Ani Oto Be ní Okɛkaseɔ Biblia Lɛ?
NYƐSƐƐ afi lɛ, Nɔyeli Kuu lɛ tswa adafi akɛ afee tsakemɔ yɛ asafoŋ kpee he gbɛjianɔtoo lɛ mli bɔ ni baaha aná be babaoo kɛkase Biblia lɛ ní asusu he akɛ weku. Kɛ́ weku yitso ji bo lɛ, bɔɔ mɔdɛŋ ni okɛ oŋa kɛ obii lɛ akase Biblia lɛ akɛ weku daa. Esa akɛ gbalashihilɛ mli hefatalɔi ni bɛ bii lɛ aŋɔ be nɛɛ kɛkase Biblia lɛ kutuu. Nyɛmimɛi oshijafoi ni weku sɔ̃i jwereee amɛ nɔ lɛ baanyɛ aŋɔ be nɛɛ kɛfee aŋkro Biblia mli nikasemɔ.
Mɛi babaoo ahiɛ esɔ gbɛjianɔ ni ato kɛha gbɛkɛ Weku Jamɔ lɛ. Ákɛ nɔkwɛmɔnɔ lɛ, asafoŋ onukpa ko ni atsɛɔ lɛ Kevin lɛ ŋma akɛ: “Wɔhiɛ esɔ gbɛjianɔtoo nɛɛ naakpa diɛŋtsɛ yɛ asafo lɛ mli. Ákɛ asafoŋ onukpai lɛ, wɔsusu bɔ ni wɔkɛ be ni wɔná wɔfata he amrɔ nɛɛ tsuɔ nii wɔhaa kɛfeɔ weku nikasemɔ ni Nɔyeli Kuu lɛ kɛɛ afee lɛ he.”
Asafoŋ onukpa ko ŋa ní atsɛɔ lɛ Jodi lɛ ŋma akɛ: “Wɔyɛ bi yei etɛ, mɔ kome eye afii 15, mɔ kome hu eye afii 11, ni naagbee mɔ lɛ eye afii 2. Nyɛsɛɛ nɛɛ wɔshi kɛtee mumuii awiemɔ asafo ko mli. Eheɔ be kɛ mɔdɛŋbɔɔ babaoo dani wɔnyɛɔ wɔsaa wɔhe kɛhaa asafoŋ kpeei srɔtoi lɛ fɛɛ. Amrɔ nɛɛ, tsakemɔ ni afee lɛ haa wɔnáa gbɛkɛ kroko kɛjáa Nyɔŋmɔ ákɛ weku!”
John kɛ eŋa JoAnn ni miisɔmɔ akɛ daa gbɛgbalɔi lɛ ŋma akɛ: “Kulɛ wɔfolɔɔ wɔweku Biblia mli nikasemɔ lɛ mli ejaakɛ wɔtooo be pɔtɛɛ kɛfeee yɛ asafoŋ nifeemɔi krokomɛi ahewɔ. Gbɛjianɔtoo hee nɛɛ ji nikeenii ni jɛ Yehowa ŋɔɔ, ni kɛ́ wɔkɛ nakai be lɛ tsu nii jogbaŋŋ taakɛ akpaa gbɛ lɛ, no lɛ ebaaha wɔkɛ Yehowa teŋ wekukpaa lɛ mli awa, ni wɔtsui baanyɔ wɔmli.”
Nyɛmi nuu oshijafo ko ni atsɛɔ lɛ Tony ni eye aaafee afii 25 lɛ feɔ aŋkro nikasemɔ daa Jufɔ gbɛkɛ. Ekɛ gbii krokomɛi ni eshwɛ yɛ otsi lɛ mli lɛ saa ehe kɛha asafoŋ kpeei. Shi Tony kɛɛ akɛ: “Daa nɛɛ lɛ, miná ni Jufɔ eshɛ.” Mɛni hewɔ? Tony tsɔɔ mli akɛ: “Eji be krɛdɛɛ ní mináa mihaa Yehowa. Mikɛ aaafee ŋmɛlɛtswai enyɔ kaseɔ nibii ní wajeɔ mi kɛ Yehowa teŋ naanyobɔɔ lɛ. Akɛni mináa be babaoo kɛkaseɔ nii hewɔ lɛ, minyɛɔ mijwɛŋɔ Biblia mli ŋmalɛi ni mikaneɔ lɛ anɔ.” Mɛni ejɛ mli kɛba? Ekɛɛ akɛ: “Yehowa ŋaawoo lɛ miibote mitsui mli tɔ̃ɔ fe tsutsu lɛ.” Mɛɛ nɔkwɛmɔnɔ eha ni tsɔɔ nakai? Ekɛɛ akɛ: “Mikane David kɛ Yonatan teŋ naanyobɔɔ lɛ he sane yɛ Insight wolo lɛ mli. Mikase nibii babaoo yɛ bɔ ni Yonatan fóɔ mɛi krokomɛi anɔ̃ mli lɛ he. Enɔkwɛmɔnɔ lɛ ye ebua mi ni minu mɔ ni ji naanyo diɛŋtsɛ lɛ shishi jogbaŋŋ. Yɛ anɔkwale mli lɛ, daa nɛɛ lɛ, miná ni Jufɔ gbɛkɛ eshɛ koni maná agugui babaoo ni tamɔ nɛkɛ!”
Ekã shi faŋŋ akɛ, kɛ́ Yehowa sɔɔlɔi fɛɛ kɛ be ni wɔná wɔfata he amrɔ nɛɛ tsu nii jogbaŋŋ kɛfee Biblia mli nikasemɔ kɛ weku jamɔ lɛ, amɛbaaná he sɛɛ waa.