Skul ni Mɛi ni Yakaseɔ Nii yɛ Jɛmɛ lɛ Yeɔ Amɛbuaa Gbɔmɛi yɛ Je Lɛŋ Fɛɛ

NYƆŊMƆ miitsɔɔ gbɔmɛi srɔtoi ni yɔɔ Yehowa Odasefoi asafoi ni fa fe 98,000 amli yɛ shikpɔji ni fe 200 anɔ lɛ anii. Wolo titri ni amɛkaseɔ ji Biblia lɛ, ni aatsɔɔ amɛ nii koni ákɛ aŋkroaŋkroi lɛ, amɛle nɔ ni Nyɔŋmɔ suɔmɔnaa nii ji kɛ gbɛ ni amɛaatsɔ nɔ amɛfee esuɔmɔnaa nii bɔni afee ni amɛya amɛhiɛ yɛ esɔɔmɔ mli. Nikasemɔ nɛɛ he baa sɛɛnamɔ kpele kɛhaa mɛi ni kɛ amɛhe woɔ mli lɛ. Mɛi nɛɛ tsuɔ Yesu Kristo famɔ akɛ afee mɛi kaselɔi lɛ he nii kɛtsɔ mɛi krokomɛi ni amɛtsɔɔ amɛ nibii ni amɛkaseɔ lɛ nɔ.—Mateo 28:19, 20.

Yɛ skul ni Yehowa Odasefoi feɔ yɛ amɛsafoi lɛ amli lɛ sɛɛ lɛ, amɛyɛ skul krɛdɛɛi komɛi hu ni amɛfeɔ. Amɛteŋ ekome ji Sɔɔlɔi Atsɔsemɔ Skul lɛ. Afee klɛŋklɛŋ nɔ̃ lɛ yɛ October afi 1987 lɛ mli yɛ Pittsburgh, Pennsylvania yɛ U.S.A. Mɛi 24 ní wieɔ blɔfo akɛje skul nɛɛ shishi. Kɛjɛ no sɛɛ kɛbaa nɛɛ, afee skul lɛ yɛ majianɔ wiemɔi 21 mli yɛ maji 43 amli. Kɛbashi amrɔ nɛɛ, asafoŋ onukpai kɛ asafoŋ sɔɔlɔi ni boteko gbalashihilɛ mli ní jɛ maji fe 90 amli etee skul nɛɛ eko. Otsii kpaanyɔ akɛtsɔseɔ mɛi yɛ skul lɛ, ni kɛ́ skulbii lɛ gbe skul naa lɛ, ahaa amɛyasɔmɔɔ yɛ hei ni hiamɔ lɛ da yɛ, yɛ amɛmaŋ loo maŋ kroko nɔ. Kɛbashi afi 2005 lɛ naagbee lɛ, no mli lɛ Odasefoi fe 22,000 etee skul nɛɛ eko. Ajɔɔ amɛ babaoo yɛ heshibaa ni amɛkɛgbɛɔ Maŋtsɛyeli lɛ he nibii amɛshwãa bɔni afee ni mɛi krokomɛi hu aná he sɛɛ lɛ hewɔ.—Abɛi 10:22; 1 Petro 5:5.

Gbɛjianɔ ni Atoɔ Koni Aya Skul lɛ Eko

Dani mɛi ni etee skul nɛɛ eko lɛ ateŋ mɛi pii baaná hegbɛ aya lɛ, amɛyabi gbɛ kɛjɛ nitsumɔ mli. Bei komɛi lɛ, gbɛbimɔ nɛɛ kɛ naagba baa. Yɛ Hawaii lɛ, aŋma Kristofoi enyɔ komɛi ni amɛji tsɔɔlɔi lɛ wolo koni amɛba skul lɛ eko, ni no hewɔ lɛ, ehe bahia koni amɛyabi gbɛ kɛjɛ nitsumɔ mli. Akɛni amɛheɔ amɛyeɔ akɛ Yehowa baaye ebua amɛ hewɔ lɛ, amɛŋma wolo kɛyabi gbɛ yɛ nitsumɔ mli, ni amɛtsɔɔ nɔ̃ hewɔ ni amɛsumɔɔ akɛ amɛya skul lɛ kɛ bɔ ni ehe baaba sɛɛnamɔ kɛha amɛ lɛ mli yɛ wolo ni amɛŋma lɛ mli. Aŋmɛ amɛyi enyɔ lɛ fɛɛ gbɛ ni amɛtee skul lɛ.

