From the book Spamers Illustrierte Weltgeschichte, Leipzig, 1898