Namɔ Esa akɛ Etsɔɔ Gbekɛbii Nyɔŋmɔ He Nii?

“Kaselɔ efeee etsɔɔlɔ; shi mɔ fɛɛ mɔ ni atsɔse lɛ kɛwula shi lɛ, eeetamɔ etsɔɔlɔ.”—LUKA 6:40, Ga Biblia hee.

FƆLƆI komɛi nuɔ he akɛ amɛhe esako bɔ ni amɛaatsɔɔ amɛbii lɛ Nyɔŋmɔ he nii. Amɛsusuɔ akɛ amɛwoloŋlee faaa loo amɛleee Nyɔŋmɔjamɔ he nii bɔ ni fa ni amɛaatsɔɔ amɛbii lɛ jogbaŋŋ. Enɛ hewɔ lɛ, ekolɛ amɛbaashi nitsumɔ ni he hiaa waa nɛɛ amɛha amɛwekunyo loo jamɔŋ hiɛnyiɛlɔ ko.

Shi namɔ sa jogbaŋŋ akɛ etsɔɔ gbekɛbii jeŋba he mlai kɛ Nyɔŋmɔjamɔ he anɔkwalei lɛ? Susumɔ nɔ ni Biblia lɛ kɛɔ yɛ sane nɛɛ he, ni okɛto nɔ ni niiamlitaolɔi eyɔse lɛ he okwɛ.

Mɛni Ji Tsɛ Gbɛnaa?

Nɔ ni Biblia lɛ tsɔɔ: “Nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ Nuŋtsɔ lɛ tsɔsemɔ kɛ ŋaawoo lɛ mli.”—Efesobii 6:4.

Nɔ ni niiamlitaolɔi eyɔse: Mɛɛ sɛɛ tsɛmɛi náa kɛ́ amɛyiŋ tsɔ yɛ Nyɔŋmɔjamɔ he saji amli? Sane ni ji Fathers’ Religious Involvement and Early Childhood Behavior (Bɔ ni Tsɛmɛi a-Nyɔŋmɔjamɔ Náa Amɛbii Bibii lɛ Anɔ Hewalɛ) ni akala yɛ afi 2009 lɛ kɛɛ akɛ: “Kɛ́ tsɛmɛi kɛ Nyɔŋmɔjamɔ kuu ko bɔ lɛ, ebaanyɛ eha amɛtsɔmɔ tsɛmɛi kpakpai. Nyɔŋmɔjamɔ buɔ aŋkroaŋkroi ahe yɛ amɛkɛ mɛi krokomɛi asharamɔ mli, ni ekɛ gbɛtsɔɔmɔi ni kɔɔ bɔ ni sa akɛ mɔ aba ejeŋ eha lɛ haa.”

Biblia lɛ maa nɔ mi akɛ ehe miihia waa ni tsɛmɛi akwɛ amɛbii ni amɛtsɔse amɛ. (Abɛi 4:1; Kolosebii 3:21; Hebribii 12:9) Shi ani nakai ŋaawoo lɛ he yɛ sɛɛnamɔ ŋmɛnɛ? Yɛ afi 2009 lɛ, University of Florida kala sane ko ni kɔɔ hewalɛ ni tsɛmɛi náa yɛ amɛbii anɔ lɛ he. Niiamlitaolɔi lɛ yɔse akɛ efɔɔ kaa akɛ gbekɛbii ni amɛtsɛmɛi bɔɔ mɔdɛŋ waa kɛkwɛɔ amɛ lɛ amli tsɔɔ amɛ waa ni amɛnuɔ he akɛ amɛhe yɛ sɛɛnamɔ. Amɛbihii lɛ baa amɛjeŋ jogbaŋŋ, ni amɛbiyei lɛ leɔ nii waa. Eyɛ faŋŋ akɛ, ŋaawoo ni Biblia lɛ kɛhaa lɛ he yɛ sɛɛnamɔ lolo.

Mɛɛ Sɛɛnamɔ Yɔɔ Nɔ ni Nyɛ lɛ Tsuɔ lɛ He?

Nɔ ni Biblia lɛ tsɔɔ: “Kaashɛ onyɛ mla lɛ ofɔ!”—Abɛi 1:8.

Nɔ ni niiamlitaolɔi eyɔse: Yɛ afi 2006 lɛ, wolo ko (Handbook of Child Psychology) tsɔɔ mli akɛ: “Kɛ́ hooo lɛ, be ni nyɛmɛi yeɔ ni amɛkɛ amɛbii gbaa sane aŋkroaŋkro lɛ fa fe tsɛmɛi lɛ anɔ̃ lɛ 100 mlijaa 65 kɛmiimɔ 80, ni nakai eji yɛ maji babaoo anɔ.” Akɛni nyɛmɛi náa be babaoo ni tamɔ nɛkɛ amɛhaa amɛbii hewɔ lɛ, amɛwiemɔi, amɛnifeemɔi, kɛ amɛjeŋba náa amɛbii lɛ anɔ hewalɛ waa.

Kɛ́ nyɛ kɛ tsɛ fee ekome kɛtsɔɔ amɛbii Nyɔŋmɔ he anɔkwale lɛ, kɛ́ hooo lɛ amɛkɛ nibii enyɔ komɛi ni he hiaa waa duroɔ amɛ. Klɛŋklɛŋ lɛ, gbekɛbii lɛ náa hegbɛ amɛkɛ amɛ-Tsɛ ni yɔɔ ŋwɛi lɛ bɔɔ naanyo, naanyobɔɔ ni amɛbaaná he sɛɛ amɛwala beaŋ fɛɛ. Nɔ ni ji enyɔ lɛ, gbekɛbii lɛ kaseɔ bɔ ni esa akɛ wu kɛ ŋa afee ekome kɛshɛ otii ni he hiaa ni amɛkɛmamɔ amɛhiɛ lɛ ahe. (Kolosebii 3:18-20) Eyɛ mli akɛ mɛi krokomɛi baanyɛ aye abua tsɛ lɛ kɛ nyɛ lɛ moŋ, shi eji fɔlɔi lɛ asɔ̃ akɛ amɛtsɔɔ amɛbii lɛ Nyɔŋmɔ he nii kɛ bɔ ni Nyɔŋmɔ taoɔ ni weku mli bii lɛ ahi shi aha.

Kɛlɛ, te esa akɛ fɔlɔi atsɔɔ amɛbii anii amɛha tɛŋŋ? Mɛɛ gbɛi ni sa jogbaŋŋ amɛbaanyɛ amɛkɛtsu nii?