Yɛ Odasefoi komɛi ni yabi gbɛ kɛjɛ nitsumɔ mli lɛ agbɛfaŋ lɛ, aha amɛle akɛ kɛ́ amɛtee skul lɛ, belɛ amɛnitsumɔ baabɔ amɛ. Amɛshi amɛnitsumɔ lɛ ni amɛtee ni Yehowa asafo lɛ tsɔse amɛ, eyɛ mli akɛ no ha amɛnitsumɔ je amɛdɛŋ. Amɛteŋ mɛi komɛi lɛ, beni amɛgbe skul lɛ naa lɛ, amɛnitsumɔtsɛmɛi lɛ ŋmala amɛ woji akɛ amɛbatsa amɛnitsumɔ lɛ nɔ. Abaanyɛ atsɔɔ bɔ ni mɛi tswaa amɛfai shi akɛ amɛbaaya skul nɛɛ eko lɛ mli yɛ wiemɔ kuku mli akɛ: Ŋmaa wolo kɛyabi gbɛ yɛ nitsumɔ mli, sɔlemɔ obi Yehowa dɛŋ yelikɛbuamɔ, ni oshi nɔ ni eshwɛ lɛ owo edɛŋ.—Lala 37:5.

‘Yehowa Tsɔɔ Amɛ Nii’

Ajeɔ gbɛ akaseɔ Biblia lɛ jogbaŋŋ yɛ otsii kpaanyɔ ni akɛfeɔ skul lɛ mli. Atsɔɔ skulbii lɛ bɔ ni ato Yehowa webii ahe gbɛjianɔ aha koni amɛfee esuɔmɔnaa nii, kɛ agbɛnɛ hu ákɛ aŋkroaŋkroi lɛ, gbɛ ni amɛaatsɔ nɔ amɛkɛ Biblia lɛ atsu nii jogbaŋŋ yɛ amɛshiɛmɔ nitsumɔ lɛ mli, yɛ asafoŋ kpeei ashishi, kɛ agbɛnɛ hu yɛ kpokpaa nɔ kpeei ashishi.

Beni mɔ ko ni tee skul nɛɛ eko lɛ tsɔɔ bɔ ni ehiɛ sɔ skul lɛ eha lɛ, eŋma enaanyo ko ni kpaako ebaaya eko lɛ wolo akɛ: “Yɛ anɔkwale mli lɛ, obaayakase nɔ ko ni okaseko pɛŋ. Skul lɛ baaha onu ŋmalɛ ni kɛɔ akɛ ‘Yehowa tsɔɔ amɛ nii’ lɛ shishi jogbaŋŋ. Skul lɛ baatsɔse bo, ni ebaaha oná tsui kɛ subaŋ kpakpa koni onyɛ onyiɛ Yesu Kristo nɔkwɛmɔnɔ lɛ sɛɛ kpaakpa. Onyɛŋ okɛ nɔ ko nɔ ko ato nibii ni obaayakase lɛ ahe.”—Yesaia 54:13.

