Sɔɔmɔ Tsɔsemɔ Skul—Shinaa Kpeteŋkpele ko ni Gbeleɔ Gbɛ Kɛha Nitsumɔi Pii
1 Yehowa tsɔ gbalɔ Yeremia nɔ egba akɛ: “Maŋɔ tookwɛlɔi mato [miwebii lɛ anɔ] ní amɛlɛ amɛ, ni amɛsheŋ gbeyei, ni amɛtsui hu efaŋ dɔŋŋ, ni amɛteŋ eko eko eshwɛŋ!” (Yer. 23:4) Ŋmɛnɛ, aatsu nɔkwɛmɔ nitsumɔ ni tamɔ nɛkɛ yɛ gbɔmɛi ni jɛ jeŋmaji fɛɛ mli lɛ ateŋ. Asafoŋ onukpai akpei nyɔŋmai abɔ ji mɛi ni tsuɔ nitsumɔ nɛɛ. Kɛfata he lɛ, oblahii asafo ni amɛyi fa tamɔ bɔ́ ejɛ amɛsuɔmɔ mli amɛkɛ amɛhe eha kɛha Yehowa sɔɔmɔ. (Lala 110:3) Mɛɛ jɔɔmɔ po nɛkɛ nyɛmimɛi hii heshibalɔi nɛɛ ji kɛha Nyɔŋmɔ webii asafoi lɛ nɛkɛ! Be mli ni mumɔŋ nikpamɔ nitsumɔ lɛ yaa nɔ lɛ, hii ni he esa ahe miihia lolo koni amɛkɛ amɛhe aha kɛsɔmɔ amɛnyɛmimɛi lɛ.
2 Sɔɔmɔ Tsɔsemɔ Skul lɛ ji gbɛjianɔtoo ko ni hi jogbaŋŋ ni atsɔɔ nɔ atsɔseɔ asafoŋ onukpai kɛ sɔɔlɔi oshijafoi kɛha gbɛnaa nii babaoo ahe nitsumɔ. Kɛjɛ beni aje skul lɛ shishi yɛ afi 1987 kɛbaa nɛɛ, atsɔse nikaselɔi ni fa fe 22,000 ni jɛ maji aaafee 144 yɛ klas srɔtoi 999 amli. Yɛ nyɛmimɛi hii nɛɛ agbɛfaŋ lɛ, skul lɛ ebafee ‘shinaa kpeteŋkpele ko ni gbeleɔ gbɛ kɛha nitsumɔi pii.’—1 Kor. 16:9.
3 Yiŋtoo ni Yɔɔ Skul lɛ Sɛɛ: Yiŋtoo ni yɔɔ Sɔɔmɔ Tsɔsemɔ Skul lɛ sɛɛ ji ni akɛtsɔse hii ni he esa koni akɛsaa amɛ kɛha gbɛnaa nii ahe nitsumɔ yɛ he fɛɛ he ni ekolɛ hiamɔ baaba yɛ, yɛ gbɛjianɔtoo lɛ mli. Skul lɛ haa nyɛmɔi ni amɛyɔɔ ni amɛkɛnyiɛɔ hiɛ yɛ sanekpakpa jajemɔ nitsumɔ lɛ mli, ni amɛkɛnáa gbɛfaŋnɔ yɛ asafoku lɛ kwɛmɔ mli, ni amɛkɛtsɔɔ nii yɛ asafo lɛ mli lɛ yaa hiɛ. Kɛ nikaselɔi lɛ gbe skul lɛ naa lɛ, ahaa amɛteŋ mɛi komɛi nitsumɔ akɛ gbɛgbalɔi krɛdɛɛi loo nɔkwɛlɔi gbɛfalɔi yɛ maji ni amɛjɛ mli lɛ amli loo yɛ maŋsɛɛ. Ahaa mɛi krokomɛi yasɔmɔɔ yɛ asafoi ni amɛjɛ mli lɛ amli loo yɛ nitsumɔhe nine lɛ shikpɔŋkuku lɛ mli hei ni hiamɔ yɔɔ lɛ.
