Jeŋba Kpakpa Woɔ Yibii

YEHOWA ODASEFOI kɛ yoo ko kɛ ebii bibii etɛ bɔi Biblia lɛ kasemɔ yɛ ŋshɔkpɔ bibioo ko ni bɛŋkɛ Japan wuoyigbɛ ŋshɔ lɛ naa lɛ nɔ. Beni mɛi ni yɔɔ nakai akutso ni etse ehe banee ni amɛnyaaa susumɔ hee ko he kwraa lɛ na enɛ lɛ, amɛfooo yoo lɛ daaŋ dɔŋŋ be fɛɛ be ni amɛaana lɛ lɛ. Ekɛɛ akɛ: “Nɔ ni haoɔ mi waa fe midaaŋ ni amɛfooo lɛ ji akɛ amɛtseee amɛhiɛ amɛhaaa miwu kɛ mibii lɛ.” Yɛ enɛɛmɛi fɛɛ sɛɛ lɛ, ekɛɛ ebii lɛ akɛ: “Esa akɛ wɔya nɔ wɔŋa wɔkutsoŋbii lɛ be fɛɛ be yɛ Yehowa hewɔ.”—Mateo 5:47, 48.

Beni amɛyɔɔ shĩa lɛ, etsɔɔ ebii lɛ bɔ ni esa akɛ amɛkɛ mɛi aye aha yɛ mlijɔlɛ mli yɛ hiɛ ni atseee ahaaa amɛ lɛ fɛɛ sɛɛ. Kɛ gbekɛbii lɛ tara amɛlɔle lɛ mli kɛmiiya amɛyakwɛ nu hiŋmɛi ni mli edɔ ni fãa kpo kɛjɛɔ shikpɔŋ, ni yɔɔ maŋ lɛ mli lɛ taakɛ amɛfɔɔ feemɔ lɛ, amɛkɛɔ amɛŋamɔi lɛ kɛkaseɔ bɔ ni amɛbaafee lɛ amɛha. Kɛ́ gbekɛbii lɛ bote tsũi lɛ amli lɛ, amɛkɛ miishɛɛ kɛɔ be fɛɛ be akɛ, “Konnichiwa!”—“Wɔmiiŋa nyɛ!” Weku lɛ mli bii lɛ jɛɔ tsuishitoo mli amɛŋaa mɛi fɛɛ ni amɛkɛkpeɔ lɛ be fɛɛ be, eyɛ mli moŋ akɛ akutsoŋbii lɛ tseee amɛhiɛ amɛhaaa amɛ be fɛɛ be. Fɛɛ sɛɛ lɛ, mɛi naa gbekɛbii lɛ ajeŋbai kpakpai lɛ.

Yɛ naagbee mli lɛ, akutsoŋbii lɛ ateŋ mɛi pii bɔi nɔheremɔ nakai nɔŋŋ akɛ, “Konnichiwa.” Yɛ afii enyɔ sɛɛ lɛ, aaafee maŋ lɛŋ bii ateŋ mɔ fɛɛ mɔ hereɔ weku lɛ ŋamɔi anɔ. Amɛ hu amɛbɔi amɛhe ŋamɔ yɛ akutso lɛ mli ni amrɔ nɛɛ amɛtseɔ amɛhiɛ amɛhaa mɛi waa. Maŋ onukpa sɛɛmɔ lɛ miitao ni ekɛ jweremɔ nii aha gbekɛbii lɛ yɛ nɔ ni amɛfee ni kɛ tsakemɔ nɛɛ ba lɛ hewɔ. Shi amɛmami ma nɔ mi eha lɛ akɛ amɛmiifee nɔ ni esa akɛ amɛfee kɛkɛ ákɛ Kristofoi. Yɛ sɛɛ mli lɛ, yɛ wiemɔ hamɔ he akaŋshii ko ni afee aha ŋshɔkpɔ lɛ nɔ bii fɛɛ lɛ mli lɛ, gbekɛbii hii lɛ ateŋ mɔ kome tsɔɔ bɔ ni emami etsɔse weku lɛ koni amɛjɛ bulɛ mli amɛŋa mɛi krokomɛi yɛ nɔ ni afeɔ amɛ lɛ fɛɛ sɛɛ. Ewiemɔ lɛ ná klɛŋklɛŋ jweremɔ nɔ̃ lɛ, ni aŋma awo maŋ lɛŋ adafitswaa wolo mli. Ŋmɛnɛ, weku lɛ mli bii yɛ miishɛɛ waa diɛŋtsɛ akɛ Kristofoi ashishitoo mlai ni amɛkɛtsu nii lɛ ewo yibii kpakpai tamɔ nɛkɛ. Sanekpakpa lɛ ni agbaa mɛi krokomɛi lɛ yɛ mlɛo kɛ́ mɛi lɛ jie naanyobɔɔ su kpo.