Sanekpakpashiɛlɔi, Nɔkwɛlɔi, kɛ Tsɔɔlɔi

Amrɔ nɛɛ, mɛi ni etee Sɔɔlɔi Atsɔsemɔ Skul lɛ eko lɛ miisɔmɔ yɛ maji 117 anɔ. Ŋshɔkpɔi ni yɔɔ Atlantik, Caribbean, kɛ Pasifik ŋshɔ lɛ anɔ kɛ agbɛnɛ hu maji ni Yehowa Odasefoi yɔɔ nitsumɔhe nine yɛ jɛmɛ lɛ amli babaoo fata maji ni wɔwieɔ he nɛɛ ahe. Amaniɛbɔɔ ni nine shɛɔ nɔ kɛjɛɔ nitsumɔhe niji lɛ tsɔɔ akɛ, nibii ni skulbii lɛ yakaseɔ lɛ jeɔ kpo yɛ amɛshiɛmɔ nitsumɔ lɛ mli, ejeɔ kpo yɛ bɔ ni amɛkwɛɔ asafoi lɛ anɔ amɛhaa lɛ mli, ni ejeɔ kpo hu yɛ amɛnitsɔɔmɔ mli. Tsɔsemɔ ni akɛhaa amɛ lɛ haa amɛkɛ Biblia lɛ tsuɔ nii jogbaŋŋ yɛ shiɛmɔ nitsumɔ lɛ mli. (2 Timoteo 2:15) Amɛkɛ Reasoning From the Scripturesa wolo lɛ fɔɔ nitsumɔ kɛ́ amɛmiiha shiatsɛmɛi asanebimɔi ahetoo, ni amɛtsɔɔ Maŋtsɛyeli shiɛlɔi krokomɛi hu koni amɛfee nakai. Ekãa ni mɛi ni etee skul lɛ eko lɛ kɛtsuɔ nii lɛ kanyaa mɛi ni amɛ hu amɛfeɔ nakai, ni nibii ni amɛtsuɔ yɛ asafoi lɛ amli lɛ tswaa emlibii lɛ emaa shi.

Asafoŋ onukpai ená hegbɛ akɛ ‘amɛkwɛ asafoku lɛ nɔ,’ ni amɛye amɛbua mɛi koni amɛsɔmɔ Nyɔŋmɔ. (1 Petro 5:2, 3) Beni asafoŋ onukpa ko wieɔ mɛi ni atsɔseɔ amɛ yɛ skul lɛ ahe lɛ, ekɛɛ akɛ: “Wɔdaa shi akɛ nitsumɔhe nine lɛ tsuɔ nyɛmimɛi hii ni atsɔse amɛ jogbaŋŋ ni amɛbayeɔ amɛbuaa wɔ kɛkwɛɔ Nyɔŋmɔ asafoku lɛ nɔ.” Nitsumɔhe nine ko hu ni yɔɔ Asia niiaŋ lɛ ŋma akɛ: “Mɛi ni etee skul lɛ eko lɛ amusuŋ tsɔ̃ɔ amɛ waa. Amɛtsuɔ nii waa, ni no haa asafoŋbii lɛ sumɔɔ amɛsane. Ale amɛ jogbaŋŋ akɛ amɛbaa amɛhe shi, amɛdɔɔ mɔ he, ni be fɛɛ be lɛ, amɛfee klalo akɛ amɛaaye amɛbua, ni enɛ hewɔ lɛ, asafoŋbii lɛ kɛ amɛ shwɛɛɛ kwraa. Amɛjɛɔ amɛsuɔmɔ mli amɛkɛ amɛhe shãa afɔle ni amɛkɛ miishɛɛ fãa kɛyahiɔ asafoi ni bɛ nɔkwɛlɔi lɛ amli.” (Filipibii 2:4) Mɛi ni tamɔ nɛkɛ lɛ anifeemɔ woɔ amɛnanemɛi heyelilɔi lɛ hewalɛ, ni amɛsa yijiemɔ.—1 Korintobii 16:18.