4 Yɛ otsii kpaanyɔ ni akɛkaseɔ nii lɛ mli lɛ, nikaselɔi lɛ kɛ amɛhe woɔ Biblia lɛ kasemɔ mli vii. Amɛsusuɔ Biblia tsɔɔmɔi srɔtoi babaoo kɛ nɔkwɛlɔi agbɛnaanii kɛ agbɛnɛ hu gbɛtsɔɔmɔi ni akɛtsuɔ Kristofoi ashihilɛ mli naagbai ahe nii lɛ ahe jogbaŋŋ. Amɛkaseɔ nɔ ni Ŋmalɛi lɛ tsɔɔ yɛ nibii anɔkwɛmɔ, saneyeli, kɛ saji ni kɔɔ gbɛjianɔtoo lɛ he lɛ hu ahe nii. Amɛnáa tsɔsemɔ krɛdɛɛ yɛ bɔ ni awieɔ yɛ mɛi ahiɛ, ni ayeɔ abuaa amɛ akɛ aŋkroaŋkroi koni amɛya amɛhiɛ yɛ mumɔŋ.
5 Taomɔ Nii: Yɛ anɔkwale mli lɛ, nibii ni ataoɔ yɛ mɔ ko he dani eya skul lɛ anɔ kwɔlɔ. Esa akɛ mɛi ni taoɔ ni amɛya eko lɛ afee mɛi ni esɔmɔ akɛ asafoŋ onukpai loo sɔɔlɔi kɛ hooo kwraa lɛ afii enyɔ kɛtsara nɔ. Esa akɛ amɛ fɛɛ amɛfee oshijafoi ni eye kɛjɛ afii 23 kɛyashi afii 50. Esa akɛ mɛi ni taoɔ ni amɛya lɛ afee mɛi ni baanyɛ akane, amɛŋma, ni amɛwie wiemɔ ni afeɔ skul lɛ yɛ mli lɛ jogbaŋŋ, ni esa akɛ amɛfee mɛi ni yɔɔ gbɔmɔtsoŋ hewalɛ kpakpa, ni kwɛmɔ loo niyenii krɛdɛɛ ko he ehiaaa amɛ. Mɛi ni asumɔɔ fe fɛɛ ji mɛi ni yɔɔ daa gbɛgbamɔ sɔɔmɔ lɛ mli.
6 Esa akɛ mɛi ni kɛ amɛhe haa lɛ afee mɛi ni miisumɔ, ni amɛbaanyɛ amɛyasɔmɔ yɛ he fɛɛ he ni amɛhe baahia yɛ. Enɛ biɔ ni amɛná su ni gbalɔ Yesaia, mɔ ni jɛ esuɔmɔ mli ekɛ ehe ha ni etsu nitsumɔ krɛdɛɛ ko, ni kɛɛ akɛ: “Naa mi, tsũ mi!” lɛ ná lɛ eko. (Yes. 6:8) Yesaia jie heshibaa hu kpo yɛ ewala shihilɛ be fɛɛ mli. Esa akɛ mɛi ni kɛ amɛhe haa koni amɛya Sɔɔmɔ Tsɔsemɔ Skul lɛ aha suɔmɔ kɛha amɛnyɛmimɛi lɛ kɛ shwelɛ ákɛ amɛaasɔmɔ amɛnyɛmimɛi lɛ akanya amɛ moŋ fe nɔ ni amɛaaná shwelɛ kɛha gbɛihemɔ loo hegbɛ krɛdɛɛ ko taomɔ. Beni akɛ tsɔsemɔ ni sa jogbaŋŋ ni tamɔ nɛkɛ lɛ eha nikaselɔi lɛ sɛɛ lɛ, akpaa amɛ gbɛ akɛ amɛkɛ nɔ ni amɛkase lɛ atsu nii koni mɛi krokomɛi aná he sɛɛ.—Luka 12:48.
