Amos Ani Eji Mɔ ni Gbulɔɔ Sikamore Tsei Ayibii Ahe Aloo Mɔ ni Buaa Enɔ Yibii Anaa?

YƐ AFI 800 D.Ŋ.B. afii lɛ amli lɛ, Amazia ni yiŋ wa, ni eji tsinabi jamɔ he osɔfo lɛ fã Amos akɛ ekagba yɛ Israel dɔŋŋ. Amos eŋɔɔɔ nɔ ni ewie lɛ nɔ, shi moŋ ekɛɛ akɛ: “Tsinakwɛlɔ ji mi kɛ mɔ ni gbulɔɔ sikamore tsei ayibii ahe. Ni Yehowa yakpala mi kɛjɛ tooi lɛ asɛɛ, ni Yehowa kɛɛ mi akɛ, ‘Yaa ní oyagba otsɔɔ mimaŋ Israel.’” (Amos 7:14, 15, NW) Hɛɛ, Yehowa ji mɔ ni tsu Amos akɛ gbalɔ; jeee lɛ diɛŋtsɛ ewo ehe gbalɔ. Shi beni Amos kɛɛ eji “mɔ ni gbulɔɔ” sikamore tsei ayibii ahe lɛ, mɛni ji nɔ ni etsɔɔ lɛ?

Hebri wiemɔ ni atsɔɔ shishi nɛkɛ lɛ je kpo shikome pɛ yɛ New World Translation lɛ mli yɛ Amos 7:14, 15 lɛ. Yɛ nɔ najiaŋ ni Biblia shishitsɔɔmɔi krokomɛi aaatsɔɔ shishi akɛ “mɔ ni gbulɔɔ” sikamore tsei ayibii “ahe” lɛ, amɛtsɔɔ shishi moŋ akɛ “mɔ ni buaa” sikamore tsei ayibii “anaa,” “mɔ ni duɔ,” loo “mɔ ni sáa he.” Shi kɛlɛ, wolo tɛtrɛɛ ko ni gbɛi ji Economic Botany lɛ kɛɛ akɛ nakai wiemɔ lɛ shishitsɔɔmɔ ni ja ji “mɔ ni gbulɔɔ nii ahe” ejaakɛ wiemɔ nɛɛ tsɔɔ nɔ pɔtɛɛ ni sikamore dulɔ lɛ feɔ.

Sikamore tsei ayibii ahe gbulɔmɔ ji nɔ ko ni afeɔ yɛ Mizraim kɛ Kipro kɛjɛ blema tɔɔ. Ŋmɛnɛ, agbulɔɔɔ sikamore tsei ayibii ahe dɔŋŋ yɛ Israel ejaakɛ adũɔ sikamore tsei ahenɔi krokomɛi yɛ jɛmɛ. Shi kɛlɛ, akɛni aná sikamore tsei ni adũ yɛ Israel yɛ nakai beaŋ lɛ kɛjɛ Mizraim hewɔ lɛ, Israelbii ni hi shi yɛ Amos beaŋ lɛ gbulɔɔ enɔ yibii lɛ ahe.

Ekã shi faŋŋ akɛ, kɛ́ agbulɔ sikamore tsei ayibii lɛ ahe lɛ, ehaa amɛmli nu fáa. Agbɛnɛ hu, nakai feemɔ haa yibii lɛ tsuɔ oya, ni ehaa amɛdaraa agboiagboi ni amɛŋɔɔ waa. Kɛfata he lɛ, akɛni yibii lɛ tsuɔ oyayaayai hewɔ lɛ, asãgbai nyɛɛɛ amɛfite lɛ.

Eyɛ mli akɛ Amos ji tsinakwɛlɔ kɛ mɔ ni gbulɔɔ sikamore tsei ayibii ahe, ni ji nitsumɔi ni abuuu tsɔ moŋ, shi esheee ehenyɛlɔi lɛ gbeyei. Yɛ no najiaŋ lɛ, ekɛ ekãa jaje Yehowa kojomɔ shɛɛ sane lɛ eshi Israel. Ŋmɛnɛ, mɛɛ nɔkwɛmɔnɔ ni sa jogbaŋŋ po enɛ ji kɛha Nyɔŋmɔ tsuji ni esa akɛ amɛhu amɛkɛ ekãa ajaje sane ni mɛi sumɔɔɔ lɛ nɛkɛ!—Mateo 5:11, 12; 10:22.