Kɛfata he lɛ, tsɔɔlɔi ni tsɔɔ nii yɛ Sɔɔlɔi Atsɔsemɔ Skul lɛ yeɔ amɛbuaa mɛi ni baa skul lɛ ni amɛwieɔ kɛ hesalɛ kɛ́ amɛdamɔ mɛi ahiɛ amɛmiiwie. Kɛ́ mɛi ni etee skul lɛ eko lɛ kɛ ŋaawoi srɔtoi ni akɛha amɛ lɛ tsu nii lɛ, no lɛ yɛ be kukuoo mli lɛ, abaanyɛ aha amɛ nifeemɔ yɛ kpokpaa nɔ kpee kɛ kpokpaa wulu nɔ kpeei ashishi. Kpokpaa nɔkwɛlɔ ko tsɔɔ mli akɛ, mɛi ni etee skul lɛ eko lɛ “haa wiemɔ jogbaŋŋ ni bɔ ni amɛkɔlɔɔ amɛwiemɔ lɛ ekomekome lɛ haa anuɔ sane he ni amɛwieɔ lɛ shishi jogbaŋŋ.”—1 Timoteo 4:13.

Beni afee Sɔɔlɔi Atsɔsemɔ Skul lɛ eko yɛ Afrika maŋ ko mli ní aha mɛi ni ba skul lɛ tee amɛsafoi lɛ amli lɛ, no ha nitsɔɔmɔ yɛ asafoŋ kpeei ashishi tee hiɛ babaoo. Asafoŋ onukpai ni etee skul lɛ eko lɛ yeɔ amɛbuaa yɛ sanekpakpa lɛ shiɛmɔ, nyɛmimɛi lɛ asaramɔ, kɛ nitsɔɔmɔ mli, ni enɛ tswaa asafoi lɛ emaa shi yɛ Nyɔŋmɔ sɔɔmɔ mli.—Efesobii 4:8, 11, 12.

Asafoi lɛ Anɔkwɛmɔ Etee Hiɛ

Asafoŋ onukpai kɛ asafoŋ sɔɔlɔi babaoo ahe miihia yɛ hei pii. Asafoi komɛi yɛ ni kɛ́ jeee mɔ ko ni etee skul lɛ eko ni aha etee jɛmɛ koni eyaye ebua amɛ kulɛ amɛbɛ asafoŋ onukpa. Enɛ hewɔ lɛ, ahaa mɛi ni etee skul lɛ eko lɛ ateŋ mɛi babaoo yasɔmɔɔ yɛ asafoi ni tamɔ nakai amli.

Nitsumɔhe niji babaoo bɔɔ amaniɛ akɛ, nɛkɛ hii nɛɛ “le asafo lɛ gbɛjianɔtoo jogbaŋŋ,” “amɛkɛ hiɛdɔɔ tsuɔ nitsumɔi ni akɛwoɔ amɛdɛŋ lɛ ahe nii,” “amɛyeɔ amɛbuaa mɛi koni amɛnu bɔ ni Yehowa asafo lɛ tsuɔ nii ehaa lɛ shishi jogbaŋŋ ni asaŋ amɛba amɛhe shi amɛha esafo lɛ,” ni “amɛyeɔ amɛbuaa ni suɔmɔ hiɔ asafoi ni amɛkɛbɔɔ lɛ mli, ni asaŋ emlibii lɛ kɛ Nyɔŋmɔ teŋ wekukpãa lɛ mli waa.” Mɛi ni etee skul lɛ eko lɛ nyɛɔ amɛfeɔ enɛɛmɛi ejaakɛ amɛkɛ Nyɔŋmɔ Wiemɔ lɛ tsuɔ nii, ni amɛfeee nii yɛ amɛsusumɔi anaa ni amɛbuuu amɛhe nilelɔi hu. (Abɛi 3:5-7) Hii ni tamɔ nɛkɛ lɛ ahe baa sɛɛnamɔ babaoo kɛhaa asafoi ni ahaa amɛyayeɔ amɛbuaa amɛ lɛ.