7 Sɛɛnamɔi: Yɛ tsɔsemɔ ni mli wa ni heɔ otsii kpaanyɔ lɛ mli lɛ, akɛ “hemɔkɛyeli kɛ tsɔɔmɔ kpakpa . . . lɛɔ” mɛi ni egbe tsɔsemɔ lɛ naa lɛ. (1 Tim. 4:6) Enɛ wajeɔ amɛ ni amɛyeɔ amɛbuaa mɛi krokomɛi ni yɔɔ asafoi kɛ kpokpai ni akɛha amɛ ni amɛsɔmɔɔ yɛ mli lɛ ni amɛwoɔ amɛ hewalɛ. Yɛ hei babaoo ni akɛha mɛi ni egbe Sɔɔmɔ Tsɔsemɔ Skul lɛ naa ni amɛsɔmɔ yɛ mli lɛ amli lɛ, shiɛmɔ nitsumɔ lɛ etee hiɛ; awo gbɛgbamɔ nitsumɔ lɛ he hewalɛ, titri lɛ yɛ mɛi ni darako lɛ ateŋ; ni akɛ yelikɛbuamɔ babaoo eha mɛi heei babaoo ni kɛ Nyɔŋmɔ webii bɔɔ lɛ.
8 Ani oji asafoŋ onukpa loo sɔɔlɔ oshijafonyo ni oye kɛjɛ afii 23 kɛyashi afii 50? Mɛni hewɔ osusuuu gbɛ ni ooobi kɛha Sɔɔmɔ Tsɔsemɔ Skul lɛ yaa lɛ he? Ani oji nyɛmi nuu fioo ni oosusu wɔsɛɛ otii ni okɛmamɔ ohiɛ yɛ Yehowa sɔɔmɔ mli lɛ ahe? Mɛni hewɔ ohaaa oshihilɛ afee mlɛo ni otsi ohe kɛjɛ nibii ni gbalaa mɔ jwɛŋmɔ lɛ ahe koni onyɛ obote nɛkɛ ‘shinaa kpeteŋkpele ni gbeleɔ gbɛ kɛha nitsumɔi pii’ nɛɛ mli? Ebaanyɛ eha oná miishɛɛ waa ni otsui anyɔ omli. Yɛ anɔkwale mli lɛ, jeee mɛi ni egbe Sɔɔmɔ Tsɔsemɔ Skul lɛ naa lɛ pɛ ji mɛi ni ená skul lɛ he sɛɛ, shi moŋ Nyɔŋmɔ webii asafoi ni yɔɔ jeŋ fɛɛ lɛ hu ená he sɛɛ.
[Akrabatsa ni yɔɔ baafa 3]
Bɔ ni Amɛná Tsɔsemɔ lɛ He Sɛɛ
“Yɛ anɔkwale mli lɛ, tsɔsemɔ lɛ eha misɔɔmɔ lɛ kɛ nyɛmɔ ni miyɔɔ ni mikɛkwɛɔ tooi lɛ anɔ yɛ nilee mli kɛtsɔ Ŋmalɛi lɛ kɛ nitsumɔ nɔ lɛ etee hiɛ.”
“Skul lɛ eha miná ekãa babaoo yɛ gbɛnaa nii srɔtoi ni mitsuɔ he nii yɛ asafo lɛ mli lɛ ahe nitsumɔ mli.”
“Kɛ hooo lɛ etsake mishihilɛ gbɛ̀i fɛɛ, kɛ bɔ ni minuɔ teokrase kɛ Nyɔŋmɔ gbɛjianɔtoo lɛ he mihaa lɛ hu.”
“Tsɔsemɔ ni miná lɛ ye ebua mi ni mina hiamɔ ni yɔɔ he akɛ mikɛ mihe aaaha koni masɔmɔ yɛ he ni hiamɔ yɔɔ lɛ.”