Kaashashao Shi akɛ Ooofee Biblia Mli Nikasemɔ!
1. Mɛni kɛ́ wɔfee lɛ, ebaatsɔɔ akɛ ‘wɔkamaaa mɔ ko mɔ ko ejurɔfeemɔ’?
1 Kɛ́ wɔkɛ ekãa jaje Nyɔŋmɔ Maŋtsɛyeli lɛ he sanekpakpa lɛ, ‘wɔkamaŋ mɛi ni sa ejurɔfeemɔ’ ni yɔɔ wɔshikpɔŋkuku lɛ mli lɛ. (Abɛi 3:27) Sanekpakpa ko bɛ ni adesai anine baanyɛ ashɛ nɔ fe sane ni kɔɔ shihilɛ kpakpa ni baaba yɛ Nyɔŋmɔ nɔyeli shishi lɛ he. Ekolɛ ojɛɔ otsui mli okɛ ohe woɔ Maŋtsɛyeli lɛ he hiɛnɔkamɔ lɛ jajemɔ mli kɛtsɔ trukaa odaseyeli loo woji ni okɛhaa lɛ nɔ, shi mɛni hewɔ okɛfeee oti ni ma ohiɛ akɛ obaafee Biblia mli nikasemɔ kɛ́ ofeee nakai amrɔ nɛɛ?
2. Mɛni baanyɛ eha wɔshashao shi akɛ wɔbaaje Biblia mli nikasemɔ shishi?
2 Bei komɛi lɛ, bɔ ni wɔnuɔ he wɔhaa lɛ ji nɔ titri ni haaa wɔnyɛ wɔfee Biblia mli nikasemɔ. Mɛi komɛi shashaoɔ shi akɛ amɛaafee Biblia mli nikasemɔ ejaakɛ amɛnuɔ he akɛ amɛnyɛŋ amɛfee loo amɛbɛ dekã kwraa. Ŋaawooi ni nyiɛ sɛɛ nɛɛ baanyɛ aye abua bo koni okashashao shi ákɛ ooofee Biblia mli nikasemɔ.—Mat. 28:19; Bɔf. 20:20.
3. Mɛni hewɔ wɔji mɛi ni sa, ni baanyɛ atsɔɔ mɛi Biblia lɛ mli lɛ?
3 Hekɛnɔfɔɔ ní Abɛ: Ekolɛ yɛ oskulyaa ni faaa aloo yɛ yiŋtoo kroko hewɔ lɛ, obɛ hekɛnɔfɔɔ yɛ omli akɛ obaanyɛ ofee Biblia mli nikasemɔ. Klɛŋklɛŋ afii 100 lɛ mli Kristofoi ni he esa waa yɛ shiɛmɔ nitsumɔ lɛ mli lɛ “jeee woloŋlelɔi kɛ nilelɔi.” Mɛni ye bua amɛ ni amɛnyɛ amɛtsɔɔ mɛi krokomɛi anɔkwale lɛ? “Amɛkɛ Yesu hi shi.” (Bɔf. 4:13) Amɛkase nii kɛjɛ Tsɔɔlɔ Kpele, ni ji Yesu, ni abáa etsɔɔmɔi kɛ enitsɔɔmɔ gbɛ̀i lɛ ayi aha wɔ yɛ Ŋmalɛi lɛ amli lɛ dɛŋ. Kɛ́ oskulyaa faaa po diɛŋtsɛ lɛ, ookase Nyɔŋmɔ he nilee ni fe je lɛŋ nilee krokomɛi fɛɛ lɛ.—Yes. 50:4; 2 Kor. 3:5.
4. Mɛni wɔbaanyɛ wɔkase kɛjɛ Amos nɔkwɛmɔnɔ lɛ mli?
4 Bei komɛi lɛ, Yehowa tsɔ̃ɔ gbalɔi anɔ ekãa nɔyelɔi loo mɛi krokomɛi ni hiɛ hegbɛi ní tɔ̃ɔ emlai anɔ lɛ. Amɛteaŋ mɛi komɛi tamɔ Amos jɛ shihilɛi ni baa shi mli. Amos kɛɛ akɛ: “Jeee gbalɔ ji mi, ni asaŋ hu jeee gbalɔ bi ji mi; shi moŋ tsinakwɛlɔ ji mi kɛ mɔ ni sáa sikamore tsei ahe.” (Amos 7:14) Shi fɛɛ sɛɛ lɛ, Amos shashaooo shi akɛ eeejaje Yehowa fɔbuu kojomɔ eshwie Amazia, ni ji tsinabi jamɔ he osɔfo lɛ nɔ. (Amos 7:16, 17) Esa akɛ wɔkai be fɛɛ be akɛ wɔmiitsu Nyɔŋmɔ nitsumɔ, ni ebaasaa wɔ jogbaŋŋ kɛha nitsumɔ ni ekɛwo wɔdɛŋ lɛ.—2 Tim. 3:17.
5. Mɛni hewɔ esa akɛ wɔbɔ mɔdɛŋ ni wɔje Biblia mli nikasemɔ shishi kɛ́ wɔbɛ dekã kwraa po lɛ?
5 Dekã ní Abɛ: Kɛ́ obɛ dekã po lɛ, ekã shi faŋŋ akɛ oto be ni okɛ ohe woɔ shiɛmɔ nitsumɔ lɛ mli yɛ be kɛ beaŋ momo. Shiɛmɔ nitsumɔ lɛ fã ko ni miishɛɛ yɔɔ mli waa ji ni aaafee Biblia mli nikasemɔ. Eji hegbɛ ni ekaaa akɛ aaana bɔ ni Yehowa Wiemɔ lɛ naa mɔ ko shihilɛ nɔ hewalɛ ehaa. (Heb. 4:12) Kɛ́ wɔkɛ wɔhe shã afɔle kɛye bua mɔ ko ‘kɛshɛ anɔkwale lɛ lee mli’ lɛ, Yehowa náa he miishɛɛ waa. (1 Tim. 2:4) Ŋwɛi bɔfoi lɛ tete po náa miishɛɛ kɛ́ mɔ ko tsake kɛjɛ etsutsu shihilɛ gbɛ nɔ ní etee ehiɛ yɛ Nyɔŋmɔ sɔɔmɔ mli.—Luka 15:10.
6. Mɛɛ hegbɛ wɔná akɛ wɔmiifee Nyɔŋmɔ suɔmɔnaa nii?
6 Nyɔŋmɔ ‘miisumɔ akɛ ehere gbɔmɛi fɛɛ ayiwala, koni amɛshɛ anɔkwale lɛ lee mli.’ (1 Tim. 2:4) Mɛɛ hegbɛ krɛdɛɛ po wɔná nɛkɛ ákɛ wɔbaatsu nii yɛ Nyɔŋmɔ suɔmɔnaa nii kɛ gbeekpamɔ naa, ní wɔkashashao shi akɛ wɔɔfee Biblia mli nikasemɔi!