Amɛsɔmɔɔ yɛ Shikpɔŋkukuji ni Etse Amɛhe Banee lɛ Amli

Mɛi ni etee skul lɛ eko lɛ ateŋ mɛi ni ahalaa amɛ akɛ gbɛgbalɔi krɛdɛɛi lɛ yeɔ buaa kui ni etse amɛhe banee ni amɛbatsɔɔ asafoi. Beni asafoŋ onukpa ko ni yɔɔ Guatemala niiaŋ he ko shɔŋŋ lɛ daa gbɛgbalɔi krɛdɛɛi ni tamɔ nakai lɛ ashi yɛ yelikɛbuamɔ ni amɛkɛhaa lɛ hewɔ lɛ, ekɛɛ akɛ: “Mikɛ afii 20 . . . esusu bɔ ni wɔɔfee wɔtsu shikpɔŋkuku agbo nɛɛ mli nii. Misɔleɔ yɛ he bei pii. Átsɔse nyɛmimɛi hii ni tee Sɔɔlɔi Atsɔsemɔ Skul lɛ jogbaŋŋ yɛ bɔ ni awieɔ ahaa kɛ agbɛnɛ hu yɛ nibii ni kɔɔ asafo lɛ gbɛjianɔtoo he, ni eŋɔɔ minaa jogbaŋŋ akɛ amrɔ nɛɛ akɛ suɔmɔ miitsu shikpɔŋkuku lɛ mli nii.”

Mɛi ni etee skul lɛ eko lɛ ekase bɔ ni amɛaafee amɛtsu nii ni emɔ shi yɛ akrowai ni egbɛ eshwã ni ebiɔ ni amɛfã gbɛ kakadaji kɛnyiɛ gɔji anɔ dani amɛyashɛ jɛmɛ lɛ amli. Kɛ́ amɛyashɛ hei ni tamɔ nakai lɛ, oya nɔŋŋ ni amɛtoɔ kui ni etse amɛhe lɛ ahe gbɛjianɔ ekɔɔɔ he eko kɛ́ shiɛlɔi komɛi eka nakai feemɔ ni eyahiii. Ákɛ nɔkwɛmɔnɔ lɛ, asafoŋ onukpa ko ni yɔɔ Niger nu he akɛ mɛi ni baanyɛ atsu amɛshikpɔŋkuku lɛ mli nii jogbaŋŋ ji mɛi ni etee skul lɛ eko, no hewɔ lɛ, ebi koni aha amɛteŋ mɛi komɛi abaye abua amɛ. Hii ni boteko gbalashihilɛ mli lɛ baaná lɛ mlɛo akɛ amɛaasɔmɔ akɛ gbɛgbalɔi krɛdɛɛi kɛ kpokpaa nɔkwɛlɔi, titri lɛ, yɛ hei ni yɔɔ shɔŋŋ-shɔŋŋ lɛ. Taakɛ ebalɛ yɛ bɔfo Paulo gbɛfaŋ lɛ, esa akɛ amɛdamɔ ‘osharai ni amɛkɛbaakpe yɛ faai ahiɛ, yɛ ojotswalɔi adɛŋ, kɛ yɛ ŋa nɔ’ lɛ anaa, ní asaŋ amɛkpee nibii ni amɛhiɔ ni amɛkɛbaakpe kɛ asafoi lɛ ahe tsuiyeli lɛ anaa.—2 Korintobii 11:26-28.

Amɛyeɔ Amɛbuaa Oblahii kɛ Oblayei

Ŋmalɛi lɛ woɔ oblahii kɛ oblayei hewalɛ koni amɛkai amɛ-Bɔlɔ lɛ. (Jajelɔ 12:1) Kristofoi oblahii kɛ oblayei baanyɛ akase nɔkwɛmɔnɔ kpakpa ni mɛi ni etee Sɔɔlɔi Atsɔsemɔ Skul lɛ eko ni yɔɔ ekãa lɛ feɔ lɛ. Aha mɛi ni etee skul lɛ eko lɛ ateŋ mɛi enyɔ yaye amɛbua asafo ko yɛ United States. Yelikɛbuamɔ ni amɛkɛha asafo lɛ ha be ni nyɛmimɛi lɛ kɛwoɔ shiɛmɔ nitsumɔ lɛ mli lɛ ku ebɔ he toi enyɔ, ni daa gbɛgbalɔi, loo be-fɛɛ Maŋtsɛyeli shiɛlɔi ni amɛyɔɔ lɛ tee hiɛ kɛjɛ 2 kɛyashɛ 11. Nɔyaa ni tamɔ nɛkɛ miiya nɔ yɛ asafoi babaoo amli.

