Sanebimɔi ni Jɛ Kanelɔi Adɛŋ
Ani wiemɔ ni ji “ekolɛ” ni yɔɔ Zefania 2:3 lɛ tsɔɔ akɛ Nyɔŋmɔ tsuji nyɛŋ aná nɔmimaa akɛ amɛbaaná naanɔ wala?
Ŋmalɛ nɛɛ kaneɔ akɛ: “Nyɛtaoa Yehowa sɛɛ gbɛ, nyɛ shikpɔŋ lɛ nɔ heshibalɔi fɛɛ ni nyɛyeɔ emla lɛ nɔ lɛ! Nyɛtaoa jalɛ sɛɛ gbɛ, nyɛtaoa heshibaa sɛɛ gbɛ: ekolɛ aaaŋɔ nyɛ atee yɛ Yehowa mlifu gbi lɛ nɔ!” Mɛni hewɔ ŋmalɛ nɛɛ kɛɔ akɛ “ekolɛ”?
Bɔni afee ni wɔnu bɔ ni Yehowa kɛ etsuji anɔkwafoi lɛ baaye aha yɛ Harmagedon lɛ shishi lɛ, ehe miihia ni wɔkai nɔ ni Biblia lɛ tsɔɔ akɛ Nyɔŋmɔ baafee eha mɛi ni baagboi dani nakai kojomɔ be lɛ ashɛ lɛ. Abaatee amɛteŋ mɛi komɛi ashi kɛya ŋwɛi akɛ mumɔŋ bɔɔ nii ni gbooo dɔŋŋ, ni abaatee mɛi krokomɛi hu ashi kɛba shikpɔŋ nɔ koni amɛhi shi kɛya naanɔ yɛ Paradeiso. (Yohane 5:28, 29; 1 Korintobii 15:53, 54) Kɛji akɛ Yehowa baakai etsuji anɔkwafoi ni gboiɔ dani Harmagedon shɛɔ lɛ ni ebaajwere amɛ lɛ, ekã shi faŋŋ akɛ ekɛ etsuji ni baahi wala mli yɛ emlifu gbi lɛ nɔ lɛ baaye yɛ nakai gbɛ nɔ nɔŋŋ.
Bɔfo Petro wiemɔi ni jɛ mumɔŋ lɛ hu woɔ mɔ hewalɛ. Eŋma akɛ: “Noa ni ji jalɛ shiɛlɔ lɛ, mɔ ni gbe yi fee mɛi kpaanyɔ lɛ kɛkɛ yi [Nyɔŋmɔ] ebaa, ni ekɛ nu afua lɛ ba mɛi ni kwa Nyɔŋmɔ lɛ aje lɛ nɔ, ni Sodoma kɛ Gomora maji lɛ hu esha ni eha amɛtsɔ lamlu, ni ekɛ butumɔ kojo amɛ . . . ni ejie Lot, jalɔ lɛ, . . . Nuŋtsɔ [Yehowa] lɛ le bɔ ni efeɔ ejieɔ jalɔi yɛ kaa mli, kɛ bɔ ni efeɔ etoɔ mɛi fɔji yɛ piŋmɔ mli kɛyashi kojomɔ gbi lɛ nɔ.” (2 Petro 2:5-9) Eyɛ mli akɛ Yehowa kpata efɔŋfeelɔi lɛ ahiɛ yɛ blema moŋ, shi ebaa Noa kɛ Lot ni kɛ anɔkwayeli sɔmɔ lɛ lɛ ayi. Yehowa baabaa jalɔi lɛ hu ayi be mli ni ekpatãa efɔŋfeelɔi lɛ ahiɛ yɛ Harmagedon lɛ. “Asafo babaoo” ni ji jalɔi lɛ baaná yibaamɔ.—Kpojiemɔ 7:9, 14.
Enɛ hewɔ lɛ, etamɔ nɔ ni wiemɔ ni ji “ekolɛ” ni akɛtsu nii yɛ Zefania 2:3 lɛ etsɔɔɔ akɛ abɛ nɔmimaa yɛ nyɛmɔ ni Nyɔŋmɔ yɔɔ akɛ ekɛaabaa mɛi ni ekpɛlɛ amɛnɔ lɛ ayi lɛ he. Yɛ no najiaŋ lɛ, mɔ ko yi ni aaabaa yɛ Yehowa mlifu gbi lɛ nɔ lɛ ji nɔ ko ni ekolɛ eeenyɛ eba mli nakai kɛji akɛ mɔ lɛ je shishi etao jalɛ kɛ heshibaa sɛɛ gbɛ. Mɔ lɛ yi ni aaabaa lɛ damɔ ya ni eeeya nɔ etao heshibaa kɛ jalɛ sɛɛ gbɛ lɛ nɔ.—Zefania 2:3.
[Mfoniri ni yɔɔ baafa 31]
“Nuŋtsɔ [Yehowa] lɛ le bɔ ni efeɔ ejieɔ jalɔi yɛ kaa mli”