Tsi Obɛŋkɛ Nyɔŋmɔ

Kɛ́ Nyɔŋmɔ kɛ Eshai Ke lɛ, Ani Ehiɛ Kpaa Nɔ?

SANE nɛɛ hetoo kukufoo ji, hɛɛ. Yehowa woɔ mɛi ni etsui kã amɛnɔ lɛ ashi akɛ: “Maŋɔ amɛnishaianii lɛ mafa, ni amɛhe eshai lɛ mikaiŋ dɔŋŋ!” (Yeremia 31:34) No hewɔ lɛ, Yehowa haa wɔnáa nɔmimaa akɛ kɛ́ ekɛ eshafeelɔi ni etsake amɛtsui lɛ ahe eshai fa amɛ lɛ, ekaiii amɛhe eshai lɛ dɔŋŋ. Shi, ani no tsɔɔ akɛ Jeŋ muu fɛɛ Bɔlɔ lɛ nyɛŋ akai eshai ni ekɛfa lɛ? Ezekiel wiemɔi lɛ haa wɔnaa bɔ ni Nyɔŋmɔ kɛ eshai faa ni ekaiii dɔŋŋ lɛ.—Kanemɔ Ezekiel 18:19-22.

Yehowa kɛ gbalɔ Ezekiel tsu nii akɛ enaawielɔ ni ekɛ jaje fɔbuu kojomɔ eshi Yuda kɛ Yerusalem ni yeee lɛ anɔkwa lɛ. No mli lɛ, maŋ muu lɛ fɛɛ ekwa Yehowa jamɔ, ni amɛha maŋ lɛŋ eyi tɔ kɛ yiwalɛ nifeemɔ. Yehowa gba akɛ Babilonbii lɛ baakpãta Yerusalem hiɛ. Shi, Yehowa kɛ hiɛnɔkamɔ saji ha amɛ be mli ni egbaa hiɛkpatamɔ ni baa lɛ. Amɛteŋ mɔ fɛɛ mɔ yɛ hegbɛ akɛ ehalaa nɔ ni esumɔɔ; mɔ fɛɛ mɔ baatere esɔ̃.—Kuku 19, 20.

Ni kɛ́ mɔ ko kpale kɛjɛ nɔfɔŋfeemɔ he, ni efee nɔ ni ja hu? Yehowa kɛɛ: “Kɛji mɔ fɔŋ lɛ kpale kɛjɛ ehe eshai ní efee lɛ fɛɛ mli, ni eye mikpɔi lɛ fɛɛ nɔ, ni eye jalɛ sane, ni efee nɔ ni ja lɛ, eyi aaaná wala kɛ̃, egboŋ!” (Kuku 21) Hɛɛ, Yehowa efee klalo akɛ ebaaŋɔ efɔŋfeelɔ ni ekpale kɛjɛ ehe eshai lɛ ahe lɛ he efa lɛ.—Lala 86:5.

Ni eshai ni efee lɛ hu? Yehowa tsɔɔ mli akɛ: “Enɔtɔmɔi ní etɔ̃ lɛ akaiŋ eko eko ahaŋ lɛ dɔŋŋ.” (Kuku 22) Kadimɔ akɛ “akaiŋ” efɔŋfeelɔ ni etsake etsui lɛ he eshai lɛ “ahaŋ lɛ dɔŋŋ.” Mɛni hewɔ enɛ sa kadimɔ waa lɛ?

Hebri wiemɔ ni atsɔɔ shishi akɛ “kai” yɛ Biblia lɛ mli lɛ shishinumɔ yaa shɔŋŋ fe ni aaakai nɔ ni eho lɛ kɛkɛ. Wolo ko wie akɛ: “Anɔkwa, bei pii lɛ, wiemɔ nɛɛ tsɔɔ nifeemɔ ko, loo akɛfataa feemɔwiemɔ kɛ nifeemɔ he.” No hewɔ lɛ, “ní aaakai” lɛ baanyɛ atsɔɔ akɛ “afee nɔ ko.” Belɛ, beni Yehowa kɛɛ yɛ efɔŋfeelɔ ni etsake etsui lɛ he akɛ, ‘akaiŋ ehe eshai lɛ ahaŋ lɛ dɔŋŋ lɛ,’ no mli lɛ Yehowa miitsɔɔ akɛ kɛ́ ekɛ eshai fa sɛɛ lɛ, efeŋ mɔ lɛ nɔ ko yɛ nakai tɔmɔ lɛ hewɔ, tamɔ ní eeeshwa mɔ lɛ loo eeegbala etoi nɛkɛ.a

Sane ni yɔɔ Ezekiel 18:21, 22 lɛ haa wɔnaa akɛ Yehowa kɛ eshai faa kwraa, ni enɛ taa wɔtsuiŋ waa diɛŋtsɛ. Kɛ́ Yehowa kɛ wɔhe eshai fa wɔ lɛ, edamɔŋ nakai eshai lɛ anɔ ekɛ wɔ aye wɔsɛɛ. No najiaŋ lɛ, eshɛrɛɔ eshafeelɔi ni etsake amɛtsui lɛ ahe eshai lɛ eshwieɔ esɛɛ. (Yesaia 38:17) No bafeɔ tamɔ egbe loo etsumɔ nakai eshai lɛ kwraa.—Bɔfoi lɛ Asaji 3:19.

Ákɛ adesai ni yeee emuu lɛ, Nyɔŋmɔ mɔbɔnalɛ lɛ he miihia wɔ. Nɔ hewɔ ji akɛ wɔtɔ̃ɔ babaoo. (Romabii 3:23) Shi, Yehowa miisumɔ ni wɔle akɛ kɛ́ wɔtsake wɔtsui lɛɛlɛŋ lɛ, efee klalo akɛ ekɛ wɔhe baafa wɔ. Kɛ́ ekɛfa lɛ, ekaiii dɔŋŋ—no tsɔɔ akɛ etsɛŋ wɔhe eshai lɛ ayisɛɛ ni edamɔ nɔ eshwa wɔ loo egbala wɔtoi. Mɛɛ sane ni haa mɔ tsui nyɔɔ emli waa po nɛ! Ani Nyɔŋmɔ mɔbɔnalɛ lɛ tsirɛɔ bo koni otsi obɛŋkɛ lɛ kpaakpa?—w12-E 7/1.

[Shishigbɛ niŋmaa]