Mɛi ni etee skul lɛ eko lɛ hu woɔ oblahii hewalɛ koni amɛto gbɛjianɔ ni amɛya Sɔɔlɔi Atsɔsemɔ Skul lɛ eko. Enɛ ekanya oblahii nɛɛ ateŋ mɛi ni jeee asafoŋ sɔɔlɔi lɛ ni amɛmiibɔ mɔdɛŋ koni amɛbatsɔmɔ sɔɔlɔi. Beni nitsumɔhe nine ni yɔɔ Netherlands lɛ wieɔ mɛi ni etee Sɔɔlɔi Atsɔsemɔ Skul lɛ eko lɛ ahe lɛ, etsɔɔ mli akɛ “oblahii ni miisusu nɔ ni amɛbaafee wɔsɛɛ lɛ ahe lɛ baanyɛ akase amɛ.”

Amɛsɔmɔɔ yɛ Asafoi ni Awieɔ Maŋsɛɛ Wiemɔ yɛ Mli lɛ Amli

Aabɔ mɔdɛŋ koni ashiɛ atsɔɔ mɛi yɛ amɛ diɛŋtsɛ amɛmaŋ wiemɔ mli, ni enɛ miiya nɔ jogbaŋŋ yɛ maji babaoo mli. Bei pii lɛ, mɛi ni etee Sɔɔlɔi Atsɔsemɔ Skul lɛ eko lɛ kaseɔ maji krokomɛi anɔ wiemɔ ni amɛyasɔmɔɔ yɛ shikpɔŋkukuji ni mɛi ni jɛ maji srɔtoi anɔ fa yɛ mli lɛ amli. Ákɛ nɔkwɛmɔnɔ lɛ, aatao shiɛlɔi babaoo ni amɛyashiɛ amɛha Albaniabii, Persiabii, kɛ Russiabii ni yɔɔ Belgium lɛ.

Mɛi ni etee Sɔɔlɔi Atsɔsemɔ Skul lɛ eko lɛ ateŋ mɛi komɛi miisɔmɔ akɛ kpokpaa nɔkwɛlɔi, asafoŋ onukpai, kɛ asafoŋ sɔɔlɔi yɛ asafoi ni awieɔ maŋsɛɛ wiemɔ yɛ mli ni yɔɔ Britain, Germany, Italy, Mexico, kɛ United States lɛ amli, ni amɛhe eba sɛɛnamɔ babaoo kɛha asafoŋbii lɛ. Nitsumɔhe nine ni yɔɔ Korea lɛ bɔ amaniɛ akɛ, “mɛi fe 200 ni etee skul lɛ eko miiye amɛmiibua asafoi kɛ kui ni awieɔ maŋsɛɛ wiemɔi yɛ mli lɛ babaoo.”

Amɛkɛ Heshibaa Tsuɔ Nitsumɔi Krokomɛi

Yɛ kui kɛ asafoi ni awieɔ maŋsɛɛ wiemɔ yɛ mli ni mɛi ni etee Sɔɔlɔi Atsɔsemɔ Skul lɛ eko lɛ yasɔmɔɔ yɛ mli lɛ asɛɛ lɛ, amɛsɔmɔɔ hu akɛ asafoŋ onukpai, asafoŋ sɔɔlɔi, kɛ nɔkwɛlɔi gbɛfalɔi. Ahaa amɛteŋ mɛi komɛi nitsumɔ yɛ maji krokomɛi anɔ. Ákɛ nɔkwɛmɔnɔ lɛ, kɛ́ mɛi ahe miihia waa yɛ Nitsumɔhe ni Kwɛɔ Sɔɔmɔ Nitsumɔ lɛ Nɔ yɛ nitsumɔhe nine lɛ eko lɛ, anyɛɔ ahaa amɛteŋ mɛi komɛi yayeɔ amɛbuaa. Amɛteaŋ mɛi hu ni le tsũmaa he nii lɛ yayeɔ amɛbuaa kɛmamɔɔ Maŋtsɛyeli Asai.

Shweremɔ ni yaa nɔ yɛ asafoi lɛ kɛ kpokpai lɛ anɔ yɛ jeŋ fɛɛ lɛ tsɔɔ akɛ esa akɛ aná mɛi ni baasɔmɔ akɛ nɔkwɛlɔi gbɛfalɔi. Bɔni afee ni atsu enɛ he nii lɛ, ahalaa mɛi ni etee Sɔɔlɔi Atsɔsemɔ Skul lɛ eko lɛ ateŋ mɛi komɛi ni akɛ otsii nyɔŋma tsɔseɔ amɛ yɛ nɔkwɛlɔi gbɛfalɔi anitsumɔ lɛ mli, ni no sɛɛ lɛ ahaa amɛsɔmɔɔ akɛ kpokpaa nɔkwɛlɔi aloo amɛwalɔi. Amrɔ nɛɛ, mɛi ni etee skul lɛ eko lɛ ateŋ mɛi 1,300 miisɔmɔ akɛ nɔkwɛlɔi gbɛfalɔi yɛ maji 97 anɔ. Nɔkwɛlɔi gbɛfalɔi ni yɔɔ Afrika maŋ ko mli lɛ 100 mlijaa 55 ji mɛi ni etee Sɔɔlɔi Atsɔsemɔ Skul lɛ eko. Yɛ Afrika maŋ kroko mli lɛ, nɔkwɛlɔi gbɛfalɔi ni yɔɔ jɛmɛ lɛ 100 mlijaa 70 ji mɛi ni etee skul eko.

Aha mɛi ni etee skul lɛ eko yɛ Asia, Australia, Canada, Europa, kɛ United States lɛ ateŋ mɛi babaoo nitsumɔi pɔtɛɛi komɛi yɛ maji krokomɛi anɔ. Kɛtsɔ nɛkɛ gbɛ nɔ lɛ, mɛi ni yɔɔ je lɛŋ fɛɛ lɛ miiná skul lɛ he sɛɛ.

Yehowa etsɔ e-Bi Yesu Kristo nɔ eha aná sanekpakpashiɛlɔi, nɔkwɛlɔi, tsɔɔlɔi, kɛ mɛi krokomɛi miigbɛ Maŋtsɛyeli lɛ he nibii amɛmiishwã yɛ naagbee gbii nɛɛ amli. Ani abaanyɛ akpa gbɛ akɛ Nyɔŋmɔ webii baaya nɔ ashwere? Hɛɛ! No hewɔ lɛ, ehe miihia waa koni hii ni ejɔɔ amɛhe nɔ lɛ abɔ mɔdɛŋ akɛ amɛbaaya amɛhiɛ ni aha amɛ sɔɔmɔ hegbɛi. (Yesaia 60:22; 1 Timoteo 3:1, 13) Sɔɔlɔi Atsɔsemɔ Skul lɛ yeɔ buaa asafoŋ onukpai kɛ asafoŋ sɔɔlɔi jogbaŋŋ ni amɛnyɛɔ amɛlɛɛɔ amɛsɔɔmɔ nitsumɔ lɛ mli, ni enɛ he baa sɛɛnamɔ kɛhaa amɛ diɛŋtsɛ kɛ mɛi krokomɛi ni ashiɛɔ ahaa amɛ yɛ je lɛŋ fɛɛ lɛ.

[Shishigbɛ niŋmaa]

[Mfonirii ni yɔɔ baafa 10]

Sɔɔlɔi Atsɔsemɔ Skul miiha Maŋtsɛyeli lɛ he nibii lɛ miiya hiɛ yɛ je lɛŋ fɛɛ

[Mfonirii ni yɔɔ baafa 13]

Ani ooshwe akɛ obaaya Sɔɔlɔi Atsɔsemɔ Skul lɛ eko bɔni afee ni oye obua mɛi krokomɛi?